Gin ango ma bino i wii ka iwinyo lok man ni ‘agikki piny’? Gwok nyo iromo tamo pi peko mo madit ma bipoto i lobo dok bityeko jami ducu makwo. Meno aye tam ma jo mukene gitye kwede, tutwalle ka gukwano lok angeya mogo calo ma kiryeyo piny kany:

•   “Lweny me Nuclear—kadi bed kicako akaka, ocakke macalo akciden, nyo ocakke pi niang manok—obedo gin ma romo timme ada.”—Bulletin of the Atomic Scientists.

•   “Pi mwaka apar mukato-ni, yamo kot magwar, mac ma wango bunga, two pa piny, ki dong aluka madongo obedo ka timme i rwom ma lamal loyo kare mo keken i twok lobo lung.”—National Geographic.

•   “Bonyo tye ka balo piny i Afrika i rwom mo marac adada.”—The Associated Press.

 Tika lobo ducu kibityekone woko? Gin ango ma Baibul waco?

 Pe. Baibul wacciwa ni lobo bibedo matwal. (Latitlok 1:4) Ma ka balo lobo ma en ocweyo, Lubanga ‘bityeko jo ma tye ka balo lobo woko.’—Niyabo 11:18.

 Ma lubbe ki Baibul, “lobo” ma bigik woko-ni obedo jo ma gicayo Lubanga dok gitimo gin mo keken ma gimito. Calo i kare pa Nua, Lubanga bityeko “lobo pa jo ma pe gilworo Lubanga.”—2 Petero 2:5; 3:7.

 Buk pa 1 Jon 2:17 wacci, “Lobo tum woko ki mitine ducu.” Tyeng man nyuto ni Lubanga pe bijwero lobo man ma wabedo iye-ni, ento bijwero jo ma gimedde ki timo jami maraco.

 Baibul pe tittiwa awene kikome ma agikki piny bibino iye. (Matayo 24:36) Ento, nyuto ni dong cok. Baibul otito pi lanyut magi:

•   Jami calo lweny, kec, two gemo, ki dong oyengyeng madongo bitimme ‘i kabedo mapol.’—Matayo 24:3, 7, 14; Luka 21:10, 11; Niyabo 6:1-8.

•   Pol pa dano bibedo jo ma giparo pigi kengi. Me labolle, gibibedo “lumar lim,” “pe gibimiyo pwoc mo,” dok ‘gibibedo jo ma mitigi pe jukke.’—2 Temceo 3:1-5.

 Jo mapol giye ni nicakke mwaka 1914, jami ma obedo ka timme i lobo cobo gin ma Baibul otito dok nyuto ni agikki piny dong cok. Pi ngec matut, nen pwony ma wiye tye ni “What Does Bible Chronology Indicate About the Year 1914?” ki dong “What Is the Sign of ‘the Last Days,’ or ‘End Times’?”

 Nyig lok me leb Grik ma kigonyo ni “niyabo” i Baibul tyen lokke ni “yabo wi gin mo.” Pol kare, nyig lok meno kitiyo kwede me tito ngec mo ma onongo kikano woko. Baibul bene loko i kom “niyabo pa Rwot Yecu,” ma man kwako ngec madok i kom Yecu macalo ngat ma kimiye twero me tyeko jo ducu maraco ki i lobo, ki dong me miyo mot bot jo ma woro Lubanga.—2 Jo Tecalonika 1:6, 7; 1 Petero 1:7, 13.

 Buk me agikki me Baibul kilwongo ni Niyabo pien tito jami ma bitimme i anyim. (Niyabo 1:1) Buk meno tye ki kwena maber dok miniwa gen. (Niyabo 1:3) Medo i kom meno, nyuto ni Lubanga bityeko tim maraco ducu dok biloko lobo man doko paradic. I kare meno, arem, deno can, ki dong to bibedo pe.—Niyabo 21:3, 4.

 Tika imito nongo ngec matut i kom cikke mamwonya magi me Baibul? Lucaden pa Jehovah gitye ki yub me kwano Baibul ki dano labongo cul mo. Pingo pe ikubbe kwedgi?