Buñ ni raniʼ Xtiitz Dios rasetlaa ndeʼ

«Ma naana xi portín noʼya ló Gudxlio»

JESÚS nábu que rimbubu xilienbu (Juan 10:14). Pal toib buñ nap toib galnabany sacró né nadxiʼbu paz, justicia, sacbu xpiin Jesús. Né sanbu xigony noʼbu ló Gudxlio, xomod gosaclóo toib buñgonaʼ de Bélgica. Ndeʼ nac experiencia xtunybu:

Órni testigos xtuny Jehová godap xitz puert, goyoʼya nabann né goniiny naʼ nagati naʼca. Bioladxi ni gochyibu naʼ ximod guinitló guirá galnagan ni noʼ ló Gudxlio, per diti bioladxi que Dios ñony láani. Godudy xhoon íz diti goyaʼya iglesia, portín bibiʼya ximod rascúyibu buñ. Cuacuenta ni góoch Testigos naʼ, né bientzaaya láani, né bidudi cuent que nagan guibany buñ sin Dios.

Per después ma diti bibiʼya testigos xtuny Jehová. Nigolú bioʼob xcalnabani. Godóba chop caj gues tipdzú, né láaca biquiinna drogas. Goniiny naʼ naninéya bixiogola ni ma goity né ngú buny que ñoladxi galchiser. ¡Ndeʼ nigolú bitzuiby naʼ goxin!, órni goyoʼya tobi demony bitzuiby naʼ. Né gocni por xidal beʼo. Órni rioʼ gueʼel bidzubi ñoʼya tobi.

Toibtica dzú bireʼya rioʼ né gonása stoib lad, né bidxina toib lagary ro casaʼyibu toib yoʼ. Nigolú bidziguiaʼya bibiʼya xidal buñ cayony dxiincu. Órni bibigaxa bibiʼya que nacyibu testigos xtuny Jehová casaʼ toib Salón del Reino. Bisetnaladxi órni goyguenyibu naʼ rioʼ, né buni pensary que guirá buñ nabany sacró pal ronyibu xomod rony Testigos.

Goniiny naʼ que niguenyibu naʼ stoib, por ngú goninéya toibtica ni cayony dxiin ro casaʼyibu salón. Gonaba lóo Dios, né después de chii govitz publicador goyguen naʼ. Gonabdiitzbu naʼ pal nainy naʼ nasudi la Biblia stoib, né nimaca gosaguela. Biruʼbu naʼ ñaʼya reunión ni ronyibu, né gosaguela. ¡Dipa ma bibiʼya buñ xomod layibu! Xidzúyenpa biyobi buñ ni nakit né ni nadxiʼ saʼ, ndeʼra ma bidzela layibu.

Desde dzúcu gosalóya goyaʼya reunión. Tzón xomal después bisiana gues. Bisaʼbi libros de astrología né discos ni gopa de música xtuny Buñdzab, né demony ma diti bitzuiby naʼ. Bisoba ni rony mandary Jehová ló la Biblia, né tzón beʼo después gosaloya goniya diitz sacró. Né xhoop beʼo después goyonisa, chop govitz de goloʼ goyonisa góca precursora auxiliar.

Radudi guixquix Jehová por guirá ni ma bunybu por naʼ. Ma naana xi portín noʼya ló Gudxlio. Scú, laa Jehová nacni toib torre ni sagaʼ dxich né láabu nigolú gonbu naʼ (Proverbios 18:10). Rasaca xomod salmista ni bicaʼ: «Toib dzú ló xiláachluʼlo nacni más galán que mil lainy stoib lagary. Né más galán tzoʼya laniolidx Dios xtuni xalagary tzoʼya lainy toib yoʼ lairy ro rac cós mal».

Gonaʼ reʼ ni natzaay xcalnabany gon xi portín noʼbu ló Gudxlio. Láaca nitisi buñ ni natzaay xcalnabany ni rayopy a Jehová sadzel láabu.