Lipoti la Ŵakupharazga Ufumu

Wakamanya Kuti Umoyo Uli na Chilato

YESU wakati wakuzimanya mberere zake. (Yohane 10:14) Usange munthu wali na mtima uwemi ndipo wakutemwa mtende na urunji, mbwenu Yesu wangamuguza na kuŵa mulondezgi wake. Ŵanthu ŵanthena aŵa ŵangaŵa na umoyo wachandulo chomene, nga umo wakachitira mwanakazi munyake wa ku Belgium. Wonani nkhani yake:

“Apo Ŵakaboni ŵa Yehova wakagogodanga pa mulyango, nkhaŵa kuti nkhusuzgika chomene maghanoghano ndipo nkhaghanaghananga vya kujikoma. Nkhakondwa chomene na fundo iyo Ŵakaboni ŵakaniphalira kuti masuzgo ghangamara, kweni nkhagomezganga yayi kuti Chiuta ndiyo wangamazga masuzgo. Pakaŵa kuti pajumpha vyaka 8 kufuma apo nkhalekera kuluta ku tchalitchi, chifukwa nkhatinkhanga chomene upusikizgi uwo ŵanthu ŵakachitanga mu matchalitchi. Kweni apo tikadumbiskananga na Ŵakaboni, nkhamanya kuti vingachitika yayi kuti munthu waŵe wakukondwa kwambura Chiuta.

“Kweni pati pajumpha nyengo yichoko waka, Ŵakaboni ŵa Yehova ŵakaleka kwiza kunyumba. Vinthu vikaŵa makora yayi, nkhadandawura chomene. Pa zuŵa nkhakhweŵanga mapaketi ghaŵiri gha hona ndipo nyengo zinyake nkhamwanga munkhwala wakuzweteska wongo. Nkhamba kuchitaso vyamizimu, chifukwa nkhakhumbanga kuyowoyeskana na agogo ŵane awo ŵali kufwa. Nausiku para nagona, nkhalotanga viŵanda ntheura nkhawopanga chomene! Ivi vikachitika kwa myezi yinandi. Mise yiliyose nkhawopanga usange nili nekha pa nyumba.

“Zuŵa linyake nkhaluta kukanyolorapo malundi, nkhenda nthowa iyo nkhatemwanga yayi kwenda. Nkhafika pa malo ghanyake apo ŵakazengangapo chinyumba chikuru, ndipo pakaŵa ŵanthu ŵanandi chomene. Apo nkhasendeleranga pafupi, nkhasanga kuti Mbakaboni ŵa Yehova ŵakuzenga Nyumba ya Ufumu. Mbwe nkhamba kughanaghanira vya Ŵakaboni awo ŵakizanga kunyumba kwane, ndipo nkhatenge usange charu chose chingaŵa na ŵanthu nga aŵa, vinthu vingenda makora chomene.

“Nkhakhumbisiska chomene kuti Ŵakaboni ŵa Yehova ŵizengeso kunyumba, ntheura nkhadumbiskana na yumoza wa ŵanthu awo ŵakazenganga apa. Nkhalomba kwa Chiuta, ndipo pati pajumpha mazuŵa 10 munthu yura nkhadumbiskana nayo pakwamba wakiza kunyumba kwane. Wakati tilutilire kusambira Baibolo, nkhazomera ndipo nkhakondwa chomene. Zuŵa leneliro wakanichemera ku maungano ku Nyumba ya Ufumu. Nkhazomera. Kakaŵa kakwamba kuwona ivyo vikachitikanga! Kwanyengo yitali nkhapenjanga ŵanthu awo ŵakutemwana zanadi, kweniso ŵakukondwa. Paumaliro nkhaŵasanga!

“Kufuma waka pa zuŵa ili, nkhajombanga yayi ku maungano. Pati pajumpha masabata ghatatu, nkhaleka kukhweŵa hona. Nkhataya mabuku gha vyamasenga, nkhaleka kupulikizga sumu za viwawa, ndipo nkhawona kuti viŵanda navyo vikamba kunichimbira. Nkhamba kuchita vinthu ivyo vikukolerana na fundo za mu Baibolo za Yehova, ndipo pakati pajumpha myezi yitatu nkhamba kupharazga makani ghawemi. Pati pajumpha myezi 6 nkhabatizika. Pakati pajumpha mazuŵa ghaŵiri kufuma apo nkhabatizikira, nkhamba kuchita upayiniya wakanyengo.

“Nkhuwonga chomene Yehova pa viwemi vyose ivyo wanichitira. Paumaliro umoyo wane ukaŵa wachandulo. Enya, zina la Yehova ntchigongwe chakukhora icho nkhabisamamo na kuvikilirika. (Zintharika 18:10) Nkhujipulika nga umo wakajipulikira uyo wakalemba Salimo 84:10, iyo wakati: ‘Zuŵa limoza mu maluŵaza ghinu ndiwemi kuluska mazuŵa 1,000 kunyake. Nasankha kwimilira pa mulyango wa nyumba ya Chiuta wane kuluska kukhala mu mahema gha uheni.’”

Mwanakazi wamtima uwemi uyu, wakawusanga umoyo wachandulo. Ntheura waliyose uyo wakupenja Yehova na mtima uwemi nayo wangawusanga.