Kidiyo jo Icrael tektek me tic macalo opii. Jehovah ooro Moses ki Aron ni guter kwena man bot Parao: ‘Wek jona guciti, wek guwora i tim.’ Parao ogamo ki awaka ni: ‘Pe aparo gin ma Jehovah owaco, dok bene pe abiweko jo Icrael woto.’ Ci Parao odiyogi me tic matek makato. Jehovah onongo ni myero eniang wi Parao. Ingeyo gin ma en otimo? En okelo Pwod Apar i kom lobo Ejipt. Jehovah owaco bot Moses ni: ‘Parao okwero winyo lokka woko. Kudiko, nongo en tye i dog Kulu Nail. Cit bote iwacce ni kit ma en okwero weko jona ni guciti, pii me kulu Nail bilokke doko remo.’ Moses owinyo dog Lubanga ci ocito bot Parao. Parao oneno kit ma Aron ogoyo pii me kulu Nail ki odone, ci piine ducu olokke odoko remo. Kulu Nail odoko coo, rec ma iye oto woko dok jo Ejipt onongo dong pe gitwero mato piine. Ento Parao pud okwero gonyo jo Icrael woko.

 I nge nino abiro, Jehovah dok ooro Moses ni odok cen bot Parao ki kwena man: ‘Ka pe iweko jona gucito, abicwalo ogwal wek gupong lobo Ejipt woko.’ Ento Parao pe oye ni jo Icrael gua, pi meno Aron oilo odone, ci ogwal ocako corre oumo lobo Ejipt ducu. Dano gunongo ogwal opong i odigi, i kitandagi, dok opye wa i atabo camgi. Ogwal opong i kabedo ducu! Parao obako doge ni Moses oleg Jehovah wek okwany ogwal woko. Parao ocikke ni ebiweko jo Icrael gicito. Pi meno, Jehovah ogiko pwod man woko, ci jo Ejipt gucoko ogwal muto guduro woko lipim. Lobo okwok woko mangwe. Ento doki, Parao okwero gonyo jo Icrael woko.

Ci Jehovah owaco bot Moses ni: ‘Aron myero ogo ngom ki odoone, ci apwa bilokke doko lakucukucu, nyo lwangi mogo ma gitino ma gikayo dano.’ Cutcut lakucukucu ocako bino mapol. Jo pa Parao kikome guwacce ni: ‘Pwod man oa ki bot Lubanga.’ Ento Parao pud okwero weko ni jo Icrael guciti.