ЗНЫКЫР шәгәы иаанагахьоума шәхала шәаанхеит ҳәа, насгьы шәыуадаҩрақәа шәхала ишәыӡбалароуп ҳәа? Ҳара зегьы даараӡа ицәгьоу аамҭақәа рзы ҳанхоит. Убри аҟынтә зны-зынла ҳгәы каҳалар алшоит, насгьы ҳхы заҵәны иаҳбалар ауеит (2 Тим. 3:1). Аха ҳара ҳауадаҩрақәа ҳхала иҳаӡбалар акәӡам. Абиблиа агәра ҳнаргоит «арыцҳара аныҟало», узықәгәыӷыртә иҟоу аҩызцәа шҳацхраауа (Ажәам. 17:17).

Апостол Павел имиссионертә ныҟәарақәа раан ицыз иҩызцәа рыцхыраара ахә ҳаракны ишьон (Кол. 4:7—11). Павел Рим данҭакыз, урҭ изыҟамҵоз ҟарҵон. Иаҳҳәап, Епафродит Филипп инхоз аишьцәеи аиҳәшьцәеи рҟынтә Павел аҳамҭа изнеигеит (Флп. 4:18). Тихик иакәзар, Павел исаламшәҟәқәа еизарақәак ирзигеит. Иҩызцәа рыцхыраара абзоурала Павел аҩны адәылҵра азин анимамызгьы, абахҭа данҭакызгьы, имаҵзура иациҵалар илшон. Ишԥаҳалшо ҳара ҩыза бзианы ҳҟалар?

Абар Испаниа инхо пионерс амаҵ зуа Елисабе́т дзықәшәаз. Лан аҵыхәтәантәи астадиахь инеихьаз акьыба чымазара лыдырбалеит. Даараӡа иуадаҩыз уи аамҭазы иаҳәшьак Елисабет ҩыза бзианы дылзыҟалеит. Лара Абиблиа аҟынтә лгәы шьҭызхуаз ажәақәа анҵаны СМС-аацҳарақәа рацәаны илзылышьҭуан. Елисабет илҳәоит: «Урҭ ансоуаз, схы заҵәны избаӡомызт, сыгәгьы шьҭырхуан» (Ажәам. 18:24).

Аишьцәеи аиҳәшьцәеи шәареи адоуҳатә усқәа еицыҟашәҵалар, шәеиҩызара еиҳагьы иӷәӷәахоит. Иаҳҳәап, ишәылшома зықәрахь инеихьоу аиашьа ма аиаҳәшьа машьынала аизарахь инажәгар, мамзаргьы ажәабжьҳәара шәрыццар? Убас аӡәи-аӡәи шәгәы шьҭибахуеит (Рим. 1:12). Ишԥашәылшо аҩны издәылымҵуа ҳашьцәеи ҳаҳәшьцәеи ҩызцәа бзианы шәырзыҟалар?

Агәабзиара иадҳәалоу, мамзаргьы егьырҭ ауадаҩрақәа ирыхҟьаны аишьцәеи аиҳәшьцәеи шьоукы лабҿаба аизарақәа изырҭааӡом. Иаҳҳәап, ҳашьа Девид адиагноз лимфома изықәдыргылеит. Фымз инареиҳаны иара ахимиотерапиа дахысуан. Уи аамҭа аҩныҵҟа Девид иԥҳәыс Лидиеи иареи аизарақәа авидеоконференциақәа рыла ауп ишырҭаауаз.

Ишԥарыцхрааи аизара аҟынтә аҩызцәа? Аизарақәа рышьҭахь Аҳратә зал аҿы иҟаз аишьцәеи аиҳәшьцәеи еснагь Девиди Лидиеи авидеоконференциала ирацәажәон. Девиди Лидиеи аизарақәа рҿы аҭакқәа аныҟарҵоз  ашьҭахь, аишьцәеи аиҳәшьцәеи иҭабуп ҳәа рарҳәарц азы ирацәаны СМС-аацҳарақәа рзырыҩуан. Ишԥарыцхрааи уи? Дара уиаҟара рхы заҵәны ирбаӡомызт.

Ишәылшома аҩны издәылымҵуа ажәабжьҳәара шәрыццар? Шәыграфик маҷк иԥсахны амаҵ рыцыжәур, урҭ шышәхамышҭуа дшәырбоит (Ажәам. 3:27). Ишәылшома асаламшәҟәы еицыжәҩырц, мамзаргьы аҭел ала ажәабжь еицышәҳәарц азы аамҭа алшәхыр? Аҩны издәылымҵуа шьоукы ажәабжьҳәаратә еиԥылара авидеоконференциала иаҭаауеит. Девиди Лидиеи уи аҩыза алшара ахьрымаз ахә ҳаракны иршьоит. Девид иҳәоит: «Ажәабжьҳәаратә еиԥылараҿы темак иааркьаҿны иалацәажәоит, насгьы Анцәа иҳәоит. Аха уи аиԥылара хәыҷгьы ҳгәы даараӡа ишьҭнахуан». Иара убас шәара ишәылшоит аҩны издәылымҵуа аишьцәеи аиҳәшьцәеи шәареи абиблиатә ҵара еицымҩаԥыжәгарц азы Абиблиа зшәырҵо дшәыманы дара рахь шәнеир ҟалома ҳәа шәразҵаар.

Аҩны издәылымҵуа ҳашьцәеи ҳаҳәшьцәеи ажәабжь рыцышәҳәалар, рҟазшьа бзиақәа еиҳа еиӷьны ижәбоит, шәагьырзааигәахоит. Иаҳҳәап, дара аҵабырг ауаҩы игәаҵанӡа инаргарц азы Абиблиа шаҟа ибзианы рхы иадырхәо аныжәбалак, еиҳагьы пату рықәышәҵалоит. Аишьцәеи аиҳәшьцәеи шәареи шәеивагыланы адоуҳатә усқәа шәанырҿу, еиҳаны аҩызцәа шәырҳауеит (2 Кор. 6:13).

Иуадаҩыз аамҭазы Павел иҩыза Тит иааигәара дахьыҟаз даараӡа игәы шьҭнахуан (2 Кор. 7:5—7). Ҳәарада, ҳашьцәеи ҳаҳәшьцәеи ҳажәақәа рыла ргәы шьҭаҳхуазар, уи даараӡа ибзиоуп. Аха Тит иҿырԥшы иҳаилнаркаауеит аамҭа рыцыхгареи усла рыцхраареи даараӡа ишхадоу (1 Иоанн 3:18).

Урыстәыла инхо ҳашьцәеи ҳаҳәшьцәеи еицхыраауеит, уи ҳара ҳзы ҿырԥш бзиоуп. Ҳахәаԥшып Сергеи иԥҳәыс Татианеи иареи зықәшәаз. Аполициа аусзуҩцәа рыҩны еимырдеит, нас рҿахәы рҿырхырц азы иргеит. Раԥхьа Татиана доурышьҭит. Сергеи игәалашәоит: «Татиана аҩныҟа даныхынҳә ашьҭахь, иаҳәшьак дымшәаӡакәа иаразнак лара лахь днеит. Ҳаҩны анеимырда ашьҭахь, ҳҩызцәа аҩны аилыргара иҳацхрааит».

Сергеи иациҵоит: «Сара еснагь исгәаԥхон Ажәамаанақәа 17:17 аҿы иану ажәеинраала. Уа иануп: „Аҩыза бзиа ианакәзаалакгьы абзиабара ааирԥшуеит, иара арыцҳара аныҟало азы ииз иашьоуп“. Уажәы ашьҭашәарыцарақәа ирыхҟьаны ҳзықәшәо ауадаҩрақәа схала сзыриааирымызт. Аха Иегова акгьы иацәымшәаӡакәа исыцхраауа аҩызцәа сиҭеит» a.

Ауадаҩра ӷәӷәақәа ҳанрықәшәо аҩызцәа бзиақәа рыда ԥсыхәа ҳамаӡам. Арыцҳара ду аан урҭ еиҳагьы иаҳҭаххоит. Шаҟа ихадоузеи уажәнатә ҩыза бзианы ҳаҟазар! (1 Пиотр 4:7, 8).