Lipooti Yabakambausi ba Bwami

Bakajana Buumi Bulaampindu

JESU waamba kuti ulizizyi mbelele zyakwe. (Johane 10:14) Ikuti muntu kajisi moyo mubotu alimwi kayanda luumumo abululami, uyooba sikutobela Jesu. Muntu uuli boobo uyoojana buumi bulaampindu, mbuli mbwaakacita mukaintu umwi waku Belgium. Ngaaya makani aajatikizya buumi bwakwe:

“Ciindi Bakamboni ba Jehova nobakakonkomona amulyango, ndakalityompedwe kapati, cakuti ncondakali kuyeeya buyo nkulijaya. Ndakakkomana nobakaamba kuti mapenzi aali munyika iino ayoomana, pele tiindakaukkomanina muzeezo wakuti Leza nguuyakwaamana. Kwamyaka iili lusele, ndakalilekede kuunka kucikombelo nkaambo tiindakabotelwa akuupaupa ameso kwakaliko. Pele mukwiindana, ndakabona kuti Bakamboni bayiisya kasimpe alimwi ndakazyiba kuti nciyumu kupona kakunyina Leza.

“Nokwakainda mazuba aali mbwaabede, Bakamboni bakacileka kundiswaya. Ndakalimvwa bubi. Aboobo ndakatalika alimwi kufweba tombwe, mane buya ndakayungizya tupakete ntondakali kufweba abuzuba, alimwi ndakatalika akubelesya misamu iikola. Akaambo kakuti ndakali kuyanda kubandika abasyaanene ibakafwa, ndakatalika kusyoma mizimo. Akaambo kaceeci, ndanooli ndalikke masiku ndakali kulwanwa amadaimona! Eeci cakazumanana kwamyezi iili mbwiibede. Aboobo lyoonse masiku ndakali kuyoowa.

“Mpoonya bumwi buzuba, ndakaunka kwakweendeenda kubelesya nzila njonditavwuli kubelesya, kumane ndakajana busena aakali mayake. Ndakagambwa kubona nkamu mpati yabantu. Nondakasika munsi-munsi, ndakabona kuti bakali Bakamboni ba Jehova ibakali kuyanda kuyaka Ŋanda ya Bwami. Mpoonya ndakayeeya ciindi ncobakali kundiswaya, kumane mumoyo ndakati, nyika niyali mbotu ikuti bantu boonse nobali kupona mbobapona Bakamboni.

“Ndakali kuyandisya kuti Bakamboni bakaboole kuŋanda yangu alimwi, aboobo ndakabandika abamwi ibakali kuyaka. Ndakapaila kuli Leza, mpoonya nokwakainda mazuba aali kkumi mwaalumi iwakandiswaide kusaanguna wakandiswaya alimwi. Wakandilomba kuti tuzumanane kwiiya Bbaibbele, mpoonya ndakazumina kakunyina kuwaya-waya. Cakutasowa ciindi wakanditamba kumiswaangano ku Ŋanda ya Bwami. Ndakazumina. Alimwi ndakagambwa kapati ancondakabona! Kuzwa kaindi ndakali kuyandaula bantu ibayandana alimwi ibakakkomene. Ndilikkomene kuti ndakabajana!

“Kuzwa leelyo ndakali kujanika kumiswaangano yoonse. Nokwakainda nsondo zitandila kuli zyotatwe ndakacileka ciyanza cibyaabi cakufweba. Ndakaasowa mabbuku aakali kwaamba zyabweende bwanyenyezi anyimbo zyabunasaatani, alimwi ndakalimvwa kuti madaimona akali kuyaabuleka kundilwana. Ndakatalika kupona buumi bweendelana azyeelelo zyamu Bbaibbele zya Jehova, mpoonya nokwakainda myezi yotatwe ndakatalika kukambauka makani mabotu. Kumane nokwakainda myezi iili cisambomwe ndakabbapatizyigwa. Nokwakainda mazuba obilo kuzwa nondakabbapatizyigwa, ndakatalika bupainiya bwakugwasyilizya.

“Ndilamulumba Jehova akaambo kazintu zibotu zyoonse nzyaandicitila. Lino ndipona buumi bulaampindu. Inzya, izina lya Jehova ningazi njumu mwalo mondakatijila akujana lukwabililo. (Tusimpi 18:10) Ndilimvwa mbwaakalimvwa sintembauzyo ciindi naakalemba majwi aali ku Intembauzyo 84:10 aakuti: ‘Kukkala buzuba bomwe mumabuwa aako nkubotu kwiinda kukkala mazuba aali 1,000 kumbi! Ndisala kwiimikila kumanjililo muŋanda ya Leza wangu muciindi cakukkala mumatente aabantu babi.’”

Mukaintu ooyu mubombe moyo wakajana buumi bulaampindu. Oobu mbocikonzya kuba akumuntu uuyandaula Jehova amoyo mubotu.