Baʼax ku kaʼansik le Bibliaoʼ

¿Kʼaas wa u beetik máak le deporteʼob peligrosoʼoboʼ?

«TEʼ KʼIINOʼOBAʼ YAʼAB MÁAKOʼOBEʼ MAʼ CHÉEN KU CHAʼANTIK U BEETAʼAL LE DEPORTEʼOB PELIGROSOʼOBOʼ, BAʼAXEʼ TAK LETIʼOB BEETIK. POR EJEMPLOEʼ KU PULKUBAʼOB DESDE JUNPʼÉEL AVIÓN, KU NAʼAKLOʼOB TIʼ JUNPʼÉEL KAʼANAL MONTAÑA UTIAʼAL U JALKʼESKUBAʼOB YÉETEL JUNPʼÉEL SUUM, KU NAʼAKLOʼOB TIʼ JUNPʼÉEL CAYUCO UTIAʼAL U MÁANOʼOB TIʼ RÍOʼOB JACH YAAN U MUUKʼ U JAʼILOʼOB YÉETEL YANOʼOBEʼ KU BUCEAROʼOB TUʼUX YAAN TIBURONOʼOB» (BEY U YAʼALIK LE PERIÓDICO THE WILLOW GLEN RESIDENT).

LE BAʼAX ku yaʼalik le periodicooʼ ku yeʼesik máakalmáak le deporteʼob maas uts tu yich u beetik le máakoʼob teʼ kʼiinoʼobaʼ. Bejlaʼeʼ tsʼoʼok u yaʼabtal le máaxoʼob uts tu yich le deporteʼob tuʼux ku naʼakal máak tiʼ junpʼéel montaña jach yaan u hieloil bey xan u pulkuba máak tiʼ paracaídas *. Leloʼ ku yeʼesikeʼ le máakoʼoboʼ jach uts tu tʼaan u tsʼáaik u kuxtaloʼob tu chiʼ kíimil. Yaan deportistaʼob xaneʼ ku naʼakloʼob yóokʼol junpʼéel tabla utiaʼal u jalkʼeskubaʼob yóokʼol le nieveoʼ, uts tu tʼaan u natʼkoʼob bicicleta teʼ montañaʼoboʼ yéetel uláakʼoʼobeʼ uts tu tʼaan u usarkoʼob patineta. Tuláakal lelaʼ ku beetkoʼob tumen jach uts tu yichoʼob le deporteʼob peligrosoʼoboʼ. Junpʼéel revistaeʼ ku yaʼalikeʼ bejlaʼeʼ ‹táan u maas yaʼabtal le máaxoʼob uts tu yich le deporteʼob beyoʼ. Le máakoʼoboʼ jach uts tu tʼaan u beetkoʼob le deporteʼob peligrosoʼoboʼ tumen u kʼáat u yeʼesoʼob maʼ saajkoʼobiʼ› (revista Time).

Táan u maas yaʼabtal le máaxoʼob beetik le deporteʼob beyaʼ, le oʼolal táan xan u maas yaʼabtal le máaxoʼob ku accidentaroʼob tu yoʼolaloʼoboʼ. Sáamsamaleʼ tu maas yaʼabtal le accidenteʼoboʼ, por ejemploeʼ tu añoil 1997 tu luʼumil Estados Unidoseʼ yaʼabchaj 33% le accidenteʼob úuch yoʼolal patinetaoʼ, 31% maas yaʼabchaj le accidenteʼob ikil u jalkʼeskuba máak yéetel junpʼéel tabla yóokʼol le nieveoʼ yéetel 20% maas yaʼabchaj yoʼolal le deporteʼob ku beetaʼal teʼ montañaʼoboʼ. Tsʼoʼoleʼ yaan horaeʼ hasta ku kíimil le máaxoʼob beetik le deporteʼobaʼ. Chéen baʼaleʼ le máakoʼoboʼ u yojliliʼob jach peligrosoʼ le deporteʼob ku beetkoʼoboʼ. Bey u yeʼesik le baʼax tu yaʼalaj juntúul koʼolel jach peligroso le deporte ku beetkoʼ. Letiʼeʼ tu yaʼalaj: «In wojliliʼ jeʼel baʼalak súutukileʼ jeʼel in kíimileʼ». Juntúul máak jach u yojel u jalkʼesuba yéetel u tabla yóokʼol le nieveoʼ tu yaʼalaj xan: «Wa maʼ ta accidentarkabaeʼ maʼ táan a tsʼáaik a wóol a beet le deporteoʼ».

Le máaxoʼob meyajtik Diosoʼ, ¿unaj wa u beetkoʼob le clase deporteʼobaʼ? ¿Jeʼel wa u yáantkoʼon le Biblia utiaʼal k-ilik wa maʼalob ka k-beet le deporteʼob beyaʼ? Utiaʼal k-núukik le preguntaʼobaʼ koʼox ilik baʼax ku tuklik Dios yoʼolal le kuxtaloʼ.

¿Bix u yilik Dios le kuxtaloʼ?

Le Bibliaoʼ ku yaʼalikeʼ Jéeobaeʼ «u sayabil le kuxtaloʼ» (Salmo 36:9). Letiʼeʼ maʼ chéen tu beetaj wíinikiʼ, baʼaxeʼ tu beetaj xan tuláakal baʼax kʼaʼabéet utiaʼal u disfrutartik le kuxtaloʼ (Salmo 139:14; Hechos 14:16, 17; 17:24-​28). Le oʼolal u kʼáat ka k-kanáant le kuxtal u siimajtoʼonoʼ. Leloʼ bey xan u yeʼesik le leyoʼob tu tsʼáaj tiʼ u kaajil Israeloʼ.

Le Ley tsʼaʼab tiʼ Moisésoʼ ku yaʼalikeʼ máakeʼ unaj u kanáantik u kuxtal u yéet máakil. Wa yaan máax maʼ tu beetik baʼax ku yaʼalik kaʼach le ley jeʼeloʼ, tsʼoʼoleʼ ku kíimil wa máaxeʼ tiʼ letiʼ yaan u culpail úuchik u kíimil le máakoʼ. Por ejemploeʼ juntúul máak ku beetik u yotocheʼ unaj u tsʼáaik kaʼach junpʼéel pretil yóokʼol le techooʼ. Wa maʼ tu beetik yéetel yaan máax ku lúubul yéetel ku kíimileʼ u culpa úuchik u kíimil le máax lúuboʼ (Deuteronomio 22:8). Wa juntúul wakax ku téek kʼóochik wa máax yéetel ku kíimileʼ maʼ tu yilaʼal wa u culpa u yuumil le wakax úuchik u kíimil le máakoʼ. Chéen baʼaleʼ wa u yuumil le wakax u yojliliʼ ku kʼóochik máak yéetel maʼ tu kʼaxkeʼ u culpa úuchik u kíimil le máakoʼ, le oʼolal yaan u kíimsaʼal le wakaxoʼ bey xan u yuumiloʼ (Éxodo 21:28, 29). Tu táan Jéeobaeʼ jach koʼoj le kuxtaloʼ, le oʼolal le ley tu tsʼáajoʼ ku yeʼesik jach kʼaʼabéet u kanáantaʼal.

Le máaxoʼob meyajtik Dios úuchjeakiloʼ u yojloʼobeʼ le leyoʼ ku tsʼáaik xan naʼatbileʼ maʼ unaj u tsʼáaik tu chiʼ kíimil u kuxtal máakiʼ. Le Bibliaoʼ ku yaʼalikeʼ juntéenjeakeʼ Davideʼ ‹taakchaj u yukʼik u jaʼil le cisterna yaan tu kaajil Belénoʼ›. Ka tu yuʼuboʼob leloʼ óoxtúul tiʼ u soldadoʼobeʼ binoʼob teʼ tuʼux jelekbal le filisteoʼoboʼ ka tu jóoʼsoʼob u jaʼil le cisterna utiaʼal u biskoʼob tiʼ Davidoʼ. ¿Baʼax túun tu beetaj David? Letiʼeʼ maʼ tu yóotaj u yukʼ le jaʼoʼ, baʼaxeʼ tu wekaj teʼ luʼumoʼ. Ka tu yaʼalaj: «¡Jach junpuliʼ maʼ maʼalob tu táan in Dios ka in beet lelaʼ! ¿Unaj wa in wukʼik u kʼiʼikʼel le máakoʼob tu tsʼáaj u kuxtaloʼob tu chiʼ kíimiloʼ? Tumen letiʼobeʼ tu tsʼáaj u kuxtaloʼob tu chiʼ kíimil utiaʼal u taaskoʼobten le jaʼoʼ» (1 Crónicas 11:17-​19). Davideʼ jach junpuliʼ maʼ taak u tsʼáaik u kuxtal u maasil tu chiʼ kíimil chéen utiaʼal u kaxtik u yutsiliʼ.

Jesús xaneʼ láayliʼ bey u yilik kaʼach le kuxtaloʼ. Le ka aʼalaʼabtiʼ tumen le Kʼaasilbaʼal ka u puluba desde tu kaʼanlil u baʼpakʼiloʼob le templo utiaʼal u yilik wa jeʼel u yáantaʼal tumen le ángeloʼoboʼ, Jesúseʼ tu núukaj: «Maʼ unaj a probartik Jéeoba a Diosiʼ» (Mateo 4:​5-7). Jeʼex túun k-ilkoʼ David yéetel Jesúseʼ u yojloʼob kaʼacheʼ Jéeobaeʼ maʼ uts tu tʼaan ka u tsʼáa u kuxtal máak tu chiʼ kíimiliʼ.

Yoʼolal le ejemploʼob tsʼoʼok k-ilkaʼ, ¿bix túun jeʼel k-ojéeltik máakalmáak le deporteʼob jach peligrosoʼoboʼ? U jaajileʼ yaan deporteʼobeʼ maʼ peligrosoʼobiʼ, chéen baʼaleʼ máak jeʼel u beetik u suut peligrosoʼobeʼ. ¿Baʼax túun jeʼel u beetik máak utiaʼal maʼ u yúuchul beyoʼ?

¿Maʼalob wa ka u arriesgart u kuxtal máak?

Utiaʼal a wilik wa peligroso junpʼéel deporteeʼ maʼalob ka tuukulnakech tiʼ le preguntaʼobaʼ: ¿jach wa yaʼab accidenteʼob ku yúuchul yoʼolal le deporteaʼ? ¿Yaanten wa tuláakal baʼax kʼaʼabéet utiaʼal maʼ u yúuchulten loob le kéen in beet le deporteoʼ? ¿Baʼax jeʼel u yúuchul wa ka lúubken, wa maʼ tin calculartik tubeel le tuʼux kin síitʼoʼ bey xan wa ku fallar le equipo kin usarkoʼ? Wa ka in beet le deporteoʼ, ¿jeʼel wa u yúuchulten wa baʼax loobil ka tak kíimkeneʼ?

Le máax meyajtik Jéeoba uts tu tʼaan u tsʼáaik u kuxtal tu chiʼ kíimileʼ maʼ tu páajtal u tsʼaʼabaltiʼ mix junpʼéel meyaj teʼ múuchʼuliloʼ, tsʼoʼoleʼ jeʼel xan u xuʼulul u biskuba yéetel Jéeobaeʼ (1 Timoteo 3:​2, 8-​10; 4:​12; Tito 2:​6-8). Jeʼex túun k-ilkoʼ le máaxoʼob meyajtik Jéeobaoʼ le kéen u beetoʼob wa baʼax deporteileʼ unaj u chʼaʼikoʼob en cuenta bix u yilik Jéeoba le kuxtaloʼ.

[Nota]