Лука иҟынтә ажәабжь бзиа 18:1—43
18 Нас Иисус иҵаҩцәа ргәы камыжьӡакәа еснагь Анцәа иҳәалар зрыхәҭоу деилиркаарц азы аҿырԥштәы рзааигеит:
2 «Қалақьк аҿы ӡбаҩык дыҟан. Иара Анцәагьы дицәшәомызт, ауаагьы хьаас имамызт.
3 Уи ақалақь аҿы ԥҳәысеибакгьы дынхон. Лара дааҟәымҵӡакәа аӡбаҩ иахь днеины, ус лҳәон: „Суҳәоит, ииашамкәа исызныҟәази сареи ҳус ииашаны иӡба“.
4 Иара зныкымкәа мап лцәикхьан, аха нас ус дхәыцит: „Сара Анцәагьы сицәшәом, ауаагьы хьаас исымам,
5 аха ари аԥҳәысеиба сгәы кыдылхит, дысҟәаҵуам. Исыӡбап лус, дцо-даауа сыԥсы лымфарц“».
6 Нас Иисус иҳәеит: «Ишәаҳама ари аӡбаҩ цәгьа ииҳәаз?
7 Уи аӡбаҩ аԥҳәысеиба длыцхраазар, нас, Анцәа дырмыцхрааӡои иара иалихыз, уахи-ҽни иҳәо ауаа, иара дара рахь ачҳара ахьааирԥшуа азы уи дахымыццакуашәа рбозаргьы?
8 Сара ишәасҳәоит: иара урҭ иаразнак дрыцхраауеит. Аха ауаҩытәыҩса Иԥа данаалак, адгьыл аҿы убри аҩыза ахаҵара змоу ӡәыр дизыԥшаару?»
9 Анаҩс Иисус ҳуаа иашақәоуп ҳәа зҳәоз, егьырҭгьы уаас изымԥхьаӡоз рзы абри аҩыза аҿырԥштәы ааигеит:
10 «Ҩыџьа ахацәа Анцәа иҳәарц азы аныҳәарҭа иҩналеит. Аӡәы дфарисеин, егьи — дшәахтәеизгаҩын.
11 Афарисеи гәаныла абас Анцәа диҳәон: „Сынцәа, иҭабуп ҳәа уасҳәоит арҳәцәеи, амцҳәаҩцәеи, зыҳәса зыԥсахуеи сахьреиԥшым, иара абри ашәахтәеизгаҩгьы сахьиеиԥшым.
12 Сара мчыбжьык ахь ҩынтә сычгоит, исоуа зегь аҟынтә ажәабатәи ахәҭа сшәоит“.
13 Ашәахтәеизгаҩ иакәзар, харашәа дгылан, ихы ажәҩан ахь ашьҭыхрагьы изыгәаӷьуамызт, игәы даасуа, абас иҳәон: „Сынцәа, срыцҳашьа, сара сыгәнаҳаҟаҵаҩуп“.
14 Сара ишәасҳәоит: уи ахаҵа аныҳәарҭа ддәылҵны аҩныҟа данцоз, Анцәа иҿаԥхьа еиҳа диашан, афарисеи иаасҭа, избанзар зхы ҳаразкуа дларҟәхоит, ахынраалара аазырԥшуа дҳаракхоит».
15 Ауаа Иисус асабицәа изнаргон, инапқәа рықәҵаны иныҳәарц азы. Аха иҵаҩцәа урҭ нарышьҭыр рҭахӡамызт.
16 Иисус асабицәа арахь исзаашәг иҳәан, иҵаҩцәа ус реиҳәеит: «Иааиааит ахәыҷқәа сара сахь, шәырԥырхагамхан, избанзар дара иреиԥшу роуп Анцәа Иаҳра зтәу.
17 Аиаша шәасҳәоит: Анцәа Иаҳра ахәыҷ иеиԥш издызымкыло уи ибараны дыҟам».
18 Аҭыԥ ду аанызкылоз аӡәы Иисус ус диазҵааит: «Арҵаҩ бзиа, иҟасҵар акәзеи наӡаӡатәи аԥсҭазаара соурц азы?»
19 Иисус иҳәеит: «Арҵаҩ бзиа ҳәа сара изысзуҳәои? Анцәа ида ибзиоу ҳәа аӡәгьы дыҟаӡам.
20 Анцәа иԥҟарақәа умдыруеи: ухатә ҩыза думԥсахын, ауаҩы думшьын, умӷьычын, аӡәы иҟам-ианым изумҳәан, уани уаби ҳаҭыр рықәҵала».
21 Иара иҳәеит: «Сара схәыҷаахыс арҭ аԥҟарақәа зегь насыгӡоит».
22 Иисус уи аниаҳа, ус иеиҳәеит: «Ак ауп иугу: иааумоу зегь ҭины, аԥара аӷарцәа ирыҭ, усҟан ажәҩан аҿы амал урҳауеит. Нас ухынҳәны, усышьҭаланы уаала».
23 Уи ауаҩ иаҳаз даараӡа игәы канажьит, избанзар амал ду иман.
24 Иисус уи днаихәаԥшын, ус иҳәеит: «Шаҟа ирцәыцәгьахозеи амал змоу ауаа Анцәа Иаҳрахь анеира!
25 Амахҽ агәыр аҵа изкылсуазар, ауаҩ беиагьы Анцәа Иаҳрахь днеиуеит».
26 Ари заҳаз ус иҵааит: «Нас, еиқәхода?»
27 Иара иҳәеит: «Ауаа ирылымшо Анцәа илшоит».
28 Пиотр иҳәеит: «Ҳара иҳамаз зегь ааныжьны, ҳушьҭалеит».
29 Иисус ус реиҳәеит: «Аиаша шәасҳәоит: Анцәа Иаҳра аҳаҭыр азы зыҩны, ма зыԥҳәыс, ма зашьцәа, ма зҭаацәа, ма зхәыҷқәа аанзыжьыз дарбанзаалак
30 уажәнатә акырӡа еиҳаны ирҳауеит, ҳаԥхьаҟагьы* наӡаӡатәи аԥсҭазаара иоуеит».
31 Нас 12-ҩык апостолцәа наскьеиган, ус реиҳәеит: «Уажәы Иерусалимҟа ҳцоит. Уа инаӡоит аԥааимбарцәа ауаҩытәыҩса Иԥа изкны ирҩыз зегьы.
32 Иара егьырҭ ажәларқәа дрырҭоит, урҭ ихыччоит, иҟоу зегь изааргоит, иҿажьцәоит,
33 ҟамчыла дрыпҟоит, нас дыршьуеит, аха ахымш раан иԥсы ҭалоит».
34 Аха дара Иисус ииҳәаз иаанагоз рзеилымкааӡеит, избанзар дара рзы уи аҵакы ҵәахын.
35 Иисус Иерихон дазааигәахон. Амҩаду аҿы илашәыз хаҵак ауаа инапы рымҵакны дтәан.
36 Ииасны ицоз ажәлар рышьҭыбжь аниаҳа, иҟалазеи ҳәа дҵааит.
37 «Назареттәи Иисус даауеит», —рҳәеит дара.
38 Усҟан иара ҿааиҭит: «Давид Иԥа Иисус, срыцҳашьа!»
39 Аԥхьа игыланы ицоз убжьы умырган ҳәа иарҳәон, аха иара еиҳагьы ибжьы рдуны ҿиҭуан: «Давид Иԥа, суҳәоит, срыцҳашьа!»
40 Иисус даангылан, арахь дысзаажәг ҳәа реиҳәеит. Данаарга, ус диазҵааит:
41 «Иузыҟасҵарц иуҭахузеи?» Иара иҳәеит: «Исықәиҭу, сылақәа ирбо иҟаҵа».
42 Иисус ус иеиҳәеит: «Уажәшьҭа иубо уҟалоит. Ухаҵара уахәышәтәит».
43 Иаргьы иаразнак ибо дҟалан, Анцәа дырҽхәо, Иисус дишьҭалеит. Уи збаз ауаагьы Анцәа ирҽхәара иалагеит.
