IN MONO ingeyo ngat mo ma kare ducu mito ni ebed mukwongo?— En twero coro ngat mukene wek en ebed mukwongo i lain. Tika dong ineno gin meno ka timme?— Lapwony Madit oneno wa jo madito ka gitemme me nongo kabedo mabeco loyo. Dok meno pe oyomo cwinye. Kong wanen gin ma otimme.

Baibul titiwa ni kilwongo Yecu i karama madit i gang pa Laparicayo mo ma onongo tye latela ma pire tek me dinine. I nge o pa Yecu, en ocako neno ka wele mukene gidonyo kun gikwanyo kabedo mabeco loyo. Pi meno en otito lapor mo macek bot wele ma kilwongogi-ni. Imito winyone?—

 Yecu owacci: ‘Ka ngat mo olwongi i karama me nyom, pe iyer kabedo maber loyo nyo ma pire tek loyo.’ Tika ingeyo pingo Yecu owaco kumeno?— En otito ni oromo bedo ni nongo kilwongo bene ngat mo ma dok pire tek loyi. Pi meno, kit ma nen kwede i cal kany-nyi ngat ma olwongo wele-ni obino ci owaco ni: ‘Wek kabedo-ni ki laco man, cit kuca.’ Itamo ni welo-ni owinyo nining i cwinye i cawa meno?— Lewic omako en pien wele mukene-ni gubinene ka en cito i kabedo ma rwomme lapiny.

Yecu onongo tye ka nyutune ni mito kabedo maber loyo pe opore. Pi meno en owaco ni: ‘Ka kilwongi i karama me nyom cit ibed i kabedo ma lapiny loyo. Ci ngat ma olwongi-ni twero bino ci waco boti ni, “Larema, nyik i kom mamalo.” Ibibedo ki deyo i nyim wele ducu ka ikobo i kabedo maber.’—Luka 14:1, 7-11.

Tika iniang lapor pa Yecu-ni?— Kong wati ki labol mo macek me neno ka iniang lok man. Go kong ni itye ka donyo i bac mo ma dano tye ka laro donyo iye. Myero mono irune me nongo kabedo kun iweko ngat madit loyi cung acunga?— Itamo ni cwiny Yecu bibedo yom ka ce itimo meno?—

Ngat mo twero waco ni Yecu pe keto cwinye i tic ma watimo. Ento in mono iye lok meno?— I kare ma onongo Yecu tye i karama madit i gang pa Laparicayo ca, en obedo ka neno kit ma dano giyero kwede kabedogi. Pe itamo ni en pud keto cwiny marom aroma i tic ma watimo i kare-ni bene?— Kit macalo Yecu tye wa i polo-ni, en dong tye ka maber me nenowa.

 Ka ngat mo temme me bedo mukwongo, man twero kelo ayela. Pol kare kelo cero lok ma miyo dano gikeco. I kare mukene man timme ka lutino giwoto ka mo kacel i bac. Tekki kiyabo dog bac litap lutino dine me bedo mukwongo. Gimito kabedo maber loyo ma cok ki wang dirica. Ngo ma twero timme i ngeye?— Man kelo daa i kingi.

Mito bedo mukwongo twero kelo ayela mapol. Okelo ayela bene wa i kin lukwena pa Yecu. Kit ma wapwonyo kwede i Dul me 6 i buk man, gin gubedo ka laro lok i kom anga ma rwomme dit loyo i kingi. Ngo ma Yecu otimo?— En omiyo botgi tira. Lacen dok gubedo ki laro lok mukene. Kong wanen kit ma ocakke kwede.

Lukwena ki jo mukene kacel ki Yecu onongo gitye ka cito i Jerucalem tyen me agikki. Yecu onongo obedo  ka pwonyogi lok i kom Kerre, pi meno, Yakobo ki Jon gubedo ka tamo lok i kom loc kacel kwede calo rwodi. Gin gutito lok man bene bot mamagi Calume. (Matayo 27:56; Marako 15:40) Pi meno, i kare ma gitye ka cito i Jerucalem, Calume obino bot Yecu, ogungo piny ci openyo ni ki timme ber.

Yecu openye ni “I mito ango?” En ogamo ni emito ni Yecu myero owek awobene gubed cok kwede i Kerre, ngat acel i cinge tung lacam ki acel tung lacuc. I kare ma lukwenane apar mukene-ni guniang gin ma Yakobo ki Jon guweko mamagi openyo pire, itamo ni gin guwinyo nining?—

Cwinygi ocwer matek i kom Yakobo ki Jon. Pi meno Yecu omiyo bot lukwenane ducu tira mo me ryeko. Yecu owaccigi ni luloc me lobo-ni gimaro ni myero gibed ki twero dok pigi obed tek. Gimaro  rwom mamalo wek dano ducu guwiny lokgi. Ento Yecu owaco bot lulub kore ni pe myero gubed kumeno. Ma ka meno, Yecu owacci: “Ngat ma mito bedo mukwongo i kinwu omyero en obed opiiwu ducu.” Tam kong lok meno!—Matayo 20:20-28, Baibol pa Katoli.

In ingeyo ngo ma opii timo pi jo mukene?— En tiyo pi jo mukene labongo tamo ni myero gin bene gutii pire. En kwanyo kabedo ma rwomme lapiny loyo ento pe mukwongo. En tiyo ticce calo ngat ma rwomme lapiny loyo ento pe calo ngat ma pire tek loyo. Wi myero opo ni Yecu owaco ni ngat ma mito bedo mukwongo omyero obed calo opii bot luwote.

Itamo ni meno te lokke ngo botwa?— Itamo ni opii pyem ki laditte i kom anga ma omyero onong kabedo maber loyo? Nyo ni anga ma bikwongo cam? Itamo ningo?— Yecu ogonyo tere ni kare ducu opii keto pi laditte bedo mukwongo.—Luka 17:7-10.

Pi meno, ngo ma myero watim ma ka temme me bedo mukwongo?— Omyero wabed calo opii bot jo mukene. Dok meno te lokke ni keto jo mukene bedo mukwongo botwa. Tere ni tero jo mukene calo pigi tego loyo wan woko. Itwero tamo yo mo ma iromo keto kwede jo mukene bedo mukwongo?— Pingo pe kong idok cen i pot karatac 40 ki 41 wek inen yo mukene ma itwero keto kwede jo mukene me bedo mukwongo ki tic pigi.

Wi myero opo ni Lapwony Madit oketo jo mukene mukwongo kun tiyo pigi. I otyeno me agikki ma en obedo ki lukwenane, en ogungo piny ci olwoko tyengi. Ka wan bene waketo jo mukene gibedo mukwongo ki tic pigi, ci wabibedo ka yomo cwiny Lapwony Madit kacel ki Wonne Lubanga Jehovah.