IKIT ma nyo ingeyo kwede, dano i kare-ni giti, gitwo dok bene gito woko. Kadi wa lutino mogo bene gito. In mono myero ilwor to nyo ngat mo ma dong oto woko?— Tika ingeyo ngo ma timme ka wato?—

Ngat mo peke ma kwo i kare-ni ma kong oto ka odwogo cen wek otit botwa gin ma timme ka wato. Ento i kare ma Yecu, Lapwony Madit onongo tye i lobo, laco mo ma kit meno obedo tye. Watwero nongo pwony madok i kom jo muto ka ce wakwano lok kom laco-ni. Laco meno onongo tye larem Yecu dok onongo bedo i latin taun mo ma cok ki Jerucalem ma kilwongo ni Betania. Nyinge kilwongo ni Lajaro, en onongo tye ki lumegine aryo ma nyinggi Marita ki Maliam. Kong dong wanen gin ma Baibul owaco ni otimme.

I nino mo acel two obwoyo Lajaro matek atika. I kare meno Yecu onongo tye ka mabor adada. Pi meno Marita ki Maliam gucwalo ngec bot Yecu ni omingi Lajaro kome lit. Gin otimo man pien gingeyo ni Yecu twero bino ci cango two pa omingi-ni woko. Yecu pe obedo dokto, ento en onongo tye ki teko mua ki bot Lubanga me cango two mo keken.—Matayo 15:30, 31.

Ma peya Yecu ocito ka neno Lajaro, two pa Lajaro omedde matek ci en oto woko. Ento Yecu owaco ki lupwonnyene ni Lajaro tye ka nino anina dok En ebicito ka coyone ki i wang nino. Lupwonnyene pe guniang gin ma Yecu owaco. Pi meno Yecu owaco botgi ka maleng ni: “Lajaro dong oto.” Man nyutu ngo i kom  to?— To obedo calo nino mo matut adada. Obedo nino mo matut ma ngat moni pe twero wa leko lek.

Yecu obino ka limo Marita ki Maliam. Ento pol lurem me paco meno dong onongo guo. Gubino ka kweyo cwiny lumege magi pi omingi ma oto. I kare ma Marita owinyo ni Yecu tye ka bino en ocito ka rwatte kwede. Cutcut Maliam bene ocito ka rwatte ki Yecu . Onongo tye ka kumo kun woto ki koko ci opoto piny ka tyen Yecu. Lurem mogo ma gulubo kor Maliam bene onongo gitye ka koko.

Lapwony Madit openyo ka kwene ma ki kano iye kom Lajaro. Ci dano gutero Yecu i boro ka ma kiyiko iye Lajaro. I kare ma Yecu oneno ni dano gitye ka koko en bene ocako koko. En onongo ngeyo kit ma lit kwede me rwenyo dano me amara.

Boro man onongo kiumo doge ki got, pi meno Yecu owaco ni: “Kwanyu got woko.” Myero mono gutim gin ma Yecu owaco-ni?— Marita otamo ni man pe obedo tam maber. En owaco ni: “Rwot, koni dong ngwe, pien ori nino angwen.”

Ento Yecu odok iye ni: “Nakanen pe awacci ni, ka iye, ci ibineno deyo pa Lubanga?” Yecu onongo tye ka waco ni en obineno gin mo ma kelo deyo i kom Lubanga. Ngo ma Yecu otimo? I kare ma kikwanyo got meno, Yecu olego malongo bot Jehovah. Ci Yecu odange ki dwan malongo ni: “Lajaro, katti woko!” Tika en okato woko? En mono onongo twero katti?—

In mono itwero coyo ngat mo ma onino?— Itwero, ka ilwongo ki dwan malongo, meno twero weko en a malo. Ento mono itwero coyo ngat mo muto?— Pe twere. Kadi dong ilwong ki dwan malongo nining, en ngat muto-ni pe obiwinyo. Pe tye gin mo keken ma in nyo an nyo ngat mo keken i lobo-ni twero timone me coyo jo muto.

 Ento Yecu dok pat. En tye ki teko mo mapat ma a ki bot Lubanga. Pi meno i kare ma Yecu olwongo Lajaro, gin mo me aura otimme. Laco ma onongo dong oto orii nino angwen kulu-ni okati woko ki i boro! En odwogo cen ma kwo! En dok ocako yweyo, wot ki lok odoco! Yecu ocero Lajaro ki i kin jo muto.—Jon 11:1-44.

Tam kong i kom lok man: Ngo ma otimme i kom Lajaro i kare ma en oto? Gwok nyo dul kome mukene—oa ki i kome ci ocito ka kwo ka mapat? Kwo pa Lajaro mono ocito i polo? En mono onongo tye kwo kunnu bot Lubanga kacel ki lumalaika maleng pi nino angwen-ni?—

Pe, en onongo peke kunnu. Wi opo ni Yecu owaco ni Lajaro tye ka nino. Ka inino nongo itye nining? Ka inino matek pe itwero ngeyo gin mo ma tye ka timme i ngeti, tika itwero ngeyone?— Dong ka icoo pe itwero ngeyo kit ma irii kwede kanino wang ma ineno cawa.

 Tye bene kumeno bot jo muto. Gin pe gingeyo gin mo keken. Komgi bene pe winyo gin mo. Dok bene pe gitwero timo gin mo. Obedo bene kit meno bot Lajaro i kare ma en onongo oto. To obedo calo nino mo matut ma ngat mo wiye pe po i gin mo keken. Baibul waco ni: “Jo ma dong guto woko pe gingeyo gin mo.”—Latitlok 9:5, 10.

Tam kong i kom lok man bene: Ka onongo Lajaro obedo i polo pi nino angwen-ni onongo en pe twero waco lok mo iye?— Dok ka onongo en tye i polo tika onongo Yecu miyo en dwogo cen i lobo kany ki ka mamwonya ca?— Ngene kene ni pe timme!

Ento, dano mapol giwaco ni watye ki gin mo ma kwo nyo tipo ma medde ki kwo i nge to. Giwaco ni kwo nyo tipo pa Lajaro onongo tye ka mo mapat. Ento Baibul pe waco kumeno. Waco ni Lubanga ocweyo laco mukwongo Adam obedo “gin ma kwo.” Dong i kare ma Adam otimo bal, en oto woko. En odoko “gin muto,” dok bene en odok cen i apwa ka ma kicweyo en ki iye. En odoko gin ma peke. Baibul bene waco ni lutino ducu pa Adam gulako bal ki to.

 Nen ka maleng ni wan pe watye ki gin mo ma medde ki kwo pire kene labongo komwa. Dong pi kit ma dano gulako bal ki bot laco mukwongo Adam-mi, motmot gito kit ma Baibul waco ni: “Dano ma timo bal bito.”—Ejekiel 18:4.

Jo mukene lworo jo muto. Pe gimito oo cok ki ka ma kiyiko iye lyel pien gitamo ni jo muto gitye ki gin ma kwo mapat ki komgi ma twero wano jo ma kwo. Ento tika dano muto twero wano dano ma kwo?— Pe, en pe twero.

Jo mukene bene gitye ki niye ni dano muto gitwero dwogo cen calo tipo ka limo jo ma kwo. Pi meno gigwoko cam pi dano muto. Ento jo ma gitimo kit meno pe gitye ki niye i kom gin ma Lubanga waco i kom jo muto. Ka waye gin ma Lubanga waco, ci pe wabilworo jo muto. Dok ka ada wanyutu pwoc bot Lubanga pi kwo, ci wanyuto man ki i timo jami ma Lubanga cwakogi.

Ento tam twero bino i wi ni: ‘Lubanga mono tika bidwogo lutino ma guto cen i kwo? Ada en mono mito timone?’ Wabinywako lok meno i nge man.