1, 2. Mic mene ma oa ki bot Lubanga ma pire tek i kare-ni, dok pingo?

WONWA me polo omiyowa mic mo ma pire tek adada—mic me kwo macalo dano ma gitye ki ryeko kacel ki kero me nyuto kite mapat pat. (Acakki 1:27) Pi bedo ki mic meno ma pire tek-ki, waromo niang kit ma cik me Baibul konyowa kwede. Ka ce walubugi, ci waromo dongo wabedo jo mutegi i yo me cwiny, jo ma gimaro Jehovah dok ma ‘gupwonnye me poko gin maber ki marac.’—Jo Ibru 5:14.

² Kero me niang cik me Baibul mitte tutwal i kare-ni, pien lobo-ni tye mapat adada ma kadi cik obed pol ningo pe twero gwaro jami ducu ma bino i kwo. Lok kom ot yat tye macalo labolle, tutwalle i lok madok i kom remo ki yo ma kwako tic kwede. Man obedo lok ma pire tek bot jo ducu ma gimito winyo Jehovah. Ento, ka waniang cik ma pigi tego me Baibul, ci wabimoko tam me ryeko ma weko cwinywa pe pidowa dok weko wabedo i mar pa Lubanga. (Carolok 2:6-11) Nen kong cikke mogo.

3, 4. Kinyuto kit ma remo pire tek kwede awene, dok man jenge i kom cik mene?

³ Jehovah onyutu tyen mukwongo wat ma tye i kin remo ki kwo, ki kit ma gileng kwede inge Kain neko omine Abel. Lubanga owaco bot Kain ni, “Nen, remo pa  omeru tye ka koko i nyima, winnye a ki i ngom.” (Acakki 4:10) I wang Jehovah, remo pa Abel onongo cung pi kwone ma kikwanyo woko i yo malit. Man oweko kiromo wacone ni remo pa Abel okok bot Lubanga wek kicul kworre.—Jo Ibru 12:24.

⁴ I nge Pii Aluka i kare pa Nua, Lubanga oye ni dano ocam ringo lee ento pe remo. Lubanga owacci: “Pe wubicamo ringo kacel ki kwone, ma en aye remone. Atikane abipido pi remo kwowu.” (Acakki 9:4, 5) Cik man gudo kom likwayo pa Nua ducu nio wa i kare-ni. Man moko lok ma Lubanga owaco bot Kain con ni remo aye cung pi kwo pa ginaketa ducu. Cik man nyutu ni Jehovah ma obedo Wang It me kwo-ni, bingolo kop i kom jo ducu ma pe giworo kwo ki remo.—Jabuli 36:9.

5, 6. I yo ango ma Cik pa Moses nyutu ni remo obedo gin maleng dok pire tek? (Nen bene bok ma tye i  pot karatac 78.)

⁵ Lok ada aryo ma pigi tego magi okati i Cik pa Moses. Buk pa Lulevi 17:10, 11 kwanne ni: ‘Ka dano mo ocamo remo, abiketo wanga i kom dano meno ma ocamo remo-ni, dok abimiyo wange rwenyo woko ki i kin lutugi. Pien kwo pa ringo tye i remo; an dong atyeko miyone botwu i wi keno tyer pi kwanyo balwu, pien remo aye gin ma kwanyo bal, pi kwo ma tye iye-ni.’ *—Nen bok ma wiye tye ni “ Teko pa Remo me Kwanyo Bal,” i pot karatac 76.

⁶ Ka ce remo pa lee ma kineko pe kitiyo kwede i wi keno tyer, ci onongo mitte ni omyero kiony woko i ngom. Dong, nongo tye calo iwacci kwo-nu kityeko dwokone woko bot Rwode. (Nwoyo Cik 12:16; Ejekiel 18:4) Nge ni Luicrael onongo pe giyelle me kwanyo remo ducu labongo kit tonne mo me dong i ringo. Teke lee-nu kingolo dok remone ocwer maber, Laicrael moni onongo  romo camone ma cwinye pe pide, pien weko remo lee meno cwer nyutu woro pi ngat ma Omiyo Kwo.

7. Daudi onyutu woro pi remo nining?

⁷ Daudi, ‘laco ma oyomo cwiny Lubanga,’ oniang cik pa Lubanga madok i kom remo. (Tic pa Lukwena 13:22) I nino mo acel ma orwo pii oneke matek, lulwenye adek  gucito wa i dye gony pa lumonegi, gutwomo pii ki i wang it mo ki kunu ci gukelo bote. Daudi oneno nining? En openyo ni, “An dok amat remo pa dano ma gudyero komgi-ni?” I neno pa Daudi, pii meno onongo rom ma obedo remo me kwo pa co magi. Kadi bed ni orwo onongo oneke, en ‘otingo oonyo i nyim Jehovah.’—2 Camuel 23:15-17.

8, 9. Tam pa Lubanga mono olokke i lok kom kwo ki dok remo i kare ma kacokke pa Lukricitayo ocakke? Tit kong.

⁸ I nge mwaki ma romo 2,400 ma kimiyo kwede cik ca bot Nua ki dok i nge mwaki ma romo 1,500 ma kimoko kwede Gicikke me Cik, Jehovah oweko lukiko madit pa kacokke pa Lukricitayo me kare macon gucoyo ni: “Cwiny maleng oneno ni ber, kacel ki wan bene, pe waket yec mapek tutwal i komwu makato lok magi ma pigi tego: pe wucam gin ma gityero bot jogi, pe wucam remo ki ringo lee ma gideyo adeya, pe wutim tim me tarwang.”—Tic pa Lukwena 15:28, 29.

⁹ Onen ka maleng ni lukiko madit me kare macon ca guniang atir ni remo obedo gin maleng dok ni tic kwede i yo ma pe opore onongo rac rom aroma ki woro cal ki tim me tarwang. Lukricitayo me ada bene i kare-ni giye lok meno. Medo i kom meno, kit ma giketo cik me Baibul i tic-ci, gin giyomo cwiny Jehovah ka gitye ka moko tamgi i lok madok i kom remo.

10, 11. (a) Lucaden pa Jehovah gineno medo remo arema-ni ki jami madongo ma tye iye nining? (b) I lok mene ma lubbe ki remo ma tam pa Lukricitayo romo pokke iye?

¹⁰ Lucaden pa Jehovah gingeyo ni ‘gwokke ki i kom remo’ tere ni omyero pe kimed remo i komgi ki dok ni omyero pe gimi remogi, ki bene ni omyero pe kigwok remogi ka mo me ameda i komgi i kare mo. Pi woro cik pa Lubanga, gin bene pe giye jami angwen  madongo ma tye i remo: red cells, white cells, platelets, ki plasma.

¹¹ I kare-ni, jami angwen madongo magi kingido igi matino tino ka kitiyo kwedgi i yo mapat pat. Lakricitayo mono romo ye jami matino tino magi ma tye i remo-ni? En mono nenogi calo “remo”? Ngat acel acel myero omok tamme pire kene i lok man. Man bene rom aroma i lok kom yo ma ludaktar gitiyo kwede calo hemodialysis, hemodilution, ki cell salvage ma kwako tic ki remo pa ngat moni i kome kekene, teke pe kong kigwoko ka mo.—Nen Lamed Ngec, pot karatac 215-218.

12. Omyero wanen dok water jami ma cwinywa aye myero ongol nining?

¹² Lok ma ngat acel acel myero omok iye tamme pire  kene mono pire pe tek bot Jehovah? Pe, en tye ki mitti i kom lok ma tye i tamwa ki i cwinywa. (Kwan Carolok 17:3; 24:12.) I nge lega ki kwedo lok i kom lok man kacel ki yo ma ludaktar gitiyo kwede, omyero walub cwinywa ma ngoliwa kop ma lubbe ki Baibul. (Jo Roma 14:2, 22, 23) Tye bene ni, ngatti mo pe myero odiwa me lubo tam ma cwinygi ongoligi, nyo pe omyero wapeny ni, “Ka onongo pekona-ni obed i komi, onongo ibitimo gin ango?” I lok ma kit meno, Lakricitayo acel acel omyero ‘oting yecce.’ *—Jo Galatia 6:5; Jo Roma 14:12; nen bok ma wiye tye ni “ An Mono Aneno Remo ni Obedo Gin Maleng?” i pot karatac 81.

13. Cik pa Jehovah nyutu gin ango i kome? Mi labolle.

¹³ Cik ma tye i Baibul nyuto ni Jehovah obedo lami cik maryek dok Wego ma lamar ma paro pi ber bedo pa lutinone. (Jabuli 19:7-11) Kadi bed ni cik ma kimiyo me ‘gwokke ki i kom . . . remo-ni’ onongo pe kimiyo calo cik ma mako yot kom, ento gwokowa ki i kom peko mogo ma bino calo adwogi me medo remo. (Tic pa Lukwena 15:20) Ki lok ada, ludaktari mapol gineno yango labongo medo remo calo “yo maber pud dong loyo” me tic i kom lutwo i kare-ni. Ki tung bot Lukricitayo me ada, jami magi moko ryeko ki mar madit pa Jehovah macalo wego.—Kwan Icaya 55:9; Jon 14:21, 23.

14, 15. (a) Cik ango ma onyutu mar pa Lubanga bot jone? (b) Iromo tic ki cik ma igi lac-ci pi gwokkeni nining?

¹⁴ Cik mapol ma Lubanga omiyo bot jo Icrael onyutu ni en paro pi ber bedogi. Me labolle, en onongo mito ni odi pa Luicrael ma gicweyo ma wigi pete apeta-ni kiket  kigeng i twokke pi gengo dano poto wek pe okel awano, kit ma onongo dano ito gibedo malo i wi odi magi pi tiyo ticgi mapol. (Nwoyo Cik 22:8; 1 Camuel 9:25, 26; Nekemia 8:16; Tic pa Lukwena 10:9) Lubanga bene ociko ni twoni dyangi mager myero kigwokgi wek pe guwan dano. (Nia 21:28, 29) Kwero lubo cik magi nyutu atir ni ngat moni pe paro pi ber bedo pa jo mukene dok romo kelo alii me onyo remo.

¹⁵ Iromo keto pwony ma nonge i cik magi i tic nining? Pingo pe kong itam i kom mutokani, kit ma idwoyo kwede, leyi-ni, paconi, gang ticci, ki kodi tuko me mato yamo ma iyero? I lobe mogo, awano ma a ki i kodi jami magi aye tye ka kelo to mapol bot jo matino, pien giketo kwogi ka mading kekengi. Ento, jo matino ma gimito bedo i mar pa Lubanga gitero kwo calo gin ma pire tek dok pe giyenyo yomcwiny ki i jami ma keto kwogi ka mading. Pe gitamo tam mingo mingo ni jo matino pe giwane. Ento, ginongo mit pa kwogi me bulu ki gwokke ki i kom jami ma wanogi.—Latitlok 11:9, 10.

16. Cik mene me Baibul ma loko i kom onyo ic? (Nen bene ngec ma tye i tere piny.)

¹⁶ Kadiwa kwo pa latin ma tye i ic bene pire tek bot Lubanga. I kare pa jo Icrael macon ca, ka ce ngatti mo owano dako muyac ci dako-ni nyo latinne oto, Lubanga onongo neno dano-nu calo ngat ma laneko, dok myero ocul “kwo ki kwo.” * (Kwan Nia 21:22, 23.) Kong dong itam kit ma Jehovah winyo kwede i neno lwagi lutino mapol ata ma kinekogi ki onyo ic mwaka ki mwaka pi cobo miti pa ngat moni nyo pi tim me tarwang.

17. Iromo kweyo cwiny ngat mo ma oonyo iye ma peya opwonyo cik pa Lubanga nining?

 ¹⁷ Ento, dako ma nongo oonyo iye ma peya oniang ngec me ada ma tye i Baibul kono? Lubanga dong pe  twero timme kica? Pe tye kumeno! Tye ni, dano ma ongut pi balle romo bedo ki gen ni Jehovah bitimme kica pi remo pa Yecu. (Jabuli 103:8-14; Jo Epeco 1:7) Kricito kikome owaco ni: “An pe abino ka lwongo jo ma kitgi atir, ento lubalo, wek gunguti.”—Luka 5:32.

18. Baibul nyuto nining gin ma kelo ony pa remo mapol?

¹⁸ Jehovah pe gengowa ki i wano jo mukene keken ento en mito ni wajwa adage woko ki i cwinywa pien en aye kelo onyo remo. Lakwena Jon ocoyo ni: ‘Ngat ma dag omine meno nongo lanek.’ (1 Jon 3:15) Dano ma kit meno nongo pe dag omine keken ento nongo lego ki i cwinye ni kono oto woko kono ber. Adage ma kit meno romo tero dano i kwoto nying marac adada nyo kelo adot goba goba i lok mo madit ma ka onongo obedo lok ada ci kelo ngolo kop pa Lubanga i kom dano meno. (Lulevi 19:16; Nwoyo Cik 19:18-21; Matayo 5:22) Pud dong pire tek ni omyero wati matek me jwayo tam marac mo keken ma tye i cwinywa!—Yakobo 1:14, 15; 4:1-3.

19. Ngat ma cik me Baibul aye doro neno tyeng calo Jabuli 11:5 ki Jo Pilipi 4:8, 9 nining?

¹⁹ Jo ma gineno ni kwo pire tek kit ma Jehovah neno kwede dok ma gimito bedo i marre bene gigwokke ki i tim gero mo keken. Jabuli 11:5 waco ni: “En dag ngat ma maro timo tim bwami.” Tyeng man pe nyutu kit pa Lubanga keken; ento tye calo cik ma myero odor kwowa. Weko jo ma maro Lubanga gigwokke ki i kom kit galowang mo keken ma dok i kom tim gero. I yo acel-lu, lok ni Jehovah obedo ‘Lubanga won kuc-ci’ miyo luticce gipongo tamgi ki cwinygi ki jami ma mwonya, maleng, ki ma myero apaka, ma kelo mer.—Kwan Jo Pilipi 4:8, 9.

20-22. Ka cungo pa Lukricitayo tye nining i lok me lobo, dok pingo?

²⁰ I wang Lubanga, lobo pa Catan-ni tye ki alii me remo. Kitiyo ki leyi mager i Ginacoya me cung kaka loc me wibye, ma oneko dano milion mapol ata ma i kine tye iye lutic pa Jehovah. (Daniel 8:3, 4, 20-22; Niyabo 13:1, 2, 7, 8) Lutim biacara kacel ki wegi ngec me cayan guribo cinggi ki luloc magi ma kiporogi ki lee-ni me yubo jami lweny mogo maraco, kun ginongo magoba madongo iye. Adada “lobo ducu tye i te loc pa Larac”!—1 Jon 5:19.

²¹ Kit ma lulub kor Yecu pe gubedo “jo me lobo” dok pe gicwako tung ka mo keken i lok me loc lobo kacel ki lweny-nyi, gin pe gitimo gin mo ma kelo alii me remo i wigi nyo macalo alwak. * (Jon 15:19; 17:16) I lubo lanen pa Kricito, gin pe gidwoko tim gero i kom tim gero ka kitye ka unogi. Ento, ginyutu cwiny me mar i kom lumonegi  kun gibedo ka lega pigi.—Matayo 5:44; Jo Roma 12:17-21.

²² Ma dong loyo ducu, Lukricitayo me ada pe giribbe ki “Babilon Madit,” ma obedo dini goba me lobo-ni ma dong alii me remo dit i wiye loyo-ni. Lok pa Lubanga wacci, “Remo pa lutit lok pa Lubanga [lunebi] ki pa jo maleng, remo pa jo ducu ma yam ginekogi i lobo, ginongo tye i Babilon.” Pi meno, kicikowa ni: “Wun jona, wua woko ki bote.”—Niyabo 17:6; 18:2, 4, 24.

23. A woko ki i Babilon Madit te lokke ngo?

²³ Weko Babilon Madit pe te lokke ni ka dano moni ongolo nyinge ki i te bukgi, ci nongo lok otum. Kwako bene dago tim maraco ma dini goba gicwako—jami calo tim tarwang, rwako wic i lok me wibye, ki yenyo lonyo ki kwok matino. (Kwan Jabuli 97:10; Niyabo 18:7, 9, 11-17) Jami magi ducu pol kare kelo ony pa remo!

24, 25. Lubanga tiyo ki ngo pi timo kica bot ngat ma oonyo remo ento ongut, dok man kinyutu nining i kare me Baibul?

²⁴ Ma peya wajolo woro me ada, wan ducu ki acel acel onongo wateno kor yub pa Catan i yo mo olo, ma meno onongo kelo alii me remo mo manok i wiwa. Ento pien waloko yo me kwowa, wadongo niye i ginkok pa Kricito, dok wadyero kwowa bot Lubanga, wanongo kica pa Lubanga ki gwok i yo me cwiny. (Tic pa Lukwena 3:19) Gangi me laro ngat ma oneko dano i kare me Baibul onongo cimo gwok man.—Wel 35:11-15; Nwoyo Cik 21:1-9.

²⁵ Yub meno onongo tiyo nining? Ka ce cing Laicrael mo ocer oneko lawote, onongo mitte ni en oring i gang me laro lanek dano. Ka lungol kop gungolo lokke, ngat ma cinge ocer-ri myero obed i gang me laro luneko-ni wang ma lalam dog madit oto. Ci dong en bedo agonya me kwo ka mo keken. Man obedo twon lanen me aura me kica pa Lubanga dok ni en tero kwo pa dano calo gin ma pire tek! I kare-ni, gin ma rom ki gangi me laro luneko aye mic pa Lubanga ma jenge i ginkok pa Kricito.  Man gwokowa ki i to pi turo cik pa Lubanga i kom kwo ki remo. In tika itero mic meno calo gin ma pire tek? Iromo nyutune ni pire tekki nining? Yo acel aye me lwongo jo mukene me bino i gang me laro lunek me kare-ni, tutwalle kit ma waneno “twon can madit atika” tye ka bino oyotoyot.—Matayo 24:21; 2 Jo Korint 6:1, 2.

26-28. I yo ango ma kwowa me kare-ni rom ki pa lanebi Ejekiel, dok waromo bedo i mar pa Lubanga nining?

²⁶ Kwo ma jo pa Lubanga tye iye i kare-ni poyo wiwa i kom lanebi Ejekiel, ma Jehovah onongo ocimme me tic macalo lakur-piny i yo me cwiny pi jo Icrael. Lubanga owacce ni “Ibitito botgi lok ducu ma acikogi kwede.” Ka onongo wi Ejekiel owil woko i kom ticce, onongo kono remo pa jo ma kinekogi i kare ma kityeko Jerucalem-mi obedo i wiye. (Ejekiel 33:7-9) Ento Ejekiel obedo lawiny omiyo remo pa jo meno pe obedo i wiye.

²⁷ I kare-ni, watye ma wakemme ki agikki me lobo man ma tye i te Catan-ni. Pi meno, Lucaden pa Jehovah gineno tito pi “kare me culo kwor” pa Lubanga ma lubbe ki kwena me Ker-ri calo tic mo ma obedo mot madit ma tye i wigi. (Icaya 61:2; Matayo 24:14) In tika inywako i tic man ma pire tek-ki? Lakwena Paulo otero ticce me pwony calo gin ma pire tek. Man oweko en owacci: “Ka kwo pa ngat mo i kinwu orwenyo, aliine pe tye i wiya, pien pe anguny ki ngeya aweko tuco botwu gin ducu ma Lubanga oyubo.” (Tic pa Lukwena 20:26, 27) Man obedo twon lanen maber botwa me aluba!

²⁸ Ada, wek wabed i mar pa wonwa Jehovah, omyero pe wanen kwo ki remo calo gin ma pire tek kit ma Jehovah neno kwede keken, omyero bene wabed leng i wange kit ma wabineno kwede i dul ma lubo man.