Leg bot Lubanga dok iyubbe maber adada. Leg bot Lubanga wek okonyi pe me keto tammi i komi kekeni, ento i kom kwenani. Mak lok ma pigi tego ma imito titone i wii. Pe ikwan lok akwana ento lok lok ma a ki i cwinyi.

Lok gin ma a ki i cwinyi. Tam i kom tyen lok mumiyo lokki pire tek bot jo ma tye ka winyi. Ket tammi i komgi. Ci kit ma icung kwede, kit ma itiyo kwede ki cingi, ki kit ma wangi nen kwede binyuto cwiny me lirem ma itye kwede.

Nen jo ma itye ka lok kwedgi. Nen wang dano ka itye ka lok kwedgi ka pe obicwero cwinygi. Ka itye ka miyo pwony i wi abam, nen ngat acel ci ikob i kom ngat mukene, ma ka neno dano ducu lawang acel.