•  Introduksyon 2

•  Mga Bahandi Tikang ha Pulong han Dios 3-5

  •  Pahayag 3

  •  Espirituwal nga mga Hiyas 4

  •  Pagbasa ha Biblia 5

•  Magin Mas Epektibo ha Ministeryo 6-14

  •  Pagtikang ha Pakiistorya 7

  •  Pagbalik-Bisita 8

  •  Panhimo hin Disipulo 9

  •  Pagsaysay han Imo mga Gintotoohan 10

  •  Pahayag 11

  •  Sulod 12

  •  Setting 13

  •  Paggamit hin mga Video Ngan Literatura 14

•  Pagkinabuhi Sugad nga mga Kristiano 15-16

  •  Pag-aram ha Biblia han Kongregasyon 16

•  Konklusyon 17

•  Kumendasyon Ngan Sagdon 18

•  Oras 19

•  Bisita han Paramangno han Sirkito 20

•  Semana han Asembleya o Kombensyon 21

•  Semana han Memoryal 22

•  Paramangno han Katirok ha Pagkinabuhi Ngan Ministeryo 23

•  Tsirman han Katirok ha Pagkinabuhi Ngan Ministeryo 24

•  Kabulig nga Magsaragdon 25

•  Dugang nga mga Klase 26

•  Mga Video 27

1. An mga instruksyon hini nga dokumento mabulig ha ngatanan nga may bahin ha katirok nga An Aton Kristiano nga Pagkinabuhi Ngan Ministeryo. Kinahanglan nira repasuhon an mga instruksyon para ha ira bahin nga mababasa ha Workbook Para ha Katirok ha Pagkinabuhi Ngan Ministeryo ngan hini nga dokumento antes mag-andam han ira bahin. An ngatanan nga magwarali dapat aghaton nga makigbahin ha pagpresenta han mga toka han estudyante. Mahimo makigbahin an iba nga aktibo nga nakikig-upod ha kongregasyon kon nauyon hira ha mga katutdoan han Biblia ngan nagkikinabuhi uyon ha Kristiano nga mga prinsipyo. An mga ginkikinahanglan ha pag-enrol dapat hisgotan han paramangno han Katirok ha Pagkinabuhi Ngan Ministeryo ha bisan hin-o nga diri pa magwarali ngan nagsusumat nga karuyag niya magpaenrol ngan katapos, ipahibaro ha iya kon kwalipikado hiya. Dapat buhaton ini nga kaupod an nagba-Bible study ha iya (o kaupod an iya tumuroo nga kag-anak). An mga ginkikinahanglan pariho ha ginkikinahanglan basi magin diri-bawtismado nga magwarali.—od kap. 8 par. 8.

2. Usa ka minuto. Kada semana, katapos han kanta ngan pag-ampo, aaghaton han tsirman han Katirok ha Pagkinabuhi Ngan Ministeryo an mamarati nga maeksayt ha masunod nga programa. Angay hiya magpokus ha mga punto nga mapapahimulsan gud han kongregasyon.

 3. Pahayag: Napulo ka minuto. An tema ngan usa nga outline nga may duha o tulo nga nangunguna nga punto igintagana ha Workbook Para ha Katirok ha Pagkinabuhi Ngan Ministeryo. Ini nga pahayag itutoka ha usa nga tigurang o kwalipikado nga ministeryal nga surugoon. Kon usa nga bag-o nga libro ha Biblia an titikangan ha sinemana nga pagbasa ha Biblia, usa nga video an ipapasalida sugad nga introduksyon. Mahimo hisgotan han mamumulong an koneksyon han video ha tema. Kondi kinahanglan niya siguruhon nga mahisgotan an mga punto nga gin-unabi ha workbook. Ngan kon may oras pa, dapat niya gamiton hin maopay an mga artwork, nga gindisenyo basi pabug-atan an materyal nga kukobrehan. Puydi hiya mag-upod hin impormasyon tikang ha iba nga reperensya kon makakabulig ito nga maipagawas an mga punto ha outline.

 4. Espirituwal nga mga Hiyas: Napulo ka minuto. Usa ini nga pakiana-ngan-baton nga bahin nga waray introduksyon o konklusyon. Dudumarahon ini hin tigurang o kwalipikado nga ministeryal nga surugoon. Kinahanglan ipakiana han nagdudumara an duha nga pakiana. Puydi liwat hiya magdesisyon kon babasahon ba o diri an mga teksto nga gin-unabi. Adton matatawag dapat magkomento ha sulod hin 30 segundo o minos pa.

 5. Pagbasa ha Biblia: Upat ka minuto. Ini nga bahin dudumarahon hin lalaki nga estudyante. Dapat basahon han estudyante an igintoka nga materyal nga waray uunabihon nga introduksyon o konklusyon. An tsirman han katirok interesado gud nga buligan an mga estudyante ha husto nga pagbasa, pagsabot han ginbabasa, kaabtik ha pagbasa, husto nga pagpabug-at han punto, pagburobag-o han tingog, angayan nga pag-undang, ngan pagin natural. Tungod kay diri parapriho an kahilaba han teksto nga babasahon, kinahanglan ikonsiderar han paramangno han Katirok ha Pagkinabuhi Ngan Ministeryo an abilidad han mga estudyante nga tutokahan hini nga bahin.

6. Kinse minutos. Ini nga seksyon han katirok gindisenyo basi tagan hin higayon an ngatanan nga magpraktis para ha ministeryo ngan mapauswag an ira mga skill ha pakiistorya ngan abilidad ha pagsangyaw ngan pagtutdo. Kon kinahanglan, an mga tigurang mahimo hatagan hin toka nga para ha mga estudyante. Dapat sundon han kada estudyante an aradman tikang ha Pagtutdo o ha Higugmaa an mga Tawo nga brosyur nga makikita ha sulod han parenteses sapit han toka ha Workbook Para ha Katirok ha Pagkinabuhi Ngan Ministeryo. May mga panahon nga mag-ieskedyol hin bahin nga pakighisgot. An sugad nga bahin dudumarahon hin tigurang o kwalipikado nga ministeryal nga surugoon.—Kitaa an  parapo 15 kon paonan-o dudumarahon an pakighisgot nga mga bahin.

 7. Pagtikang ha Pakiistorya:  Ini nga bahin mahimo itoka ha lalaki o babaye nga estudyante. An asistant dapat igkasi-lalaki, igkasi-babaye, o kapamilya. An estudyante ngan an asistant mahimo lumingkod o tumindog.—Para ha dugang nga impormasyon parte ha sulod ngan setting hini nga toka, kitaa an  parapo 12 ngan  13.

8. Pagbalik-Bisita: Ini nga bahin mahimo itoka ha lalaki o babaye nga estudyante. An asistant dapat igkasi-lalaki o igkasi-babaye. (km 5/97 p. 2) An estudyante ngan an asistant mahimo lumingkod o tumindog. Dapat ipasundayag han estudyante kon ano an yayaknon ha pagpadayon han naglabay nga pag-istorya.—Para ha dugang nga impormasyon parte ha sulod ngan setting hini nga toka, kitaa an  parapo 12 ngan  13.

 9. Panhimo hin Disipulo: Ini nga bahin mahimo itoka ha lalaki o babaye nga estudyante. An asistant dapat igkasi-lalaki o igkasi-babaye. (km 5/97 p. 2) An estudyante ngan an asistant mahimo lumingkod o tumindog. Ipapasundayag hini nga bahin an pag-aram ha Biblia nga nagpapadayon na. Diri kinahanglan hin introduksyon o konklusyon labot la kon an estudyante ginbabantayan ha usa hini nga mga aradman. Diri kinahanglan basahon ha daku nga tingog an bug-os nga igintoka nga materyal, bisan kon mahimo ini buhaton.

 10. Pagsaysay han Imo mga Gintotoohan: Kon itoka sugad nga pahayag, dapat ini dumarahon hin lalaki nga estudyante. Kon itoka sugad nga pasundayag, mahimo ini dumarahon hin lalaki o babaye nga estudyante. An asistant dapat igkasi-lalaki, igkasi-babaye, o kapamilya. An estudyante dapat maghatag hin klaro ngan mataktika nga baton ha tema nga pakiana gamit an impormasyon ha iginhatag nga reperensya. Ha panahon han iya bahin, puydi hiya magdesisyon kon uunabihon ba niya an reperensya o diri.

 11. Pahayag: Ini nga bahin itutoka ha lalaki nga estudyante ngan ihahatag sugad nga pahayag ha kongregasyon. Kon an pahayag iginbase ha usa nga punto ha apendise A han Higugmaa an mga Tawo nga brosyur, dapat pabug-atan han estudyante kon paonan-o an (mga) teksto magagamit ha ministeryo. Pananglitan, puydi niya isaysay kon san-o mahimo gamiton an usa nga teksto, kon ano an kahulogan hito, ngan kon paonan-o mangangatadongan ha usa nga tawo gamit ito. Kon an pahayag iginbase ha usa nga punto ha usa han mga leksyon ha Higugmaa an mga Tawo nga brosyur, an estudyante dapat magpokus ha kon paonan-o iaaplikar ha ministeryo ito nga punto. Puydi niya pabug-atan an ehemplo nga iginpapakita ha punto 1 han leksyon o pabug-atan an bisan ano nga nasuporta nga mga teksto nga igin-upod ha leksyon, kon makakabulig ito.

   12. Sulod: An impormasyon hini ngan ha masunod nga parapo aplikado ha “Pagtikang ha Pakiistorya” ngan “Pagbalik-Bisita” nga mga bahin. Labot la kon may iba nga instruksyon, tumong han estudyante nga magsumat hin simple nga kamatuoran ha Biblia nga angayan ha iya kaistorya ngan maglatag hin pundasyon para ha sunod nga pag-istorya. Dapat magpili an estudyante hin topiko nga napapanahon ngan epektibo ha ira lugar. Puydi hiya magdesisyon kon magpapakita ba hiya o diri hin publikasyon o video tikang ha aton Toolbox ha Pagpanutdo. Imbes nga magpasundayag hin minemorya nga presentasyon, dapat kultibaron han mga estudyante an mga skill ha pakiistorya, sugad han pagpakita hin personal nga interes ngan pagin natural.

   13. Setting: Dapat ipahiuyon han estudyante an igintoka nga setting ha kahimtang ha ira lugar. Pananglitan:

1.  (1) Pagsangyaw ha Balay-Balay: Ini nga setting nag-uupod han pagsangyaw ha balay-balay—in person man, ha telepono, o pinaagi hin surat—ngan han pagpadayon han naglabay nga pakiistorya ha usa nga nasangyawan ha balay-balay.

2.  (2) Pagsangyaw ha Diri-Pormal nga Paagi: Ini nga setting nagpapakita han pagsalingabot han mga oportunidad nga makasangyaw kon may nakakaistorya kita. Mahimo ini mag-upod han pagsumat hin mensahe tikang ha Biblia ha imo mga nakakaistorya ha trabaho, ha eskwelahan, hirani ha imo gin-uukyan, ha panpubliko nga sarakyan, o ha bisan diin samtang ginhihimo mo an imo adlaw-adlaw nga buruhaton.

3.  (3) Pagsangyaw ha Publiko: Ini nga setting mahimo mag-upod han pagsangyaw gamit an cart, pakiistorya ha mga tawo ha mga lugar han negosyo, o pagsangyaw ha kalsada, parke, parkingan, o bisan diin nga may mga tawo.

 14. Paggamit hin mga Video Ngan Literatura: Depende ha kahimtang, an estudyante mahimo magdesisyon nga mag-feature hin video o literatura. Kon may video an bahin han estudyante o kon magdesisyon hiya nga mag-feature hin video, dapat niya ito ipakita ngan hisgotan pero diri ito dapat i-play.

15. Katapos hin kanta, an masunod nga 15 minutos hini nga seksyon amo an usa o duha nga bahin nga gindisenyo basi buligan an mga mamarati nga maiaplikar an Pulong han Dios. Labot la kon may iba nga instruksyon, ini nga mga bahin mahimo itoka ha mga tigurang o kwalipikado nga ministeryal nga mga surugoon, labot la han lokal nga mga panginahanglan, nga dudumarahon hin tigurang. Kon an bahin igintoka sugad nga pakighisgot, an speaker mahimo magbangon hin mga pakiana ha bug-os nga bahin labot la han mga pakiana nga igintagana na. Dapat halipot la an iya introduksyon basi magkaada igo nga panahon ha pagkobre han nangunguna nga mga punto ngan mahatagan an mamarati hin oportunidad nga makigbahin. Kon kinahanglan mag-interbyu, mas maopay nga ha entablado magkomento an gin-iinterbyu imbes nga ha iya lingkoran, kon posible.

  16. Pag-aram ha Biblia han Kongregasyon: Trenta minutos. Itutoka ini ha usa nga kwalipikado nga tigurang. (Kon gutiay la an mga tigurang, mahimo magtoka hin kwalipikado nga mga ministeryal nga surugoon, kon kinahanglan.) Dapat siguruhon han lawas han mga tigurang kon hin-o an kwalipikado ha pagdumara han Pag-aram ha Biblia han Kongregasyon. An mga gin-aprobaran kinahanglan magdumara hin maopay basi eksakto ha oras an pag-aram, mapabug-atan an importante nga mga teksto, ngan mabuligan an ngatanan nga maapresyar an praktikal nga bili han ginkobrehan nga mga punto. An mga gin-aprobaran magpapahimulos ha pagrepaso han iginpublikar nga instruksyon kon paonan-o magdudumara han mga bahin nga pakiana ngan baton. (w23.04 p. 24, kahon) Kon nakobrehan na an ngatanan nga nakatoka nga aradman, diri na kinahanglan paihaon pa an pag-aram. Kon posible, dapat iba-iba an magdudumara ngan magbabasa kada semana. Kon an tsirman han Katirok ha Pagkinabuhi Ngan Ministeryo magsiring nga pahaliputon an pag-aram, an nagdudumara kinahanglan magdesisyon kon paonan-o ito pahahaliputon. Mahimo niya pilion nga diri ipabasa an pipira nga parapo.

17. Tulo ka minuto. Rirepasuhon han tsirman han Katirok ha Pagkinabuhi Ngan Ministeryo an mapulsanon gud nga mga punto nga ginhisgotan ha katirok. Kinahanglan liwat niya unabihon an hihisgotan ha sunod nga semana. Mahimo niya ipahibaro an ngaran han mga estudyante nga may bahin ha sunod nga semana, kon may oras pa. Gawas la kon may iba nga instruksyon, an importante nga mga pahibaro ngan importante nga mga surat para ha kongregasyon kinahanglan basahon han tsirman ha iya konklusyon. An mga pahibaro sugad han regular nga kahikayan ha pagsangyaw ngan eskedyol ha paglimpyo diri dapat iyakan ha entablado pero dapat ipaskin ha information board. Kon kukulangon an oras ha konklusyon para magbasa hin mga pahibaro o surat, dapat hangyoon han tsirman an mga brother nga may mga bahin ha seksyon nga Pagkinabuhi Sugad nga mga Kristiano nga pahaliputon an ira bahin kon kinahanglan. (Kitaa an  parapo 16 ngan  19.) Tatapuson an katirok pinaagi hin kanta ngan pag-ampo.

18. Katapos han tagsa nga bahin han mga estudyante, an tsirman han Katirok ha Pagkinabuhi Ngan Ministeryo may-ada mga usa ka minuto basi maghatag hin kumendasyon ngan sagdon nga iginbase ha igintoka nga aradman. Kon gin-uunabi han tsirman an toka han usa nga estudyante, diri niya iuupod an aradman. Pero katapos han bahin han estudyante ngan katapos hiya tagan hin angayan nga kumendasyon, mahimo unabihon han tsirman an aradman ngan kon kay ano nga maopay an pagkadumara hito han estudyante, o mahimo isaysay han tsirman ha buotan nga paagi kon kay ano nga angay hatagan hin dugang nga atensyon han estudyante ito nga punto ngan kon paonan-o niya ito mahihimo. Mahimo liwat komentohan han tsirman an iba nga mga aspekto han pasundayag kon para ha iya magpapahimulos hito an estudyante o an mamarati. An dugang nga mapulsanon nga sagdon nga iginbase ha Higugmaa an mga Tawo nga brosyur, ha Pagtutdo nga brosyur, o ha Eskwelahan ha Ministeryo nga libro mahimo ihatag ha pribado katapos han katirok o ha iba nga panahon, may kalabotan man ito ha igintoka nga aradman o ha iba nga aradman.—Para ha dugang nga impormasyon may kalabotan ha papel han tsirman han Katirok ha Pagkinabuhi Ngan Ministeryo ngan ha papel han kabulig nga magsaragdon, kitaa an  parapo 19,  24, ngan  25.

19. Diri angay mag-obertaym an mga bahin o an mga iyayakan han tsirman han Katirok ha Pagkinabuhi Ngan Ministeryo. Bisan kon nakabutang ha Workbook Para ha Katirok ha Pagkinabuhi Ngan Ministeryo an oras han tagsa nga bahin, kon nakobrehan na hin maopay an materyal, diri kinahanglan magdugang hin impormasyon basi la magamit an iginhatag nga oras. Kon mag-obertaym an mga bahin, angay magsagdon ha pribado an tsirman han Katirok ha Pagkinabuhi Ngan Ministeryo o an kabulig nga magsaragdon. (Kitaa an  parapo 24 ngan  25.) An kahilawig han bug-os nga katirok, upod na an mga kanta ngan pag-ampo, dapat 1 ka oras ngan 45 minutos.

20. Kon bisita han paramangno han sirkito ha kongregasyon, kinahanglan sundon an programa ha Workbook Para ha Katirok ha Pagkinabuhi Ngan Ministeryo gawas la han masunod: An Pag-aram ha Biblia han Kongregasyon ha seksyon nga Pagkinabuhi Sugad nga mga Kristiano liliwanan han 30 minutos nga service talk han paramangno han sirkito. Antes han service talk, rirepasuhon han tsirman han Katirok ha Pagkinabuhi Ngan Ministeryo an katatapos pa la nga programa, hihisgotan an programa para ha sunod nga semana, uunabihon an importante nga mga pahibaro, babasahon an importante nga mga surat, ngan katapos, tatawagon an paramangno han sirkito. Katapos han service talk, tatapuson han paramangno han sirkito an katirok pinaagi hin kanta nga iya ginpili. Mahimo hiya maghangyo hin iba nga brother nga mag-aampo ha pagtapos han katirok. Waray dudumarahon nga dugang nga klase ha linggwahe han kongregasyon kon bisita han paramangno han sirkito. An usa nga grupo mahimo magdumara han ira kalugaringon nga mga katirok bisan kon bisita han paramangno han sirkito ha host nga kongregasyon. Pero kinahanglan tumampo an grupo ha host nga kongregasyon para ha service talk han paramangno han sirkito.

21. Waray katirok han kongregasyon ha semana han asembleya o kombensyon. Dapat pahinumdoman an kongregasyon nga an materyal nga nakaeskedyol para ha mga katirok hito nga mga semana kinahanglan adman hin personal o sugad nga pamilya.

22. Kon an Memoryal mahituman ha Lunes, Martes, Mierkoles, Huwebes, o Biernes, waray paghihimoon nga Katirok ha Pagkinabuhi Ngan Ministeryo.

23. Usa nga tigurang nga ginpili han lawas han mga tigurang an magigin paramangno han Katirok ha Pagkinabuhi Ngan Ministeryo. Responsabilidad niya nga siguruhon nga ini nga katirok organisado ngan nadudumara uyon hini nga mga instruksyon. Dapat may maopay hiya nga komunikasyon ha kabulig nga magsaragdon. Kon may-ada na Workbook Para ha Katirok ha Pagkinabuhi Ngan Ministeryo, itutoka dayon han paramangno han Katirok ha Pagkinabuhi Ngan Ministeryo an ngatanan nga bahin han katirok ha midweek para han duha ka bulan. Upod hini an mga bahin nga diri para ha mga estudyante ngan an mga tsirman ha katirok ha midweek nga gin-aprobaran han lawas han mga tigurang, pati na an mga bahin han mga estudyante. (Kitaa an  parapo 3-16 ngan  24.) Kon nagtutoka hin mga bahin han mga estudyante, kinahanglan niya ikonsiderar an edad, eksperyensya, ngan kagawasan ha pagyakan han estudyante ha topiko nga ginhihisgotan. Sugad liwat hito an dapat niya himoon kon nagtutoka han iba nga mga bahin han katirok. An tagsa nga bahin kinahanglan ihatag hin diri maminos tulo ka semana antes han petsa han bahin. An form nga Our Christian Life and Ministry Meeting Assignment (S-89) dapat gamiton para ha mga bahin han mga estudyante. Kinahanglan siguruhon han paramangno han Katirok ha Pagkinabuhi Ngan Ministeryo nga ibutang ha information board an usa nga kopya han eskedyol han mga bahin ha bug-os nga katirok. An lawas han mga tigurang mahimo magtoka hin usa pa nga tigurang o hin ministeryal nga surugoon basi bumulig ha iya. Pero mga tigurang la an dapat magtoka han mga bahin nga diri para ha mga estudyante.

24. Kada semana, usa nga tigurang an magigin tsirman han bug-os nga Katirok ha Pagkinabuhi Ngan Ministeryo. (Kon gutiay la an mga tigurang, mahimo magtoka hin kwalipikado nga mga ministeryal nga surugoon kon kinahanglan.) Responsabilidad niya nga iandam an introduksyon ngan konklusyon. Maghahatag liwat hiya hin introduksyon para ha ngatanan nga bahin, ngan depende ha kadamu han tigurang, mahimo itoka ha iya an iba nga mga bahin ha katirok, labi na an mga bahin nga may ipapakita la nga video pero waray pakighisgot. Dapat halipot gud la an mga komento ha butnga han mga bahin. An lawas han mga tigurang magdidesisyon kon hin-o ha mga tigurang an kwalipikado para hini nga toka. An kwalipikado nga mga tigurang tutokahan sugad nga mga tsirman ha panapanahon. Depende ha kahimtang han kongregasyon, an paramangno han Katirok ha Pagkinabuhi Ngan Ministeryo mahimo gamiton hin mas agsob sugad nga tsirman kay ha iba nga kwalipikado nga mga tigurang. Kon an usa nga tigurang kwalipikado ha pagdumara han Pag-aram ha Biblia han Kongregasyon, posible gud nga kwalipikado hiya nga magin tsirman han katirok. Kondi alayon hinumdumi nga an tigurang nga gintokahan sugad nga tsirman dapat maghatag hin mahigugmaon ngan mapulsanon nga kumendasyon, ngan hin sagdon ha mga estudyante nga may bahin kon kinahanglan. Responsabilidad gihap han tsirman nga siguruhon nga matatapos an katirok ha eksakto nga oras. (Kitaa an  parapo 17 ngan  19.) Kon karuyag han tsirman ngan may-ada man espasyo, mahimo magbutang ha entablado hin mikropono nga may stand basi maipakilala niya an sunod nga may bahin samtang napwesto ha podyum an brother nga gintokahan. Bangin karuyag liwat han tsirman nga lumingkod ha usa nga lamesa ha entablado samtang gindudumara han estudyante an pagbasa ha Biblia nga bahin ngan ha Magin Mas Epektibo ha Ministeryo nga seksyon han katirok. Mahimo ini makatipid hin oras.

25. Kon posible, usa nga tigurang nga eksperyensyado nga speaker an angay pilion para hini nga toka. Responsabilidad han kabulig nga magsaragdon nga maghatag hin sagdon ha pribado, kon kinahanglan, ha mga tigurang ngan mga ministeryal nga surugoon parte ha anoman nga bahin nga ira gindumara, pati na an mga bahin ha Katirok ha Pagkinabuhi Ngan Ministeryo, pahayag publiko, ngan pagdumara o pagbasa ha Pag-aram ha Barantayan o Pag-aram ha Biblia han Kongregasyon. (Kitaa  parapo 19.) Kon damu nga tigurang ha kongregasyon an maopay nga mga speaker ngan magturutdo, iba naman nga tigurang an puydi magin kabulig nga magsaragdon kada tuig. An kabulig nga magsaragdon diri kinahanglan magsagdon dayon katapos han tagsa nga bahin.

26. Depende ha kadamu han estudyante, an mga kongregasyon mahimo magkaada dugang nga mga klase para ha mga bahin han mga estudyante. An tagsa nga dugang nga klase dapat dumarahon hin kwalipikado nga magsaragdon, mas maopay kon usa nga tigurang. Kon kinahanglan, usa nga kwalipikado gud nga ministeryal nga surugoon an mahimo tokahan. An lawas han mga tigurang dapat magdesisyon kon hin-o an puydi tagan hini nga responsabilidad ngan kon angay ba magsurosaliwan hini nga toka. Kinahanglan sundon han magsaragdon an mga instruksyon ha  parapo 18. Kon may-ada dugang nga klase, hahangyoon an mga estudyante nga kumadto ha second hall katapos han Espirituwal nga mga Hiyas nga bahin han seksyon nga Mga Bahandi Tikang ha Pulong han Dios. Kinahanglan hira bumalik ha main hall kahuman han kataposan nga bahin nga gindudumara hin estudyante.

27. May pinili nga mga video nga gagamiton para hini nga katirok. An mga video para ha katirok ha midweek magigin available ha JW Library^® nga app ngan maa-access gamit an iba-iba nga gadyet.

© 2023 Watch Tower Bible and Tract Society of Pennsylvania

S-38-SA 11/23