Jo Icrael mapol dok gudok cen ka woro cal apaya, pi meno Jehovah omiyogi i cing jo Piliciti. Ento onongo tye Luicrael mogo ma gimaro Jehovah. Ngat acel i kingi onongo nyinge Manoa. En ki dakone onongo gipe ki lutino. I nino mo acel Jehovah ooro lamalaikane bot dako pa Manoa. Malaika-ni owaco bote ni: ‘Ibinywalo latin laco. En bilaro jo Icrael ki i cing jo Piliciti. En bibedo Ajula pa Lubanga.’ In ingeyo jo ma onongo kilwongogi ni Ajula pa Lubanga? Gubedo jo ma gitiyo pi Lubanga i yo mapat. Onongo pe kiye ni Ajula pa Lubanga gungad yer wigi.

I nge kare mo, dako pa Manoa onywalo latin awobi, ci gucako nyinge ni Samson. I kare ma Samson odongo, Jehovah omiye teko madwong adada. En onongo twero neko labwor ki cinge nono. I nino mo acel, Samson oneko jo Piliciti 30 en kene. Jo Piliciti gudage adada ci gubedo ka yenyo yo me neke. I dyewor acel mo ma Samson obuto i Gaja, jo Piliciti gubuto gukure i dog cel me gang meno wek guneke woko i odiko. Ento i cwiny dyewor, Samson oa malo, ocito i dog cel, ci oputo woko. Otingo dog cel man i wi gwokke ci otero wa i wi got ma cok ki Kebron!

Lacen, jo Piliciti gucito bot dako mo ma Samson maro ma nyinge Delila, ci guwaco bote ni: ‘Wabiculi lim ryal alip mapol ka inongo ka ma tek kom Samson a ki iye. Wamito make wek watweye i buc.’ Delila onongo mito cente meno, pi man en oye. I acakkine, Samson okwero tite gin mumiyo kome tek tutwal. Ento en obedo ka dide matek ki lokke nino ducu wang ma Samson otuco mung me tekone. En owacce ni: ‘Yer wiya pud peya kilyelo pien an abedo Ajula pa Jehovah. Ka ce kilyelo yer wiya, ci tek koma birwenyo woko.’ Samson otimo bal madit ki tuco mung man, pe kumeno?

 Cutcut Delila owaco bot jo Piliciti ni: ‘Aniang munge woko!’ En omiyo Samson onino i eme, ci olwongo ngat mo olyelo yer wiye woko. Ka dong Delila odange ni: ‘Samson, Lupiliciti gubino i komi!’ Samson oco ki i wang nino, ento tekone onongo dong orwenyo. Jo Piliciti gumake, gukolo wange woko, ci gutere i buc.

I nino mo acel jo Piliciti alip mapol gucokke i ot me woro lubangagi Dagon, kun gidange ni: ‘Lubangawa dong omiyo Samson i cingwa! Kel Samson woko! Wek en otuk tuko mo me galo wangwa.’ Guweko en ocung i kin wir ot aryo ci gubedo ka nyware. Samson okok ni: ‘Ai Jehovah, alegi ni imiya tek kom doki tyen man acel-li.’ Yer wi Samson onongo olot woko doki. En ocoro wir ot ki tekke ducu. Ot omuk opoto piny, oneko jo ducu ma i iye, dok Samson bene oto woko.