Mitantara i Mpitory i Fanjakagney

Nahafantatse ty Raha Kendré o Fiaignagneo Reke

NIREHAKE ty Jesosy fa nahafantatse o agnondri’eo reke. (Jaona 10:14) Naho managne fo soa ty ndaty raike sady tea ty fiadanagne naho ty hamarenagne, le hanjare ho mpanonjohy ty lia i Jesosy. Hahafantatse ty raha kendré o fiaignagneo ty ndaty hoe izay, manahake i ampela raike ta Belzike tagne toy. Izao ty tantara’e:

“Tamy i Vavolombelo i Jehovah nampikonkogne tan-tragnoko teoy, le tena nikivy raho sady fa ho namono tegna. Teako ty raha nirehafe i Vavolombelogne rey miomba ty hagnafahagne ty olagne amy ty tontolo marare toy eto. Faie tsy teako i hevetse tihoey tie agnisa ty hanao ze raha zay ty Andrianagnahare. Tsy niangogne sasa raho valo taogne taloha izay noho ty falaignako ty soa miatreke atao ty ndaty nitreako tagne. Faie tamy i Vavolombelogne rey, le nifantako tamy ty raha nirehafe iareo ty hamarenagne sady nanjare tsapako fa sarotse ty miaigne tsy misy an’Andrianagnahare.

“Nampalahelo fa nanjare tsy afake nifandrambe tamy i Vavolombelogne rey raho tafara ty nitiliha iareo ahy. Tena nijale raho. Nifoke sigara 2 pake raho sady nifoke rongony iaby. Nifandrambe tamo o demoniao raho satria te hifandrambe amy i dadabeiko fa nimatey. Tamy ze halegne raike zay, le tena natahotse raho satria nitsoboré o demoniao raho voka ze raha zay. Naharetse am-bola’e maro zay. Natahotse raho isake hariva satria nitoboke raike.

“Nandeha nitsangatsangagne tamy ty lalagne tsy le nifandenako zay raho tie indraike zay, le nahatrea fagnoregnagne tragno bey raike. Gaga raho nahatrea vahoake maro teo. Naho fa nagnarine teo raho, le nahatrea fa kay Vavolombelo i Jehovah magnoregne Anjomba Fanjakagne raike iareò. Nitsiaroko i fitiliha i Vavolombelogne rey ahy tan-tragnoko agney, sady nieretseretse raho tie, hahafinaritse vata’e naho manahake o ndaty rehoe o ndatio iaby.

“Nagniry mafe ty hiheregna i Vavolombelogne rey an-tragnoko agne indraike raho, le nirehake tamy ty ila’e tamy ze niasa tamy i anjombay teo. Nivavake taman’Andrianagnahare raho. Folo andro tafara tatoy, le niavy tandalan-tragnoko eo i lahilahy nifandrambe tamako voaloha’ey. Nandrisike ahy hanohy i fianaragne Baibolỳ reke, le tena nifale raho sady nagneke. Le avy le nandrisike ahy hagnatreke fivoriagne amy i Anjomba Fanjakagney agne reke. Mbe tsy nahatrea raha hoe izay indraike raho! Fa ela ty nipaliavako ndaty mifankatea naho sambatse. Ela ty ela ta nitreako intoagne iareo!

“Tafara izay le nagnatreke ty fivoriagne iaby raho. Vola’e raike latsake teo ho eo, le najanoko i fahazaran-dratiko nifokey. Nariako iaby i boke miomba ty firehafagne ty hoavy, naho i cd nisy mozike mifandrambe amy ty demonia nanagnako rey. Tsapako fa tsy nitsobore ahy sasa i demonia rey. Nampifagnarake ty fiaignako amy ty fitsipy i Jehovah amy Baiboly ao raho. Nanomboke nitory i talily soay raho afake telo volagne. Natao badisa raho afake enem-bolagne. Nanomboke nanao ty asa ty mpisava lalagne mpagnampe raho roe andro tafara ty badisako.

“Misaotse i Jehovah raho amy ze kila raha soa natao’e tamako. Ela ty ela fa ta nisy raha kendré’e avao ty fiaignako. Fiarovagne mafe vata’e ty tahina i Jehovah le nataoko fitsolohagne naho fietahagne. (Ohabolana 18:10) Tena mitovy amy ty raha nitsapa i mpanao salamoy ty raha tsapako, naho fa nanoratse hoe izao reke amy Salamo 84:10 ao tie: “Fa ty andro raike an-tokotane’o eo le soa noho ty andro arivo an-toeran-kafa agne. Aleoko mitsangagne amy ty lala i anjomban’Andrianagnaharekoy eo, toe izay hipetrake amy ty tragnolay o raty fagnahio.”

Nahatrea ty raha kendré o fiaignagneo o ampela nanagne fo feno fahalemem-pagnahy iohoe. Afake manao hoe izay ka ndra ia ndra ia mipay i Jehovah amy ty fo soa.