•  Mvulatswinga 2

•  Lupfumo Lwo Tumbulwaho Ipfini Ḽa Mudzimu 3-5

  •  Nyambo 3

  •  U Fukula Madzanga A Re Bivhilini 4

  •  Muvhalo Wa Bivhili 5

•  Khwinisani Nḓila Ine Na Huwelela Ngayo 6-14

  •  U Thoma Nyambedzano 7

  •  U Vhuyelela 8

 U Ita Vhafunziwa 9

•  U Ṱalutshedza Zwine Na Zwi Tenda 10

•  Nyambo 11

•  Mafhungo 12

•  Vhuimo 13

•  U Shumisa Vidio Na Khandiso 14

•  Vhutshilo Ha Mukriste 15-16

•  Pfunzo Ya Bivhili Ya Tshivhidzo 16

•  Maipfi A U Phetha 17

•  U Khoḓa Na Nyeletshedzo 18

•  Tshifhinga 19

•  Musi No Dalelwa Nga Mulavhelesi Wa Ḽiisela 20

•  Vhege Ya Guvhangano Kana Ya Buthano 21

•  Vhege Ya Tshihumbudzo 22

•  Mulavhelesi Wa Muṱangano Wa Vhutshilo Na Vhuḓinḓa 23

•  Mudzulatshidulo Wa Muṱangano Wa Vhutshilo Na Vhuḓinḓa 24

•  Muṋei Wa Nyeletshedzo 25

•  Dziṅwe Kilasi 26

•  Vidio 27

1. Hovhu vhulivhisi vhu ḓo thusa vhoṱhe vha re na tshipiḓa kha Muṱangano Wa Vhutshilo Na Vhuḓinḓa Hashu Ha Vhukriste. Musi vha sa athu lugiselela zwipiḓa zwavho, vha fanela u vusulusa vhulivhisi vhu ambaho nga zwipiḓa zwavho samusi zwo sumbedzwa kha Tshibugwana Tsha Muṱangano Wa Vhutshilo Na Vhuḓinḓa na vhune vha ḓo vhu wana henefha. Vhahuweleli vhoṱhe vha fanela u ṱuṱuwedzwa uri vha ḓiṅwalise u ṋea nyambo dza vhagudiswa. Na vhane vha ḓa miṱanganoni tshifhinga tshoṱhe vha nga ḓiṅwalisa arali vha tshi tenda zwine Bivhili ya funza nahone vha tshi tshila nga nḓila ine Vhakriste vha tea u tshila ngayo. Mulavhelesi wa Muṱangano Wa Vhutshilo Na Vhuḓinḓa u fanela u ṱalutshedza vhane vha tama u ḓiṅwalisa naho vha sa athu vha vhahuweleli uri ndi mini zwine zwa lavhelelwa khavho na u vha vhudza arali vha tshi fanelea. Zwenezwi zwi fanela u itwa mugudisi wawe wa Bivhili e hone (kana mubebi ane a vha Ṱhanzi). Zwithu zwine zwa ṱoḓea uri vha fanelee zwi fana na zwine zwa ṱoḓea uri muthu a fanelee u vha muhuweleli a songo lovhedzwaho.—od ndim. 8, phar. 8.

2. Munithi muthihi. Vhege iṅwe na iṅwe, nga murahu ha luimbo na thabelo ya u vula, mudzulatshidulo wa Muṱangano Wa Vhutshilo Na Vhuḓinḓa u tea u ita uri vhathetshelesi vha vhe na dzangalelo kha zwine vha ḓo zwi guda kha muṱangano. Mudzulatshidulo u tea u livhisa ṱhogomelo kha mbuno dzine dza ḓo fhaṱa tshivhidzo.

 3. Nyambo: Mimunithi ya fumi. Kha Tshibugwana Tsha Muṱangano Wa Vhutshilo Na Vhuḓinḓa ni ḓo wana tshiṱoho na manweledzo a mbuno mbili kana tharu. Heyi nyambo i tea u avhelwa muhulwane kana mushumeli a faneleaho. Musi hu tshi thomiwa bugu ntswa ya Bivhili kha muvhalo wa Bivhili wa vhege, hu ḓo tambiwa vidio ya marangaphanḓa a yeneyo bugu. Tshiambi tshi nga kha ḓi sumbedza nḓila ine zwo sumbedzwaho kha vidio zwa tshimbidzana ngayo na tshiṱoho. Naho zwo ralo, tshiambi tshi tea u ita vhungoho ha uri tshi ṱanganya mbuno dzo ṅwalwaho kha tshibugwana. Zwiṅwe hafhu, arali tshifhinga tshi tshi tenda, tshiambi tshi tea u shumisa zwavhuḓi zwifanyiso zwo sumbedzwaho. Tshi nga shumisa na mbuno dzi bvaho kha dziṅwe khandiso, dzine dza tikedza mafhungo ane a khou haseledzwa.

 4. U Fukula Madzanga A Re Bivhilini: Mimunithi ya fumi. Heyi ndi khaseledzo ya mbudziso na phindulo hu songo itwa marangaphanḓa kana magumo. I fanela u ṋekedzwa nga muhulwane kana mushumeli a faneleaho. Tshiambi tshi fanela u vhudzisa vhathetshelesi mbudziso dzoṱhe. Zwiṅwe hafhu, a nga khetha u vhala kana u sa vhala ndimana dzoṱhe dzo redzwaho. Vhathetshelesi vha tea u ṋekedza phindulo dzi sa fhiri mithethe ya 30.

 5. Muvhalo Wa Bivhili: Mimunithi miṋa. Yeneyi nyambo ya mugudiswa i tea u ṋekedzwa nga muthu wa tshinnani. Mugudiswa u fanela u vhala luṅwalo lwe a avhelwa lwone a songo ṋea marangaphanḓa kana magumo. Mudzulatshidulo wa muṱangano u tea u livhisa ṱhogomela kha u thusa vhagudiswa uri vha vhale nga nḓila yavhuḓi, vha pfesese zwine vha zwi vhala, vha vhale nga u tou elela, vha ombedzele nga nḓila yo teaho, vha shandule ipfi, na uri vha awele fhethu ho teaho nahone vha vhale nga lwa nzulele. Mulavhelesi Wa Muṱangano Wa Vhutshilo Na Vhuḓinḓa u tea u nanga muthu ane a ḓo ita muvhalo wa Bivhili o sedza vhukoni hawe ngauri nga zwiṅwe zwifhinga muvhalo wa Bivhili u vha wo lapfa kana u mupfufhi.

6. Mimunithi ya 15. Hetshi tshipiḓa tsha muṱangano tsho itelwa uri vhoṱhe vha wane tshibuli tsha u guda nḓila ya u amba vhuḓinḓani na u khwinisa vhukoni ha u huwelela na u funza. Musi zwi tshi ṱoḓea, vhahulwane vha nga avhelwa nyambo dza vhagudiswa. Mugudiswa muṅwe na muṅwe u fanela u shumela kha mbuno ye a ṋewa yone i bvaho kha bugwana U Funza kana Funani Vhathu ine ya wanala tsini na nyambo yawe kha Tshibugwana Tsha Muṱangano Wa Vhutshilo Na Vhuḓinḓa. Nga zwiṅwe zwifhinga, hu ḓo vha na tshipiḓa tshine tsha vha tsha khaseledzo. Tshenetsho tshipiḓa tshi tea u itwa nga muhulwane wa tshivhidzo kana mushumeli ane a fanelea.—Sedzani  phara 15 u itela u vhona uri tshipiḓa tsha khaseledzo tshi tea u itwa hani.

 7. U Thoma Nyambedzano: Heyi nyambo ya mugudiswa i nga kha ḓi ṋekedzwa nga muthu wa tshinnani kana wa tshifumakadzini. Muthusi wawe u tea u vha wa mbeu i fanaho kana a vhe e muraḓo wa muṱa wawe. Mugudiswa na muthusi wawe vha nga i ṋekedza vho tou dzula kana vho tou ima.—U itela u wana zwo engedzeaho nga ha mafhungo ane ha nga ambiwa nga hao na vhuimo, sedzani  phara 12 na  13.

 8. U Vhuyelela: Heyi nyambo ya mugudiswa i nga kha ḓi ṋekedzwa nga muthu wa tshinnani kana wa tshifumakadzini. Muthusi wawe u tea u vha wa mbeu i fanaho. (km 5/97 p. 2) Mugudiswa na muthusi wawe vha nga i ṋekedza vho tou dzula kana vho tou ima. Mugudiswa u tea u sumbedza zwine zwa tea u ambiwa musi muhuweleli a tshi vhuyelela kha muthu we a sumbedza dzangalelo kha nyambedzano yo fhiraho.—U itela u wana zwo engedzeaho nga ha mafhungo ane ha nga ambiwa nga hao na vhuimo, sedzani  phara 12 na  13.

 9. U Ita Vhafunziwa: Heyi nyambo ya mugudiswa i nga kha ḓi ṋekedzwa nga muthu wa tshinnani kana wa tshifumakadzini. Muthusi wawe u tea u vha wa mbeu i fanaho. (km 5/97 p. 2) Mugudiswa na muthusi wawe vha nga i ṋekedza vho tou dzula kana vho tou ima. Heyi nyambo i tea u sumbedza pfunzo ya Bivhili yo no thomaho ine ya khou bvela phanḓa. A hu na ṱhoḓea ya uri hu vhe na marangaphanḓa kana magumo nga nnḓa ha musi mugudiswa a tshi khou shumela kha iṅwe ya dzenedzo mbuno. A si khombekhombe uri hu vhalwe phara dzoṱhe dze nyambo ya thewa khadzo.

 10. U Ṱalutshedza Zwine Na Zwi Tenda: Musi tshenetshi tshipiḓa tsha mugudiswa tshi tsha nyambo, tshi fanelwa u itwa nga muthu wa tshinnani. Musi tshenetshi tshipiḓa tsha mugudiswa tshi tsha musumbedzo tshi nga kha ḓi itwa nga muthu wa tshinnani kana wa tshifumakadzini. Muthusi wawe u tea u vha wa mbeu i fanaho kana a vhe e muraḓo wa muṱa wawe. Mugudiswa u fanela u fhindula mbudziso nga nḓila yavhuḓi na i pfalaho a tshi shumisa mafhungo e a ṋewa one. Mugudiswa a nga khetha u amba kana u sa amba nga ha khandiso ine a khou wana khayo mafhungo awe.

 11. Nyambo: Yeneyi ndi nyambo ya mugudiswa ine ya ṋekedzwa nga muthu wa tshinnani. Musi nyambo yo thewa kha mbuno i re kha ṱhumetshedzo A ya bugwana Funani Vhathu, mugudiswa u fanela u sumbedza uri ri nga shumisa hani vese kana dzivese vhuḓinḓani. Sa tsumbo, a nga ṱalutshedza uri vese i nga shumiswa lini, uri i amba mini na uri hu nga thuswa hani muthu uri a i pfesese. Musi nyambo yo thewa kha iṅwe ya mbuno dzi re kha bugwana Funani Vhathu, mugudiswa u fanela u livhisa ṱhogomelo kha uri yeneyo mbuno i nga shumiswa hani vhuḓinḓani. Arali zwi tshi nga thusa, a nga amba nga ha tsumbo i re kha mbuno ya u thoma ya ngudo kana nga ha vese iṅwe na iṅwe yo katelwaho kha ngudo.

   12. Mafhungo: Zwi re kha hei phara na i tevhelaho zwi shuma kha tshipiḓa tsha “U Thoma Nyambedzano” na tsha “U Vhuyelela.” Nga nnḓa ha musi zwo sumbedzwa nga iṅwe nḓila, tshipikwa tsha mugudiswa ndi u huwelela mulaedza wo leluwaho une wa kwama muthu ane a khou amba nae na u sia mbudziso ine vha ḓo haseledza nga hayo tshifhingani tshi ḓaho. Mugudiswa u tea u khetha tshiṱoho tshine tsha tshimbidzana na zwine zwa khou itea nga tshenetsho tshifhinga na tshine tsha shuma tsimuni yawe. A nga khetha u amba kana u sa amba nga ha khandiso kana vidio i re kha Bogisi Ḽa Zwishumiswa Zwa U Funza. Vha gudiswa vha fanela u guda vhutsila ha u amba, nga u sumbedza u vha na ndavha na u amba nga nḓila ya nzulele nṱhani ha u ita musumbedzo wo tou rwelwaho ngomani.

   13. Vhuimo: Mugudiswa u fanela u ita uri vhuimo vhu tshimbidzane na tsimu ya hune a dzula hone. Sa tsumbo:

1.  (1) Nnḓu Nga Nnḓu: Zwi katela u huwelela nnḓu nga nṋdu nga u amba na muthu nga ho livhaho, nga founu kana nga vhurifhi na u dovha wa amba na muthu we wa mu wana musi u vhuḓinḓani ha nnḓu nga nnḓu.

2.  (2) U Huwelela Lu Songo Dzudzanywaho: Ndi u shumisa tshibuli tshiṅwe na tshiṅwe tshine na tshi wana ni tshi khou amba na muthu nga ha zwithu zwo ḓoweleaho u itela u huwelela. Zwenezwi zwi nga katela u amba mafhungo a re Bivhilini na vhane na ṱangana navho mushumoni, tshikoloni, vhahura, musi ni kha tshiendedzi tsha nnyi na nnyi kana fhethu huṅwe na huṅwe musi ni tshi khou ita mishumo yo ḓoweleaho ya ḓuvha ḽiṅwe na ḽiṅwe.

3.  (3) U Huwelela Fhethu Ha Vhomuthumunzhi: Zwenezwi zwi nga katela u huwelela nga tshigariki, u founela vhathu vhe mishumoni, u huwelela tshiṱaraṱani, u huwelela dziphakhani, hune ha paka dzigoloi kana huṅwe na huṅwe hune vhathu vha wanala hone.

 14. U Shumisa Vidio Na Khandiso: Zwi tshi ya nga vhuimo, mugudiswa a nga khetha u shumisa vidio kana khandiso. Arali nyambo ya mugudiswa i na vidio kana arali a khetha u shumisa vidio, u fanela u i sumbedza ane a khou amba nae na u haseledza nga hayo, fhedzi a songo tamba yeneyo vidio.

15. Nga murahu ha luimbo, mimunithi ya 15 ya tshenetshi tshipiḓa i ḓo vha na tshipiḓa tshithihi kana zwivhili zwo itelwaho u thusa vhathetshelesi uri vha shumise Ipfi ḽa Mudzimu vhutshiloni havho. Nga nnḓa ha musi zwo sumbedzwa nga iṅwe nḓila, hedzi nyambo dzi nga avhelwa vhahulwane kana vhashumeli vha faneleaho. Fhedzi ṱhoḓea dza tshivhidzo dzi tea u ṋekedzwa nga muhulwane wa tshivhidzo. Kha tshipiḓa tshine tsha ri “Haseledzani na vhathetshelesi,” tshiambi tshi nga vhudzisa mbudziso kha nyambo yoṱhe u engedza kha mbudziso dzi re hone kha nyambo. Marangaphanḓa ho ngo fanela u lapfa u itela uri mbuno khulwane dzi kone u bvela khagala na uri vhathetshelesi vha kone u shela mulenzhe. Musi hu na nyambedzano, arali zwi tshi konadzea, zwi nga vha zwavhuḓi uri ane ha khou itwa nae nyambedzano a ye tshiṱeidzhini.

  16. Pfunzo Ya Bivhili Ya Tshivhidzo: Mimunithi ya 30. I tea u avhelwa muhulwane a faneleaho. (Zwivhidzo zwi re na vhahulwane vha si gathi zwi nga shumisa vhashumeli vha fanelaho arali zwi tshi ṱoḓea.) Tshigwada tsha vhahulwane tshi fanela u khetha vhane vha fanelea u fara Pfunzo Ya Bivhili Ya Tshivhidzo. Vho khethwaho vha tea u vha vha tshi kona u funza nga nḓila yavhuḓi u itela uri pfunzo i fhele nga tshifhinga, hu ombedzelwe maṅwalo a ndeme na u thusa muṅwe na muṅwe u vhona ndeme ya mbuno dze dza haseledzwa. Vha ḓo thuswa nga u vusulusa vhulivhisi ho ṋewaho malugana na zwipiḓa zwi re na mbudziso na dziphindulo. (w23.04 p. 24, bogisi) Arali mbuno dzoṱhe dza ngudo ine ya khou gudiwa yeneyo vhege dzo bviselwa khagala, a hu na ṱhoḓea ya u lapfisa ngudo. Hu fanela u shumiswa vhavhali na vhafari vha Pfunzo Ya Bivhili Ya Tshivhidzo vha sa fani vhege iṅwe na iṅwe hune zwiimo zwa tenda. Arali mudzulatshidulo wa Muṱangano Wa Vhutshilo Na Vhuḓinḓa a amba uri pfunzo i pfufhifhadzwe, mufari wa yeneyi pfunzo u tea u dzhia phetho ya nḓila ine a ḓo i pfufhifhadza ngayo. A nga kha ḓi vhudzisa mbudziso hu songo vhalwa dziṅwe phara.

17. Mimunithi miraru. Mudzulatshidulo wa Muṱangano Wa Vhutshilo Na Vhuḓinḓa u ḓo vusulusa mbuno khulwane dza muṱangano. U fanela u dovha a ṋea mavhala a nngwe a zwa vhege i ḓaho. A nga ḓivhadza madzina a vhagudiswa vhane vha ḓo ṋekedza nyambo vhege i ḓaho, arali tshifhinga tshi tshi tenda. Nga nnḓa ha musi zwo sumbedzwa nga iṅwe nḓila, hu tea u itwa nḓivhadzo dza ndeme nahone marifhi a ndeme a tea u vhalelwa tshivhidzo nga mudzulatshidulo musi a tshi ita tshipiḓa tsha maipfi a u phetha. Mafhungo a kwamaho zwithu zwo ḓoweleaho, sa tsimu, u kunakisa Holo, ho ngo tea u ḓivhadzwa kha pulatifomo, nḓivhadzo dza hone dzi tea u vhewa kha bodo ya nḓivhadzo. Arali tshifhinga tsha u phetha tsho vhetshelwaho mudzulatshidulo tshi sa ḓo eḓana u ita nḓivhadzo kana u vhala marifhi, mudzulatshidulo u tea u humbela vhahashu vha re na zwipiḓa kha Vhutshilo Ha Mukriste uri vha pfufhifhadze zwipiḓa zwavho nga hune zwa ṱoḓea ngaho. (Sedzani  phara 16 na  19.) Muṱangano u ḓo phethwa nga luimbo na thabelo.

18. Nga murahu ha nyambo iṅwe na iṅwe ya mugudiswa, mudzulatshidulo wa Muṱangano wa Vhutshilo na Vhuḓinḓa u na munithi muthihi wa u khoḓa na u ṋea nyeletshedzo yo thewaho kha ngudo yo sumbedzwaho. Musi mudzulatshidulo a tshi ḓivhadza nyambo i tevhelaho ya mugudiswa, ha nga ḓo amba ngudo ine mugudiswa a khou shumela khayo. Naho zwo ralo, musi mugudiswa o no ṋekedza nyambo nahone mudzulatshidulo o no mu khoḓa, a nga kha ḓi ḓivhadza ngudo ye mugudiswa a vha a tshi khou shumela khayo na u amba uri ndi ngani o shuma zwavhuḓi kha yeneyo mbuno kana a ṱalutshedze nga nḓila yavhuḓi uri ndi ngani a tshi fanela u livhisa ṱhogomelo khulwane kha yeneyo mbuno na uri a nga zwi itisa hani. Mudzulatshidulo a nga kha ḓi dovha a amba zwo engedzeaho nga ha yeneyo nyambo arali a tshi pfesesa uri zwi nga vhuyedza mugudiswa kana vhathetshelesi. Nyeletshedzo yo engedzeaho yo thewaho kha bugwana Funani Vhathu, bugwana U Funza kana kha bugu Tshikolo Tsha Vhuḓinḓa i nga ṋewa tshiphirini nga murahu ha muṱangano kana nga tshiṅwe tshifhinga yo thewa kha mbuno ine mugudiswa a khou shumela khayo kana iṅwe mbuno.—U itela u wana mafhungo o engedzeaho malugana na mushumo wa mudzulatshidulo wa Muṱangano Wa Vhutshilo Na Vhuḓinḓa na muṋei wa nyeletshedzo, sedzani  phara 19,  24 na  25.

 19. Zwipiḓa kana zwine mudzulatshidulo wa Muṱangano Wa Vhutshilo Na Vhuḓinḓa a ḓo zwi amba, a zwo ngo tea u fhirisa tshifhinga tsho vhewaho. Naho kha Tshibugwana Tsha Muṱangano Wa Vhutshilo Na Vhuḓinḓa ho sumbedzwa tshifhinga tsha tshipiḓa tshiṅwe na tshiṅwe, arali mbuno dzoṱhe dzo bvela khagala a ho ngo tea u engedzwa mafhungo u itela u tou shumisa tshifhinga tsho salaho. Arali zwiṅwe zwipiḓa zwa ḽa tshifhinga, nyeletshedzo i tea u ṋewa tshiphirini nga mudzulatshidulo wa Muṱangano Wa Vhutshilo Na Vhuḓinḓa kana nga muṋei wa nyeletshedzo. (Sedzani  phara 24 na  25.) Muṱangano woṱhe, u katela nyimbo na thabelo ya u vula na ya u phetha, zwi fanela u fhedza awara nthihi na mimunithi ya 45.

20. Musi tshivhidzo tsho dalelwa nga mulavhelesi wa ḽiisela, mbekanyamushumo i fanela u farwa nga nḓila ine zwa vha ngayo kha Tshibugwana Tsha Muṱangano Wa Vhutshilo Na Vhuḓinḓa nga nnḓa ha tshipiḓa tshi tevhelaho: Pfunzo Ya Bivhili Ya Tshivhidzo i ḓo dzhielwa vhudzulo nga nyambo ya tshumelo ya mulavhelesi wa ḽiisela ya mimunithi ya 30. Musi hu sa athu ṋekedzwa nyambo ya tshumelo, mudzulatshidulo wa Muṱangano Wa Vhutshilo Na Vhuḓinḓa u ḓo vusulusa nyambo dzo ṋekedzwaho, a ita mavhala a nngwe a vhege i ḓaho, a ita na nḓivhadzo dza ndeme arali dzi hone na u vhala marifhi a ndeme arali a hone nahone nga murahu a vhidze mulavhelesi wa ḽiisela uri a ḓe na tshipiḓa tshawe. Nga murahu ha nyambo ya tshumelo, mulavhelesi wa ḽiisela u ḓo phetha muṱangano nga luimbo lwe a lu khetha. A nga kha ḓi humbela muṅwe wahashu uri a phethe nga thabelo. Hu songo farwa dziṅwe kilasi nga luambo lune lwa shumiswa tshivhidzoni musi no dalelwa nga mulavhelesi wa ḽiisela. Tshigwada tshi nga fara miṱangano yatsho na musi mulavhelesi wa ḽiisela o dalela tshivhidzo tshine tsha tikedza tshenetsho tshigwada. Naho zwo ralo, tshenetsho tshigwada tshi tea u vha hone musi mulavhelesi a tshi ṋekedza nyambo ya tshumelo.

21. A hu farwi miṱangano ya tshivhidzo nga vhege ya guvhangano kana buthano. Tshivhidzo tshi tea u humbudzwa uri mafhungo a miṱangano ya dzenedzo vhege a fanela u gudiwa nga muthu nga eṱhe kana sa muṱa.

22. Arali Tshihumbudzo tshi vhukati ha vhege, Muṱangano Wa Vhutshilo Na Vhuḓinḓa u nga si vhe hone.

23. Muhulwane o khethwaho nga tshigwada tsha vhahulwane u ḓo vha mulavhelesi wa Muṱangano Wa Vhutshilo Na Vhuḓinḓa. Vhuḓifhinduleli hawe ndi u ita vhungoho ha uri wonoyo muṱangano wo dzudzanywa zwavhuḓi nahone u farwa u tendelana na hovhu vhulivhisi. U fanela u shumisana na muṋei wa nyeletshedzo nga nḓila yavhuḓi. Musi Tshibugwana Tsha Muṱangano Wa Vhutshilo Na Vhuḓinḓa tshi tshi vha hone, mulavhelesi wa Muṱangano Wa Vhutshilo Na Vhuḓinḓa u ḓo avhela vhathu zwipiḓa zwoṱhe zwa yeneyo miṅwedzi mivhili. Hezwi zwi katela nyambo dza vhagudiswa na dzi sa itwi nga vhagudiswa na uri ndi nnyi ane a ḓo vha mudzulatshidulo. U ḓo shumisa vhahulwane vha faneleaho vhe vha khethwa nga tshigwada tsha vhahulwane uri vha vhe mudzulatshidulo. (Sedzani  phara 3-16 na  24.) Musi a tshi avhela vhagudiswa nyambo, u tea u ṱhogomela miṅwaha yavho, tshenzhelo na uri vho vhofholowa naa u amba nga ha mafhungo ane a khou haseledzwa. U fanela u ita zwi fanaho musi a tshi avhela na zwiṅwe zwipiḓa zwa muṱangano. Vhathu vhoṱhe vha tea u avhelwa zwipiḓa kana nyambo hu tshee ho sala vhege tharu uri vha ṋekedze nyambo. Vhagudiswa vha tea u ṋewa nyambo hu tshi shumiswa fomo Our Christian Life and Ministry Meeting Assignment (S-89). Mulavhelesi wa Muṱangano Wa Vhutshilo Na Vhuḓinḓa u tea u ita vhungoho ha uri mbekanyamushumo ya muṱangano yo nambatedzwa fhethu hune ha nambatedzwa hone dzinḓivhadzo. Tshigwada tsha vhahulwane tshi nga nanga muhulwane kana mushumeli uri a mu thuse. Naho zwo ralo, ndi vhahulwane fhedzi vhane vha fanelea u avhela vhathu zwipiḓa zwi sa itwi nga vhagudiswa.

24. Vhege iṅwe na iṅwe, muhulwane u ḓo vha mudzulatshidulo wa Muṱangano Wa Vhutshilo Na Vhuḓinḓa. (Zwivhidzo zwi re na vhahulwane vha si gathi zwi nga shumisa vhashumeli vha faneleaho arali zwi tshi ṱoḓea.) U ḓo hwala vhuḓifhinduleli ha u dzudzanya marangaphanḓa na maipfi a u phetha. U dovha a ḓivhadza zwipiḓa zwoṱhe nahone zwi tshi ya nga uri hu na vhahulwane vhangana, a nga kha ḓi fara zwiṅwe zwipiḓa zwa wonoyo muṱangano, zwihuluhulu zwipiḓa zwa vidio fhedzi i si na khaseledzo. Ho ngo fanela u ambesa musi nyambo i tshi fhela na musi a tshi ḓivhadza i tevhelaho. Tshigwada tsha vhahulwane tshi ḓo khetha vhahulwane vha faneleaho u vha mudzulatshidulo. Vhahulwane vha faneleaho vha avhelwa nga u tou sielisana u vha mudzulatshidulo. Zwi tshi ya nga zwiimo zwa tshivhidzo, mulavhelesi wa Muṱangano Wa Vhutshilo Na Vhuḓinḓa a nga vha mudzulatshidulo u fhira vhaṅwe vhahulwane vha faneleaho. Arali muhulwane a tshi fanelea u fara Pfunzo Ya Bivhili Ya Tshivhidzo, kanzhi u a fanelea u vha mudzulatshidulo. Naho zwo ralo, ni songo hangwa uri muhulwane ane a ḓo vha e mudzulatshidulo u ḓo fanela u khoḓa mugudiswa o ṋekedzaho nyambo na u mu ṋea nyeletshedzo nga nḓila yavhuḓi arali zwi tshi ṱoḓea. Mudzulatshidulo u dovha a vha na vhuḓifhinduleli ha u ita vhungoho ha uri muṱangano u fhela nga tshifhinga. (Sedzani  phara 17 na  19.) Arali mudzulatshidulo a tshi vhona zwo tea nahone zwi tshi konadzea, hu nga imiswa iṅwe khudzaipfi pulatifomoni u itela uri a kone u ḓivhadza nyambo i tevhelaho musi wahashu o lindela o ima kha khudzaipfi ya tshiambi. Zwiṅwe hafhu, mudzulatshidulo a nga kha ḓi dzula pulatifomoni ho vhewa ṱafula musi hu tshi khou itwa Muvhalo Wa Bivhili na kha tshipiḓa Khwinisani Nḓila Ine Na Huwelela Ngayo. Zwenezwi zwi nga vhulunga tshifhinga.

25. Hune zwa konadzea, ndi zwavhuḓi uri honovhu vhuḓifhinduleli vhu hweswe muhulwane ane a vha tshiambi tshi re na tshenzhelo. Vhuḓifhinduleli ha muṋei wa nyeletshedzo ndi u ṋea nyeletshedzo tshiphirini kha muhulwane kana mushumeli malugana na nyambo naho i ifhio ine a nga i ṋekedza arali zwi tshi ṱoḓea, u katela na nyambo dza kha Muṱangano Wa Vhutshilo Na Vhuḓinḓa, nyambo dza khagala na u fara kana u vhala kha Pfunzo Ya Tshiingamo kana Pfunzo Ya Bivhili Ya Tshivhidzo. (Sedzani  phara 19.) Arali hu na vhahulwane vho vhalaho tshivhidzoni vha re na vhukoni ha u funza, ṅwaha muṅwe na muṅwe hu nga avhelwa muṅwe muhulwane a faneleaho uri a ite wonoyu mushumo. A zwi ṱoḓei uri muṋei wa nyeletshedzo a ṋee nyeletshedzo nga murahu ha nyambo iṅwe na iṅwe.

26. Zwi tshi ya nga tshivhalo tsha vhagudiswa, hu nga kha ḓi vhumbiwa dziṅwe kiḽasi u itela u fara nyambo dza vhagudiswa. Kiḽasi iṅwe na iṅwe i fanela u vha na muṋei wa nyeletshedzo a faneleaho, arali zwi tshi konadzea u tea u vha muhulwane wa tshivhidzo. Arali zwi tshi ṱoḓea, hu nga avhelwa mushumeli a faneleaho. Tshigwada tsha vhahulwane tshi ḓo khetha vhenevha vhaṋei vha nyeletshedzo na u dzhia phetho ya uri vha tea u sielisana kana hai. Muṋei wa nyeletshedzo u fanela u tevhedza vhulivhisi ho ṱaluswaho kha  phara 18. Arali hu tshi farwa dziṅwe kilasi, vhagudiswa vha fanela u humbelwa uri vha ye kha dzenedzo kilasi nga murahu ha tshipiḓa U Fukula Madzanga A Re Bivhilini tshine tsha wela nga fhasi ha Lupfumo Lwo Tumbulwaho Ipfini Ḽa Mudzimu. Vha fanela u humela murahu musi hu tshi fhela nyambo ya u fhedza ya mugudiswa.

27. Vidio dzo khethwaho dzi ḓo shumiswa kha wonoyu muṱangano. Vidio dza muṱangano wa vhukati ha vhege dzi ḓo wanala kha JW Library® nahone dzi nga vulwa nga zwishumiswa zwo fhambanaho.

© 2023 Watch Tower Bible and Tract Society of Pennsylvania

S-38-VE 11/23