KA INENO karatac akwana, lok angeya me telebijon, nyo iwinyo lok angeya me redio, inongo ni gupong ki lok me turo cik, lweny, ki tim aranyi. Romo bedo ni in bene itye ka yelle ki two nyo cwinyi tye ka cwer pi to pa danoni me amara.

Penye kekeni ni:

• Man mono aye gin ma Lubanga mito pi an ki jo me oda?

• Atwero nongo kony me lweny ki pekki ma atye kwede-ni ki kwene?

• Tika wabibedo ki kuc me ada i wi lobo-ni?

Baibul miyo lagam mucwiny i kom lapeny macalo magi.

• Dano pe dong gibiwinyo arem, pe gibitii, nyo to.—Niyabo 21:4

• “Lungolo bipye malo calo til.”—Icaya 35:6

• “Lutowang wanggi biyabbe.”—Icaya 35:5

•  Kibicero jo muto.—Jon 5:28, 29

• Pe tye ngati mo ma kome bibedo lit.—Icaya 33:24

• Cam bibedo tye mapol ata pi dano ducu i wi lobo.—Jabuli 72:16

Yot mada me tamo ni gin ma pud ia ka kwanone ki i buk man obedo mere lek mamwa. Ento Lubanga ocikke me timo alokaloka magi i lobo cokcok-ki, dok Baibul tito kit ma en bitimone kwede.

Medo i kom meno, Baibul bene tittiwa gin ma myero wange wek wabed ki yomcwiny me ada kun wanongo mit pa kwo i kare-ni. Tam kong manok i kom jami ma keli par. Jami magi twero bedo can lim, peko me kwo me ot, two, nyo to pa danoni me amara. Baibul twero konyi me lweny ki pekki magi, dok twero kweyo cwinyi kun miyo lagam i kom peny mogo macalo magi:

• Pingo wadeno can?

• I yo ango ma watwero lweny ki pekki ma watye kwede?

• Kwowa me ot twero bedo me yomcwiny nining?

• Ngo ma timme i komwa ka wato?

• Tika dok wabineno jowa me amara ma dong guto woko-ni?

• Pingo watwero bedo labongo akalakala mo ni Lubanga bitimo jami ducu ma en ociko?

 Kit ma dong icako kwano buk man nyuto ni in imito niang gin ma Baibul pwonyo. Buk man bikonyi. Paragraf ducu tye ki lapeny ma bikonyi me niang Baibul. Dano milion mapol ata dong gunongo mit pa nyamo lok me Baibul kacel ki Lucaden pa Jehovah. Wageno ni in bene ibinongo mitte. Dong, walego ni Lubanga ogo laane i komi ka iwoto ki niang gin ma Baibul twero pwonyi!