1. Ghen’è tante persone che le crede nela magia e nel spiritismo?

DE acordo con un libro sora le religion dela Àfrica, quasi tute le persone là le crede nela magia. Questo sucede anca intrà le persone che le ga studià tanto e quele che no le ga quasi studià. Anca i lìderi religiosi del Islan e dele ciese cristiane i crede nela strionaria.

2. De ndove le persone le crede che vien la forsa doperada par far la magia?

² Nela Àfrica tante persone le crede nte una forsa che nissuni pol veder, che se dopera par far la magia. Lori i dise che Dio el ga el controle sora questa forsa che i spiriti e i morti i pol doperarla. De acordo con quel che lori i crede, arquante persone anca le pol doperar questo poder sia par far el ben come el mal.

3. Che robe brute le persone le crede che la magia la pol far?

³ La magia negra la pol esser doperada par farghe mal ai nemighi. Tanti i crede che se pol mandar le mosche, i osei, i babastrii o altre bèstie par far mal ale persone. Lori anca i dise che, par causa dela magia negra, le persone le lota coi altri, no le pol gaver fioi, le resta malade o fin le more.

4. (a) Cossa che tante persone le crede sora i strioni? (b) Cossa che tanti strioni i conta sora quel che i fà?

⁴ Tanti i crede che anca i strioni i pol farghe mal ale persone. Lori i dise che i strioni i pol ndar fora del so corpo de note par catarse con altri strioni o par finir fora cola vita de una persona pin pianeto. Tanti strioni i dise che questo sucede. Ma el so corpo resta casa nel so leto, alora no i ze mia boni de provar se questo l’è vera o nò. Par esémpio, una revista dela Àfrica la parla sora quel che tre gióvene che le era strione le ga fato. Una la ga dito che la ga copà 150 persone in assidente de moto. Nantra la ga dito che la ga copà sinque tosatei ciuciando el so sangue. E ancora nantra la ga dito che la ga copà tre morosi parché i la ga assada.

5. (a) Cossa che tanti i pensa che la magia bona la fà? (b) Come che arquanti i la dopera?

⁵ Le persone le pensa che la magia bona la protege contra el mal. Lore le dopera anei e brasseleti par far questo. Anca le beve rimedi o passa nel so corpo. Tante persone le sconde mestieri nele so case o soto tera par protegerse e le se fida nela protession de amuleti che i ga i testi dela Bìblia o del Alcoron.

6. (a) Cossa che Sàtana e i so demoni i ga fato nel passà? (b) Cossa che ghemo de pensar sora el poder che lori i ga?

⁶ Sàtana e i so demoni i ze poderosi nemighi. Lori i ze boni de influensar i pensamenti e la vita dele persone. Nel passà, lori i ze fin ndati rento i corpi de persone e de bèstie e li ga controladi. (Mateo 12:43-45) Savemo che Sàtana e i so demoni i ga tanto poder. Ma questo no vol mia dir che lori i pol far tuto quel che i vol.

7. Sàtana el vol che noantri credemo in che? Fà un esémpio.

⁷ Sàtana l’è tanto bon in imbroiar le persone. Lu el ghe fà creder ale persone che lu el ga pi poder de quel che el ga. Par esémpio, nte una època de guera nela Àfrica, i soldadi i ga doperà gravassion de tiri par spaventar i so nemighi parché i volea farli pensar che lori i gavea tante arme poderose par atacarli. Anca Sàtana el fà cossita. Lu el vol che le persone le pense che lu el ga tanto poder e che el pol far tuto quel che el vol. Lu el proa assar le persone spaurade parché el vol che le fae la so volontà e nò la volontà de Geovà. Vedemo adesso tre busie che Sàtana el vol che noantri credemo.

8. Quala che la ze una dele busie che Sàtana el conta?

⁸ Una dele busie che Sàtana el conta l’è che ghen’è un motivo par de drio de tute le brute robe che sucede. Par esémpio, pol esser che sìpia stà una persona che la ga fato mal a qualchedun o la ga doperà la forsa dela magia par farghe mal. Metemo dir che un toseto el more par causa dela malària. La so mama la sà che lu el ga ciapà malària par causa de un moschin, ma fursi la pensa che qualchedun el ga doperà magia par mandar un moschin becar el toseto.

9. Come che la Bìblia la mostra che no l’è mia Sàtana che fà suceder tuti i problemi?

⁹ Sàtana el ga poder de far vegner fora problemi. Ma no podemo mia pensar che tuti i problemi che ghemo vien par causa de Sàtana. Eclesiasti 9:11 dise: “Gnanca sempre quei pi svelti i vinse la carera e gnanca sempre i pi forti i vinse la guera. Gnanca sempre quei che i ga sabedoria i ga de magnar, gnanca sempre i furbi i ga tante robe e gnanca sempre ghe va tuto ben a quei che i sà tanto. Parché a tuti pol suceder qualcossa rugna o che no i speta mia.” Par esémpio, pol esser che una persona che la ze drio corer nte una carera la ze tanto pi svelta che i altri, ma no la vinse la carera parché ghe sucede una roba bruta che no la spetea mia. Fursi la se strabuca, la casca do e la se fà mal. Questo podaria suceder con qualchedun. No vol mia dir che l’è Sàtana o un strion che la ga fato cascar do.

10. (a) Cossa che le persone le dise sora i strioni? (b) Come che savemo che questo l’è una busia?

¹⁰ La seconda busia che Sàtana el conta l’è che i strioni i pol ndar fora del so corpo de note par catarse con altri strioni o par finir fora cola vita de una persona pin pianeto. Ma sarà che vien fora qualcossa del corpo de una persona? Come ghemo belche imparà, la ànima la ze la pròpia persona e nò qualcossa che va fora del so corpo. Savemo anca che el spìrito el ne dà forsa, par quela che no’l pol far gnente fora del nostro corpo.

11. Parché che savemo che i strioni no i pol ndar fora del so corpo? Ti te credi che l’è pròpio cossita?

¹¹ Gnanca el nostro spìrito gnanca la nostra ànima i pol ndar fora del nostro corpo par far qualcossa, sia bona o bruta. Alora, i strioni no i ze mia boni de ndar fora del so corpo. Par quela, no l’è mia vero quel che lori i dise o i pensa che i ga fato.

12. Come che Sàtana el pol far le persone creder che lore le ga fato o le ga scoltà qualcossa che no ga mia sucedesto?

¹² Ma parché che i strioni i dise che i ze ndati fora del so corpo par far qualcossa? Sàtana el pol far le persone creder che le ga visto, scoltà o fato qualcossa che no ga mia sucedesto. Cossita, Sàtana el fà che le persone le reste distante de Geovà e le fà pensar che quel che ghen’è nela Bìblia l’è una busia.

13. (a) Sarà che ghen’è magia bona? (b) Cossa che la Bìblia la dise sora magia?

¹³ La tersa busia che Sàtana el conta la ze che ghen’è magia bona che la pol dar protession contra la magia negra. Ma la Bìblia no la dise mia che ghen’è una magia bona o negra. La parla contra tuti i tipi de magia. Vedemo arquante lege che Geovà el ghe ga dato ala nassion de Israel sora la magia e quei che i la pratichea:

• “No sté praticar magia.” — Levìtico 19:26.

• “Gavé pròpio de copar el omo o la dona che i proa parlar coi spìriti o che i proa indovinar el futuro. Gavé de coparli a sassade. L’è par so colpa de lori che i sarà copadi.” — Levìtico 20:27.

• ‘No se ga de catar intrà de valtri . . . qualchedun che el pratica magia, qualchedun che el va in serca de pressagi, o un strion, qualchedun che el va consultar un mediun spìrita o un indovinador, gnanca qualchedun che el va in serca de parlar coi morti.’ — Deuteronómio 18:10-14.

14. Parché che Geovà el ga proibio la magia?

¹⁴ Queste lege insegnea che Dio no’l volea che el so pòpolo el pratichesse magia. Geovà el ghe ga dato queste lege parché li amea. Lu no’l volea che i gavesse paura o i credesse in stòrie false relassionade cola magia. Gnanca el volea che el so pòpolo el sofrisse par causa dei demoni.

15. Come che la Bìblia la mostra che Geovà l’è tanto pi poderoso che Sàtana?

¹⁵ La Bìblia no la parla tuto sora quel che i demoni i pol o no i pol far. Ma la assa ciaro che Geovà l’è tanto pi poderoso che Sàtana e i so demoni. Par esémpio, Geovà li ga paradi via del cielo. (Apocalisse 12:9) Nantro esémpio l’è parché Sàtana el ga domandà a Geovà se el podea provar Giò. E lu el ga obedio quando Geovà el ghe ga dito de nò coparlo. — Giò 2:4-6.

16. Ndove che podemo ndar in serca de protession?

¹⁶ Proverbi 18:10 dise: “El nome de Geovà l’è una forte tore. El giusto el core rento de ela e el riceve protession.” Alora, ghemo de ndar in serca de Geovà par gaver protession. I servi de Dio no i va in serca de magia o benzederi par gaver protession dei demoni. Lori no i ga paura de quei che i fà strionaria. I servi de Dio i crede in quel che la Bìblia la dise: “Parché Geovà el varda tuta la tera coi so oci, par mostrar la so forsa a quei che i lo serve de tuto el cuor.” — 2 Cróniche 16:9.

17. Tiago 4:7 ne assa sicuri de che? Ma cossa che ne toca far?

¹⁷ Se te servi a Geovà, te pol esser sicuro che sucederà quel che l’è scrito in Tiago 4:7: “Alora, aceté la autorità de Dio, ma meteve contra el Diaol e lu el scamparà via de valtri.” Se te adori el vero Dio e te aceti la so autorità, te pol esser sicuro che Geovà el ndarà protegerte.