Moses ki Aron gucito bot Parao ci gutito bote kwena pa Lubanga ni: ‘Ka pe iweko jona gucito, abicoro lwak lwango madongo i lobo man.’ Lwango madongo magi gikayo dano. Lwango ocorre limuk i odi pa jo Ejipt, lucan wa ki lulonyo. Lobo ducu opong ki lwango. Ento lwango obedo pe i lobo me Gocen, ka ma jo Icrael bedo iye. Pwod me angwen man ki ma lubo-ni ducu owano jo Ejipt keken. Parao obako doge ni: ‘Wukwa Jehovah wek okwany lwak lwango-ni woko. Jowu twero cito gire.’ Ento i kare ma Jehovah okwanyo lwango madongo-ni, Parao oloko tamme woko. Awene ma Parao onongo biniang iye i kom teko pa Jehovah?

Jehovah owaco ni: ‘Ka Parao pe oweko jona gucito, two bipoto i kom lee pa jo Ejipt ci gibito woko.’ Orwone, lee ocako to. Ento lee pa jo Icrael pe guto. Kadi bed kit meno, cwiny Parao odoko nwang, pe oweko lwak ocito.

Ci Jehovah owaco bot Moses ni odok cen bot Parao ci oyu buru malo i yamo. Buru-ni olokke odoko apwa ma duny i yamo ci opoto i kom Luejipt ducu. Man okelo odeke ma tyer doko lwak bur i kom jo Ejipt wa ki leegi ducu. Kadi bed kit meno, Parao okwero gonyo jo Icrael woko.

Jehovah ooro Moses ni odok cen bot Parao ki kwena man: ‘Pud ikwero weko jona ni guciti? Diki,  abicoro lwak pee mapek i lobo.’ Orwone Jehovah omiyo piny omor, ci ocoro pee ma orubbe ki mac. Meno obedo pee ma ocwer marac adada ma pud dong loyo i lobo Ejipt. Pee obalo yadi ki ginapita ducu ma tye i poto, ento i lobo Gocen pee obedo pe. Parao owaco ni: ‘Wuleg Jehovah wek ogik pee-ni woko! Ci abiweko wucito.’ Ento cutcut ma kot ki pee ogik, Parao oloko tamme woko.

Ka dong Moses owaco ni: ‘Bonyo dong bicamo jami ducu ma pee oweko.’ Lwagi bonyo milion mapol ata gucamo gin mo keken ma odong i poto ki yadi. Parao obako doge ni: ‘Leg Jehovah wek okwany bonyo magi woko.’ Ento i kare ma Jehovah ogiko bonyo woko, cwiny Parao pud omedde ki bedo nwang.

Jehovah owaco bot Moses ni: ‘Rye cingi malo tung polo.’ Cutcut piny ocido woko licuc. Pi nino adek, jo Ejipt onongo pe gitwero neno dano nyo gin mo keken. Ento ka ma jo Icrael bedo iye piny obedo maleng.

Parao owaco bot Moses ni: ‘Wun ki jowu wutwero cito. Ento wuwek leeyiwu odong kany.’ Moses ogamo ni: ‘Myero water leeyiwa wek watyergi macalo mot bot Lubangawa.’ Parao okeco me to. En odange ni: ‘A woko ki bota! Ka dok aneno wangi, abineki woko.’