Motmot, dano gunya mapol i wi lobo. Pol pa dano magi onongo gubedo jo maraco. Kadi wa lumalaika mogo bene i polo gudoko raco. Guweko pacogi me polo ci gubino piny i lobo. Tika ingeyo pingo gutimo man? Gumito ni giruk kom pa dano wek ginyom mon.

Lumalaika magi ki mon gunywalo lutino awobe. Lutino magi gudongo gudoko cogi co matego ma lubwura. Gin guketo awano i kom dano. Jehovah pe oye ni jami magi omedde ki timme. Pi meno, en omoko tamme me neko jo maraco ducu ki pii aluka.

Ento onongo tye laco mo ma dok pat adada. En onongo maro Jehovah. Nyinge Nua. En onongo tye ki dakone ki awobe adek, ma nyinggi Cem, Kam ki Yafeci, dok awobe magi gubedo ki mongi. Jehovah owaco bot Nua ni oyub yeya madit, wek en ki jo me ode pe guto woko ka Pii Aluka ocorre. Yeya man obedo twon bok mo madit me bao ma pe lwiny i te pii. Jehovah bene owaco bot Nua ni okel lee mapol i yeya wek gin bene pe guto woko.

Cutcut, Nua ocako yubo yeya. En kacel ki jo me ode gutero cokcok mwaki 50 me yubone. Guyubo yeya man kit ma Jehovah otito botgi kikome. I kare meno, Nua obedo ka ciko dano pi bino pa Pii Aluka-ni. Ento pe tye ngat mo ma owinyo lokke.

Olo twal, kare oromo me donyo i yeya. Kong wanenu gin mutimme i ngeye.