TIKA dong ngat mo okwalo gin mo ki boti?— Meno omiyo iwinyo nining?— Ngat ma okwalo gin meno-ni obedo lakwo dok pe tye ngat mo ma maro lakwo. Itamo ni dano moni cako doko lakwo nining? Kwo mono bedo i remo, ma miyo kinywalo ngat moni kit meno?—

Watyeko dong pwonyone ni dano kinywalogi ki bal. Pi meno, wan ducu watye ki kom me roc. Ento pe tye ngat mo ma kinywale ma lakwo. Lakwo twero a ki i ot ma danone kitgi beco. Lunyodone, omegine ki lumegine bene nongo gigene. Ento miti pa ngat moni i kom jami calo cente nyo gin ma cente twero wilone aye miyo en doko lakwo.

Nga ma itwero wacone ni obedo lakwo mukwongo?— Kong watam lokke. I kare ma Lapwony Madit tye i polo en onongo dong ngeyo lakwo mukwongo-ni. Lakwo meno obedo lamalaika. Kit macalo Lubanga onongo ocweyo lumalaika ducu labongo roc mo-ni, lamalaika man ocako doko lakwo nining?— Kit ma wapwonyo kwede i Dul me 8 i buk man, lamalaika-ni omito gin ma pe mege. Wi mono po i kom gin meno?—

I kare ma Lubanga ocweyo laco ki dako mukwongo, lamalaika meno omito ni gin myero guwore. En onongo pe opore me nongo worogi. Worogi obedo pa Lubanga. Ento en okwalo woko! Kit ma en oweko Adam ki Kawa guwore-ni, lamalaika man odoko lakwo. En odoko Catan Larac-ci.

Ngo ma weko ngat moni doko lakwo?— Miti i kom jami ma pe mege. Miti man twero doko tek ma weko wa jo ma kitgi beco gitwero  timo jami maraco. I kine mogo, jo ma gidoko lukwo pe gingut me cako timo jami mabeco kit macon. I kin jo magi bene obedo lakwena acel pa Yecu. Nyinge Juda Iskariot.

Juda onongo ngeyo ni kwalo kwo rac pien ni en kipwonye ki Cik pa Lubanga wacon ma en onongo pud awobi matidi. En onongo bene ngeyo ni i kare mo Lubanga oloko ki i polo kun waco bot jone ni: “Pe ikwal gin mo.” (Nia 20:15) I kare ma Juda odongo, en orwatte ki Lapwony Madit ci odoko ngat acel i kin lupwonnyene. I ngeye Yecu oyere bene me bedo i kin lukwenane 12 ni.

Yecu ki lukwenane onongo giwoto kacel. Onongo gicamo kacel. Dok cente ducu ma gurupgi tye kwede onongo kigwoko i bok acel. Yecu omiyo bok meno bot Juda ni ogwoki. Ki lok ada, cente meno onongo pe pa Juda. Ento ingeyo ngo ma Juda otimo i nge kare mo manok?—

Juda ocako kwanyo cente ma i bok kadi pe myero onongo en okwany. En onongo kwanyo ka luwote pe ka nene, dok bene otemo yenyo yo ma myero emed kwede cente i bok meno. En ocako keto tamme i kom cente cawa ducu. Kong wanen gin ma miti marac-ci okelo i kine ka nino mogo manok ma peya kineko Lapwony Madit.

Maliam, lamin Lajaro larem Yecu okelo moo mo ma ngwece kur ci oonyo i tyen Yecu. Ento Juda oloko iye marac. Ingeyo pingo?— En owaco ni moo meno onongo myero gucat ci kimi centene bot lucan. Ento i adane en onongo mito ni emed cente i bok wek ekwal woko.—Jon 12:1-6.

Yecu owaco bot Juda ni omyero pe oyel Maliam pien ni onyutu kica. Juda cwinye ocwer pi lok ma Yecu owacce ni, pi meno en oa ocito bot lulamdog madito pa Lubanga ma gin aye gubedo lumone pa Yecu. Gin onongo gimito mako Yecu ento gimito ni gimake i dyewor wek lwak pe onengi.

 Juda owaco bot lulamdog pa Lubanga ni: ‘Abiwacciwu kit ma wutwero mako kwede Yecu ka ce wumiya cente. Wubimiya ciling adi?’

Lulamdog pa Lubanga gudok iye ni, ‘Wabimiyo boti lim ryal pyeradek.’—Matayo 26:14-16.

Juda ogamo cente meno. Man onongo dong bedo calo iwacci en tye ka cato Lapwony Madit bot jo magi! Tika iromo tamo ngat mo keken ma timo gin marac calo man?— Meno aye adwogi ma bino ka ngat mo odoko lakwo ci okwalo cente. En nongo maro cente loyo kit ma en maro kwede dano nyo kadi wa Lubanga.

Gwok nyo itwero waco ni, ‘An pe abimaro gin mo keken maloyo maro Jehovah.’ Ber adada ni itamo kumeno. I kare ma Yecu oyero Juda me bedo lakwenane, twero bedo ni en kong otamo kumeno. Jo mukene ma gidoko lukwo bene mogo nongo gubedo ki tam ma kumeno. Kong dong walok i kom jo mogo i kingi.

Ngat acel i kine obedo latic pa Lubanga ma nyinge Akan, ma okwo wacon ma pud peya kinywalo Lapwony Madit-ti. Akan oneno bongo maber, dul jabu, ki cente me ryal mogo. Jami magi onongo pe mege. Baibul waco ni jami magi onongo gubedo pa Jehovah pien  ni kikwanyogi ki bot lumerok pa jo pa Jehovah. Ento Akan onongo mito jami magi matek tutwal ci okwalogi woko.—Yocwa 6:19; 7:11, 20-22.

Lapor mukene ene. Yam con Jehovah oyero Daudi me bedo kabaka me Icrael. I nino mo acel Daudi obedo ka neno dako mo maleng ma nyinge Batceba. En omedde ki neno Batceba ci ocako tamo kit me kwanye me kele paco wek obed dakone. Ento en onongo obedo dako pa Uria. Ngo ma Daudi onongo myero otim?—

Daudi onongo myero owek tam i kom Batceba. Ento en pe otimo meno. Pi meno Daudi okwanye okele i pacone. I ngeye en oketo yub oweko kineko Uria. Pingo Daudi otimo gin marac-ci?— Pien en omedde ki mito dako pa ngat mukene.—2 Camuel 11:2-27.

 Jehovah oweko Daudi omedde ki kwo pien en ongut. Ento cakke i kare meno Daudi obedo ki pekki mapol. Wod pa Daudi Abcalom onongo mito mayo ker pa wonne wek ebed kabaka. Pi meno ka dano gubino ka neno Daudi, Abcalom gwako korgi kun noto lemgi. Baibul waco ni: ‘Abcalom obedo ka ywayo cwiny jo Icrael ducu odwoko i kome.’ En oweko dano gucako mito en aye me doko kabaka ma ka Daudi.—2 Camuel 15:1-12.

Tika dong ibedo ki miti matek i kom gin mo kit ma Akan, Daudi, ki Abcalom gubedo kwede-ni?— Ka gin meno obedo pa ngat mukene, kwanyone labongo twero obedo kwalo kwo. Wi mono po i kom gin ma lakwo mukwongo, Catan onongo mito?— En onongo mito ni dano guwore ma ka woro Lubanga. Pi meno Catan onongo tye ka kwalo kwo i kare ma en oweko Adam ki Kawa guwinyo lokke.

Ka ngat mo tye ki gin mo, en tye ki twero me moko anga ma myero oti kwede. Me lapor-re, itwero cito ka tuko ki lutino mukene i pacogi. Tika bibedo ber ka ikwanyo gin mo ki kunnu ikelo i pacowu?— Pe ber, nikwanyo ka mamagi nyo babagi oye ni ikwany. Ka ce ikwanyo gin mo icito kwede paco ma pe ipenyo meno nongo obedo kwalo kwo.

Pingo atematema twero bino me kwalo gin mo?— Pien ni nongo imito gin mo ma pe megi. Kadi bed ngat mukene pe oneni ma itye ka kwanyone, ento anga ma nongo tye ka neni?— Lubanga Jehovah. Omyero wiwa opo ni Lubanga dag kwalo kwo. Pi meno mar-ri i kom Lubanga ki dano luwoti bikonyi wek pe idok lakwo.