OVOLANDU AKUNDI VUSOMA

Eye wa Limbuka Okuti Omuenyo u Kuete Ocimãho

YESU wa popia okuti, wa kũlĩha olomeme viaye. (Yoano 10:14) Wosi o kuete utima wa sunguluka, ocisola, ombembua kuenda esunga, o ka kokiwa kolondonge via Yesu. Omunu waco o ka limbuka okuti, omuenyo u kuete ocimãho, ndeci ca pita lukãi umue wo kofeka yo Beljika. Ulandu waye u popia ndoco:

“Vepuluvi Olombangi Via Yehova via totola pepito liange, nda sumuile calua kuenda nda yonguile oku li ponda. Nda sola ovina Olombangi Via Yehova via popia viatiamẽla koku pua kuovitangi violuali lulo, pole, sia solele ocisimĩlo cokuti, Suku wa kongeliwa vovitangi viaco. Pa pitile ale anyamo ecelãla, tunde eci nda liwekelepo oku enda konembele omo okuti, sia solaile ombambe va enda oku lekisa. Lolombangi Via Yehova, nda limbuka ocili kovina va popia kuenda nda limbukavo okuti, ndi kala lika komuenyo lekuatiso lia Suku.

“Ca ndi sumuisa calua ceci okuti, noke lioku nyũliwa olonjanja vimue Lolombangi Via Yehova, ovo va liwekapo oku iya. Nda sumuile calua. Nda enda oku sipa calua loku nyua olodroga. Omo okuti, nda yonguile oku sapela la kukululu yange wa fa osimbu, nda sanda umbanda. Omo liaco, nda enda oku kuata usumba walua luteke lika liange, eci olondele via enda oku mbeta! Ovina viaco via li pita vokuenda kuolosãi vimue. Kovoteke osi, nda kuatele usumba omo lioku kala lika liange.

“Eteke limue nda endele oku ka ñuala ñuala kuenje nda pita vonjila yimue okuti lalimue eteke nda pitilemo kuenda nda pitĩla pocitumãlo cimue pa kala oku lingiwa upange umue woku tunga. Nda komõha eci nda mola okuti, pocitumãlo caco pa kala omanu valua. Nda amela ocipepi, kuenje nda limbuka okuti Olombangi Via Yehova via kala oku tunga Onjango yimue Yusoma. Nda ivailuka otembo ovo va enda oku ndi nyũla kuenda nda sokolola ndomo oluali nda lua kala nda okuti, omanu vosi va kaile Olombangi Via Yehova.

“Nda yonguile okuti, Olombangi Via Yehova vi tiuka konjo yange kuenje nda sapela la vamue va kala oku tunga Onjango Yusoma. Nda likutilila ku Suku kuenje noke yoloneke ekũi, ulume wa sapelele lame tete, weya oku ndi nyũla. Eye wa ndi sapuila oco tu amameko oku lilongisa Embimbiliya kuenje nda tava lesanju. Vepuluvi liaco, haico a ndi laleka oku enda kohongele Vonjango Yusoma. Nda tava oku enda. Lalimue eteke nda muile ovina nda sangamo! Tunde osimbu, nda kala oku sandiliya omanu va li sole pokati kuenda va likuetele ombembua. Omanu vaco nda va sanga!

“Noke, nda fetika oku enda enda kolohongele viosi. Eci pa pita olosemana vitatu, nda liwekapo oku sipa. Nda inasi alivulu osi oku kũlĩhĩsa olombungululu kuenda ovisungo viatiamẽla ku Satana kuenje nda limbuka okuti, olondele ka via kuatele vali unene kokuange. Nda ambata omuenyo wange ndomo ci likuata lolonumbi via Yehova kuenje noke liolosãi vitatu, nda fetika oku kunda olondaka viwa. Eci pa pita olosãi epandu, nda papatisiwa. Noke yoloneke vivali, nda fetika upange wakundi va sokamo.

“Ndi pandula Yehova omo liovina viosi viwa a linga kokuange. Cilo, omuenyo wange u kuete ocimãho. Ocili, onduko ya Yehova, ocikolo ca pama muna nda sanga ocitililo kuenda eteyuilo. (Olosapo 18:10) Ndi liyevite ndeci ukualosamo a liyeva poku soneha Olosamo 84:10 hati: ‘Eteke limosi povitali viove lia velapo, ohulukãi koloneke kocitumãlo cikuavo ci sule! Nda nõlapo oku talama puvelo wonjo ya Suku yange Okuti oku kala volombalaka violondingaĩvi hacoko.’”

Ukãi waco ukuotima wa sunguluka, wa limbuka okuti, omuenyo u kuete ocimãho. Cimuamue haico ci pondola oku li pita lomanu vosi va sanda Yehova lutima wa sunguluka.