Ododo 44

Rakab Okano Lurot-Piny

CO MAGI gitye i peko. Gin omyero gua woko, ka pe ci kibinekogi woko. Gin Luicrael ma lurot-piny, dok dako ma tye ka konyogi-ni obedo Rakab. Rakab bedo kany i ot ma tye i kom cel boma me Jeriko. Wanenu kong pingo co magi gitye i peko.

Luicrael dong guyubbe woko me ngolo Kulu Jordan me donyo i lobo Kanaan. Ento ma peya gudonyo, Yocwa ocwalo lurot-piny aryo-ni. En owaco botgi ni: ‘Wucit wucinen lobo-nu kacel ki boma me Jeriko.’

Ka lurot-pinnyi guo i Jeriko, gin gucito i ot pa Rakab. Ento ngat mo owaco bot kabaka me Jeriko ni: ‘Luicrael mo aryo gubino kany tin i dyewor ka roto lobo.’ I kare ma en owinyo lok man, kabaka meno ocwalo co mogo bot Rakab, ci gugole cik ni: ‘Kel co ma gitye i otti-ni, woko!’ Ento Rakab onongo dong okano lurot-pinnyi woko i wi ode. En owaco botgi ni: ‘Co mogo gire gubino i oda, ento pe angeyo ka ma gua iye. Gin gucito ma piny cok yuto, ma peya kiloro dog cel. Ka wuruune, wutwero makogi woko!’ Pi meno co-ni guryemo korgi.

I ngeye ma dong gua, Rakab oruune ocito i wi ot. En owaco bot lurot-piny-nyi ni: ‘An angeyo ni Jehovah bimyowu lobo man. Wan wawinyo kit ma en otwoyo kwede Nam Makwar i kare ma wua ki i Ejipt, dok kit ma wuneko kwede kabaka Cikon ki Og. An atimiwu kica, pi meno, wutim ber, wukwonga ni wubitima kica. Wular kwo pa wora ki maa, kacel ki omegina ki lumegina.’

Lurot-piny man gukwonnge ni gibitimo, ento Rakab myero otim gin mo. Lurot-piny guwaco ni: ‘Kwany tol man makwar-ri ci itwe i wang diricani, dok icok wadini ducu i otti kacel kwedi. Dong ka wan ducu wadwogo ka turo Jeriko, wabineno tol man i wang dirica ci pe wabineko ngatti mo ma i otti.’ Ka lurot-piny gudok cen bot Yocwa, gin gutitte jami ducu ma otimme.

Yocwa 2:1-24; Jo Ibru 11:31.