PWONY ME 38
Nyut Pwoc pi Mic me Kwo
Tye jami mapol mamwonya adada ma watwero timogi kun wanongo mitgi pien watye kwo. Kadi bed watye ka kato ki i pekki, pud watwero nongo mit pa kwo i kare mogo. Watwero nyuto ki Jehovah nining ni watye ki pwoc pi mic me kwo? Dok tyen lok ma pire tek mene ma weko omyero watim meno?
1. Pingo omyero wanyut pwoc pi mic me kwo?
Omyero wanyut pwoc pi kwo pien obedo mic ma oa ki bot Wonwa ma lamar, Jehovah. En ‘aye wang it me kwo’ dok ocweyo jami ma kwo ducu. (Jabuli 36:9) “En kikome aye ma miyo kwo ki dano ducu wa ki yweyo ki jami ducu.” (Tic pa Lukwena 17:25, 28) Jehovah miniwa jami ma mitte wek wabed kwo. Ento pe meno keken. En miniwa jami magi ki kwayigi mapol adada wek wanong mit pa bedo kwo.—Kwan Tic pa Lukwena 14:17.
2. Watwero nyuto ki Jehovah nining ni watye ki pwoc pi mic me kwo?
Cakke i kare ma mamani ogammi i iye, Jehovah onongo paro piri. I lega ma Jehovah oweko kicoyo i Lokke, laticce mo acel owaco bote ni: ‘Yam inena i kare ma kicweya i i maa.’ (Jabuli 139:16) Kwoni pire tek adada bot Jehovah. (Kwan Matayo 10:29-31.) Cwero cwinye adada ka ngat mo okwanyo kwone kekene nyo kwo pa ngat mukene akaka. a (Nia 20:13) Cwero bene cwiny Jehovah matek ka waketo kwowa ka mading nyo pe wagwoko kwo pa jo mukene. Ka wagwoko kwowa dok waworo kwo pa jo mukene, ci wanyuto ni watye ki pwoc pi mic mamwonya me kwo.
NONG NGEC MATUT
Nen yo mapatpat ma itwero nyuto kwede pwocci pi mic me kwo.
3. Gwok yotkomi
Pien wacikke bot Jehovah me timo mitine kare ducu, watiyo ki kwowa ducu pire. Bedo calo wamiyo komwa macalo gityer bot Lubanga. Kwan Jo Roma 12:1, 2, ci wunyam lapeny magi:
-
Gin ango ma myero otug cwinyi me gwoko yotkomi?
-
Itwero timo man i yo mapatpat ango?
4. Tim jami ma weko igwokke ki i nongo awano nyo to
Baibul cuko cwinywa me gwokke ki timo jami ma keto kwowa ka mading. Tuk VIDIO wek inen jami mogo ma itwero timogi wek igwok kwoni.
Kwan Carolok 22:3, ci wunyam kit ma in kacel ki jo mukene wutwero gwokke kwede . . .
-
i gangwu.
-
i gang ticci.
-
ka wutye ka tuku.
-
ka itye ka dwoyo mutoka nyo ibedo iye.
5. Pe iket awano i kom kwo pa latin ma tye i ic
Daudi otito ni Jehovah tye ki miti madwong adada i kom jami ducu ma timme i kom latin ma tye ka dongo i i mine. Kwan Jabuli 139:13-17, ci wunyam lapeny man:
-
I wang Jehovah, kwo pa latin cakke awene, ka mine ogamo ic nyo ka kinywale?
Cik pa Jehovah bot Luicrael macon onongo gwoko kwo pa dako ma oyac, kacel ki latin ma tye i iye. Kwan Nia 21:22, 23, ci wunyam lapeny magi:
-
Jehovah neno ngat ma cinge ocer ci okwanyo kwo pa latin ma i ic nining?
-
En biwinyo nining ka ngat mo otimo meno akaka? b
-
In itamo ningo i kom kit ma Lubanga winyo kwede?
Kadi wa dako ma neno kwo calo gin ma pire tek twero tamo ni gin mo mukene pe ma etwero timo mapat ki oyo iye. Kwan Icaya 41:10, ci wunyam lapeny magi:
-
Ka dako mo tye ka nongo dic me oyo iye, en myero onong kony ki bot anga? Pingo?
JO MOGO GIWACO NI: “Dako tye ki twero me onyo iye pien en aye oyac dok meno obedo kome.”
-
Ngo ma moko boti ni Jehovah neno kwo pa min latin ki latin ma i iye calo gin ma pire tek adada?
WOT WIYE WIYE
Baibul pwonyowa ni omyero wamar, wawor, dok wagwok mic me kwo ma Jehovah omiyo. Man kwako kwowa ki kwo pa jo mukene.
Ngo ma ipwonyo?
-
Pingo kwo pa dano pire tek adada bot Jehovah?
-
Jehovah winyo nining ka ngat mo okwanyo kwo pa dano akaka?
-
Pingo itye ki pwoc pi mic me kwo?
TIM KWED
Watwero pwoyo Jehovah nining pi mic me kwo?
Nong lagam pi lapeny man, Tika Lubanga bitimo kica ki dako ma ooyo iye?
Pwony kit ma neno pa Lubanga i kom kwo omyero ogud galowang ma wayero.
“‘Tuko ma Keto Kwo ka Mading’—Tika Omyero Ituki?” (Awake!, Oktoba 8, 2000)
Ket kong ni ngat mo tye ki tam me kwanyo kwone. Nen kit ma Baibul twero konye kwede.
“Amito To Woko—Tika Baibul Twero Konya ka Atye ki Tam me Kwanyo Kwona?” (Pwony ma tye i jw.org)
a Jehovah paro adada pi jo ma cwinygi otur. (Jabuli 34:18) En niang arem cwiny ma weko dano bedo ki miti me kwanyo kwone, dok en mito miyo kony. Me neno kit ma Jehovah twero miyo ki ngat mo teko me kwero tam me kwanyo kwone, kwan pwony ma wiye tye ni “Amito To Woko—Tika Baibul Twero Konya ka Atye ki Tam me Kwanyo Kwona?” ma tye i bute me Tim Kwed i pwony man.
b Jo ma guoyo ic i kare mukato angec omyero cwinygi pe opidgi mukato kare woko—Jehovah twero timmigi kica. Pi ngec mapol, nen pwony ma wiye tye ni “Baibul Loko Nining i kom Oyo Ic?” ma tye i bute me Tim Kwed i pwony man.
