1, 2. De acordo con Ebrei 13:4, cossa che quei che i serve a Dio i ga de pensar sora el matrimònio?

 TE CATI che l’è importante rispetar a Geovà? Sicuro che si! Lu el mèrita el nostro rispeto. Lu el ne fà la promessa che se ghe demo onor a lu, anca lu el ndarà darne onor. (1 Sam. 2:30; Pro. 3:9; Apo. 4:11) Geovà anca el vol che rispetemo altre persone, come le autorità del governo. (Rom. 12:10; 13:7) Ma ghen’è nantra roba ntela nostra vita che l’è tanto importante mostrar rispeto: el matrimònio.

² Paolo el ga scrito: “Che tuti i gàpia rispeto par el matrimònio, e che i maridadi i sìpie fedeli un al altro.” (Ebr. 13:4) Lu l’era drio parlar che i servi de Dio i ga de veder el matrimònio con rispeto e come una roba pressiosa. Se te si maridà, l’è cossita che ti te vedi el to matrimònio?

3. Che importante consìlio Gesù el ga dato sora el matrimònio? (Vedi la ilustrassion nel scomìnsio del stùdio.)

³ Se ti te rispeti el matrimònio, te ndarè far compagno al meio esémpio che ghen’è, Gesù Cristo. Quando i Farisei i ga domandà cossa che Gesù el pensea del divòrsio, lu el ga dito quel che Geovà el ga parlà nel primo matrimònio: “El omo el assarà so pare e so mare, e i due i sarà una sol carne. Quel che Dio el ga unio el omo no’l ga de spartir.” — Ledi Marco 10:2-12  a; Gén. 2:24.

4. Qual che l’era el ogetivo de Geovà par el matrimònio?

⁴ Gesù el ga dito una roba importante: L’è stà Geovà che el ga creà el matrimònio e el gavea de esser par sempre. Quando Geovà el ga fato el matrimònio de Adon e Eva, no’l ga fato el divòrsio insieme. El ogetivo de Geovà l’era che un omo el restesse insieme con una dona par sempre.

5. Cossa che sucede col matrimònio par via dela morte?

⁵ Come savemo, Adon el ga pecà, e par quela ga cambià arquante robe. Una de queste robe l’è che la morte la pol finir col matrimònio. Savemo che l’è cossita par via de una carta che Paolo el ga scrito. Lu el ga dito che la morte la finisse col matrimònio, e che una persona che la ze védova la pol maridarse nantra volta. — Rom. 7:1-3.

6. Cossa la lege de Moisè la ne insegna sora quel che Geovà el pensa del matrimònio?

⁶ La lege che Geovà el ga dato ai israeliti assea un omo gaver de pi de una dona. I israeliti belche i fea cossita vanti de gaver la lege de Geovà. Ma la lege la ghe dea protession ale done e ai so fioi. Par esémpio, se un israelita el se maridesse con una schiava e dopo el gavesse nantra dona, lu el gavea de tender de quel che quela prima dona la ghe ocorea. (Éso. 21:9, 10) Ancoi, noantri no obedimo ala lege de Moisè, ma ela la ne giuta a capir come che el matrimònio l’è pressioso par Geovà. Saver quel che Geovà el sente ne giuta a gaver de pi rispeto par el matrimònio, mia vera?

7, 8. (a) De acordo con Deuteronómio 24:1, cossa che la lege la disea del divòrsio? (b) Cossa che Geovà el pensa del divòrsio?

⁷ Cossa che la lege la parlea del divòrsio? Par Geovà el matrimònio el ga tanto valor. (Ledi Deuteronómio 24:1.  b) La lege la disea che un israelita el podea divorsiarse dela so dona se lu el savesse de “qualcossa schifosa sora ela”. La lege no la disea cosa volea dir la roba “schifosa”. Sicuro che no l’era qualche roba, ma si una roba sèria, vergognosa. (Deu. 23:14) L’è bruto dir che nei giorni de Gesù, tanti giudei i se divorsiea par “qualche motivo”. (Mat. 19:3) No volemo mai far compagno a lori.

⁸ Nel tempo de Malachia, tanti òmini i se divorsiea dela so prima dona par maridarse con nantra che la era pi gióvena e che no la servia a Geovà. Savemo quel che Geovà el pensa del divòrsio par via de quel che el ga parlà: ‘Mi òdio el divòrsio’. (Mal. 2:14-16) Lu anca el ga dito a Adon e Eva quando i se ga maridà: “El omo el assarà el so pare e la so mare, e el se unirà ala so sposa, e i due i deventarà una sol carne.” (Gén. 2:24) Gesù anca el pensea compagno Geovà. Lu el ga dito: “Quei che Dio el ga unio, el omo no’l pol spartir.” — Mat. 19:6.

9. Cossa capimo dele parole de Gesù in Marco 10:11, 12?

⁹ Sarà che una persona che la serve a Dio la pol divorsiarse e maridarse nantra volta? Gesù el ga dito: “Qualchedun che el se divorsia dela so dona e el se marida con nantra, el fà adultèrio contra la prima dona. E, se una dona, dopo de divorsiarse del so omo, la se marida con nantro, la fà adultèrio.” (Marco 10:11, 12; Luca 16:18) Gesù el mostrea rispeto al matrimònio e el volea che i altri anca lo mostresse. El omo che el se spartisse dela so dona fedele e la dona che la se spartisse del so omo fedele par qualche motivo, e se marida con nantra persona, fà adultèrio. El matrimònio no’l se finisse par via del divòrsio. Dio ancora li vede come “una sol carne.” Gesù el ga dito che se un omo el se divorsiesse dela so dona par qualche motivo, el omo el podea far con che ela la fesse adultèrio. Come cossita? Pol esser che la dona che la era divorsiada no la gavea quel che ghe ocorea par viver e, par quela, la gavea de maridarse nantra volta. El so matrimònio anca el saria un adultèrio.

10. Quando che un servo de Dio el pol divorsiarse e esser lìbero par maridarse nantra volta?

¹⁰ Gesù el ga dito che ghen’è sol una roba che pol finir col matrimònio. Lu el ga dito: “Qualchedun che el se divorsia dela so dona, se no l’è par via de imoralità sessual e el se marida con nantra dona, el fà adultèrio.” (Mat. 19:9) Lu el gavea belche parlà del assunto nel discorso che lu el ga fato nel monte. (Mat. 5:31, 32) E nele due volte lu el ga parlà sora “imoralità sessual”. Imoralità sessual vol dir gaver relassion sessuai fora del matrimònio. Pol esser anca: adultèrio, prostituission, sesso intrà persone che no le ze maridade, omossessualismo e sesso con bèstie. Par esémpio, se un omo che l’è maridà el fà adultèrio, la so dona la pol scòlier divorsiarse. Se ela la scòlie divorsiarse, par Geovà, el matrimònio l’è finio.

11. Parché che un servo de Dio el desside no divorsiarse anca se el pol farlo?

¹¹ Gesù no’l ga dito che la persona la ze obrigada a divorsiarse. Par esémpio, pol esser che una dona la desside seitar col so matrimònio ancora che el so omo el gàpia fato imoralità sessual. Fursi la fà cossita parché lo ama, la vol perdonarlo e la vol far che el so matrimònio el devente meio. Anca pol esser che se ela la se spartisse e no la se marida nantra volta, la pol infrontar dificoltà. Come che la ndarà darghene fora cole robe che la ga de bisogno e cola voia sessual? Sarà bona de viver ela sola? Come i fioi i ndarà sentirse col divòrsio? Sarà pi fadiga insegnarli a amar a Geovà? (1 Cor. 7:14) El omo o la dona che no i ga bio la colpa del divòrsio i podarà infrontar dificoltà.

12, 13. (a) Cossa che ga sucedesto nel matrimònio de Osea? (b) Parché Osea l’è ndato tor indrio Gómer, e cossa che imparemo?

¹² La vita del profeta Osea la ne insegna come che Geovà el vede el matrimònio. Geovà el ga dito a Osea par maridarse con Gómer, che dopo la se ‘deventaria prostituta e la ndaria gaver fioi che i nasseria dela so prostituission.’ Gómer e Osea i ga bio un fiol. (Ose. 1:2, 3) Dopo, ela la ga bio due fioi con nantro omo. Ancora che la ga fato imoralità sessual de pi de una volta, Osea el ga seità maridà con ela. Gómer la ze ndata via de casa e la ze deventada una schiava, stesso cossita Osea la ga tolta indrio. (Ose. 3:1, 2) Geovà el ga doperà Osea come esémpio par mostrar come che lu sempre el perdonea Israel, ancora quando i israeliti i fea adultèrio par adorar altri dèi. Cossa imparemo?

¹³ Se un sposo o una sposa de un servo de Dio el fà imoralità sessual, quel che no’l ga bio la colpa el ga de far una dessision. Come Gesù el ga dito, lu el pol divorsiarse e restar lìbero par maridarse nantra volta, o el pol perdonar. Perdonar no l’è sbalià. Dopo che Osea ga tolto indrio Gómer, ela no la ga bio relassion sessuai con nantro omo. Gnanca Osea el ga bio relassion con Gómer par un tempo. (Ose. 3:3, nota.) Ma dopo el ga tornà a gaver relassion sessuai con ela. Col esémpio de Osea, Geovà el ga mostrà ai israeliti che li acetea e che podaria seitar a esser el so Dio. (Ose. 1:11; 3:3-5) Cossa imparemo sora el matrimònio? Se la persona maridada la ga relassion sessual col so sposo o sposa che ga fato imoralità, vol dir che la ga perdonà. (1 Cor. 7:3, 5) El omo e la dona no i ga pi motivi par divorsiarse. Ma i ga de laorar insieme par gaver un matrimònio con rispeto come che Dio el vol.

14. Cossa che 1 Corinti 7:10, 11 dise che pol suceder nel matrimònio?

¹⁴ Tuti quei che i serve a Dio i ga de rispetar el matrimònio cossita come Geovà e Gesù. Ma par via dela imperfession, arquanti no i ze boni. (Rom. 7:18-23) Fin i dissìpoli de Gesù, del primo sècolo, i ga bio problemi nel matrimònio. Paolo el ga dito “che la sposa no la ga de separarse del so sposo”, ancora cossita, arquanti i se spartia.— Ledi 1 Corinti 7:10, 11.  c

15, 16. (a) Stesso cole dificoltà, cossa che i maridadi i ga de far? (b) Elo cossita anca con quei maridadi con persone che no le serve a Dio? Parché?

¹⁵ Paolo no’l ga parlà del motivo de lori spartirse. Ma savemo che no l’era par via dela imoralità sessual. Par quela che la dona no la podaria divorsiarse e maridarse nantra volta. Paolo el ga dito che la sposa la gavea de restar sensa maridarse o la gavea de tornar col so sposo. O sia, par Geovà, lori ancora i era maridadi. Paolo el ga dito che se el problema nel matrimònio no l’era la imoralità sessual, lori i gavaria de far la pace. El sposo e la sposa i pol domandar el aiuto dei ansiani. Lori no i ndarà dir chi che l’è giusto o chi che l’è sbalià, ma i ndarà mostrar quel che la Bìblia la dise.

¹⁶ La situassion la pol esser pi difìcile quando la persona la ze maridada con qualchedun che no’l serve a Geovà. Sarà che i pol spartirse se ghen’è problemi nel matrimònio? Come ghemo visto, la Bìblia la parla che sol saria giusto divorsiarse par via dela imoralità sessual. Ela no la parla de altri motivi. Paolo el ga scrito: “La dona che la ga el sposo che no’l crede, e lu l’è disposto a viver con ela, no la asse el so sposo.” (1 Cor. 7:12, 13) Compagno l’è con noantri ancoi.

17, 18. Parché arquanti i desside no divorsiarse anca se i infronta arquante dificoltà?

¹⁷ Ghen’è situassion che el sposo che no’l serve a Geovà el mostra che no’l vol restar insieme dela so sposa. Fursi el ghe dà bote e el mete la salute e la vita dela dona in perìcolo. Anca no’l vol dar quel che la ghe ocore par viver e el intriga la amicìssia che ela la ga con Geovà. Quando sucede una roba cossita, no importa quel che el sposo el parla, lu el mostra che no’l vol restar cola so sposa. Alora, ela la desside spartirse. Ma ghen’è altri che i ga infrontà una situassion someiante e no se ga spartio, i ga dessidio perseverar e far el so matrimònio deventar meio. Parché?

¹⁸ Come lori i ze ancora maridadi, se lori due i se spartisse i gavarà le dificoltà che ghemo parlà vanti. El apòstolo Paolo el ga parlà de nantro motivo par el omo e la dona restar insieme. Lu el ga dito: “Parché el sposo che no’l crede mia l’è santificà par via dela so sposa, e la sposa che no la crede mia la ze santificada par via del so sposo che el crede. Par quela i so fioi i ze santi, senò, i saria impuri.” (1 Cor. 7:14) Tanti servi de Dio i desside no divorsiarse, anca con tante dificoltà. Lori no i se ga ciamà grami dela dessision e, col tempo, lori due i ga scominsià a servir a Geovà insieme.— Ledi 1 Corinti 7:16  d; 1 Pie. 3:1, 2.

19. Parché ghen’è tanti matrimoni felici nel pòpolo de Dio?

¹⁹ Gesù el ga parlà de divòrsio e Paolo de separassion. Lori due i volea che i servi de Dio i rispetesse el matrimònio. Ancoi nel pòpolo de Dio ghen’è tanti matrimoni felici. Proa vardar ntela to congregassion. Sicuro che te ndarè catar matrimoni felici, el motivo l’è parché el sposo ama la so dona e la dona la rispeta el so sposo. Lori i mostra che i rispeta el matrimònio cossita come Geovà el rispeta. Milioni de persone le ze drio mostrar che le parole de Dio le ze vere. Lu el ga dito: “Par quela, el omo el assarà so pare e so mare, e se unirà ala so sposa, e i due i sarà una sol carne.” — Efe. 5:31, 33.