Loko nuna na nsati va tirhisana, va fana ni mufambisi wa vhiyawu ni mupfunisi wa yena lava va yendlaka hinkwaswu swaku vhiyawu li famba kahle. Loko ku humelela swikarhatu hiwumbirhi ka vona va pimisa hi leswi nga ta va pfuna.

BIBELE LI LI: “A va ha li vambirhi, kambe se i nyama yin’we.” — Matewu 19:6.

Christopher a li: “Nuna na nsati va fanele va tirhisana, leswo swi ta yendla swaku va tsaka ka muchadu wa vona.”

Loko nuna na nsati va nga tirhisani, swi yendla swaku loko ko tshuka ku va ni mhaka leyi va kalaka va nga twanani ka yona, va solasolana ku nga li ku zama ku lulamisa xikarhatu. Leswo swi yendla swaku hambi hi swikarhatu swaswitsongo swi kula hintamu.

Alexandra a li: “Ku tirhisana i swa lisima ka muchadu. Loko mina ni nuna wa mina hi nga tirhisani hi to fana ni vakolega va kwartu ntsena ku nga li nuna na nsati. Funtshi hi to fana ni vanhu vambirhi lavo ngo tshama xikan’we lava va kalaka va nga twanani swaku va yendla swiboho swa lisima.”

TIKAMBELI

• Ku nga va swaku male leyi ni yi holaka ni pimisa swaku i ya “mina noxe”?

• Ku nga va swaku ni kota ku pepa loko ni li kule ni nuna kumbe nsati wa mina?

• Hambiloko ni swi tiva swaku nuna kumbe nsati wa mina a ma rhandza hintamu maxaka ya yena, ku nga va swaku ni fambela kule na wona?

BULISANANI

• I ka swiyimu swini lani hi kotaka ku tirhisana?

• I ka swiyimu swini lani hi faneleke hi yampsisa?

• I mpsini leswi hi nga swi yendlaka swaku hi yampsisa?

LESWI SWI NGA MI PFUNAKA

• A hi nge muchadu wa wena wu fana ni jogu naswona wena ni lweyi u nga chada na yena mi bela ka mintlawa ya ku hambana. Zama ku vona swaku i mpsini leswi mi nga swi yendlaka swaku mi tshika ku bela ka mintlawa ya ku hambana se mi bela ka ntlawa wun’we.

• Handle ka ku pimisa hi swaku, ‘ni nga yendla yini swaku ni ganya?’ pimisa hi leswi: ‘Hi nga yendla yini swaku hi ganya?’

Ethan a li: “U nga tshameli ku vona swaku i mani a nga ni razão kumbe lweyi a nga phazama. A xa lisima hintamu i ku yendla swaku ka muchadu wa n’wina ku va ni ku rhula mi tlhela mi twanana.”

BIBELE LI LI: “Mi nga pimiseni hi leswi pfunaka n’wina ntsena, kambe pimiselani ni van’wani.” — Vafilipiya 2:3, 4.