Иегова — со Инмар, кудӥныз кулэ тодматскыны

КЫЗЬЫ тӥ малпаськоды, вань-а мар ке, мар тӥлесьтыд улондэс умойгес карыны быгатысал? Трос адямиос шӧдӥзы, соослэн улонзы умойгес луиз шуыса, куке соос Инмар сярысь тодыны кутскизы. Инмар сярысь тодон-валан тӥледлы пайда ваёз али но, азьланяз но.

Иегова Инмарлэн, Библилэн Авторезлэн, потэ, ми соин мед тодматскомы шуыса. Псаломъёсты гожъясь вераз: «Мед тодозы, Тон Одӥгнад — Кузё-Инмар, быдэс музъем выллы Вылысь Инмар луиськод шуыса». Инмар тодэ, со сярысь тодон-валан милемлы пайда вае шуыса. Со вера: «Мон Кузё-Инмар тынад Инмаред, тонэ пайдаё ужлы дышетӥсь». Кыӵе пайда ми басьтӥськомы Иегова Инмарен тодматскыса? (Псалтирь 82:19; Исаия 48:17).

Кылсярысь, Инмар юрттэ милемлы шуг-секытъёсты вормыны, каньыл сюлмын улыны но оскыны, азьланяз ваньмыз умой луоз шуыса. Со сяна, Иегова Инмарез умойгес тодыса, ми кутскиськомы мукет сямен учкыны юанъёс шоры, кудъёсыз сюлмаськыто быдэс дунне вылысь трос адямиосты. Кыӵе со юанъёс?

Тодӥськоды-а тӥ, малы тӥ улӥськоды?

Наука но техника удысын трос азинсконъёс лэсьтэмын ини ке но, адямиос али но валэктыны уг быгато на: малы ми улӥськомы? Мар возьма милемыз азьланяз? Адями та юанъёслы валэктонъёсты уг шедьты ке, со шудо луыны уг быгаты. Тросэз адямиос озьы ик уло. 1990-тӥ аръёслэн пумазы Германиын ортчытэм эскерон возьматӥз, трос адямиос уг тодо, мар понна улоно. Оло нош, тӥ палан но сыӵе ик югдур.

Адями уг тоды ке, мар понна со улэ, солэн азьланезлы осконэз но ӧвӧл, шуг-секытъёсын нюръяськыны кужымез но уг тырмы. Тросэз сыӵе мылкыдзэс вормыны тыршо, нимо-дано луыса яке коньдон люкаса. Но со уг юртты. Соин куддыръя адямиослэн улэмзы но уг поты ни. Озьы вал егит чебер кышномуртэн, кудӥз сярысь гожъязы Франциысь одӥг газетын. Пичи дырысеныз ик со кышномурт туж узыр улӥз, озьы ке но со шудо ӧй вал. Соин, изён эмъюм юыса, со аслэсьтыз йырзэ быдтӥз. Тӥ но тодӥськоды, дыр, сыӵе адямиосты.

Куд-ог адямиос малпало, наука улон сярысь ваньзэ вераны быгатэ шуыса. Но Германиысь одӥг журнал вера: «Наука троссэ валэктыны быгатэ ке но, со уг быгаты сётыны милемлы пайдаё визь-кенешъёс». Со журналын верамын на, пӧртэм научной теориос, кылсярысь, эволюция сярысь теория, уг сёто шуыса азьланезлы оскон но уг юртто шуг-секытъёс пыр потыны. Зэм, тодосчиослы луыса ми троссэ тодӥськомы со сярысь, мар луэ адямилэн мугораз, кызьы со воштӥське но мар соин луэ. Но тодосчиос уг быгато валэктыны, мар понна ми улӥськомы но мар возьма милемыз азьланяз. Наукалы гинэ оскиськид ке, улонысь тужгес но кулэ луись юанъёслы валэктонъёс уд шедьты. Озьыен, кызьы вера Германиысь одӥг газет, туннэ адямиослы туж кулэ пайдаё визь-кенешъёс.

Кылдытӥсь сяна, нокин но улонын тужгес но кулэ луись юанъёслы валэктонъёс сётыны уг быгаты. Инмар адямиосты кылдытӥз бере, со тодэ, малы ми улӥськомы. Библиын верамын, Иегова адямиосты кылдытӥз, соос музъем вылын мед улозы, музъемез мед тырмытозы но со сярысь мед сюлмаськозы шуыса. Инмарлэн потэ, адямиос мед тыршозы шуыса со кадь шонерлыкоесь, визьмоесь но яратӥсесь луыны. Ми тодӥськомы ке, малы Иегова милемыз кылдытӥз, ми валаськомы, малы ми улӥськомы (Улон-вылон 1:26—28).

Мар карыны луоз?

Малы ми улӥськомы? Мар возьма милемыз азьланяз? Та юанъёслы валэктонъёс тӥ али ке но ӧд шедьтэ на ке, Библия ӧте тӥледыз матэгес тодматскыны Иеговаен. Иисус вераз: «Та быронтэм улон луэ: соос мед тодозы Тонэ, одӥг гинэ зэм Инмарез, но Тонэн ыстэм Иисус Христосэз». Озьы ик Библия ӧте Инмар кадь яратӥсесь луыны но возьматыны, ми возьмаськомы шуыса дырез, ку Инмарлэн Эксэйлыкез кивалтоз. Та ӧтёнлы вазиськиды ке, тӥ шудогес луоды но тӥляд азьланезлы осконды луоз. Со сяна, тӥ шедьтоды валэктонъёс со юанъёслы, кудъёсыз тӥледыз сюлмаськыто вал (Иоанн 17:3; Екклесиаст 12:13).

Макем со кулэ, вераны быгатэ Ханс a. Азьло со Инмарлы оске вал ке но, осконэз солы номыр уг сёты вал. Ханс яратэ вал наркотикъёсты, кышномуртъёсты, мотоциклъёсты но йыружъёс лэсьтэ вал. «Мыным ялан мар ке уг тырмы вал. Улонэ шумпотон уг вайы вал»,— тодаз вае со. Куке Ханслы 25 арес пала вал, со малпаз Иегова сярысь тросгес тодыны. Со кутскиз Библиез лыдӟыны. Иеговаен матэгес тодматскыса, со тодӥз, мар понна улоно. Ханс улонзэ воштӥз, пылатӥськиз но Иеговалэн Адӟись-Ивортӥсез луиз. Со дас ар ини, вань дырзэ сётыса, Инмарлы ужа-тырше. Со вера: «Иеговалы ужан-тыршон — со самой умоез, мар вань улонын. Сое номырин но уд ӵошаты. Иеговаен тодматскыса, мон валай, мар понна улоно».

Малы ми улӥськомы шуыса гинэ адямиос уг малпасько, соосты мукет юанъёс но сюлмаськыто. Дуннеын югдур пумен секытгес луэ. Соин ик тросгес но тросгес адямиос малпаськыны кутско мукет юан вылын.

Малы сомында курадӟонъёс?

Курадӟонэн пумиськыкуз, адями малпа: «Малы со луиз?» Та юанлы со шонер валэктон шедьтэ ке, солэн кужымез луэ азьланяз улыны. Нош шонертэм валэктон шедьтэ ке, со курадӟыса улэ. Тани, кылсярысь, мар луиз Бруниен.

«Кӧня ке ар талэсь азьло мынам нылы кулӥз,— вера Бруни нимо кышномурт.— Мон Инмарлы оскисько вал, соин ик священник доры мынӥ. Со вераз мыным, Инмар мынэсьтым Зузаннаме инме басьтӥз шуыса но табере со кылчин. Нылы кулэм бере улонэ йырчукин кошкиз. Мынам Инмарлы туж воже потӥз, со мынэсьтым нылме басьтӥз шуыса». Бруни трос аръёс ӵоже кайгырыса улӥз. Со вера на: «Со вакытэ мон доры одӥг кышномурт лыктӥз, Иеговалэн Адӟись-Ивортӥсез. Со возьматӥз мыным Библиысь, Инмарлы вожез поттыны кулэ ӧвӧл шуыса. Иегова Зузаннаме инме ӧз басьты. Нылы кылчин ӧз луы. Со висьыны усиз, малы ке шуоно вань адямиос сьӧлыкоесь. Зузанна али изе. Со возьма, ку Иегова сое улӟытоз. Озьы ик мон тодӥ, Инмар адямиосты кылдытӥз, соос пумтэм вапумъёс ӵоже рай музъем вылын мед улозы шуыса. Ӝоген со аслэсьтыз малпанзэ быдэстоз. Куке мон умойгес тодӥ Иеговаез, кыӵе солэн сямъёсыз, мынам соин кусыпъёсы юнмазы но мыным капчигес луиз» (Псалтирь 36:29; Апостолъёслэн ужъёссы 24:15; Римъёслы 5:12).

Трос миллион адямиос пӧртэм пумо курадӟонъёсын пумисько: семьяысьтызы кин ке кулэ, ожъёс кутско, сютэм улон, инкуазь шимучыръёс луо. Брунилы капчигес луиз, куке со тодӥз Библиысь, Иегова курадӟеммы понна янгыш ӧвӧл но солэн уг поты вал, адямиос курадӟыса мед улозы шуыса. Со сяна, со тодӥз на: ӝоген Иегова ваньзэ тупатоз. Нош улонлэн уродгес но уродгес луэмез возьматэ, ми «берпум аръёсы» улӥськомы шуыса. Ӝоген улон умой пала воштӥськоз (2 Тимофейлы 3:1—5; Матфей 24:7, 8).

Кызьы Инмарен тодматсконо

Ханс но, Бруни но Инмарлы оско вал. Но соослэн со сярысь тодон-валанзы ӧжыт вал. Нош куке соос Иегова сярысь тросгес тодӥзы, со соослы шумпотон вайиз. Соос улонысь тужгес но кулэ луись юанъёслы валэктонъёс шедьтӥзы. Солы луыса соос шудо луизы но азьланезлы осконзы кылдӥз. Со выллем ик югдурзы вал Иеговалэн мукет ужась-тыршисьёсызлэн но.

Иеговаен тодматскеммы потэ ке, нырысь кутсконо Библиез сак эскерыны. Библиын гожтэмын, кин со Иегова но мае со возьма милесьтым. Озьы лэсьтӥзы нырысетӥ даурысь куд-ог адямиос. Тани мар вера историк но эмъясь Лука Грециысь Верия карысь иудейёс сярысь: «Инмар кылэз соос шумпотыса кабыл басьтӥзы. Шонер-а тазьы луэ, уг-а соиз, я таиз верам шуыса, нуналлы быдэ Священной Гожтэмъёсты эскерыса улӥзы» (Апостолъёслэн ужъёссы 17:10, 11).

Нырысетӥ даурысь христианъёс но огазе люкаськылӥзы Инмарлы йыбыртъян понна (Апостолъёслэн ужъёссы 2:41, 42, 46; 1 Коринфъёслы 1:1, 2; Галатъёслы 1:1, 2; 2 Фессалоникаослы 1:1). Озьы ик туннэ но Иеговалэн Адӟись-Ивортӥсьёсыз, огазе люкаськыса, пумиськонъёс ортчытъяло. Со пумиськонъёс юртто Иеговалы матэ кариськыны но солы шумпотыса ужаны-тыршыны. Иеговалэн Адӟись-Ивортӥсьёсыныз кусып возён мукет пайда вае на. Иеговалэн Адӟись-Ивортӥсьёсыз тыршо Иеговалэсь адӟем карыны. Соин ик, тӥ соосын ӵош пумиськонъёсазы ветлӥды ке, дышетскоды Иеговалэсь адӟем карыны но со сярысь тросгес тододы (Еврейёслы 10:24, 25).

Тӥ вералоды, дыр: «Мар мында кужым пононо Инмарен тодматскон понна!». Зэм, кужым пононо. Но малпалэ ай, кӧня кужым пононо, кыӵе ке мукет ужпумез быдэстон понна но. Кылсярысь, верано ке спортсменъёс сярысь. Кӧня соос кужым поно ӵошатсконъёслы дасяськон понна! Тани мар вера Франциысь куасэн бызьылӥсь Жан-Клод Кили, кудӥз олимпийской шудонъёсын зарни медаль басьтӥз: «Дасяськыны кутсконо ини 10 арлы азьлогес. Арысь аре ужпумъёс пуктоно но соосты быдэстоно. Котькуд нунал со сярысь малпаськоно... [...] Дасяськыку мугорез гинэ ужатоно ӧвӧл, нош озьы ик йырез но ужатоно на, араз 365 нуналзэ ик». Кӧня дыр но кужым сёто спортсменъёс, оло нош, 10 минут гинэ кыстӥськись ӵошатсконъёс понна! Табере малпалэ ай, кӧня пайда ваёз, ми Иегова сярысь тодыны тыршимы ке!

Нуналысь нуналэ юнмась кусыпъёс

Котькуд адямилэн улонзэ умойгес каремез потэ. Тӥледлы потэ ке, тӥ уд тодӥське шуыса, мар понна улӥськоды, яке тӥляд тодэмды потэ ке, малы сомында курадӟонъёс, соку тӥледлы Иегова Инмар сярысь тодоно. Со сярысь тодыны луоз Библиысь. Инмар сярысь тодыса, тӥляд улонды умойгес луоз.

Дугдомы-а ми куке Иегова сярысь выльзэ тодэмысь? Соос, кинъёс солы трос аръёс ӵоже ужало-тыршо ини, ялан со сярысь выльзэ тодо. Со бадӟым шумпотон вае но Иегова Инмарен кусыпъёсмес юнматэ. Ми соглаш луиськомы апостол Павеллэн кылъёсыныз. Со вераз: «Э, Инмарлэн тодонэзлэн, визьлыкезлэн пыдэстэм узырлыкез! Валаны луонтэмесь Солэн судъёсыз, эскерыны луонтэмесь Солэн сюресъёсыз! Кузё-Инмарлэсь визьзэ тодыны кин быгатӥз ни? Яке кин Солэн визь-кенеш сётъясез вал?» (Римъёслы 11:33, 34).

[Сноска]

[Ватсан, 5-тӥ бам]

Адямиос али ке но валэктыны уг быгато: малы ми улӥськомы? Мар возьма милемыз азьланяз?

[Ватсан, 6-тӥ бам]

«Куке мон умойгес тодӥ Иеговаез, кыӵе солэн сямъёсыз, мынам соин кусыпъёсы юнмазы».

[Ватсан, 7-тӥ бам]

«Иеговалы ужан-тыршон — со самой умоез, мар вань улонын. Сое номырин но уд ӵошаты. Иеговаен тодматскыса, мон валай, мар понна улоно».