PWONY ME 06
Kwo Ocakke Nining?
“In [Lubanga] aye i wang it me kwo ducu.” (Jabuli 36:9) Tika iye lok meno? Jo mogo giwaco ni kwo ocakke pire kene. Ka meno lok ada, ci watye i lobo kany macalo adwogi me akciden mo ata. Ento, ka Lubanga Jehovah aye ocweyo kwo, ci nongo kwo tye ki tyen lok, pe kumeno? a Nen kong gin ma Baibul tito i kom kit ma kwo ocakke kwede ki tyen lok ma omiyo watwero ye ni lok meno tye ada.
1. Anga ma ocweyo polo ki lobo?
Baibul waco ni: “I acakki piny Lubanga oketo polo ki lobo.” (Acakki 1:1) Pol pa lucayan giye ni polo ki lobo tye ki acakkine. Lubanga ocweyo polo ki lobo nining? En otiyo ki “cwiny” mere maleng me cweyo jami ducu i polo ki lobo, ma i kine tye iye yogo, lakalatwe, ki jami mukene ma i dan polo.—Acakki 1:2.
2. Pingo Lubanga ocweyo lobo?
Jehovah “pe oketo lobo ci oweko woko kun onyobbe atata, en oketo ni dano twero bedo iye.” (Icaya 45:18) En oyubo lobo mamwonya wek dano onong mit me bedo iye dok oketo iye jami ducu ma mitte pi dano me kwo pi naka. (Kwan Icaya 40:28 ki 42:5.) Lucayan giwaco ni lobo dok pat adada ki jami mukene ma i dan polo. Lucayan peya gunongo kabedo mo mukene i dan polo ma tye ki jami ducu ma dano mito wek obed kwo.
3. Ngo mumiyo dano pat ki lee?
I nge cweyo lobo, Jehovah ocweyo jami makwo ma iye. Mukwongo, en ocweyo jami ma twi atwiya ki lee. I nge meno, “Lubanga ocweyo dano i kit calle kikome.” (Kwan Acakki 1:27.) Gin ango ma weko dano dok pat? Kit macalo kicweyowa i cal pa Lubanga, watye ki kero me poro kite, calo mar ki ngolo kop atir. En bene ocweyowa ki kero me pwonyo leb mapatpat, me bedo ki ur ka waneno jami mamwonya, kacel ki nongo mit pa wer. Dok dano pat ki lee, pien wan keken aye watwero woro Lacwec.
NONG NGEC MATUT
Ngi jami ma nyuto ni kwo kicweyo acweya dok ni gin ma Baibul waco i kom cwec tye ada. Nen gin ma kit pa dano pwonyowa i kom Lubanga.
4. Kwo kicweyo acweya
Pol kare kimiyo pwoc bot dano pi jami ma guyubo kun nongo guporo ki i kom cwec. Dong anga ma omyero kipwo pi cwec ma dano tye ka poro-ni? Tuk VIDIO, ci wunyam lapeny ma lubo-ni.
-
Jami ango ma dano guyubo kun giporo cwec?
Odi ducu dano aye gigoyo pulanne dok gigero. Ento anga ma ogoyo pulan dok oyubo jami ducu ma kwo? Kwan Jo Ibru 3:4, ci wunyam lapeny magi:
-
Ka ineno jami makwo, mene ma yomo cwinyi adada?
-
Tika pore me ye ni jami ducu ma tye i polo ki lobo kicweyogi acweya? Pingo?
Tika onongo ingeyo?
Itwero nongo pwony kacel ki vidio ma kwako lok man i jw.org i te pwony ma katti kare ki kare ma wiye tye ni “Kicweyo Mono Acweya?” ki “Tamgi i Kom Kit ma Kwo Ocakke Kwede.”
“Pien ot mo keken dano aye ma gero, ento ngat ma gero jami ducu en aye Lubanga.”
5. Watye ki tyen lok mapol me ye ni lok ma Baibul waco i kom cwec tye ada
I Acakki cura 1, Baibul tito kit ma lobo ki kwo ma iye ocakke kwede. Tika itwero ye lok meno nyo obedo mere ododo keken? Tuk VIDIO, ci wunyam lapeny ma lubo-ni.
-
Tika Baibul pwonyo ni lobo kacel ki kwo ma iye kicweyo i nino abicel keken?
-
Tika itamo ni lok me Baibul i kom kit ma kicweyo kwede lobo tye kakare dok rwatte? Pingo iye nyo pe iye?
Kwan Acakki 1:1, ci wunyam lapeny man:
-
Lucayan giwaco ni polo ki lobo tye ki acakkine. Ka iporo tamgi ki gin ma ikwano ki i Baibul, tika rwatte?
Jo mukene gitamo ni nen calo Lubanga ocweyo nyig kom acel ci nyig kom meno obedo ka lokke me doko jami makwo mukene-ni. Kwan Acakki 1:21, 25, 27, ci wunyam lapeny magi:
-
Tika Baibul pwonyo ni Lubanga ocweyo nyig kom acel ci oweko olokke odoko rec, lee, ki dano? Nyo mono en ocweyo ‘kit kwa’ kwo ducu mapatpat? b
6. Dano obedo cwec pa Lubanga ma dok pat adada
Wan wapat adada ki lee ma Jehovah ocweyo. Kwan Acakki 1:26, ci wunyam lapeny man:
-
Kit macalo kicweyowa i cal pa Lubanga, kerowa me nyuto mar ki kica mono nyuto gin ango i kom Lubanga?
JO MOGO GIWACO NI: “Gin ma Baibul waco i kom cwec obedo mere ododo.”
-
In kono itamo ningo? Pingo?
WOT WIYE WIYE
Jehovah aye ocweyo polo ki lobo kacel ki kwo ducu.
Ngo ma ipwonyo?
-
Ngo ma Baibul pwonyo madok i kom kit ma polo ki lobo ocakke kwede?
-
Tika Lubanga oweko kwa kwo mapatpat-ti olokke ki i kom nyig kom acel, nyo ocweyo gin ducu acweya?
-
Ngo mumiyo dano dok pat ki cwec pa Jehovah mukene?
TIM KWED
Nen kit ma cwec nyuto kwede ni Lacwec tye.
Nen kit ma wego twero tito kwede pwony me Baibul madok i kom cwec bot wode matidi.
Nen kong ka ce pwony ni kwo ocakke pire kene rwatte ki pwony me Baibul.
“Tika Lubanga Oweko Kwa Kwo Mapatpat-ti Olokke ki i kom Nyig Kom Acel?” (Pwony ma tye i jw.org)
Nen kong ka cogo macon ma kigolo kacel ki tic pa lucayan moko ni kicweyo kwo acweya nyo ni kwo ocakke pire kene.
a Pwony me 25 binyamo yub pa Lubanga pi dano.
b I Baibul, lok man ni “kwa” loko i kom gurup madit pa jami makwo.
