Ododo 15

Dako pa Lot Oneno Ngeye

LOT ki jo me ode gukwo kacel ki Abraim i lobo Kanaan. I nino mo acel Abraim owaco bot Lot ni: ‘Ngom kany dong pe romo leewa ducu. Tim ber, wapokke woko. Ka ilubo yo acel, ci an abikwanyo yo mukene.’

Lot otingo wange oneno piny. En oneno but lobo mo maber adada ka ma pii ki lum mabeco pi leene onongo tye iye. Man aye Distrik me Jordan. Pi meno Lot otero jo me ode ki leene kunnu. Motmot guyubo pacogi i boma madit me Codom.

Jo me Codom onongo giraco tutwal. Man owango cwiny Lot pien en onongo obedo ngat ma kite maber. Lubanga bene iye owang. Lacen, Lubanga ocwalo Lumalaika aryo me tito ki Lot ni en ebityeko Codom ki boma madit me Gomora ma cok kwede-ni pi racgi.

Lumalaika-ni guwaco ki Lot ni: ‘Ruune! Kwany dakoni ki anyirani aryo-ni ci ia woko ki kany!’ Lot gin ki jo ode onongo gitye ka gale, pi meno lumalaika-ni omako cinggi ci oterogi ki i boma woko. Ci lamalaika acel owaco ni: ‘Ringu pi kwowu. Pe wunen ngewu. Ringu i wi cere, wek pe wuto.’

Lot ki anyirane guwinyo ci guringo woko ki i Codom. Gin pe gucung kadi pi kare matidi mo dok bene pe guneno ngegi. Ento dako pa Lot pe olubo cik meno. I kare ma dong guo i bor piny mo me a ki i Codom, en ocung ci oneno ngeye. Ci dako pa Lot olokke odoko wir kado. Itwero nenne i cal-li?

Waromo nongo pwony maber ki iye. Man nyutiwa ni Lubanga laro jo ma winye, ento jo ma pe winye kwogi birwenyo woko.

Acakki 13:5-13; 18:20-33; 19:1-29; Luka 17:28-32; 2 Petero 2:6-8.