1. Nan̈ino atsika resy lahatra fa efa miain̈y aminy “andra farany”?

 ANAO ma teraka tafarany 1914? Izikoa zen̈y, efa niain̈y tan̈atiny “andra farany” donia ty anao dikanizen̈y. (2 Tim. 3:1) Resy lahatra atsika panompony Jehovah fa atsika io efa miain̈y aminy “andra farany.” Nan̈ino? Fotony atsika jiaby samby efa naharen̈y momba raha efa nivolan̈iny Jesosy fa handalo amy fotoan̈a iziô. Tafiditry amy zen̈y ady, mosary, horohorontany, valanaretin̈y, mahaimaro olo tsy man̈araka lalàn̈a, baka io fan̈injehan̈a panompony Jehovah. (Mat. 24:3, 7-9, 12; Lioka 21:10-12) Mahita koa atsika fa toetrinolo efa mitovy amy raha nikoran̈iny apostoly Paoly.​—Zahava efajoro “ Toetrinolo amy Zioty.”

2. Ino aby fan̈ontanian̈a mila haintsika valiny?

² Efa elaela nandalovany 1914 zay, ke dikanizen̈y atsika ziô efa miain̈y amy tapany farany aminy “andra farany.” Ke efa marikitry mare farany. Zen̈y mahavy atsika mila mahay valiny fan̈ontanian̈a maventy aby ty: Ino aby raha hiboaka amy tapany farany aminy “andra farany”? Avio tiany Jehovah han̈ino atsika amy fiambesan̈a faviany raha aby zen̈y?

3. Izikoa 1 Tesalonianina 5:1-3 zahan̈a, ino filazan̈a hataondro firenena aby io?

³ Vakia 1 Tesalonianina 5:1-3. “Andrany Jehovah” koran̈iny Paoly io hanomboko amy fan̈afihan̈a “Babylony Be” na fivavahan̈a diso jiaby, avio hifaran̈a aminy Aramagedona. (Apok. 16:14, 16; 17:5) Aloha heliny hanombohany “andrany Jehovah” io, iro pitondra fanjakan̈a aby io han̈ano filazan̈a fa misy “fandriampahaleman̈a ndreky filaminan̈a!” Matetiky iro pitondra aby io mampiasa volan̈a mitovitovy amy zen̈y, lera iro mivolan̈a fa hankatsara fifandraisan̈a misy amy samby firenena. b Fa tsy karaha zen̈y filazan̈a araiky volan̈iny Baiboly io. Fotony lera izio miboaka, maro olo loso mieritreritry fa vitany pitondra aby io ankitin̈y nampilamin̈y fiain̈ana. Fa ny marin̈y aminany, hisy “fandravan̈ana tampoko” afaranizen̈y.​—Mat. 24:21.

4. a) Ino raha mbala tsy haintsika? b) Ino ndraiky raha efa haintsika?

⁴ Misy raha sasany mbala tsy haintsika momba filazan̈a “fandriampahaleman̈a ndreky filaminan̈a” io. Ohatra, tsy haintsika baka aminino mahavy iro pitondra fanjakan̈a aby io han̈ano filazan̈a io, na koa akory fomba han̈anaovandro izio. Avio tsy haintsika koa asa izio filazan̈a miavaka be atao indraiky fo, sa filazan̈a maromaro mifandimby. Fa ndray zen̈y, raha haintsika, atsika tsy mila mino fa vitandro ankitin̈y nampisy fandriampahaleman̈a erantany. Na atsika aby tokotro direkty tontohitry fa io filazan̈a nirahin̈y niambesantsika in̈y. Izio lamariky hahaizan̈a fa efa hanomboko amy zay “andrany Jehovah.”

5. Nan̈ino 1 Tesalonianina 5:4-6 man̈ampy atsika ho von̈ono aminy “andrany Jehovah”?

⁵ Vakia 1 Tesalonianina 5:4-6. Ino raha mety hataontsika baka atsika ho von̈ono aminy “andrany Jehovah”? Paoly nan̈iraka atsika mba tsy ‘hatoro karaha olo sasany.’ Atsika mila ‘mifoha fo’ sady mahimahin̈y fo amy raha hiboaka. Fomba han̈aboahantsika zen̈y, ohatra, atsika tsy mila milan̈y na aminjovy na aminjovy, avio atsika tsy mila miditry amy politiky zen̈y foeky. Izikoa baka atsika man̈ano zen̈y, atsika manjary “an̈isany donia ty” edy. (Jaona 15:19) Haintsika fa efa Fanjakan̈any Zan̈ahary zaraiky fo vahaolan̈a afaka hampisy fandriampahaleman̈a ambony tany eto.

6. Ampiantsika han̈ano ino ma olo, baka io nan̈ino?

⁶ Atsika tsy vitany miezaka tsy hatoro fo fa atsika koa man̈ampy olo hifoha fo. Ampiantsika iro hahay raha koran̈iny Baiboly fa handalo erantany. Tsarova fa izikoa anao miambin̈y fahorian̈a be manomboko zay vo hanapakevitry hanompo Jehovah, efa tara loatra! c

7. Ino raha tiany Jehovah hataontsika amy zioty?

⁷ Hely tavela tsy aviany “andrany Jehovah”, ke tiany izikoa atsika mazoto mitory fo. Zen̈y mahavy atsika mila mifen̈y “ho be atao fo aminy asany Tompo.” (1 Kor. 15:58) Jesosy efa nivolan̈a tsialohaloha, fa atsika han̈ano raha zen̈y. Karaha ty baka raha nivolan̈iny izikoa izy fa nikoran̈a momba raha maventy hiboaka aminy andra farany: “Ankoatranizen̈y, tsy maintsy hitorian̈a amy firenena jiaby antsendriky vaovao tsara.” (Mar. 13:4, 8, 10; Mat. 24:14) Miniminia hely baka! Isaka anao mitory, anao an̈isany man̈atanteraka faminanian̈a io.

8. Man̈ano akory fandrosoan̈any asa fitorian̈a?

⁸ Isaka taon̈o, mahaimaro fo olo maharen̈y vaovao tsara momba Fanjakan̈a io. Diniha baka hamaraozany pitory erantany, aminy andra farany iziô. Taminy 1914 tan̈y, mbala 5 155 fo pitory tamy tany 43. Fa amy zioty ndraiky, efa kadiriny 8 500 000 pitory amy tany 240 mandilatra. Fa mbala tsendriky vita asantsika. Atsika mila mitory momba Fanjakan̈any Zan̈ahary fo, ke man̈ambara aminolo fa izio zaraiky fo mahavita man̈adoso problemo jiaby mahazo olombelon̈o.​—Sal. 145:11-13.

9. Nan̈ino atsika tokony hitory fo?

⁹ Asa fitorian̈a io tsy tapitry izikoa tsy efa Jehovah mivolan̈a vita. Ke karakory ma habezany fotoan̈a tavela mbala hahafahandro hianatra raha momba Zan̈ahary Jehovah ndreky Jesosy Kristy? (Jaona 17:3) Tsy haintsika valinizen̈y. Fa ny raha haintsika, mandrapaviany fahorian̈a be, lan̈iany olo ‘manan̈a fô tsara ke man̈eva hahazo fiain̈ana tsisy farany’ mbala afaka man̈eky vaovao tsara fo ndreky mifidy hanompo Jehovah. (Asa. 13:48) Akory mety han̈ampiantsika olo aby io diany mbala tsendriky tara loatra?

10. Akory an̈ampiany Jehovah atsika baka hahay hampianatra ny marin̈y?

¹⁰ Jehovah mampiasa fandaminan̈anany han̈amezan̈a atsika raha jiaby ilaintsika hahavitan̈a mampianatra ny marin̈y. Amy fomba karakory? Isaka herin̈iandra, ohatra, atsika ampiofan̈iny amy fivorian̈a andavandra. Loso haintsika karakory atao mampiditry koran̈a ndreky karakory atao lera mitsidiky. Amy fivorian̈a io koa atsika ampiofan̈iny hahay hampianatra Baiboly. Fa tsy zen̈y fo. Fandaminan̈any Jehovah koa man̈amia atsika Fitaovan̈a Fampianaran̈a. Izio man̈ampy atsika ...

•   hanomboko koran̈a,

•   han̈ano raha hahavy olo ho lian̈a aminy hafatra hindesintsika,

•   handrisiky olo hazoto hianatra raha momba Baiboly,

•   hampianatra ny marin̈y lera mampianatra Baiboly, avio

•   handrisiky olo lian̈a hizaha tranonkalantsika ndreky ho avy hivory.

 Atsika ndray efa manan̈a fitaovan̈a aby io, izikoa iro io tsy ampiasaintsika, tsisy varany. d Ohatra, ino raha mety hataonao izikoa anao nahita olo lian̈a sady nilamin̈y tsarabe koran̈anaro? Izy mety hamezanao trakty na gazety, amy zen̈y izy mba misy raha vakivakin̈a mandrapavianao. Isaka fanjava, andraikitrintsika tsiaraikiaraiky mifen̈y baka ho be atao aminy asa fitorian̈a.

11. Ino ma antony nan̈anaovan̈a Fianaran̈a Baiboly Aminy Internet?

¹¹ Misy fomba hafa koa an̈ampiany Jehovah olo hahay ny marin̈y, an̈isanizen̈y Fianaran̈a Baiboly Aminy Internet amy jw.org^®. e Nan̈ino ma nasian̈a fianaran̈a io ao? Fotony isaka fanjava, maro olo erantany mitady fianaran̈a Baiboly aminy Internet ao. Ke baka amy fianaran̈a io mety hahitandro fahamarin̈ana amy Volan̈a Zan̈ahary. Misy olo sasany tsy dia mazoto hianatra Baiboly miaraka amintsika. Ke izikoa anao fa tojy olo karaha zen̈y, aboaha izy Fianaran̈a Baiboly Aminy Internet io, na koa andifasa liens izy misy hahitany izio.

12. Ino raha ho hitanolo amy Fianaran̈a Baiboly Aminy Internet ao?

¹² An̈isany raha dinihin̈y amy Fianaran̈a Baiboly Aminy Internet ao, ohatra, momba Baiboly ndreky Araiky nampanoratra izio. Hita ao koa azovy aby olo ten̈a koran̈iny Baiboly, ndreky ino fan̈antinan̈a amezanizio. Ty ohatra raha ianaran̈a:

•   Akory mety han̈ampiany Baiboly anao?

•   Azovy ma Jehovah ndreky Jesosy avio anjely zen̈y?

•   Nan̈ino Zan̈ahary niasa olombelon̈o?

•   Nan̈ino misy jaly ndreky raha ratsy?

 Ianaran̈a ao koa karakory hataony Jehovah ...

•   han̈adoso jaly ndreky fahafatesan̈a,

•   hamelon̈o ndraiky olo efa maty, avio

•   hanolo fanjakan̈anolombelon̈o amy Fanjakan̈any Zan̈ahary.

13. Olo araiky koa ma fa mianatra Baiboly aminy Internet ao efa tsy mila olo hampianatra izy Baiboly eky? Hazavà.

¹³ Olo araiky ndray efa mianatra Baiboly aminy Internet, zen̈y tsy mivolan̈a fa izy efa tsy mila olo hampianatra izy Baiboly eky. Atsika namezany Jesosy tombontsoa hampianatra olo. Atsika man̈anten̈a fa iro olo lian̈a aby io hamaky ndreky hankasitraka leson aminy Internet ao, ke hanjary tihahay raha maromaro momba raha hitandro ao. Mety han̈eky hampianarin̈y Baiboly iro amy zen̈y. Isaka tapitry leson araiky, olo io ampirisihin̈y hangataka olo hampianatra izy Baiboly. Isanandra, efa mandilatra 230 fangatahan̈a azontsika aminy Internet ao, baka aminolo erantany. Ilain̈y mare misy olo mampianatra!

14. Tokony hifen̈y mare han̈ano ino ma atsika, izikoa Matio 28:19, 20 dinihin̈y? Nan̈ino?

¹⁴ Vakia Matio 28:19, 20. Lera atsika mampianatra Baiboly, atsika tokony hifen̈y mare han̈ampy olo io hanjary pianatra na pan̈aradia Jesosy, ke “hitandrin̈y raha jiaby” nan̈irahany Jesosy. Mila ampiantsika olo io baka hazava aminany tsarabe fa izy mila mifidy hanompo Jehovah ndreky hanohan̈a Fanjakan̈anany. Ke mila mifen̈y atsika hanohin̈y fonany, amy zen̈y izy han̈araka raha nianarany ndreky hanokanten̈a amy Jehovah ke hatao batisa. Efa baka amy zen̈y zaraiky fo hahavy ho tafitsaka velon̈o aminy andrany Jehovah.​—1 Pet. 3:21.

15. Tsy tokony handany lera aminjovy ma atsika? Nan̈ino?

¹⁵ Hitantsika tio fa efa hely tavela ho rava donia ty. Dikanizen̈y, atsika efa tsy mila mandany lera aminolo efa tsy han̈ano raha. (1 Kor. 9:26) Meky mare baka asa ty! Mbala maro olo mila maharen̈y hafatra momba Fanjakan̈a io, diany mbala tsendriky tara loatra.

16. Izikoa Apokalypsy 18:2, 4, 5, 8 zahan̈a, ino ma raha tsy maintsy ataontsika jiaby? (Zahava koa lamariky amy pazy ambany.)

¹⁶ Vakia Apokalypsy 18:2, 4, 5, 8. Hitantsika aminy andininteny aby io fa misy raha hafa tiany Jehovah hataony panomponany. Olo ten̈a kristianin̈y zen̈y tokotro mitandrin̈y tsy hifandray amy Babylony Be foeky. Nety nisy pianatra Baiboly araiky taloha nivavaka tamy fivavahan̈a diso, talohany nahaizany fahamarin̈ana. Izy mety nandray anjara tamy raha nataony fivavahan̈a io, na koa nan̈amia vola hanohan̈ana izio. Ke izikoa izy efa mianatra Baiboly, izy efa tsy tokotro hifandray amy fivavahan̈a diso eky. Lera izy man̈ano zen̈y vo mety iken̈y hanjary pitory. Tokony manoratra taratasy izy mivolan̈a fa izy niala amy fivavahan̈anany taloha in̈y. Na koa mety misy raha hafa mila ataony han̈aboahan̈a fa izy efa tsy pikamban̈a ao eky. Ary karaha zen̈y fo koa tokony hataony amy zay fikambanan̈a nisy izy, ke misy ifandraisany amy Babylony Be. f

17. Asa karakory ma tsy tokony hataony Kristianin̈y? Nan̈ino?

¹⁷ Mila mangala toky tsarabe Kristianin̈y araiky fa izy efa tsy mifandray amy Babylony Be eky. (2 Kor. 6:14-17) Izy ohatra, tsy han̈eky hiasa niny leglizy. Izikoa misy olo na sosiete mikarama izy, ke izy irahindro man̈ano asa amy tran̈ony leglizy araiky, izy tsy tokotro han̈eky hiasa be ao, nata mety ataony fo man̈ano asa malakilaky vita, karaha ataony man̈avotro olo. Izikoa izy miasa ten̈a, izy tsy tokony hitady asa amy leglizy na han̈ano fifan̈arahan̈a hiaraka hiasa amindro. Anao koa fa hanapakevitry momba zen̈y, diniha tsara lahatsoratra amy lamariky amy pazy ambany io. Mentitry mare atsika amy raha zen̈y, fotony tsy tiantsika izikoa atsika mandray anjara amy raha ataony fivavahan̈a diso ndreky amy fahotan̈andro. Maloto baka iro io amy Zan̈ahary.​—Isaia 52:11. g

18. Akory nan̈aboahany rahalahy araiky fa nan̈araka toro lalan̈y Baiboly fo izy?

¹⁸ Diniha baka raha navoa antipan̈ahy araiky ty. Izy miasa ten̈a. Nisy olo nangataka izy handeha handrafitry raha hely tamy leglizy araiky tamy tanànandro. Tsy leglizy io nikarama izy fa olo io. Rango zay, rahalahy io efa nivolan̈a fa izy tsy han̈ano asa niny leglizy. Ary efa hainolo io raha zen̈y, fa nahavy izy nandeha nikoran̈a tamy rahalahy io, fotony tsisy pandrafitry nan̈eky han̈ano asa io. Fa rahalahy io tsy nan̈eky. Izy nan̈araka toro lalan̈any Baiboly fo. Herin̈iandra man̈araka, nisy raha niboaka. Naboaka tamy gazety sariny pandrafitry araiky mametaka lakroa tamy leglizy io. Seky sariny rahalahy io tiô, izikoa izy nan̈eky nilefitry. Mety ho karakory eky niritriretiny piaramanompo izikoa zen̈y niboaka? Robaka foeky lazanany! Avio mety karakory tsapany Jehovah?

19-20. a) Ino aby raha nianarantsika firaka eto? b) Ino koa raha mbala tokony hianarantsika?

¹⁹ Eraka raha koran̈iny faminanian̈any Baiboly, raha maventy hiboaka tsy ho ela, filazan̈a momba “fandriampahaleman̈a ndreky filaminan̈a.” Nakiry izy, atsika efa nampianariny Jehovah fa iro firenena aby io tsy hahavita hampisy fandriampahaleman̈a ndreky filaminan̈a zen̈y, ke sarintsariny fo raha hivolan̈indro io sady tsy hahadin̈y ela. Ke ino tokony hataontsika, diany mbola tsendriky miboaka raha zen̈y ndreky fandripahan̈a tampoko avy afaranizen̈y? Tiany Jehovah atsika hifen̈y amy fitorian̈a ndreky fampianaran̈a. Avio atsika tsy mila mifandray amy Babylony Be, ke hiala amy fivavahan̈a diso ndreky tsy han̈ano asa misy ifandraisany amizio.

²⁰ Mbala hisy raha hafa koa hiboaka afaranizen̈y, amy farany “andra farany.” Misy raha hafa koa tiany Jehovah hataontsika. Ino izio, avio akory hioman̈antsika amy raha jiaby hiboaka atoato io? Zen̈y raha ho hitantsika amy lahatsoratra man̈araka.