Jehovah mito ni jo munyomme gulub kwonge me nyomgi. I kare ma Jehovah tye ka ribo laco ki dako mukwongo i nyom, en owacci: ‘Laco bimoko i kom dakone liking, gin aryo gidoko kom acel.’ Lacen Yecu bene onwoyo lok man dok omedo ni: “Pi meno gin ma Lubanga oribo kacel, dano pe opok kingi.” (Acakki 2:24; Matayo 19:3-6) Pi man, Jehovah gin ki Yecu gineno nyom calo gin marii pi kwo pa jo moni kulu wang ma ngat acel oto. (1 Jo Korint 7:39) Kit ma nyom obedo yub maleng-ngi, ket pa nyom omyero pe kiter calo gin me tuku. Ki lok ada, Jehovah dag keto nyom i yo ma pe lubbe ki Ginacoya.—Malaki 2:15, 16.

 Kit gin ango ma Ginacoya ye iye ni romo keto keny? Tye ni, Jehovah dag tim me abor ki tarwang. (Acakki 39:9; 2 Camuel 11:26, 27; Jabuli 51:4) Ki lok ada, en neno tim tarwang calo gin me kwer atika ma omiyo en ye ni nyom twero ket pire. (Pi nyamo gin ma tim tarwang kwako, nen Dul me 9, paragraf 7, ka ma kitito iye lok kom tim tarwang.) Jehovah oweko twero i cing ngat ma pe labal-li me moko tamme ka ce en mito keto nyomgi woko nyo pe. (Matayo 19:9) Dong, ka ngat ma pe obalo-ni omoko tamme me keto nyom woko, en nongo pe otimo gin ma Jehovah dag. Ento ki tungcel bene, Lukricitayo me kacokke pe omyero gucuk cwiny ngat mo me keto nyomgi. I kare mukene jami mogo tye ma miyo ngat ma kibalo i kome-ni moko tamme me medde ki bedo ki labal meno, tutwalle ka ce labal-li ongut ki cwinye ducu. Jamine ducu gire kiweko i wi jo ma Ginacoya yenigi me keto nyomgi, gin aye myero gumok tamgi pigi kengi kun gibedo atera me kemme ki adwogine.—Jo Galatia 6:5.

I kare mukene ka kwo tye ka ma ding, Lukricitayo mogo gimoko tamgi me pokke nyo keto nyomgi woko kadi bed ni luotgi pe otimo bal me tim tarwang. Ka gin ma kit meno otimme, Baibul ciko ni ngat ma opokke-ni “myero obed kene, nyo odwog cen.” (1 Jo Korint 7:11) Lakricitayo ma kit meno pe bibedo agonya me nyomo ngat mukene. (Matayo 5:32) Kong wanenu jami mukene ma jo mogo gineno ni twero kelo pokke i nyom.

Kwero konyo jo me ot akaka. Can twero diyo jo me ot magwa ma nongo jami me kwo doko tek pien ni laco okwero miyogi jami ma mitte kadi bed ni en tye ki kero me miyone. Baibul tito ni: “Ka ce dano mo pe miyo gin mo . . . pi jo me ode kikome, nongo dong okwero niyene woko, dok bene odoko rac ma kato ngat ma pe oye Lubanga.” (1 Temceo 5:8) Ka dano ma kit meno okwero loko kite, dakone romo moko tamme me yenyo yone ki dong gwoko ber bedo pa lutinone ki penyo twero ki bot kot me pokke woko.  Ka tye kumeno, ci luelda omyero gunen adot man ki diro ka ada Lakricitayo moni-ni okwero miyo kony bot jo me ode ada. Kwero gwoko jo me ot romo weko kiryemo ngat meno woko.

Tim gero marac. Dako nyo laco mager ma maro lweny romo timo gin mo marac adada ma keto yotkom nyo kwo pa lawote ka mading. Ka ngat ma ger nyo maro lweny-nyi obedo Lakricitayo, luelda me kacokke omyero gungi koko meno maber. Kiniga kacel ki tim gero miyo kiromo ryemo dano moni woko ki i kacokke.—Jo Galatia 5:19-21.

Gengo miyo woro bot Jehovah. Laco nyo dako mo romo keto tek me culo yo me woro pa lawote kare ki kare ma miyo dong pe twere bote nyo diye tektek me turo cik pa Lubanga i yo mogo. Ka tye kit meno, ci ngat ma kitye ka diye-ni myero omok ka ce yo me “winyo Lubanga ma kato dano” nongo obedo me yenyo pokke woko ma lubbe ki cik.—Tic pa Lukwena 5:29.

I jami ma kitgi dok pat ma kinyamogi malo-ni, ngat mo pe myero odi laco nyo dako mo me pokke nyo me medde ki nyomgi ki lawote ca. Kadi bed Lukricitayo muteggi ki luelda gimiyo kony ki tira ma a ki i Baibul, ento gin nongo pe gitwero ngeyo jami ducu ma tye ka timme i kin laco ki dako. Jehovah keken aye twero nenone. I lok ada, dako nyo laco ma Lakricitayo pe nyutu woro i kom Lubanga nyo i kom yubbe me nyom ka en kwoto lok me peko ma nongo tye i otgi pi pokke woko ki bot lawote. Jehovah ngeyo woko ka nongo obedo pulan pa ngat moni me pokke kadi bed en otemme nining me kanone. Adada, “pe tye gin mo mukanne ki bot Lubanga ma en pe neno, jami ducu ma en oketo odurre woko ka maleng i wange, en aye ngat ma bingiyo kwowa.” (Jo Ibru 4:13) Ento ka gin mo marac tye ka medde ameda labongo gik pi kare malac, ngat mo pe myero okok i kom Lakricitayo mo ma nongo oyero gire me pokke woko. I agikkine, “Wan ducu wabicung i nyim komker me ngolo kop pa Lubanga.”—Jo Roma 14:10-12.