Mibuzyo Yabasikubala

Ncinzi Jesu ncaakali kupandulula naakaambila Nikodemo kuti: “Takukwe muntu uwakatanta kujulu, pele oyo uwakazwa kujulu, nguwenya Mwana a-Muntu”?—Johane 3:13.

Ciindi eeco Jesu wakacili anyika alimwi tanaakaningatanta naa kujokela kujulu. Pele nzyotuzi kujatikizya Jesu alimwi acakali kwaambwa naakaamba majwi aaya zilakonzya kutugwasya kumvwisya ncaakali kupandulula.

Jesu “wakazwa kujulu” nkaambo wakali kukkala a Bausyi kujulu, pele kuciindi ceelede buumi bwakwe bwakalonzyegwa kuya mwida lya Mariya calo cakapa kuti Jesu azyalwe kali muntu. (Luka 1:30-35; Ba-Galatiya 4:4; Ba-Hebrayo 2:9, 14, 17) Naakafwa Jesu wakabusyigwa kali cilenge camuuya akujokela kuli Jehova. Nkakaambo kaako kakuceede buyo ciindi cisyoonto kuti ajaigwe, Jesu wakapaila kuti: “Taata, kondilemya antoomwe ayebo abulemu obo mbwendakali kujisi nkecili ayebo, inyika kiitanaanzwa.”—Johane 17:5; Ba-Roma 6:4, 9; Ba-Hebrayo 9:24; 1 Petro 3:18.

Iciindi Jesu naakali kubandika a Nikodemo, mu Farisi alimwi mwiiyi wamu Israyeli, Jesu tanaakaningapilukila kujulu. Ncobeni kwakanyina muntu wakafwide akuunka kujulu. Jesu kumugama wakaamba kuti Johane Mubapatizi wakali musinsimi mupati wa Leza, nokuba boobo, “oyo muniini wamu-Bwami bwakujulu mupati kwiinda nguwe.” (Matayo 11:11) Alimwi mwaapostolo Petro wakapandulula kuti Mwami Davida musyomesi wakafwa alimwi wakacili mucuumbwe cakwe; Davida kunyina naakaunka kujulu pe. (Incito 2:29, 34) Kuli kaambo kakapa kuti aabo ibakafwa katanafwa Jesu, mbuli Davida, Johane Mubapatizi alimwi abaalumi bamwi basyomeka bataunki kujulu. Bakafwa kacitanasika ciindi cakuti Jesu ajalule nzila naa kupa kuti kacikonzyeka kubantu kubusyilwa kuyoopona kujulu. Imwaapostolo Paulo wakalemba kuti Jesu mbuli musolozi, ‘wakajalula nzila mpya yabuumi’ iitola kujulu.—Ba-Hebrayo 6:19, 20; 9:24; 10:19, 20.

Mbwaanga Jesu tanaakaningafwa akubusyigwa, ncinzi ncaakali kupandulula naakaambila Nikodemo kuti: “Takukwe muntu uwakatanta kujulu, pele oyo uwakazwa kujulu, nguwenya Mwana a-Muntu”? (Johane 3:13) Amulange-lange kaambo naa Jesu ncaakali kubandika a Nikodemo.

Ciindi mweendelezi uulya waba Juda naakaboola kuli Jesu masiku, Jesu wakamwaambila kuti: “Ncobeni ndakwaambila kasimpe, Muntu atazyalwa akuzyalwa kwakujulu, takonzya kubona Bwami bwa-Leza.” (Johane 3:3) Mpoona Nikodemo wakabuzya kuti: ‘Ino eeco inga cakonzyeka buti? Mbuti muntu mbwakonzya kuzyalwa lwabili?’ Tanaakaimvwisya njiisyo eeyi ya Leza ijatikizya kunjila mu Bwami bwa Leza. Mbuti mbwaakali kukonzya kwiimvwisya? Kunyina muntu wakali kukonzya kumuyiisya njiisyo eeyi akaambo kakuti taaku wakaunkide kale kujulu aboobo ikuba muciimo cakukonzya kupandulula zijatikizyidwe mukunjila mu Bwami. Alikke wakali kukonzya kucita boobo ngu Jesu. Wakali kukonzya kumuyiisya Nikodemo alimwi abamwi akaambo kakuti walo wakazwa kujulu aboobo wakali kukonzya kuyiisya bantu kujatikizya zintu eezi.

Imubuzyo ujatikizya lugwalo oolu utondezya kaambo kayandika kapati kajatikizya kwiiya Jwi lya Leza. Tacigwasyi pe kudooneka ncolwaamba lugwalo akaambo buyo kakuti talumvwugwi kabotu. Ncolyaamba Bbaibbele mucibalo cimwi ceelede kuteelelwa kwiinda mukugwasyigwa azibalo zimwi alimwi zyeelede kweendelana. Kuyungizya waawo, kanji-kanji makani aali mucibalo—bukkale naa kaambo kakali kubandikwa—zilakonzya kutugwasya kujana bupanduluzi bulimvwisya bwalugwalo lukatazya kumvwisya.