1, 2. (a) Ko e hā naʻe lava ke fai ʻe he kau taki lotú ki he ngāue fakamalangá, ka naʻe anga-fēfē fakafeangai ʻa e kau ʻapositolo? (e) Ko e hā naʻe fakafisi ai ʻa e kau ʻapositoló ke talangofua ki hono tapui ʻo e malangá?

KO E taimi nounou pē eni hili ʻa e Penitekosi 33 T.S. Ko e fakatahaʻanga Kalisitiane ʻi Selusalema naʻe toki fokotuʻu pē ʻi ha ngaahi uike siʻi. ʻOku hā mahino, ʻoku vakai ki heni ʻa Sētane ko e taimi totonu ia ke ne fai ha meʻa. Ki muʻa ke hoko ʻa e fakatahaʻangá ʻo mālohí, ʻokú ne loto ke ne fakangata ia. ʻOku ueʻi leva ʻe Sētane ʻa e kau taki lotú ke nau tapui ʻa e ngāue malangaʻi ʻo e Puleʻangá. Kae kehe, ko e kau ʻapositoló ʻoku hokohoko atu ʻenau malanga loto-toʻá, pea ko e kau tangata mo e kau fefine tokolahi ʻoku nau hoko ko e “kau tui ki he ʻEikí.”​—Ngā. 4:​18, 33; 5:​14.

² ʻI he ʻita tōlili ʻa e kau fakafepakí, ʻoku nau toe ʻohofi ʻa e kau ʻapositoló ʻo tuku pōpula kotoa kinautolu. Neongo ia, lolotonga ʻa e poʻulí, ʻoku fakaava ʻe he ʻāngelo ʻa Sihová ʻa e matapā ʻo e pilīsoné, pea ʻi he mafoa ʻa e atá ʻoku toe hoko atu ʻa e malanga ʻa e kau ʻapositoló! Naʻe toe puke kinautolu pea ʻave ki he ʻao ʻo e kau pulé, ʻoku nau tukuakiʻi ʻa e kau ʻapositoló ki hono maumauʻi ʻa e tuʻutuʻuni fekauʻaki mo e ngāue fakamalangá. ʻI he tali ki aí, naʻe fakahaaʻi loto-toʻa ʻe he kau ʻapositoló: “Kuo pau ke mau talangofua ki he ʻOtuá ko e pulé ia kae ʻikai ki he tangatá.” ʻOku teketekelili ʻa e kau pulé ʻo nau loto ke “tāmateʻi” ʻa e kau ʻapositoló. Ka ʻi he mōmeniti mātuʻaki mahuʻinga ko ení, ʻoku lea hake ʻa e faiako Lao tokaʻi ko Kāmelielí, ʻo fakatokanga ki he kau pulé: “Mou tokanga . . . ʻoua te mou kaunoa ʻi he kau tangatá ni, kae tukunoaʻi kinautolu.” Ko e meʻa fakaʻohovalé, ʻoku tali ʻe he kau pulé ʻene faleʻí pea nau tuku ange ʻa e kau ʻapositoló. Ko e hā ʻoku fai ʻe he kau tangata faitōnunga ko iá? ʻI he ʻikai manavaheé, ʻoku nau hokohoko atu “ʻo ʻikai tuku ʻa e faiako mo hono talaki ʻa e ongoongo lelei fekauʻaki mo e Kalaisí, ʻa Sīsū.”​—Ngā. 5:​17-​21, 27-​42; Pal. 21:​1, 30.

3, 4. (a) Ko e hā ʻa e founga kuo talu hono ngāueʻaki mai ʻe Sētane ke ʻohofi ʻa e kakai ʻa e ʻOtuá? (e) Ko e hā te tau lāulea ki ai ʻi he vahe ko ení mo e vahe ʻe ua hono hokó?

³ Ko e hopo ko ia ʻi he fakamaauʻangá ʻi he 33 T.S. ko e fuofua fakafepaki fakalao ia ki he fakatahaʻanga Kalisitiané, ka naʻe ʻikai ko e fakaʻosí pē ia. (Ngā. 4:​5-8; 16:20; 17:​6, 7) ʻI hotau taimí, ʻoku kei ueʻi pē ʻe Sētane ʻa e kau fakafepaki ki he lotu moʻoní ke nau fakaʻaiʻai ʻa e kau maʻu mafaí ke nau tapui ʻetau ngāue fakamalangá. Ko e kau fakafepakí kuo nau fai ʻa e ngaahi tukuakiʻi kehekehe ʻo e kakai ʻa e ʻOtuá. ʻOku nau pehē ʻoku tau fakamaveuveu ʻi he komiunitií. ʻOku nau toe pehē ʻoku tau angatuʻu; pea pehē ko ha kau fefakatauʻaki fakakomēsiale kitautolu. ʻI he taimi feʻungamālié, kuo ʻalu ki he fakamaauʻangá hotau fanga tokouá ke fakamoʻoniʻi ʻoku loi ʻa e ngaahi tukuakiʻi ko iá. Ko e hā ʻa e ola ʻo e ngaahi hopo ko ení? ʻOku anga-fēfē kaunga kiate koe ʻa e tuʻutuʻuni ʻi he ngaahi hopo ʻi he laui hongofuluʻi taʻu kuo maliu atú? Tau sivisiviʻi angé ha ngaahi keisi ʻe niʻihi ke sio ki he founga kuo nau tokoni ai “ʻi hono taukapoʻi mo fokotuʻu fakalao ʻa e ongoongo leleí.”​—Fil. 1:7.

⁴ ʻI he vahe ko ení te tau tokangataha ai ki he founga kuo tau taukapoʻi ai ʻetau totonu ke maʻu ʻa e tauʻatāina ke malangá. Ko e vahe ʻe ua hono hokó te na sivisiviʻi ʻa e niʻihi ʻo e ngaahi hopo naʻa tau faitau mo ia ʻi heʻetau fāinga ke ʻoua te tau hoko ko ha konga ʻo e māmaní pea moʻuiʻaki ʻa e ngaahi tuʻunga ʻo e Puleʻangá.

5. ʻI he konga ki mui ʻo e 1930 tupú, ko e hā naʻe puke ai ʻa e kau malanga ʻo e Puleʻangá, pea ko e hā ʻa e meʻa naʻe fakakaukau ʻa e niʻihi naʻa nau takimuʻá ke faí?

⁵ ʻI he konga ki mui ʻo e taʻu 1930 tupú, ko e ngaahi kolo mo e siteiti ʻi ʻAmelika naʻa nau feinga ke fakamālohiʻi ʻa e Kau Fakamoʻoni ʻa Sihová ke maʻu ʻa e ngofua pe laiseni fakalao kae lava ke nau kau ki heʻenau ngāue fakafaifekaú. Ka naʻe ʻikai ke kole ʻe hotau fanga tokouá ha laiseni. Ko ha laiseni ʻe lava ke fakataʻeʻaongaʻi, pea naʻa nau tui ʻoku ʻikai ha founga-pule ʻokú ne maʻu ha mafai ke kaunoa ʻi he fekau ʻa Sīsū ki he kau Kalisitiané ke malangaʻi ʻa e pōpoaki ʻo e Puleʻangá. (Mk. 13:10) Ko hono olá, ko e lauingeau ʻo e kau malanga ʻo e Puleʻangá naʻe puke. ʻI he tali ki aí, ko e niʻihi naʻa nau takimuʻa ʻi he kautahá naʻa nau fakakaukau ke ʻave ia ki he fakamaauʻangá. Naʻa nau ʻamanaki ke fakahaaʻi ko e Puleʻangá naʻa nau fai ʻa e ngaahi fakataputapui taʻefakalao ki he totonu ʻa e Kau Fakamoʻoní ke fakahoko tauʻatāina ʻenau lotú. Pea ʻi he 1938 naʻe hoko ha meʻa ʻo taki atu ai ki ha hopo fakahisitōlia. Ko e hā naʻe hokó?

6, 7. Ko e hā naʻe hoko ki he fāmili Cantwell?

⁶ ʻI he pongipongi Tūsite, ʻo ʻEpeleli 26, 1938, ko Newton Cantwell, taʻu 60; mo hono uaifí, ʻa Esther; pea mo ʻena tamaiki tangata ko Henry, Russell, mo Jesse​—ko e toko nima ko kinautolú naʻa nau tāimuʻa makehe​—naʻa nau ʻalu atu ke malanga ʻi ha ʻaho ʻe taha ʻi he kolo ko New Haven, Connecticut. Ko hono moʻoní, naʻa nau ʻosi mateuteu ke mavahe ʻo fuoloa ange ʻi he ʻaho ʻe taha. Ko e hā hono ʻuhingá? Naʻe ʻosi puke kinautolu ʻi ha ngaahi taimi, ko ia naʻa nau ʻiloʻi ʻe lava ke toe puke kinautolu. Neongo ia, naʻe ʻikai ke hōloa ai ʻa e holi ʻa e fāmili Cantwell ke malangaʻi ʻa e pōpoaki ʻo e Puleʻangá. Naʻa nau aʻu ki New Haven ʻi ha meʻalele ʻe ua. Naʻe fakaʻuli ʻa Newton ʻi he meʻalele ʻa e fāmilí ʻa ia naʻe fakafonu ai ʻa e ʻū tohi Fakatohitapu mo e kalamafoni toʻotoʻo, lolotonga iá naʻe fakaʻuli ʻa e taʻu 22 ko Henry ʻi ha kā mo e meʻa fakaleʻolahi. Ko e moʻoni, hangē ko ia naʻa nau ʻamanekiná, ʻi loto pē ʻi he houa ʻe taha naʻe taʻofi kinautolu ʻe he polisí.

⁷ Ko e ʻuluakí, ko Russell, taʻu 18, naʻe puke ia pea toki puke leva ʻa Newton mo Esther. Naʻe sio mai ʻa Jesse, taʻu 16, mei he mamaʻó ki hono taki atu ʻe he kau polisí ʻene ongo mātuʻá mo hono tokouá. Naʻe malanga ʻa Henry ʻi he tafaʻaki ʻe taha ʻo e koló, ko ia naʻe toe toko taha pē ʻa Jesse. Neongo ia, naʻá ne toʻo hake ʻene kalamafoní pea hokohoko atu ʻene malangá. Naʻe tali ʻe ha ongo tangata Katolika ke ne tā ange ha malanga ʻa Tokoua Rutherford naʻe fakakaveinga “Ko e Filí.” Ka ʻi heʻenau fanongo ki he malangá, naʻe ʻita lahi ʻa e ongo tangatá ʻo na loto ke na taaʻi ʻa Jesse. ʻI he anga-mokomoko naʻe mavahe ʻa Jesse, ka ʻi he taimi nounou mei ai, naʻe taʻofi ia ʻe ha polisi. Ko ia naʻe toe puke foki mo Jesse. Naʻe ʻikai ke fakaʻilo ʻe he kau polisí ʻa Tuofefine Cantwell, ka naʻa nau fakaʻilo ʻa Tokoua Cantwell mo hono ngaahi fohá. Kae kehe, naʻe fakaʻatā kinautolu ʻaki hono totongi maluʻi ki tuʻa ʻi he ʻaho pē ko iá.

8. Ko e hā naʻe fakahalaia ai ʻe he fakamaauʻangá ʻa Jesse Cantwell?

⁸ ʻI ha ngaahi māhina siʻi ki mui ai, ʻi Sepitema 1938, naʻe hā ʻa e fāmili Cantwell ʻi he fakamaauʻanga ʻi New Haven. Naʻe fakahalaiaʻi ʻa Newton, Russell mo Jesse ki he tānaki paʻanga ʻo ʻikai ha laiseni. Neongo ʻenau tangi ki he Fakamaauʻanga Lahi ʻo Connecticut, naʻe halaia ʻa Jesse ʻi hono maumauʻi ʻa e melinó​—ʻene hoko ko ha tokotaha fakamaveuveu. Ko e hā hono ʻuhingá? Koeʻuhi ko e ongo tangata Katolika naʻá na fanongo ki he malangá naʻá na fakamoʻoni ʻi he fakamaauʻangá ko e malangá naʻe laukovi ki honau siasí pea fakaʻitaʻi kinaua. Ke fakaʻikaiʻi ʻa e tukuakiʻi ko ení, ko e fanga tokoua fua fatongia ʻi heʻetau kautahá naʻa nau tangi ki he Fakamaauʻanga Lahi ʻo ʻAmeliká​—ʻa e fakamaauʻanga māʻolunga taha ʻo e fonuá.

9, 10. (a) Ko e hā ʻa e tuʻutuʻuni naʻe fai ʻe he Fakamaauʻanga Lahi ʻo ʻAmeliká ki he keisi ʻa e fāmili Cantwell? (e) ʻOku anga-fēfē ʻetau kei maʻu ʻaonga mei he tuʻutuʻuni ko iá?

⁹ Kamata ʻi Maʻasi 29, 1940, ko e Tuʻi Fakamaau Lahi ko Charles E. Hughes mo e kau fakamaau ʻe toko valu naʻa nau fanongo ki he fakakikihi naʻe ʻoatu ʻe Tokoua Hayden Covington, ko ha loea ʻa e Kau Fakamoʻoni ʻa Sihová. * ʻI hono ʻoatu ʻe he loea ʻa e siteiti ʻo Connecticut ʻene fakakikihí ke fakamoʻoniʻi ko e kau fakamaveuveu ʻa e Kau Fakamoʻoní, naʻe ʻeke ange ʻe ha fakamaau ʻe taha: “Naʻe moʻoni koā ko e pōpoaki naʻe fanongonongo ʻe Kalaisi Sīsuú naʻe taʻemanakoa ʻi hono ʻahó?” Naʻe tali ange leva ʻe he loea ʻa e siteití: “Ko ia, pea kapau ʻoku tonu ʻeku maʻu ki he Tohi Tapú, ʻoku toe tala mai ai ʻa e meʻa naʻe hoko kia Sīsū ʻi heʻene fanongonongo ʻa e pōpoaki ko iá.” Ko ha lea fakatupu tokanga ia! ʻI he taʻeʻilo, naʻe fakakalasi ai ʻe he loeá ʻa e Kau Fakamoʻoní mo Sīsū pea fakakalasi ʻa e siteití mo e faʻahinga naʻa nau fakahalaiaʻi ʻa Sīsuú. ʻI Mē 20, 1940, naʻe tuʻutuʻuni ai ʻa e Fakamaauʻangá kuo ikuna ʻa e Kau Fakamoʻoni ʻa Sihová.

¹⁰ Ko e hā ʻa e ʻaonga ʻo e tuʻutuʻuni ko eni ʻa e Fakamaauʻangá? Naʻe fakalahi atu ai hono maluʻi ʻa e totonu ki he tauʻatāina ʻo e lotú ʻo ʻikai lava ai ʻe ha puleʻanga, siteiti pe ko ha founga-pule fakalotofonua ke ne fakangatangata fakalao ʻa e tauʻatāina ki he lotú. ʻIkai ngata aí, naʻe ʻiloʻi ʻe he Fakamaauʻangá ko e tōʻonga ʻa Jesse naʻe “ʻikai . . . ke ne fakamanamanaʻi ʻa e melino mo e maau ʻi he komiunitií.” Ko ia ai, ko e tuʻutuʻuní naʻá ne fakahaaʻi māʻalaʻala ko e Kau Fakamoʻoni ʻa Sihová ʻoku ʻikai ko ha kau fakamaveuveu ʻi he komiunitií. He ikuna fakalao kāfakafa ē ki he kau sevāniti ʻa e ʻOtuá! ʻOku anga-fēfē ʻetau kei maʻu ʻaonga mei aí? Ko ha loea ʻa ia ko ha Fakamoʻoni ʻokú ne pehē: “Ko e totonu ko ia ke fakahoko tauʻatāina ʻetau lotú ʻo ʻikai manavahē ki ha ngaahi fakataputapui taʻetotonu ʻokú ne fakaʻatā kitautolu Kau Fakamoʻoni ʻi he ʻaho ní ke vahevahe atu ha pōpoaki ʻo e ʻamanakí ki he niʻihi kehe ʻi he komiunitī ʻoku tau nofo aí.”

11. Ko e hā ʻa e feingangāue naʻe fakahoko ʻe hotau fanga tokoua ʻi Kānatá, pea ko e hā hono ʻuhingá?

¹¹ ʻI he 1940 tupú, ko e Kau Fakamoʻoni ʻa Sihova ʻi Kānatá naʻa nau fehangahangai mo ha fakafepaki kakaha. Ko ia ʻi he 1946, ke ʻai ke ʻiloʻi ʻe he kakaí hono toʻo ʻe he Puleʻangá ʻa e totonu ki he tauʻatāina ke lotú, ko hotau fanga tokoua ʻi aí naʻa nau fakahoko ha feingangāue ʻaho ʻe 16 ʻa ia naʻa nau tufaki ai ʻa e tuleki naʻe fakakaveinga ko e Quebec’s Burning Hate for God and Christ and Freedom Is the Shame of All Canada. Ko e tuleki peesi ʻe fā ko ení naʻe fakahaaʻi fakaikiiki ai ʻa e fakafepaki fakatupunga ʻe he haʻa faifekaú, anga-fakamanu ʻa e kau polisí pea mo e ʻohofi fakamālohi hotau fanga tokoua ʻi he vahefonua ʻo Quebec. “ʻOku hokohoko atu hono puke taʻefakalao ʻo e kau fakamoʻoni ʻa Sihová,” ko e lau ia ʻa e tulekí. “ʻOku fakafuofua ki he keisi ʻe 800 nai fekauʻaki mo e kau fakamoʻoni ʻa Sihova ʻi Montreal.”

12. (a) Naʻe anga-fēfē fakafeangai ʻa e kau fakafepakí ki he feingangāue hono tufaki ʻo e tulekí? (e) Ko e hā ʻa e hia naʻe fakaʻilo ki ai ʻa hotau fanga tokouá? (Sio foki ki he fakamatala ʻi laló.)

¹² Ko e Palēmia ʻo Quebec ko Maurice Duplessis, naʻá ne ngāue fakataha mo e Katinale Katolika Loma ko Villeneuve, ʻi he fekauʻaki mo e tulekí naʻá ne fanongonongo ʻe ʻi ai “ha tau ʻo ʻikai ha meesi” mo e kau Fakamoʻoní. Naʻe vave ʻa e liunga ua ʻa e lahi ʻo e ngaahi keisí mei he 800 ki he 1,600. “Naʻe tuʻo lahi hono toutou puke kimautolu ʻe he kau polisí,” ko e lea ia ʻa ha tuofefine tāimuʻa. Ko e Kau Fakamoʻoni naʻe maʻu naʻa nau tufa ʻa e tulekí naʻe fakaʻilo ki he hia ko hono pulusi ʻo e “fakamatala angatuʻu.” *

13. Ko hai ʻa e fuofua faʻahinga naʻe hopoʻi ʻi he fakamaauʻangá ki he angatuʻu, pea ko e hā ʻa e tuʻutuʻuni ʻa e fakamaauʻangá?

¹³ ʻI he 1947, ko Tokoua Aimé Boucher mo hono ʻofefine ko Gisèle, taʻu 18 mo Lucille, taʻu 11, ʻa e fuofua faʻahinga naʻe hopoʻi ʻi he fakamaauʻangá ki he angatuʻu. Naʻa nau tufaki ʻa e tuleki Quebec’s Burning Hate ofi ki heʻenau faama ʻi he tafaʻaki fakatonga ʻo e Kolo Quebec, ka naʻe faingataʻa ke vakai atu kiate kinautolu ko ha kau fakamaveuveu. Ko Tokoua Boucher ko ha tangata anga-fakatōkilalo mo anga-malū naʻá ne moʻua pē ʻi he ngāue ʻi hono kiʻi fāmá pea faʻa fononga ki he koló ʻi he hoosi mo e saliote. Neongo ia, naʻe kātekina ʻe hono fāmilí ʻa e niʻihi ʻo e ngaahi ngaohikovia anga-fakamamahi naʻe lave ki ai ʻi he tulekí. Ko e fakamāú, ʻa ia naʻá ne fehiʻa ʻi he Kau Fakamoʻoní, naʻá ne fakafisi ke tali ʻa e fakamoʻoni naʻe tonuhia ʻa e fāmili Boucher. ʻI hono kehé, naʻá ne tali ʻa e fakamatala ʻa e talatalaakí ko e tulekí naʻá ne fakaʻaiʻai ʻa e māveuveu pea ko e fāmili Boucher ʻoku nau halaia. Ko ia ko e aofangatuku eni ʻa e fakamāú: Ko ha hia ia ke tala ʻa e moʻoní! Ko Aimé mo Gisèle naʻe fakaʻilo ki hono tufaki ʻa e fakamatala angatuʻu, pea naʻa mo kiʻi Lucille naʻe tuku pilīsone ʻi he ʻaho ʻe ua. Naʻe tangi ʻa e fanga tokouá ki he Fakamaauʻanga Lahi ʻo Kānatá, ʻa e fakamaauʻanga māʻolunga taha ʻi he fonuá, ʻa ia naʻa nau tali ke fanongo ki he keisí.

14. Naʻe anga-fēfē fakafeangai ʻa e fanga tokoua ʻi Quebec ʻi he lolotonga ʻa e ngaahi taʻu ʻo e fakatangá?

¹⁴ Lolotonga ení, ko hotau fanga tokoua mo e fanga tuofāfine loto-toʻa ʻi Quebec naʻa nau hokohoko atu ke malangaʻi ʻa e pōpoaki ʻo e Puleʻangá ʻi he fehangahangai mo e ngaahi ʻoho taʻeufi mo anga-fakamālohi​—ʻo iku atu ai ki he ngaahi ola fakaofo. Lolotonga ʻa e taʻu ʻe fā hili ʻa e kamata ʻo e feingangāue ke tufaki ʻa e tulekí ʻi he 1946, ko e tokolahi ʻo e Kau Fakamoʻoni ʻi Quebec naʻe tupu mei he toko 300 ki he toko 1,000! *

15, 16. (a) Ko e hā ʻa e tuʻutuʻuni naʻe fai ʻe he Fakamaauʻanga Lahi ʻi Kānatá ki he keisi ʻa e fāmili Boucher? (e) Ko e hā ʻa e ola ʻo e ikuna ko ení ki hotau fanga tokouá mo e niʻihi kehé?

¹⁵ ʻI Sune 1950, ko e Fakamaauʻanga Lahi ʻi Kānatá, ʻa ia ʻoku faʻuʻaki ʻa e kau fakamaau ʻe toko hiva, naʻa nau fanongo ki he keisi ʻa Aimé Boucher. ʻI he māhina ʻe ono ki mui ai, ʻi Tīsema 18, 1950, naʻe tuʻutuʻuni ʻa e Fakamaauʻangá ʻoku tau ikuna. Ko e hā hono ʻuhingá? Ko Tokoua Glen How, ko ha loea maʻá e Kau Fakamoʻoní, naʻá ne fakamatala naʻe loto-tatau ʻa e Fakamaauʻangá mo e fakakikihi ʻa e Kau Fakamoʻoní ko e “angatuʻú” ʻoku kau ai ʻa e fakaʻaiʻai ke anga-fakamālohi pe fakafepaki ki he puleʻangá. Neongo ia, ko e tulekí, “naʻe ʻikai ke ne fakaʻaiʻai ha meʻa pehē pea ko ia ai ko ha founga fakalao ia ʻo e tauʻatāina ki he leá.” Naʻe toe pehē ʻe Tokoua How: “Naʻá ku siotonu ai ki hono ʻai ʻe Sihova ke mau ikuná.” *

¹⁶ Ko e tuʻutuʻuni ʻa e Fakamaauʻanga Lahí ko ha ikuna kāfakafa moʻoni ia maʻá e Puleʻanga ʻo e ʻOtuá. Naʻe fakataʻeʻaongaʻi ai ʻa e makatuʻunga ki he ngaahi keisi kehe ʻe 122 ʻa ia naʻe tukuakiʻi ai ʻa e Kau Fakamoʻoni ʻi Quebec ki hono tufaki ʻa e ngaahi fakamatala angatuʻú. ʻIkai ko ia pē, ko e tuʻutuʻuni ko eni ʻa e Fakamaauʻangá naʻe lava ai ki he kau tangataʻifonua ʻo Kānatá mo e Kominiuelí ke nau ʻoatu tauʻatāina ʻenau ngaahi hohaʻá ki he puleʻangá. Pehē foki, ko e ikuna ko ení naʻá ne fakangata ai ʻa e ʻohofi ʻe he Siasí mo e puleʻanga ʻo Quebec ʻa e tauʻatāina ʻa e Kau Fakamoʻoni ʻa Sihová. *

17. ʻOku anga-fēfē feinga ʻa e ngaahi puleʻanga ʻe niʻihi ke puleʻi ʻetau ngāue fakamalangá?

¹⁷ Hangē ko e muʻaki kau Kalisitiané, ko e kau sevāniti ʻa Sihova ʻi he ʻaho ní “ʻoku ʻikai ko ha kau fakatau atu . . . ʻo e folofola ʻa e ʻOtuá.” (Lau ʻa e 2 Kolinitō 2:​17.) Neongo ia, ko e ngaahi puleʻanga ʻe niʻihi ʻoku nau feinga ke puleʻi ʻetau ngaahi ngāue fakafaifekaú fakafou ʻi he ngaahi lao fakakomēsiale. Tau lāulea angé ki ha hopo ʻe ua ʻi hono fehuʻia pe ko e Kau Fakamoʻoni ʻa Sihová ko e kau fefakatauʻaki pe ko e kau faifekau.

18, 19. Naʻe anga-fēfē feinga ʻa e kau maʻu mafai ʻi Tenimaʻaké ke taʻofi ʻa e ngāue fakamalangá?

¹⁸ Tenimaʻake. ʻI ʻOkatopa 1, 1932, naʻe fokotuʻu ai ha lao ʻa ia naʻe tapui ai ke fakatau atu ha fakamatala kuo pulusi ʻo ʻikai ha laiseni fefakatauʻaki. Kae kehe, naʻe ʻikai ke kole ʻe hotau fanga tokouá ha laiseni. ʻI he ʻaho hono hokó, naʻe malanga ha kau malanga ʻe toko nima ʻi Roskilde, ko ha kolo ʻi he maile ʻe 20 nai ki he fakahihifo ʻo Copenhagen, ʻa e kolomuʻá. ʻI he ngataʻanga ʻo e ʻahó, naʻe pulia ʻa e taha ʻo e kau malangá, ko August Lehmann. Naʻe puke ia ʻi hono fakatau atu ʻa e ngaahi koloa ʻo ʻikai ha laiseni.

¹⁹ ʻI Tīsema 19, 1932, naʻe hā ʻa August Lehmann ʻi he fakamaauʻangá. Naʻá ne fakamoʻoni ko ʻene ʻaʻahi ki he kakaí ke ʻoatu ha tohi Fakatohitapu, ka naʻá ne fakaʻikaiʻi naʻá ne fakatau atu ia. Naʻe loto-tatau ʻa e fakamaauʻangá mo ia. Naʻa nau pehē: “Ko e fakaʻiloá . . . ʻoku malava pē ke ne poupouʻi fakapaʻanga ia, pea kuo ʻikai [ke ne] maʻu ha paʻanga pe ko haʻane taumuʻa ke maʻu mai ia, ka ʻi hono kehé ko ʻene ngāué kuó ne fakatupunga ha mole fakapaʻanga kiate ia.” ʻI he kau fakataha ʻa e fakamaauʻangá mo e Kau Fakamoʻoní, naʻa nau tuʻutuʻuni ko e ngāue ʻa Lehmann ʻoku ʻikai lava “ke fakakalasi ia ko ha fefakatauʻaki.” Ka ko e ngaahi fili ʻo e kakai ʻa e ʻOtuá, naʻa nau fakapapauʻi ke taʻofi ʻa e ngāue fakamalangá ʻi he kotoa ʻo e fonuá. (Saame 94:20) Ko e loea ʻa e talatalaakí naʻá ne tangi ʻo aʻu ki he Fakamaauʻanga Lahí. Naʻe anga-fēfē fakafeangai hotau fanga tokouá?

20. Ko e hā ʻa e tuʻutuʻuni naʻe fai ʻe he Fakamaauʻanga Lahi ʻo Tenimaʻaké, pea naʻe fakafeangai fēfē ʻa hotau fanga tokouá?

²⁰ ʻI he ngaahi uike ki muʻa ʻi he hopo ʻi he Fakamaauʻanga Lahí, ko e Kau Fakamoʻoni ʻi he kotoa ʻo Tenimaʻaké naʻa nau toe fakalahi ange ʻenau ngāue fakamalangá. ʻI he Tūsite, ʻOkatopa 3, 1933, naʻe tala ʻe he Fakamaauʻanga Lahí ʻenau tuʻutuʻuní. Naʻa nau loto-tatau mo e fakamaauʻanga māʻulalo angé naʻe ʻikai ke maumauʻi ʻe August Lehmann ʻa e laó. Ko e tuʻutuʻuni ko ení naʻe ʻuhinga iá ko e Kau Fakamoʻoní naʻe lava ke hokohoko atu ʻenau malanga tauʻatāiná. ʻI hono fakahāhā ʻe he fanga tokouá mo e fanga tuofāfiné ʻenau houngaʻia kia Sihova ʻi he ikuna fakalao ko ení, naʻa nau toe fakalahi atu ʻenau ngāue fakamalangá. Talu mei he tuʻutuʻuni ko ia ʻa e Fakamaauʻangá, ko hotau fanga tokoua ʻi Tenimaʻaké kuo malava ke nau fakahoko ʻenau ngāue fakafaifekaú ʻo ʻikai ha fakafeʻātungia mei he puleʻangá.

21, 22. Ko e hā ʻa e tuʻutuʻuni naʻe fai ʻe he Fakamaauʻanga Lahi ʻi ʻAmeliká ki he keisi ʻa Tokoua Murdock?

²¹ ʻAmelika. ʻI he Sāpate, Fepueli 25, 1940, ko ha tāimuʻa ko Robert Murdock, Jr., mo e Kau Fakamoʻoni kehe ʻe toko fitu naʻe puke kinautolu lolotonga ʻenau malanga ʻi Jeannette, ko ha kolo ofi ki Pittsburgh, ʻi he siteiti ʻo Pennsylvania. Naʻe fakahalaiaʻi kinautolu ʻi hono tufa ʻo e ʻū tohí taʻemaʻu ha laiseni. ʻI he tangí, naʻe loto ʻa e Fakamaauʻanga Lahi ʻi ʻAmeliká ke fanongo ki heʻenau keisí.

²² ʻI Mē 3, 1943, naʻe tala ʻe he Fakamaauʻanga Lahí ʻenau tuʻutuʻuní, ʻa ia naʻa nau taukapoʻi ʻa e Kau Fakamoʻoní. Naʻe ʻikai tali ʻe he Fakamaauʻangá ʻa e fiemaʻu ko ia ke maʻu ha laiseni ki hono tufaki ʻo e ʻū tohi fakalotú koeʻuhí ʻoku taʻefakakonisitūtone. Naʻe fakataʻeʻaongaʻi ʻe he Fakamaauʻangá ʻa e tuʻutuʻuni ʻa e koló koeʻuhi “ko hano fakangatangata ia ʻo e tauʻatāina ke tuku atu ha fakamatala pea ko ha taʻofi ia ʻo e tauʻatāina ke fai ʻa e lotú.” ʻI hono fakahoko atu ʻa e fakakaukau ʻa e Fakamaauʻangá, naʻe pehē ʻe Fakamaau William O. Douglas ko e ngāue ʻa e Kau Fakamoʻoni ʻa Sihová “ʻoku ʻikai ko e ngāue fakamalanga pē; ʻoku ʻikai ko hono tufaki pē ʻo e ʻū tohi fakalotu. Ko hono fakatahaʻi ia ʻo e meʻa ʻe ua ko ení.” Naʻá ne toe pehē: “Ko e founga ngāue fakalotu ko ení ʻoku totonu ke fakamahuʻingaʻi lahi tatau pē . . . mo e lotu ʻi he ngaahi fale lotú mo e malanga mei he tuʻuʻanga malangá.”

23. Ko e hā ʻoku mahuʻinga ai ʻa e ngaahi ikuna ʻi he fakamaauʻangá ʻi he 1943 kiate kitautolu he ʻaho ní?

²³ Ko e tuʻutuʻuni ko eni ʻa e Fakamaauʻanga Lahí naʻe hoko ia ko ha ikuna fakalao lahi ki he kakai ʻa e ʻOtuá. ʻOku fakapapauʻi ai ʻa hotau tuʻunga moʻoní​—ko e kau faifekau Kalisitiane kae ʻikai ko e kau fefakatauʻaki fakakomēsiale. ʻI he ʻaho fakangalongataʻa ko ia ʻi he 1943, naʻe ikuna ʻe he Kau Fakamoʻoni ʻa Sihová ʻa e keisi ʻe 12 ʻi heʻenau keisi fakakātoa ʻe 13 naʻe hā ʻi he Fakamaauʻanga Lahí, kau ai ʻa e keisi ʻa Murdock. Ko e ngaahi tuʻutuʻuni ko eni ʻa e fakamaauʻangá kuo hoko ia ʻo ʻaonga lahi ki he ngaahi keisi ki muí ni mai ʻa ia kuo toe fehuʻia ai ʻe hotau kau fakafepakí ʻetau totonu ke malangaʻi fakahāhā ʻa e pōpoaki ʻo e Puleʻangá pea mei he fale ki he fale.

24. ʻOku anga-fēfē ʻetau fakafeangai ʻi hono tapui ʻe he puleʻangá ʻetau ngāue fakamalangá?

²⁴ ʻI he tuʻunga ko e kau sevāniti ʻa Sihova, ʻoku tau houngaʻia lahi ʻi he taimi ʻoku ʻomai ai ʻe he ngaahi puleʻangá ʻa e totonu fakalao ke tau malangaʻi tauʻatāina ʻa e pōpoaki ʻo e Puleʻangá. Neongo ia, ʻi he taimi ʻoku tapui ai ʻe ha puleʻanga ʻetau ngāue fakamalangá, ʻoku tau feʻunuʻaki ʻetau ngaahi foungá, ʻo hokohoko atu pē ʻetau ngāué ʻi ha faʻahinga founga pē ʻoku ala lavá. Hangē ko e kau ʻapositoló, “kuo pau ke [tau] talangofua ki he ʻOtuá ko e pulé ia kae ʻikai ki he tangatá.” (Ngā. 5:​29; Māt. 28:19, 20) ʻI he taimi tatau, ʻoku tau tangi ki he ngaahi fakamaauʻangá ke toʻo ʻa e fakataputapui ki heʻetau ngaahi ngāué. Fakakaukau ki ha fakatātā ʻe ua.

25, 26. Ko e hā naʻe hoko ʻi Nikalākuā ʻo taki atu ai ki ha hopo ʻi he Fakamaauʻanga Lahí, pea ko e hā ʻa e olá?

²⁵ Nikalākuā. ʻI Nōvema 19, 1952, ko e misinale mo e sevāniti vaʻa ko Donovan Munsterman naʻá ne hū atu ki he ʻŌfisi ʻImikuleisoni ʻi Managua, ʻa e kolomuʻá. Naʻe fekauʻi ia ke ne ʻalu ʻo sio kia Komanitā Arnoldo García, ko e pule ʻo e ʻōfisí. Naʻe tala ange ʻe he komanitaá kia Donovan ko e kotoa ʻo e Kau Fakamoʻoni ʻa Sihova ʻi Nikalākuā naʻe “tapui ʻenau malangaʻi ʻenau tokāteliné mo hono fakahoko ʻenau ngāue fakalotú.” ʻI hono ʻeke ange ʻa e ʻuhingá, naʻe fakamatalaʻi ange ʻe Komanitā García ko e Kau Fakamoʻoní naʻe ʻikai ke nau maʻu ha ngofua mei he minisitā ʻa e puleʻangá ke fakahoko ʻenau ngāue fakafaifekaú pea naʻe tukuakiʻi kinautolu ko e kau kominiusi. Ko hai hotau kau tukuakiʻí? Ko e haʻa faifekau Katolika Lomá.

²⁶ Naʻe tangi ʻa Tokoua Munsterman ʻi he taimi pē ko iá ki he Potungāue ʻa e Puleʻangá mo e Lotú pehē foki kia Palesiteni Anastasio Somoza García, ka naʻe ʻikai ha ʻutu ʻe hakea. Ko ia naʻe feʻunuʻaki ʻe he fanga tokouá ʻenau foungá. Naʻa nau tāpuni ʻa e Fale Fakatahaʻangá, fakatahataha ʻi he fanga kiʻi kulupu iiki, pea taʻofi ʻa e faifakamoʻoni ʻi he halá, ka naʻa nau kei malangaʻi pē ʻa e pōpoaki ʻo e Puleʻangá. ʻI he taimi tatau, naʻa nau faile ha tohi tangi ki he Fakamaauʻanga Lahi ʻo Nikalākuaá, ʻo kole ke nau toʻo ʻa e fakataputapuí. Naʻe līpooti ʻi he ngaahi nusipepa lahi ʻa e tapuí pea mo e fakamatala ʻi he tohi tangí, pea naʻe loto ʻa e Fakamaauʻanga Lahí ke fanongo ki heʻenau keisí. Ko e hā ʻa e olá? ʻI Sune 19, 1953, naʻe pulusi ʻe he Fakamaauʻanga Lahí ʻenau tuʻutuʻuni ʻa e ikuna ʻa e Kau Fakamoʻoní. Naʻe ʻiloʻi ʻe he Fakamaauʻangá ko e tapuí naʻá ne maumauʻi ʻa e konisitūtone ki he tauʻatāina ke leá, konisēnisí mo hono fakahāhā ʻo e tuí. Naʻe toe tuʻutuʻuni ai ke fakaleleiʻi ʻe he puleʻanga Nikalākuaá mo e Kau Fakamoʻoní hona vaá.

27. Ko e hā naʻe ofoofo ai ʻa e kakai ʻo Nikalākuaá ʻi he tuʻutuʻuni ʻa e Fakamaauʻangá, pea naʻe anga-fēfē vakai ʻa e fanga tokouá ki he ikuna ko ení?

²⁷ Naʻe ofoofo ʻa e kau Nikalākuaá ʻi he kau ʻa e Fakamaauʻanga Lahí mo e Kau Fakamoʻoní. Ki muʻa hení, naʻe mātuʻaki mālohi ʻa e tākiekina ʻa e haʻa faifekaú ʻo fakaʻehiʻehi ai ʻa e Fakamaauʻangá mei he fekīhiaki mo kinautolú. Pehē foki, naʻe fuʻu mālohi mo e mafai ʻo e kau ʻōfisa fakapuleʻangá ʻo tātaitaha ai ke fakafepakiʻi ʻe he Fakamaauʻangá ʻenau ngaahi tuʻutuʻuní. Ko hotau fanga tokouá naʻa nau tuipau ko ʻenau ikuna ko ení koeʻuhí ko e maluʻi kinautolu ʻe honau Tuʻí pea mo ʻenau hokohoko atu e malangá.​—Ngā. 1:8.

28, 29. ʻI he 1980 tupú, ko e hā naʻe hoko ʻi Sāié?

²⁸ Sāie. ʻI he 1980 tupú, naʻe ʻi ai ʻa e Kau Fakamoʻoni ʻe toko 35,000 nai ʻi Sāie, ʻa ia ko e Lepupilika Temokalati ia ʻo Kongó he taimí ni. Ke ngaʻunu fakataha mo e tupulaki ʻa e ngāue ʻo e Puleʻangá, naʻe fai ʻe he vaʻá ʻa e ngaahi langa foʻou. ʻI Tīsema 1985, naʻe fakahoko ha fakataha-lahi fakavahaʻapuleʻanga ʻi Kinshasa, pea ko e toko 32,000 ʻo e kau fakafofonga naʻa nau haʻu mei he tapa kehekehe ʻo e māmaní naʻa nau fakafonu ʻa e sitētiume ʻi he koló. Ka naʻe liliu ʻa e ngaahi tuʻungá ki he kau sevāniti ʻa Sihová. Ko e hā naʻe hokó?

²⁹ Ko Tokoua Marcel Filteau, ko ha misinale mei Quebec, Kānata, ʻa ia naʻá ne tofanga ʻi he fakatanga ʻi he taimi ʻo Duplessis, naʻá ne ngāue ʻi Sāie ʻi he taimi ko iá. Naʻá ne fakamatala ki he meʻa naʻe hokó: “ʻI Maʻasi 12, 1986, naʻe ʻoange ki he fanga tokoua fua fatongiá ha tohi naʻe fakahaaʻi ai ko e fakatahataha ʻa e Kau Fakamoʻoni ʻa Sihova ʻi Sāié naʻe taʻefakalao.” Naʻe fakamoʻoni ʻi he tapuí ʻa e palesiteni ʻo e fonuá, ko Mobutu Sese Seko.

30. Ko e hā ʻa e fili mafatukituki naʻe fiemaʻu ke fai ʻe he Kōmiti Vaʻá, pea ko e hā naʻa nau fili ke faí?

³⁰ ʻI he ʻaho hono hokó naʻe fanongonongo ʻi he letiō ʻa e fonuá: “Heʻikai ʻaupito ke tau toe fanongo ki he Kau Fakamoʻoni ʻa Sihová ʻi [Sāie].” Tuai-e-kemo naʻe kamata ke fakatangaʻi kinautolu. Naʻe maumauʻi ʻa e ngaahi Fale Fakatahaʻangá, pea ko hotau fanga tokouá naʻe kaihaʻasia ʻenau koloá, puke, tuku pilīsone pea haha kinautolu. Naʻa mo e fānau Fakamoʻoní naʻe tuku pilīsone. ʻI ʻOkatopa 12, 1988, naʻe puke ʻe he puleʻangá ʻa e ngaahi koloa ʻetau kautahá, pea ko e kau sōtiá naʻa nau nofo ʻi he vaʻá. Ko e fanga tokoua fua fatongiá naʻa nau tangi kia Palesiteni Mobutu, ka naʻe ʻikai ke nau maʻu ha tali. ʻI he taimi ko iá, naʻe pau ke fai ʻe he Kōmiti Vaʻá ha fili mafatukituki, “ʻOku totonu ke tau tangi ki he Fakamaauʻanga Lahí, pe te tau tatali pē?” Ko Timothy Holmes, ko ha misinale pea ko e sea ia ʻo e Kōmiti Vaʻa ʻo e fonuá ʻi he taimi ko iá, ʻokú ne manatu, “Naʻa mau hanga kia Sihova ki ha poto mo ha tataki.” Hili ʻa e lāulea ʻi he faʻa lotu, naʻe ongoʻi ʻe he kōmití naʻe ʻikai ko ha taimi totonu ia ke fai ha ngāue fakalao. ʻI hono kehé, naʻa nau tokangataha ki hono tokangaʻi ʻa e fetokouaʻakí pea mo e kumi ki ha ngaahi founga ke hokohoko atu ai ʻa e ngāue fakamalangá.

31, 32. Ko e hā ʻa e tuʻutuʻuni fakaofo naʻe fai ʻe he Fakamaauʻanga Lahi ʻo Sāié, pea ko e hā ʻene ʻaonga ki hotau fanga tokouá?

³¹ Naʻe ʻosi atu ʻa e ngaahi taʻu lahi. Naʻe kamata ke holo hono fakatangaʻi ʻa e Kau Fakamoʻoní pea naʻe tokaʻi ange ʻa e totonu ʻa e tangatá ʻi he fonuá. Naʻe fakaʻosiʻaki ʻe he Kōmiti Vaʻá ko e taimi eni ke tangi ai ki he Fakamaauʻanga Lahi ʻo Sāié fekauʻaki mo e tapuí. Ko e fakaofó, naʻe loto ʻa e Fakamaauʻanga Lahí ke fanongo ki he keisí. Pea ʻi Sanuali 8, 1993, ko e meimei taʻu ʻe fitu ia hili ʻa e tapui naʻe fakahoko ʻe he palesitení, naʻe tuʻutuʻuni ʻa e Fakamaauʻangá ko e meʻa naʻe fai ʻe he puleʻangá ki he Kau Fakamoʻoní naʻe taʻefakalao, pea naʻe toʻo leva ʻa e fakataputapuí. Fakakaukau atu pē ki he ʻuhinga ʻo e meʻá ni! Naʻe tuku ʻe he kau fakamāú ʻenau moʻuí ke ʻi ha tuʻunga fakatuʻutāmaki, ʻi heʻenau fakataʻeʻaongaʻi ha tuʻutuʻuni ʻa e palesiteni ʻo e fonuá! ʻOku pehē ʻe Tokoua Holmes, “Lolotonga ʻa e vahaʻa taimi ʻo e hopo ko iá, naʻa mau sio ki he anga hono liliu ʻe Sihova ʻa e ngaahi meʻá.” (Tan. 2:​21) Ko e ikuna ko ení naʻá ne fakaivimālohiʻi ʻa e tui ʻa hotau fanga tokouá. Naʻa nau ongoʻi ko e Tuʻí, ʻa Sīsū, naʻá ne tataki ʻene kakaí ke ʻiloʻi ʻa e taimi mo e founga ke ngāue aí.

³² ʻI hono toʻo ʻa e fakataputapuí, naʻe fakaʻatā ʻa e ʻōfisi vaʻá ke nau ʻomai ʻa e kau misinale, langa ʻa e vaʻa foʻou, pea fakafolau mai mo e ʻū tohi Fakatohitapu. * He fiefia ē ko e kau sevāniti ʻa e ʻOtuá ʻi māmani lahí ke vakai ki he anga hono maluʻi ʻe Sihova ʻa e lelei fakalaumālie hono kakaí!​—ʻAi. 52:10.

33. Ko e hā ʻoku tau ako mei hono sivisiviʻi ko eni ʻo e niʻihi ʻo e ngaahi hopó?

³³ Ko ʻetau sivisiviʻi ko ia ʻa e niʻihi ʻo e ngaahi faitau fakalaó ʻoku fakamoʻoniʻi ai kuo fai ʻa Sīsū ki heʻene palōmesi: “Te u ʻoatu kiate kimoutolu ha ngaahi lea mo ha poto ʻa ia ko hono kotoa homou kau fakafepakí heʻikai te nau lava ke matatali pe fakakikihiʻi.” (Lau ʻa e Luke 21:12-​15.) ʻI he taimi ʻe niʻihi, ʻoku hā mahino hono hanga ʻe Sihova ʻo ngāueʻaki ʻa e kau Kāmelieli ʻi onopooni ke maluʻi ʻene kakaí pe kuó ne ueʻi ʻa e kau fakamaau mo e kau loea loto-toʻa ke nau taukapoʻi ʻa e fakamaau totonú. Kuo fakapekuʻi ʻe Sihova ʻa e meʻatau ʻa hotau kau fakafepakí. (Lau ʻa e ʻAisea 54:17.) ʻOku ʻikai lava ʻe he fakafepakí ʻo taʻofi ʻa e ngāue ʻa e ʻOtuá.

34. Ko e hā ʻoku fakaofo fau ai ʻetau ngaahi ikuna fakalaó, pea ko e hā ʻoku fakamoʻoniʻi aí? (Sio foki ki he puha “ Ngaahi Ikuna Fakahisitōlia ʻi he Fakamaauʻanga Māʻolungá Naʻá Ne Fakalahi ʻa e Ngāue Fakamalangá.”)

³⁴ Ko e hā ʻoku fakaofo fau ai ʻetau ngaahi ikuna fakalaó? Fakakaukau ki he meʻá ni: Ko e Kau Fakamoʻoni ʻa Sihová ʻoku ʻikai ke nau tuʻu-ki-muʻa pe faitākiekina. ʻOku ʻikai ke tau kau ʻi he filí, poupou ki he ngaahi kemipeini fakapolitikalé pe feinga ke tākiekina ʻa e kau politikí. ʻIkai ngata aí, ko e faʻahinga ʻo kitautolu ʻoku ʻave ki he fakamaauʻangá ʻoku faʻa lau kinautolu ko e kau “taʻeako mo lāuvale.” (Ngā. 4:13) Ko ia, ʻi he vakai ʻa e tangatá, ko e ngaahi fakamaauʻangá ʻoku ʻikai ke nau maʻu ʻa e mālohi feʻunga ke fakafepakiʻi hotau kau fakafepaki fakalotú mo fakapolitikalé pea ke tokoniʻi kitautolu. Neongo ia, ko e fakamaauʻangá kuo nau toutou tokoniʻi kitautolu ke tau ikuna! Ko ʻetau ngaahi ikuna fakalaó ʻoku fakamoʻoniʻi ai ʻoku tau ʻaʻeva “ʻi he vakai ʻa e ʻOtuá pea ʻi he fāʻūtaha mo Kalaisi.” (2 Kol. 2:​17) Ko ia ai, ʻoku tau lea fakataha mo e ʻapositolo ko Paulá: “Ko Sihova ʻa hoku tokoní; ʻe ʻikai te u ilifia.”​—​Hep. 13:6.