PINGO lapeny man ni, Anga ma obedo Lubangani-ni? mo ma pire tek?— Pien dano giworo lubange mapol. (1 Jo Korint 8:5) I kare ma lakwena Paulo onongo teko ki bot Jehovah me cango laco mo ma naka yam peya owoto, lwak gudange ni: “Lubanga gulor piny botwa macalo dano!” Lwak onongo gimito miyo woro bot Paulo ki lawote Barnaba. Gulwongo Paulo ni Ermec ki Barnaba ni Jeuc, ma gubedo nying lubange me goba.

Ento Paulo ki Barnaba pe guye ni lwak ominigi woro. Guringo i dye lwak kun gidange ni: “Wua woko ki bot gin ma konnye pe, wulokke bot Lubanga makwo.” (Tic pa Lukwena 14:8-15) Anga ma obedo “Lubanga makwo,” ma ocweyo jami ducu?— Jehovah, “Ngat Mamalo Twal ma loyo wi lobo-ni ducu.” Yecu olwongo Jehovah ni “Lubanga acel me ada.” Dong, anga keken ma opore me awora?— Jehovah keken!—Jabuli 83:18; Jon 17:3; Niyabo 4:11.

Pol pa dano giworo lubange mapat ki “Lubanga acel me ada.” Pol kare giworo jami ma kiyubo ki yat, got, nyo nyonyo. (Nia 32:4-7; Lulevi 26:1; Icaya 44:14-17) Kadi wa co ki mon ma guywek adada i kine mukene kiworogi calo lubange. Mono pore me minigi deyo?—

I kare ma Caulo odoko lakwena Paulo, en ocoyo ni: “Jo ma pe giye-nu, lubanga me lobo man dong oumo tamgi woko.” (2 Jo Korint 4:4) Anga ma obedo lubanga meno?— Catan Larac-ci! Catan dong oweko jo miyo woro bot dano kacel ki jami mapol.

 I kare ma Catan otemo bito Yecu me ryebbe piny ka woro en, ngo ma Yecu owaco bot Catan?— ‘Wor Rwot [Jehovah] Lubangani, dok iti pire keken.’ (Matayo 4:10) Kit meno Yecu onyuto atir ka maleng ni woro obedo pa Jehovah keken. Kong dong wakwan lok i kom awobe mogo ma onongo guniang lok man. Nyinggi Cadrak, Mecak, ki Abednego.

Awobe Ibru magi onongo gitye i kin rok pa Lubanga me Icrael ma kimakogi ci kiterogi macalo opii i lobo Babilon. Ki kunnu kabaka ma nyinge Nebukadnejar otiyo cal madit atika me jabu. I nino mo acel en ocwalo cik ni ka kigoyo wer, dano ducu myero guryebbe piny i nyim cal meno. En ociko ni: ‘Ngat ma pe biryebbe piny me woro cal man gibibole i ruk mac mukur malyet.’ Ngo ma onongo ibitimo?—

 Pol kare Cadrak, Mecak, ki Abednego onongo gilubo cik ducu pa kabaka. Ento gin gukwero ryebbe piny i nyim cal ca. Ingeyo pingo?— Pien cik pa Lubanga waco ni: ‘Pe omyero ibed ki lubanga mukene mapat ki an. Pe omyero iti cal apayani mo, dok pe omyero iryebbe piny i nyimme.’ (Nia 20:3-5) Pi meno, Cadrak, Mecak, ki Abednego gulubo cik pa Jehovah ma ka lubo cik pa kabaka.

Akemo omako kabaka matek, cutcut en owaco ni kikel lutino Ibru adek magi bote. En openyogi ni: ‘Tika obedo lok ada ni wun pe wutye ka woro lubangana? Abiminiwu dok kare mukene. Dong, ka wuwinyo wer, wuryebbe piny wuwor cal ma atiyo-ni. Ka wukwero, ci gibibolowu woko i ruk mac mukur malyet. Lubanga mene ma bilarowu kwanyowu woko ki i cinga?’

Ngo ma awobe magi onongo giromo timone? Ka in kono, ngo ma onongo ibitimone?— Gin guwaco bot kabaka ni: ‘Lubangawa ma waworo-ni bilarowa. Ento ka ce pe olarowa, wan pe wabiworo lubangani-ni. Pe wabiryebbe i nyim cal me jabu ma itiyo.’

Kabaka odoko ger adada. En ociko ni: ‘Med mac olyetti tyen abiro kulu makato kit mukwongo ca!’ En dok ociko co mogo ma komgi tek ni gutwe Cadrak, Mecak, ki Abednego ci gubolgi i ruk  mac mukur malyet! Mac-ci onongo lyet atika ma leb macce ma lyel bene oneko co ma komgi tek pa kabaka-ni woko! Ngo mutimme i kom Luibru adek magi?

Cadrak, Mecak, ki Abednego gupoto i dye mac kikome. Ento gin gua malo! Awano mo onongo pe i komgi. Dok onongo pe kitweyogi. Man otwere nining?— Kabaka oneno ruk mac mukur malyet-ti, dok gin ma en oneno omiyo lworo omake. En openyo ni: ‘Mono pe wabolo jo adek i mac?’ Luticce gugamo ni: “Ada, kabaka, iloko kakare.”

Kabaka dok owacci: ‘Nen! Atye ka neno jo angwen gitye ka wot awota i dye mac, kun mac bene pe wangogi.’ Tika ingeyo dano me angwenne-ni?— Obedo lamalaika pa Jehovah. En ogwoko Luibru adek-ki pe guwang.

I nge meno, kabaka obino onyiko cok ki doggola me kabedo ka ma ruk mac tye ka lyel iye-ni ci odange ni: “Cadrak, Mecak ki Abednego, wun lutic pa Lubanga Mamalo Twal, wukatti woko, wubin kany!” I  kare ma gukatti woko, dano ducu guneno ni pe guwang. Kadi wa ngwec yito mo onongo pe i komgi. Kabaka dok owacci: ‘Gipwo Lubanga pa Cadrak, Mecak ki Abednego, ma ocwalo lamalaika ci olaro luticce woko pien gukwero woro lubanga mo ata ma pe Lubangagi kikome.’—Daniel, cura 3.

Waromo nongo pwony ki i kom gin man mutimme con-ni. Kadi wa i kare-ni bene dano gigoyo cal jami nyo gitiyo cal apaya me awora. Buk me Encyclopedia Americana wacci: “Bandera obedo gin maleng calo yatariya.” Cal magi kitiyogi ki yat, got, nyonyo nyo kigoyo i kom bongo. Lupwonnye pa Yecu me kare macon gukwero miyo woro bot laloc madit me lobo Roma, tim ma lakwed lok me tekwaro Daniel P. Mannix owaco ni kiromo porone ki “kwero goyo calut i nyim bandera nyo nwoyo kwonge me woro lobo.”

Dong itamo ni Lubanga paro ka cal ma kiworo-ni kiyubo ki bongo, nyo kitiyo ki yat, got nyo nyonyo?— Itamo ni pore pi latic pa Jehovah me miyo woro bot cal ma kit man?— Cadrak, Mecak, ki Abednego gukwero timone, dok Jehovah iye obedo yom i komgi. In kono itwero lubo lanengi nining?—