Kadi bed ni Lukricitayo dong pe gilubo Cik pa Moses, ento cikke aryo madito loyo​—me maro Lubanga ki luwotwa—​pud obedo te guti me gin ma Jehovah mito ki botwa. (Mat 22:37-39) Mar meno pe obedo gin ma kinywalowa kwede. Myero wati matek me dongone. I yo ma nining? Yo acel ma pire tek aye kwano Baibul nino ducu. Ka watamo i kom kit mapatpat pa Lubanga, ma tye i Ginacoya, ci waneno ‘ber pa Jehovah.’ (Jab 27:4) Macalo adwogine, marwa pire bidongo dok tamwa lokke bedo calo mege. Man tugo cwinywa me lubo cik pa Lubanga, ma i kine tye iye cik me nyuto mar pi jo mukene. (Jon 13:34, 35; 1Jon 5:3) Nen kong tam adek ma kimiyo kany i kom kit me nongo mit pa kwano Baibul:

• Go calle i wi, kun ineno, ibilo, ingweyo dok iwinyo jami ma kunnu. Go ni itye kunnu. Ngo ma onongo ibineno, ibiwinyo, dok ibingweyo? Jo ma itye ka kwano lok i komgi-ni onongo gubiwinyo nining?

• Ti ki yo mapat pat. Magi aye yo mogo: Kwan ki dwan malongo, nyo lub ki i Baibul-li kun iwoto ki winyo dwan ma kimako. Kwan lok i kom dano nyo pwony mo me Baibul me kaka kwano cura ki cura. Me labolle, ti ki Lamed Ngec A7 nyo B12 i Baibul me New World Translation of the Holy Scriptures me kwano lok i kom Yecu. Ka itye ka kwano ginacoya me nino ducu, kwan cura ma kikwanyo ginacoya meno ki iye. Kwan bukke me Baibul kore ki kore ma lubbe ki kare ma kicoyogi iye.

• Kwan ki miti me niang. Kwano kadi wa cura acel keken me Baibul nino ducu kun iniang dok ilwodo lokke ber loyo kwano cura mapol mere me wek ityek Baibul. Tam i kom ngo ma onongo tye ka timme. Nen kabedo ki kare mutimme iye. Ti ki mep kacel ki ginacoya ma kiketo i dye pot karatac acel acel. Kwed lok acel mo olo ma pe iniang maber. Ka twere, wek cawa ma itiyo kwede me lwodo lok obed ma rom ki cawa me kwanni.