Jehová, ti Dios ni naquiiñeʼ gunibiaʼluʼ

¿Ñee runi sentirluʼ riaadxaʼ lii xiixa lu xquendanabániluʼ la? Pa huaxiéʼ runibiaʼluʼ Dios, zándaca zacá cayuni sentirluʼ. ¿Xiñee yaʼ? Stale binni maʼ binibiaʼcaʼ Dios ni riete lu Biblia ne maʼ guleenducaʼ stale cosa galán lu xquendanabánicaʼ.

Ni bicaa Biblia nga Jehová ne racalaʼdxiʼ gunibiaʼnu laa. Ti salmista bicaa: «Ti ganna binni laluʼ nga Jehová, lii si nga ni nuu jma luguiáʼ lu guidubi naca guidxilayú». Nanna Dios zabeendunu stale cosa galán pa gunibiaʼnu laa. «Naa, Jehová, naa nga Dios stiluʼ, ni cusiidiʼ lii para cheʼ ni lii galán». ¿Xi ribeendunu ora runibiaʼnu Jehová, Dios ni jma nandxóʼ? (Salmo 83:18; Isaías 48:17).

Ora runibiaʼnu Dios, racanebe laanu gudxíʼlunu ca guendanagana ni rápanu guiráʼ dxi. Laaca rudiibe ti esperanza galán laanu para despué ne riguixhedxibe ladxidoʼno. Ra gunibiaʼluʼ Dios, zadxélaluʼ ca respuesta stiʼ ca pregunta ni runi stale binni. ¿Gunáʼ nga ca pregunta riʼ yaʼ?

¿Xi pur nabáninu?

Neca nuu stale tecnología tiempu riʼ, stale binni rinabadiidxaʼ: ¿Xiñee nuaaʼ ndaaniʼ Guidxilayú riʼ pue? ¿Ñee ndiʼ si nga guendanabani la? ¿Xi pur nabaneʼ? Pa qué guicábinu ca pregunta riʼ, zándaca guiníʼ íquenu xi pur nabáninu. ¿Ñee zacá runi sentir binni la? Lu ti encuesta ni guca ndaaniʼ guidxi Alemania biaʼ lu iza 2000, jma de galaa de ca binni ni guca entrevistar riníʼ íquecaʼ xi pur nabánicaʼ. Ne zándaca zacá riníʼ ique binni neza ra nabézaluʼ.

Pa qué ganna binni xi pur nabani la? qué zanna xi guni, pur nga stale binni ruyubi gapa ti dxiiñaʼ nabé galán o gapa stale bueltu, peru qué ribánicaʼ nayecheʼ. Ora qué guidxelaʼ binni xi guni né xquendanabani la? riníʼ íquecaʼ jma galán gáticaʼ. Periódicu ni láʼ International Herald Tribune bizeeteʼ «nga peʼ nga ni bizaaca ti gunaa nabé sicarú, biniisibe ndaaniʼ ti familia ni guizáʼ napa bueltu ne gúpabe guiráʼ ni gucaláʼdxibe. Neca ruluíʼ galán nabánibe, biʼniʼ sentirbe nuube stúbibe ne guníʼ íquebe xi pur nabánibe, ngue runi biitibe laca laabe». Zándaca binibiaʼluʼ tuuxa biʼniʼ sentir nuu stubi ne biiti laca laa.

¿Ñee huayunadiágaluʼ nacaʼ zanda gacané ciencia binni para ganna xi pur nabani la? Ti revista de Alemania ni láʼ Die Woche bizeeteʼ: «Neca biaʼsi ni riníʼ ciencia, qué gánnacaʼ gastiʼ de Dios. Ni runibiáʼcabe casi evolución ne física cuántica qué zanda quixhedxí ca ni ladxidóʼ binni ne gacaneni laacaʼ guibánicaʼ galán». Maʼ nanna ca científicu ca guyáʼ stale cosa ni nabani lu Guidxilayú ne laaca maʼ nánnacaʼ ximodo runi naturaleza dxiiñaʼ. Qué randa rusiene ciencia ximodo guyáʼ guendanabani ne xi pur nabáninu. Pa nisi ciencia ñuni crenu, qué ñánnanu xi ñuninenu xquendanabáninu. Ti periódicu ni láʼ Süddeut­sche Zeitung ná «guiráʼ binni caquiiñeʼ gábicabe laa xi guniné xquendanabani».

Dios ni bizáʼ laanu nga zanda gabi laanu xi guninenu xquendanabáninu purtiʼ laabe bizaʼbe binni ne nánnabe xi pur nabáninu. Biblia ná bizáʼ laanu para guibáninu ndaaniʼ Guidxilayú ne gápanu ni. Ne laaca naquiiñeʼ gusihuinni binni ca cualidad stiʼ Dios casi guendaruni jneza, sabiduría ne guendarannaxhii. Ora rudiʼnu cuenta xiñee bizáʼ Jehová laanu, riénenu xi pur nabáninu (Génesis 1:26-28).

¿Xi zanda gúniluʼ?

Pa qué gánnanu xiñee nuunu ndaaniʼ Guidxilayú riʼ ne xi pur nabáninu, Biblia ná caquiiñeʼ gunibiáʼ chaahuinu Jehová. Jesús guníʼ ca diidxaʼ riʼ: «Zacaacabe guendanabani ni qué zaluxe ra gunibiáʼcabe lii, tobi lucha Dios ni dxandíʼ, ne ra gunibiáʼcabe Jesucristu, ni biseendaluʼ». Nga runi, risaca gápanu cualidad stiʼ Dios casi guendarannaxhii ne quixhe íquenu guni mandar Reinu stiʼ Dios laanu, zacatiʼ nga zabáninu galán ne ziuʼnu nayecheʼ. Pa gúniluʼ guiráʼ ca ni bizéʼtenu riʼ, zánnaluʼ xi pur nabani binni (Juan 17:3; Eclesiastés 12:13).

Guidúʼyanu ni bizaaca Hans. * Neca nánnabe nuu Dios, qué nibánibe modo ná. Nabé guyuuláʼdxibe droga, gúpabe stale gunaa, guláʼnabe ne xcústube gápabe moto. Sicaríʼ guniʼbe: «Qué ñuuladxeʼ modo nabaneʼ». Dxi napa Hans 25 iza, gudixhe ique gunibiáʼ Dios, ngue runi, bizulú biindaʼ Biblia. Ne ora guca xhamígube Jehová, biénebe xi pur nuube ndaaniʼ Guidxilayú, nga runi gudixhe íquebe guchaabe modo nabánibe ne guyuunísabe casi testigu stiʼ Jehová. Maʼ zinebe chii iza de cayúnibe ni ná Jehová de tiempu completu. Sicaríʼ guniʼbe: «Gástiruʼ sti cosa jma galán que gúniluʼ ni ná Jehová. Dede dxi binebiaʼyaʼ laabe, maʼ nannaʼ xi pur nabaneʼ».

Nuu binni rinabadiidxaʼ xi pur nabani, laaca nuu binni nuu xizaa pur guiráʼ ca cosa malu ni cayaca ndaaniʼ Guidxilayú riʼ.

¿Xiñee bizaaca ni pue?

Ora ridxaagalú binni ti desgracia, nagueendaca riníʼ ique: ¿xiñee bizaaca ni pue? Para ganda gudxiilú binni ti guendanagana, naquiiñeʼ ganna xi guni. Pa qué guidxélabe xiñee bizaaca ni, qué zusiaandabe ni ne qué zabánibe nayecheʼ. Guidúʼyanu ni bizaaca Bruni, ti gunaa ni napa xiiñiʼ.

Sicaríʼ guniʼbe: «Raca chupa chonna iza gutiʼ Susanne, dxaapahuiiniʼ stinneʼ, cumu runeʼ cré Dios la? guyaaʼ ra nuu ti xaíque yuʼduʼ para quixhedxibe ladxiduáʼ, gúdxibe naa caquiiñeʼ Dios ti ángel huiiniʼ guibáʼ, ngue runi ziné dxaapahuiiniʼ stinneʼ. Dxi gutiʼ Susanne, guizáʼ gucaná ladxiduáʼ ne laaca guca nanaladxeʼ Dios purtiʼ ziné laabe guibáʼ». Stale iza naná guyuu ladxidóʼ Bruni. Laaca bizeetebe: «Despué biquiiñeʼ ti hermana testigu stiʼ Jehová Biblia para gusiene naa cadi jneza gaca nanaladxeʼ Dios. Gúdxibe naa qué niné Jehová xiiñeʼ guibáʼ ne qué ñúnibe laa ti ángel, bisiénebe naa guca huará xiiñeʼ purtiʼ binni ruchee laanu. Yanna maʼ nannaʼ nisiaasiʼ xiiñeʼ lu guendaguti ne zusibani Jehová laabe. Laaca biziideʼ bizáʼ Jehová binni para guibani ndaaniʼ Guidxilayú riʼ dxi gácani ti paraísu ne nannaʼ dxiicheʼ maʼ cadi candaa zazaaca ni. Dxi biziideʼ nabé nachaʼhuiʼ Jehová, bineʼ sentir nuaaʼ jma gaxha de laa ne gutadxí ladxiduáʼ» (Salmo 37:29; Hechos 24:15; Romanos 5:12.)

Stale binni cadiʼdiʼ ra nagana pur guerra, pur gastiʼ guendaró ne pur ca desastre natural. Gutadxí ladxidóʼ Bruni dxi bisiidiʼ lu Biblia qué gapa Dios donda pur guiráʼ ca cosa ni cayaca riʼ, purtiʼ nánnabe qué racalaʼdxiʼ Jehová guni sufrir binni. Rihuinni dxichi maʼ nabáninu lu «ca últimu dxi» riʼ, purtiʼ maʼ bidale cosa malu ndaaniʼ Guidxilayú, peru maʼ cadi candaa zabáninu jma galán (2 Timoteo 3:1-5; Mateo 24:7, 8).

Xi zanda gúninu para gunibiaʼnu Dios

Cumu qué runibiáʼ Hans ne Bruni Dios la? nga runi qué gánnacaʼ stale de laabe. Ra gudixhe íquecabe guiziidicabe jma de Jehová la? guleendúcabe ni galán. Ra biziidicabe ni rusiidiʼ Biblia, gutadxí ladxidóʼcabe ne yanna nápacabe ti esperanza galán. Stale xpinni Jehová huadiʼdiʼ lu ca guendanagana ni gudiʼdiʼ Hans ne Bruni.

Para ganda gunibiáʼ chaahuinu Jehová, caquiiñeʼ guidúʼndanu Biblia para gánnanu xi naquiiñeʼ gúninu lu xquendanabáninu. Ne nga peʼ nga ni biʼniʼ caadxi binni ni bibani lu primé siglu. Historiador ne médicu Lucas guníʼ «nabé galán bidxaagalú congregación de Berea, Grecia, Pablo ne Silas «purtiʼ gucuaacaʼ stiidxaʼ Dios né stale gana, ne ruundaʼ chaahuicaʼ Stiidxaʼ Dios guiráʼ dxi ti gúʼyacaʼ pa dxandíʼ guiráʼ ni cayunadiágacaʼ» (Hechos 17:10, 11).

Dxiqué laaca guca reunir ca xpinni Cristu ni bibani lu primé siglu ndaaniʼ congregación (Hechos 2:41, 42, 46; 1 Corintios 1:1, 2; Gálatas 1:1, 2; 2 Tesalonicenses 1:1). Ngaca nga runi ca testigu stiʼ Jehová tiempu riʼ, raca reunircaʼ ndaaniʼ congregación para gacanecaʼ binni guidxíñacaʼ ra nuu Jehová ne gúnicaʼ ni nabé. Ribeendú binni ni galán ora ridxaagacaʼ ca Testigu. Neca binni ruchee laacaʼ, nápacaʼ ca cualidad stiʼ Dios, nga runi, pa guidxaagaluʼ laacabe jma zunibiaʼluʼ Jehová (Hebreos 10:24, 25).

Caquiiñeʼ gúninu stale stipa para gunibiaʼnu ti binni, ne ngaca nga ni naquiiñeʼ gúninu né xquendanabáninu. Guiníʼ íquenu ximodo runi entrenar ca deportista para checaʼ ti competencia. Ti hombre de Francia ni láʼ Jean-Claude Killy, ni biʼniʼ ganar medalla de oro lu ti deporte ni runibiáʼcabe casi esquí bizeeteʼ xii nga ni naquiiñeʼ guni binni para guni ganar lu ti deporte, sicaríʼ guniʼbe: «Para ganda guni ganar tuuxa la? naquiiñeʼ gaca preparar chii iza ante ne guni entrenar guiráʼ dxi». ¡Nabé nagana ni! Zándaca rindaa carrera riʼ biaʼ chii minutu si, peru pa racalaʼdxiʼ tuuxa guni ganar la? naquiiñeʼ guni guiráʼ ca ni bizéʼtenu riʼ, ngaca nga ni naquiiñeʼ gúniluʼ para gunibiaʼluʼ Jehová ne zabeenduluʼ stale cosa galán.

Chuʼnu jma gaxha de Dios

Guiráʼ binni racalaʼdxiʼ guibani galán. Nga runi, pa riníʼ íqueluʼ xi pur nabániluʼ ne rinabadiidxaluʼ xiñee nuu stale cosa malu, gudixhe ique gunibiaʼluʼ Jehová, Dios ni bicaa Biblia. Pa guiziidiluʼ jma de laabe la? zacaneni lii guibániluʼ jma nayecheʼ.

Guiráʼ dxi zusiidiʼ Jehová laanu, ne nga huayúnibe né ca xpínnibe ni maʼ xadxí de cayuni ni nabe. Ra jma gunibiaʼnu laabe, zabáninu jma nayecheʼ ne ziuʼnu jma gaxha de laabe. Guiníʼ íquenu ca diidxaʼ ni guníʼ apóstol Pablo, sicaríʼ guniʼbe: «¡Nabé stale ndaayaʼ rudii Dios, nabé nuu xpiaaniʼ ne nanna stale! ¡Tu laa zanda guiene ca juiciu stibe, ne tu laa zanda guiene guiráʼ ca neza stibe! Purtiʼ “¿tu laa zanda ganna xi riníʼ ique Jehová? ¿O tu laa zanda gudii conseju laabe?”» (Romanos 11:33, 34).

[Nota]

[Ni caníʼ]

Stale binni rinabadiidxaʼ: ¿Xiñee nuaaʼ ndaaniʼ Guidxilayú riʼ pue? ¿Ñee ndiʼ si nga guendanabani la? ¿Xi pur nabaneʼ?

[Ni caníʼ]

«Dxi biziideʼ nabé nachaʼhuiʼ Jehová, bineʼ sentir nuaaʼ jma gaxha de laa ne gutadxí ladxiduáʼ».

[Ni caníʼ]

«Gástiruʼ sti cosa jma galán que gúniluʼ ni ná Jehová. Dede dxi binebiaʼyaʼ laabe, maʼ nannaʼ xi pur nabaneʼ».