Bíblia nia hanorin

Laʼen mak família nia ulun, neʼe katak sá?

IHA rai barak kuandu halaʼo kazamentu, noiva sei jura katak nia sei hakruʼuk no halo tuir ninia laʼen. Maski nuneʼe, feto barak la gosta laʼen mak sai família nia ulun iha moris kaben nian. Hanoin toʼok buat neʼebé Bíblia hanorin kona-ba neʼe. Ita sei haree katak Bíblia nia hanorin mak lójiku no diʼak atu aplika.

Maromak fó knaar saida ba laʼen?

Bíblia esplika kona-ba arranju ulun nian iha Éfeso 5:22-24, hodi dehan: “Feen sira tenke hakruʼuk ba sira-nia laʼen hanesan hakruʼuk ba Naʼi, tanba laʼen mak ulun ba ninia feen hanesan Kristu mak ulun ba kongregasaun . . . Tuir loloos, hanesan kongregasaun hakruʼuk ba Kristu, feen sira mós tenke hakruʼuk ba sira-nia laʼen iha buat hotu.” Laʼen mak “ulun ba ninia feen” no iha responsabilidade atu dirije família, no feen presiza hatudu respeitu ba laʼen hodi apoia laʼen nia desizaun.​—Éfeso 5:33.

Laʼen nia kbiit iha limite tanba nia tenke hakruʼuk ba Maromak no Kristu. Nia la iha direitu atu haruka ninia feen hodi kontra Maromak nia ukun-fuan sira ka halo buat neʼebé kontra feen nia konxiénsia neʼebé hetan treinu husi Bíblia. Maski nuneʼe, Maromak fó responsabilidade ba laʼen atu halo desizaun importante ba ninia família hodi la liu limitasaun neʼebé Maromak fó ba nia.​—Roma 7:2; 1 Korinto 11:3.

Bíblia haruka laʼen atu halaʼo ninia knaar nuʼudar ulun hodi tau uluk ninia feen nia diʼak duké nia rasik nian. Éfeso 5:25 dehan: “Laʼen sira, kontinua hadomi imi-nia feen, hanesan Kristu mós hadomi kongregasaun no fó ninia moris ba kongregasaun.” Laʼen neʼebé halo tuir Kristu nia ezemplu sei la uza sala ninia kbiit hodi buka diʼak deʼit ba ninia an rasik.

Bíblia mós haruka laʼen sira atu moris hamutuk ho sira-nia feen “hodi komprende sira”. (1 Pedro 3:7) Neʼe laʼós deʼit hatene katak mane no feto la hanesan iha dalan fíziku no emosaun. Laʼen tenke komprende didiʼak ninia feen nia presiza.

‘Nia mak ó-nia pár’

Feen nia knaar mak atu halo tuir deʼit ninia laʼen ka lae? Hanoin toʼok kona-ba Sara, neʼebé Bíblia temi nuʼudar ezemplu furak kona-ba halo tuir ninia laʼen Abraão. (1 Pedro 3:5, 6) Sara hakruʼuk ba Abraão iha situasaun oioin iha sira-nia moris. Porezemplu Sara apoia Abraão nia desizaun atu husik sira-nia hela-fatin neʼebé diʼak no moris nuʼudar ema laʼo-rai. Nia mós apoia Abraão kona-ba buat neʼebé kiʼik, porezemplu prepara ai-han ba bainaka sira neʼebé mai derrepente. (Génesis 12:5-9; 18:6) Maibé bainhira mosu problema neʼebé sériu, Sara fó sai ninia hanoin no sentimentu maski nia hatene katak Abraão nia hanoin la hanesan. Neʼe akontese bainhira Sara hakarak Abraão atu haruka Agar no ninia oan-mane primeiru Ismael sai. Iha tempu neʼebá, Maromak la korrije Sara maibé haruka Abraão atu “rona” ba ninia feen. Durante tempu neʼe, Sara kontinua hakruʼuk ba Abraão no hein ba Abraão atu foti desizaun duké koko atu duni sai Agar no Ismael.​—Génesis 21:8-14.

Sara nia ezemplu hatudu katak feen laʼós laʼen nia atan, maibé laʼen nia “pár”, ka parseira, neʼe mak knaar neʼebé lori dignidade ba feto sira. (Malaquias 2:14) Nuʼudar laʼen nia pár, feen sei fó sai ninia hanoin kona-ba desizaun neʼebé afeta família, no dala barak feen mak toma konta ba buat oioin iha uma laran, inklui mós tau matan ba família nia osan. Klaru, nuʼudar família nia ulun, laʼen iha responsabilidade atu halo desizaun ikus.​—Provérbios 31:10-31; 1 Timóteo 5:14.

Respeitu Kriadór ba arranju kaben nian

Maromak Jeová kria mane no feto, no nia halo arranju kaben nian nuʼudar relasaun neʼebé sagradu. (Génesis 2:18-24) Maromak mós fó knaar espesífiku ba laʼen no feen, hodi nuneʼe sira bele moris haksolok.​—Deuteronómio 24:5; Provérbios 5:18.

Tanba Maromak Jeová mak hahú arranju kaben nian, nia iha direitu no kbiit atu fó sai matadalan ba kaben-naʼin sira. Feen-laʼen neʼebé kumpre didiʼak sira ida-idak nia knaar no halo tuir arranju ulun nian tanba respeitu Maromak, sira sei halo Maromak kontente no sei simu Ninia bensaun.

ITA HANOIN ONA KA LAE?

◼ Sé mak hatudu ezemplu perfeitu kona-ba halaʼo ninia knaar nuʼudar ulun?​—Éfeso 5:25.

◼ Maromak tau limite ba laʼen nia kbiit ka lae?​—1 Korinto 11:3.

◼ Saida mak objetivu ba moris kaben no arranju ulun nian?​—Provérbios 5:18.

[Dezeñu]

Kuandu laʼen halaʼo ninia knaar nuʼudar ulun hodi tuir Kristu nia ezemplu, neʼe sei lori haksolok ba sira-nia moris kaben