Ino Mahatsara Atsika Mahay Jehovah?

METY ho maty antoko ma anao fotony misy raha araiky maventy tsy anan̈anao? Ia valiny, izikoa anao tsy dia mahay raha momba Zan̈ahary. Nan̈ino? Olo antapitrisany nahita fa ten̈a mitondra hatsaran̈a maventy fahaizan̈a momba Zan̈ahary araiky koran̈iny Baiboly io. Sady izio hatsaran̈a afaka azo iô ny iô, avio mahadin̈y ela.

Zan̈ahary Jehovah tompiny volan̈a amy Baiboly ao. Atsika tiany hahay izy. Karaha ty nivolan̈iny panoratra salamo: “Baka olo jiaby mahay fa anao, araiky manan̈a an̈aran̈a Jehovah, anao zaraiky fo Farany An̈abo amy tany jiaby.” Efa hainy fa ten̈a hitondra hatsaran̈a nintsika fahaizan̈a raha momba izy. Karaha ty volan̈iny: “Zaho Zan̈aharinao Jehovah, mampianatra anao raha hahatsara anao.” Ino ma hatsaran̈a azontsika izikoa atsika mahay raha momba Jehovah Zan̈ahary Farany An̈abo?—Salamo 83:18; Isaia 48:17.

An̈isany hatsaran̈a azontsika: Atsika mahazo taridalan̈a hiatrefan̈a problemo isanandra, manan̈a fan̈antinan̈a azo antoko, ndreky milamintsain̈y. Baka io manjary miova fahitantsika iro fan̈ontanian̈a maventy ndreky manahirantsain̈y olo maro aminandra izioty. Ino aby ma fan̈ontanian̈a aby zen̈y?

Misy Tanjon̈o ma Fiain̈ananao?

Efa mivoatra mare teknolozy aminandra izioty. Fa ndray zen̈y, mbala misy olo fo man̈ontany ten̈a karaha ty: ‘Nan̈ino ma zaho velon̈o? Han̈ano akory hoavinaka? Ino ma ten̈a dikany fiain̈ana ty?’ Tsy ho hisy dikany foeky fiain̈ananolo araiky, izikoa izy tsy mahazo valiny mahafapo amindro fan̈ontanian̈a aby io. Maro ma olo mahatsapa karaha zen̈y? Nisy fan̈adikadin̈ana araiky natao tan Allemagne tamy taon̈o 1997. Antsasakanolo aby nadikadin̈iny taminizio, matetiky na ndraikindraiky, mahatsapa fa tsisy dikany fiain̈anandro. Mety misy raha karaha zen̈y koa amy toeran̈a misy anao.

Izikoa tsy hainolo araiky ino ten̈a dikany fiain̈ananany, izy manjary tsy hahavita hanakatra tanjon̈o. Maro olo mahatsapa fa misy raha manky amy fiain̈anandro, ke iro mifen̈y mitady asa tsara na hamory harian̈a. Kanefa raha manky io mety mbala hampiasaloha iro fo. Misy aby olo sasany tihofoaty foeky, fotony ren̈indro karaha tsisy dikany foeky fiain̈anandro. Karaha zen̈y iziô tsaiky man̈angy araiky zatovo hely zay. Gazety International Herald Tribune nivolan̈a fa “pan̈arivo mare [fianakavian̈andro] ke maro raha nafaka nataondro.” Fa ndray tio fiain̈ana mampiadan̈a zen̈y, izy mbala nahatsiaro latsatokan̈a fo, baka io tsisy dikany foeky fahitany fiain̈ananany. Namono ten̈a izy, ke nihina aody mampandry. Naty izy. Anao koa mety mahay olo nahatsiaro latsatokan̈a ke namono ten̈a karaha zen̈y. Mampalahelo!

Anao ma efa navy naharen̈y olo nivolan̈a fa siansy io afaka man̈ambara atsika raha jiaby momba fiain̈ana? Karaha ty volan̈iny gazety aliman Die Woche: ‘Siansy io mety ho marin̈y, fa ndray zen̈y izio tsy man̈amia taridalan̈a momba fivavahan̈a ndreky fitondranten̈a. Sady karaha tsy mahafapo foeky teoriny evolision. Ndray fiziky momba raha madiniky koa, mbala tsy mankahery ndreky tsy mampilamintsain̈y foeky.’ Baka tamy fikarohan̈a aratsiansy nahaizan̈a raha maro momba zavaboary maro samihafa. Izio koa nan̈azava iro tsingerin̈y voajanahary mamelon̈o iro io. Fa ndray zen̈y, siansy tsy afaka man̈ambara amintsika nan̈ino atsika misy, baka io han̈ano akory ny hoavintsika. Ke izikoa siansy fo tavandraintsika, tsy ho haintsika foeky ino ten̈a dikany fiain̈ana. Ke karaha volan̈iny gazety alimàn Süddeutsche Zeitung “olombelon̈o mila taridalan̈a fo ndray aia ndray aia.”

Ankoatrany Zan̈ahary, azovy edy ma ny ten̈a tsara toeran̈a man̈amia taridalan̈a atsika? Efa izy edy. Izy nan̈apetraka olombelon̈o voanalohany tambony tany teto. Dikany zen̈y tsy maintsy hainy ino mahavy iro eto. Baiboly mivolan̈a fa Jehovah niasa olombelon̈o baka iro hameno tany ndreky hikarakara izio. Tamy raha jiaby nataondro, iro tokony ho nan̈aboaka toetriny Zan̈ahary, karaha ataony fitiavan̈a rariny, fahendrena, ndreky fitiavana. Izikoa mazava amintsika antony niasany Zan̈ahary atsika, ho haintsika nan̈ino atsika misy.—Genesisy 1:26-28.

Ino Raha Mety Hataonao?

Karakory izikoa taloha, anao tsy nahita valiny mahafapo tamindro fan̈ontanian̈a aby ty: ‘Nan̈ino ma zaho velon̈o? Han̈ano akory hoavinaka? Ino ma ten̈a dikany fiain̈ana ty?’ Baiboly mandrisiky anao hianatra hahay Jehovah tsarabe. Karaha ty baka ho Jesosy: “Baka iro velon̈o tsisy farany, iro mila mianatra momba anao, Zan̈ahary tokana sady marin̈y, ndreky Jesosy Kristy irakanao.” Tsara koa anao mba mifen̈y hanan̈a toetry tsara, intsaka eky fitiavan̈a, baka io ataova tanjon̈o hanjary panompony Fanjakan̈any Mesia. Ho hisy dikany edy fiain̈ananao, sady anao hanan̈a fan̈antinan̈a ten̈a tsara ndreky azo antoko. Ho voavaly koa iro fan̈ontanian̈a maventy nampiasaloha anao letrizay.—Jaona 17:3; Mpitoriteny 12:13.

Ino edy ma vokany zen̈y aminao? Hainy Hans tsarabe valinizen̈y. * Efa mba nino Zan̈ahary fo Hans taon̈o maro loso zay, kanefa finoan̈anany zen̈y tsy ten̈a nisy vokany tamy fiain̈ananany. Izy ten̈a tia nihina jamala, niaraka tamy viavy ratsy fitondranten̈a, nan̈ano raha ratsy madinidiniky, baka io tia môtô. Ho izy: “Tsisy dikany foeky fiain̈ananaka, sady ten̈a tsy nahafapo.” Taminizy kadiriny 25 taon̈o tio, izy tapakevitry hianatra momba Jehovah tsarabe, ke nivakiany tsarabe Baiboly. Izikoa izy efa nahay tsarabe momba Jehovah, baka io nazava taminany ino tanjon̈o fiain̈ana, izy nan̈ova fiain̈ananany. Natao batisa izy ke nanjary Vavolombelon̈o Jehovah. Efa folo taon̈o zay izy nan̈ano fanompoan̈a manontolo andra. Karaha ty hoizy: “Tsisy raha tsaratsarany manompo Jehovah. Tsisy raha mety ampitovisin̈y amizio. Zaho koa efa nahay Jehovah, nanjary nisy dikany fiain̈ananaka.”

Ino ma tanjon̈o fiain̈ana? Azo antoko fa tsy valiny fan̈ontanian̈a zen̈y fo mahalian̈a olo maro. Arakaraka fiain̈ana mahairatsy, misy fan̈ontanian̈a araiky maventy hafa koa mampiasaloha olo.

Ino ma Nahavy Izio?

Lera misy raha sarotro mandalo, matetiky fan̈ontanian̈a ty tsy mety afaka an̈aty jerinolo: Ino ma nahavy izio? Miankin̈y mare amy valiny fan̈ontanian̈a io hahavitanolo hahatanty raha mandalo io. Izikoa tsy mahafapo izy foeky valiny azony, hahaihijaly fo izy sady mety hahatsiaro diso mare an̈atinany an̈y. Zen̈y ziô raha nandalo tamy Bruni.

Amy zioty, Bruni io man̈angy efa mahazoazo taon̈o, sady renimpianakavian̈a. Ho izy: “Efa taon̈o maromaro loso zay, naty zanako viavy hely. Zaho nino Zan̈ahary, ke zaho nandeha nan̈aton̈o mompera tamy toeran̈a nisy zahay baka hahazo fankahirezan̈a. Nalainy Zan̈ahary aminany andan̈itry an̈y zen̈y ho izy Susanne, sady efa anjely izy izioty. Zanako izikoa fa naty, fiain̈ananaka tsy basiny nanjary tsisy dikany foeky fa nanjary halako mare koa Zan̈ahary, fotony izy nangala zanako.” Tan̈atiny taon̈o maro, Bruni nijaly ndreky nalahelo fo. Ho izy: “Nisy Vavolombelon̈o Jehovah nan̈aboaka zaho baka tamy Baiboly fa tsisy antony tokony hahavy zaho tsy ho tia Zan̈ahary. Jehovah tsy nangala Susanne, baka io izy tsy niova anjely aby. Olombelon̈o tsy lavorary izy, ke zen̈y nahavy izy narary. Susanne mandry ampasan̈a ao, sady efa miambin̈y fotoan̈a hamilomany Jehovah izy. Nianarako koa fa Jehovah niasa olombelon̈o mba hipetraka mandrakizay amy paradisa ambony tany, sady efa tsy ho ela raha zen̈y ho tanteraka. Izikoa fa nanjary haiko toetriny Jehovah, zaho nanjary nahatsapa narikitry izy mare, avio efa tsy nahatsiaro nijaly be eky.”—Salamo 37:29; Asan’ny Apostoly 24:15; Romanina 5:12.

Olo antapitrisany miatriky raha sarotro isankarazany: Fahorian̈a aminy ain̈inany, ady, mosary, na antambo. Nanjary kirikiry Bruni izikoa fa hitany tamy Baiboly tao fa kaiky tsy Jehovah foeky mahavy raha ratsy aby zen̈y. Nata olombelon̈o tsy nataony hijaly foeky. Sady efa tsy ho ela izy han̈afoan̈a raha ratsy jiaby. Fitomboany faharatsian̈a io mariky hahaizan̈a fa atsika io efa miain̈y aminy “andra farany” donia ratsy ty. Fiovoan̈a hitondra hatsaran̈a hiambesantsika io efa marikitry.—2 Timoty 3:1-5; Matio 24:7, 8.

Mahay Zan̈ahary

Hans ndreky Bruni samby efa nahaihay raha momba Zan̈ahary. Iro nino izy, kanefa an̈arany fo iro nahay raha momba izy. Ten̈a nahita hatsaran̈a iro izikoa fa nangala fotoan̈a hahaizan̈a tsarabe raha momba Jehovah. Hitandro valiny fan̈ontanian̈a maro maventy momba andrantsika iziô. Ke iro nanjary nilamintsain̈y sady nanan̈a fan̈antinan̈a azo antoko. Antapitrisany koa panompony Jehovah mahatsapa karaha zen̈y.

Izikoa tihahay raha momba Jehovah, voanalohany, mila mandiniky tsarabe Baiboly. Izio man̈ambara amintsika raha momba izy ndreky raha takiny amintsika. Zen̈y raha nataonolo sasany tamy taonjato voanalohany. Karaha ty nivolan̈iny Lioka pahay tantara ndreky dokotera, momba iro tamy fiangonan̈a jiosy ta Beria, a Gresy: “Iro tsy vitany nazoto nitandren̈y volan̈a Zan̈ahary [baka tamy Paoly ndreky Silasy] fo fa isanandra koa iro nandiniky Soratra Masin̈y io, baka ho azondro antoko tsarabe fa zen̈y ankitin̈y izy.”—Asan’ny Apostoly 17:10, 11.

Fiangonan̈a kristianin̈y tamy taonjato voanalohany koa niaraka nivory. (Asan’ny Apostoly 2:41, 42, 46; 1 Korintianina 1:1, 2; Galatianina 1:1, 2; 2 Tesalonianina 1:1) Karaha zen̈y koa ataony fiangonan̈any Vavolombelon̈o Jehovah aminandra izioty. Iro miaraka mivory. Fivorian̈a aby io natao han̈ampian̈a olo hifandray marikitry amy Jehovah ndreky hanompo izy ankaravoan̈a. Fiarahan̈a amy Vavolombelon̈o io koa mitondra hatsaran̈a hafa. Matetiky olombelon̈o mangala tahaka toetriny Zan̈ahary tompoeny, ke iro Vavolombelon̈o aby io koa man̈aboaka toetriny Jehovah, ndray mety tsy ten̈a amy fomba feno. Ke fiarahan̈a mivory amindro man̈ampy atsika hahay tsarabe momba Jehovah.—Hebreo 10:24, 25.

Izio ma mitaky ezaka be loatra fahaizan̈a momba Zan̈ahary? Izio ndraiky mitaky ezaka marin̈y. Karaha zen̈y koa raha maro tian̈a takarin̈y amy fiain̈ana, tsy zen̈y? Iritrireta baka ezaka ataony atlety araiky ten̈a mahay izikoa fa man̈ano entraineman. Diniha baka ohatra, raha nivolan̈iny Jean-Claude Killy. Izy nahazo meday volamena tamy konkoro migororosy amy lanezy, tamy soma olimpiky ta France. Izy nivolan̈a fa izikoa pan̈ano spaoro araiky tihahomby tsarabe amy sehatra iraisampirenena ‘mila mioman̈a 10 taon̈o alohany konkoro io, sady tokony hieritreritry izio fo isanandra. Sain̈y ndreky vatan̈a miasa fo isanandra an̈aty taon̈o.’ Konkoro atao an̈aty 10 minity fo izy mitaky fotoan̈a ndreky ezaka mare be karaha zen̈y! Kanefa mbala be lavitry sady ten̈a maharitry noho zen̈y hatsaran̈a azontsika izikoa mahay momba Jehovah.

Mihavan̈a Tsarabe amy Zan̈ahary

Azovy ma tiho matiantoko amy fiain̈ana zen̈y? Tsisy. Ke izikoa tsapanao fa tsy ten̈a misy tanjon̈o fiain̈ananao na izikoa tianao ho hay nan̈ino raha ratsy aby io misy, mifen̈a ho tapakevitry hahay Jehovah, Zan̈ahary koran̈iny amy Baiboly ao. Raha zen̈y afaka man̈atsara fiain̈ananao mandrakizay.

Mety ho lany ma raha afaka ianarantsika momba Jehovah? Misy olo efa nanompo izy efa rango ela, kanefa mbala varian̈a fo amy raha nianarany ndreky amy raha vaovao mbala ianarany momba Jehovah. Fianaran̈a karaha zen̈y mahavy atsika ho sambatra ndreky harikitry Jehovah tsarabe. Irarian̈a atsika hitovy hevitry amy apostoly Paoly. Ho izy: “Lalin̈y ankitin̈y harian̈any Zan̈ahary ndreky fahendrenanany ndreky fahaizan̈anany! Tsy takatra jery fomba fitsaran̈anany, baka io tsisy olo mahadiniky lalan̈anany. Mba ‘azovy ma nanjary nahay raha an̈aty jeriny Jehovah, na azovy ma nanjary pan̈amia hevitry izy?’”—Romanina 11:33, 34.

[Lamariky amy pazy ambany]

[Volan̈a nalain̈y]

Mbala misy olo fo man̈ontany ten̈a karaha ty: ‘Nan̈ino ma zaho velon̈o? Han̈ano akory hoavinaka? Ino ma ten̈a dikany fiain̈ana ty?’

[Volan̈a nalain̈y]

“Izikoa fa nanjary haiko toetriny Jehovah, zaho nanjary nahatsapa narikitry izy mare”

[Volan̈a nalain̈y]

“Tsisy raha tsaratsarany manompo Jehovah. Tsisy raha mety ampitovisin̈y amizio. Zaho koa efa nahay Jehovah, nanjary nisy dikany fiain̈ananaka.”