I kare-ni, jo ma itgi oding gitye ma romo milion 70 kulu i twok lobo lung, dok mapolle gitiyo ki leb acel i kom leb 200 pa luding. Ki cwercwiny madit, luding it pol kare kiterogi marac, kit ma kinyuto kwede i lok ma kicoyo piny kany:

•   “I twok lobo lung, pol kare kinywaro twero pa luding it ki jo ma gitye ki peko me winyo lok.”—National Association of the Deaf (U.S.).

•   “Luding it ma gitye i lobe ma pud tye ka dongo adonga gitye i kin jo ma lucan loyo, dok pe yot botgi me nongo pwonnye, tic ki ngec.”—World Federation of the Deaf.

 Lubanga winyo nining i kom jo ma itgi oding? Gin ango ma Baibul waco i kom jo ma itgi oding? Dok Lucaden pa Jehovah gitye ka konyogi nining i kare-ni?

Kit ma Lubanga Neno Kwede Jo ma Itgi Oding

 Baibul nyuto ni Lubanga Jehovah a paro pi jo ma itgi oding. En mito ni kitergi i yo maber dok gunong adwogi maber ki i pwonnye ma en miyo.

 Ginacoya: “Pe iyet ladingit.”—Lulevi 19:14.

 Ginacoya: “Lubanga pe poko kin dano.”—Tic pa Lukwena 10:34.

 Ginacoya: ‘Yecu owoto orumo gangi mapatpat kun pwonyo lok me kwena maber me ker pa Lubanga.’—Matayo 9:35.

 Ginacoya: Yecu bene ‘omiyo jo ma itgi oding guwinyo lok, ki jo ma te lebgi oto guloko.’—Marako 7:37.

 Ginacoya: “Jo ma itgi oding bene itgi biyabbe.”—Icaya 35:5.

 Tyen lokke: Jehovah otito ni jo ma itgi oding gibiwinyo lok.—Icaya 29:18.

Kit ma Lucaden pa Jehovah Gitye ka Konyo Kwede Jo ma Itgi Oding

 Lucaden pa Jehovah ginywako kwena pa Lubanga ma miyo gen bot jo ma itgi oding i twok lobo lung. Ngo ma watye ka timone me cobo man? Wagonyo Baibul ki vidio ma jenge i Baibul i leb pa luding it makato 100 kulu. Wan bene wapwonyo dano lok me Baibul dok wayubo cokke i leb pa luding it. Magi weng watimo pi jo ma gimito kony pa Lubanga labongo penyo cente mo keken. Pingo? Pien Yecu ociko ni: “Wun wugamo nono labongo cul mo, wumi bene nono labongo cul.”—Matayo 10:8.

 Itwero nongo jami magi ki i intanet nyo iromo kwanyone ci iketo i cimmi ki i kabedo magi:

 JW.ORG. Di lanyut me leb ma nonge malo i pej mo keken me jw.org ci inong gin ma imito i leb pa luding it.

 JW Library Sign Language app. Ket app man i cimmi, ci dong ibibedo ki kero me kwanyo nyo neno vidio i leb pa luding it.

Jami Macalo Mene ma Watye Kwede me Konyo Dano me Pwonyo Lok me Baibul?

 Baibul i leb pa luding it. Baibul me  New World Translation of the Holy Scriptures i leb pa Luding It me Amerika obedo Baibul mukwongo ma kityeko gonyone i leb pa luding it. Baibul me New World Translation dong tye nonge i leb mapol pa luding it. Baibul mogo dong kityeko gonyogi ento mukene pud kigonyo bute mogo keken dok kitiko medo leb manyen mwaka ki mwaka. (Me neno leb ma dong kigonyo nyo Baibul ki i intanet, nen bok ma wiye tye ni “Baibul me New World Translation i Leb pa Luding It.”)

•   Nen vidio ma wiye tye ni The Complete New World Translation Is Available in ASL me niang tic ma watiyo me gonyo Baibul i leb pa luding it.

•   Ka imito nongo adwogi maber loyo ki i kwano Baibul, ket JW Library Sign Language app i cimmi. App man twero konyi me yero tyeng mogo i Baibul me leb pa luding it.

•   Dmytro ki Vita gitye lunyodo ma itgi oding, ento lutinogi giwinyo lok. Nen kit ma jo ganggi gunongo kwede adwogi maber ki i neno Baibul nino ducu i leb pa luding it.

 Vidio ma tye ki pwony me Baibul. Lucaden pa Jehovah dong guyubo vidio i leb pa luding it ma konyo dano me niang ki keto pwony me Baibul i tic. Pwony man gudo . . .

•   Jo munyomme ki jo ganggi

•   Jo me mwaka apar ki wiye ki dong bulu

•   Lutino

 Yub me kwano Baibul ki kony pa lapwony. Pwony kwena ma tye i Baibul i leb pa luding it ki kony pa lapwony. Peny wek kinyutti kit ma wakwano kwede Baibul ki dano labongo cul mo.

 Jeson Senajonon bedo i lobo Philippines. Nen kit ma yubwa me kwano Baibul okonye kwede me dongo wat macok ki Lubanga.

 Mario Antúnez onongo tye latela kanica mo i lobo Honduras. Nen kit ma en onongo kwede lagam pi lapeny me Baibul ma en onongo tye kwede, kit ma en otito kwede i lok ma en ocoyo ma wiye tye ni “Onongo Atye ki Lapeny Mapol Loyo Lagam.”

 Cokke ki dong yub mogo. I twok lobo lung, watye ki kacokke ki gurup mapol i leb pa luding it, ka ma wacokke iye me nongo pwony ki woro Lubanga cabit ki cabit. Wan bene wayubo gure madongo mwaka ki mwaka i leb pa luding it ka ma kipwonyo iye lok me Baibul. I cokke ki gurewa, wagonyo lok pi jo ma itgi oding dok wanggi oto bene. Bene wamiyo ginakwana i braille labongo cul mo.

•   Nong kacokke macok kwedi.

•   Pwony jami mapol madok i kom gurewa me adwol ki gure me rijon ma timme mwaka ki mwaka.

•   Bed tye i Nipo me to pa Yecu, ma obedo yubwa ma pire tek loyo mwaka ki mwaka.

 José Luis Ayala bedo i lobo Mexico. Kinywale ma ite oding, ci lacen, wange bene oto woko. Nen kit ma kikonye kwede me doko lapwony me Baibul ma ladiro.