Zire Bakure

Mo na “bakureamo” nga gu ni mo agbia ni mbu ro ni paranga ro. Ko asa ro mo nibiti ro nga mo ima nyaka na si kini ngere wa ko aundo ro tipa mo du sa na akuaro. Ho mo ani du ni rogo fuda berãseyo, mo anaandu koyo du ko ni ti aregbo dũ tipa ka gbia bete “wasa.” Ka pe rengo, mo aima ye ka kido kuti ko rogo dungu abangiriba.

Ono wa regbo aasusa, mo aye ka ino gu gbegberẽpai du tiko. Ko naida gupai nga kadu na mo ti aregbo dunduko, ka si vura du vurũ nga gipai re nika sa kura aboro ka idinga ro rogo gu kura aba ya. Na wa vura duhe nga ko arengbe ka saro mo du ni gu boro naima nyaka, ko amangi gipai re ni gbarasa ko kpotoro. Ka gbia kurapai kurii gure, ko aima dĩ papara gu marã mo naagbiaha.

Ti agi aregbo susi kusayo re, mo ima asada ka kata pabakure na ko, ono ko aidanga ka mbu ro te. Ngba kura gene, ko ima da ni baira ro. Mo nabira tiro tipa zio mo bakure na ko.

GURE nga gu pabakure du dagba avugundö na gundö. Tingbafuo Earline vu gundö tipa agarã 50, ri aya: “Gundö anaaundo re susi gu ka mi du na bakureami patire. Si aima susa gu gbua nga kadu na bakure nga gu ni oni naima ima na ni, ti kura aregbo, si naaningia yangara bakureami.” Ono tie a wa Earline aye ka inoho, ka pe rengo, gundö ho nga bakure te si nga kere gbegberẽ he. Nirengo agu afugo du kuari re ima rengba kadu tipa ri kpara kusayo ti pai sa. Ho ri awiriki gupai ni nga vugundö nga gbegberẽpai bangiri Mbori, mbiko si nagbarasa gu kpotorani Mbori afuhe furani, ri ambu gu sino nga ga vugundö re.—2 AKorindo 7:1.

Gu kura kumba nga Frank adiberã a ka mbu vugundö tipa ka sa ngbarago ti Mbori. Fuo uru sa watadu susi gure tingbafuo gu uru ko avu gako yangara gundö, ko abi tiko ko ni gurumo vuru bambu dimo kpuko yo kaa gbata gu katiri rii gundö nga gu nati ku dagba ahe yo. Frank aya: “Gure nga gu regbo mi amangi gimi diaberã. Ho mi abi tire ni mi nakuku ngba rukusi re na kini gurumo sande na bere ka aweteka bibiriko rago tipa katiri rii gundö, si asa re rago gberẽ tire. Mi aavungo gundö berewe te.”

Tipagine duhe tini ni mbumbuhe ka mbu vugundö? Abawetekeapai ima kura bara dungu nduapai: (1) Agu ahe i ambakada gundö rogoho ima rengba ka zio baha ti aboro wa kina gu kura kere angua aboro naadiaha kutii kpotoyo yo. (2) Gu ngirã gundö boro agbidaha re ima rengba kada berã ni yo vuru asekonde yo gbua saba. (3) I naape gupai gbe nga vugundö nga nyanyakipa pai rogo ga boro raka yo mbiko wai i aringbisaha na riahe, mbirahe, fugodagbase, dia fuda berãseyo kusayo, gbiati gu kura apai.

Ono tie, a wa Earline na Frank nabihe, boro ima rengba ka mbu gipai nga gu nazio baha ti boro re. Ka si du nga mo vugundö, na mo naida ka mbu he, geda gi kekeapai ngbe fuo gere rengbe kadu nga tonatona vovo gene raka foro.