1, 2. (a) I yo ango ma lobo-ni rom ki latim bal ma kicok nekone? (Nen cal ma i pot karatac man.) (b) Jo ducu ma i polo kacel ki lobo gibiwinyo nining ka kijwero lobo man marac-ci?

GO KONG ni kingolo pwod me to i wi lamabuc mo mager adada. Dok lugwok mabuc gitye ka tere dong me aneka. Kadi bed ni latim bal-li pud tye kwo dok kome nen yot, ento en dong cok ki to. Dong rom ki lyel ma woto. *—Nen lok ma tye i tere piny.

² Lobo man marac-ci rom ki latim bal ma kicok nekone-ni. Baibul waco ni: “ Lobo tum woko.” (1 Jon 2:17) Jehovah dong otyeko mokone ni cokcok-ki kibijwero lobo man woko. Ento tye apokapoka acel ma pire tek i kin jwero lobo man ki neko latim bal-ca. Jo mogo gitwero tamone ni kop ma kingolo me neko latim bal-li pe obedo atir dok gitwero jemo iye, ki gen ni pe kibineke. Ento Jehovah ngolo kop atir, dok tamme me jwero lobo-ni tye atir. (Nwoyo Cik 32:4) Agikki pa lobo man dong pe bigalle. Ka  dong kijwero lobo-ni, jo ducu ma i polo ki i lobo kany gibiye ni Jehovah ngolokop kakare. Dok man biweko lobo ducu bedo ki kuc!

3. Pekki angwen mene ma gibibedo pe ka Ker pa Lubanga ocako loc?

³ “Lobo” macok “tum” woko-ni kwako gin ango? Kwako jami maraco ma tye ka timme i kare-ni. Cokcok-ki jami magi ducu gibigik woko. Man bene obedo but “kwena maber me ker pa Lubanga.” (Matayo 24:14) I pwony man, wabinyamo jami angwen ma bigik woko ka Ker pa Lubanga ocako loc: lutim maraco, tim me camucana, tim maraco, ki dong kwo matek. Wabipwonyo jami adek i kom pekki magi ki acel acel, (1) kit ma gudowa kwede i kare-ni, (2) gin ma Lubanga bitimo pi peko meno, ki dong, (3) gin ma bileyo ka wang peko meno.

4. Lutim maraco gigudowa nining i kare-ni?

⁴ Lutim maraco gigudowa nining i kare-ni? Lukwena Paulo owaco ni i kare me agikki, “piny bibedo marac i kare mogo.” Dok omedde ni: “Jo maraco ki jo ma lugoba gibimedde ki bedo marac makato kare.” (2 Temceo 3:1-5, 13) Tika dong jami magi gugudi? Jo mapol i kinwa gudeno can i cing jo maraco, me labolle, tim gero, apokapoka pi rangi del kom, ki tim aranyi. Jo mukene i kingi pe gikano jami maraco ma gitimo. Jo mukene gibino macalo lukony dano, ento ki lok ada nongo tamgi rac adada. Kadi bed ni jami magi pud pe gutimme i komwa, ento tim pa jo maraco pud gudowa ducu. Cwinywa cwer adada ka wawinyo kit ma kitero kwede lutino, jo mutii, ki dong jo ma gipe ki lukony korgi. Jo maraco magi gitimo jami ma weko ginen calo lee mager nyo bene jogi. (Yakobo 3:15) Ento ki yomcwiny madit, Lok pa Jehovah miniwa gen.

5. (a) Lutim maraco pud gitye ki kare me timo ngo? (b) Gin ango ma bitimme i kom jo ma gukwero loko kwogi?

⁵ Gin ango ma Jehovah bitimone? I kare-ni, Jehovah pud omiyo kare ki lutim maraco me loko kitgi. (Icaya 55:7) Kadi bed ni dong kicok jwero lobo man, ento pud peya kingolo kop me agikki i wi lutim maraco. Ento ngo kono ma bitimme i kom jo ma gukwero lokke ki jo ma gucwako lobo man nio wa i twon can madit? Jehovah ocikke me jwero lutim maraco ki i lobo. (Kwan Jabuli 37:10.) I kare-ni, jo mapol gupwonyo kit me kano jami maraco ma gitimo, dok pol kare pe gipwodogi. (Yubu 21:7, 9) Ento Baibul poyo wiwa ni: Lubanga “ciko wange pi neno gin ma dano tiyo, ci neno ka ma en cito iye ducu. Pe tye muto mo nyo piny ma ocido licuc ka ma lutim maraco gitwero kanne iye.” (Yubu 34:21, 22) Pi meno, pe tye yo mo ma watwero kane kwede ki bot Jehovah. En twero neno gin mo keken ma lutim maraco gitimo. I nge Armagedon, wabiyenyogi ki ka ma onongo gibibedo iye ento pe wabinongogi. Gibibedo pe matwal!—Jabuli 37:12-15.

6. Angagi ma gibibwot ka kijwero lutim maraco, dok pingo man tye kwena maber?

 ⁶ Angagi ma gibibwot ka kijwero lutim maraco? Jehovah ocikke ni: “Jo mamwol aye gibicamo lobo; gibibedo ki yomcwiny pi lonyo madwong ma gibilimo.” I jabuli meno, En omedde ni: “Jo ma kitgi atir gibicamo lobo, dok gibibedo iye matwal.” (Jabuli 37:11, 29) Angagi ma gubedo “jo mamwol” ki “jo ma kitgi atir”? Jo mamwol aye jo ma ginongo pwony ki bot Jehovah dok gilubo. Jo ma kitgi atir aye jo ma gimaro timo gin ma Lubanga mito. I kare-ni, jo maraco gipol loyo jo ma kitgi atir. Ento i lobo manyen, lobo bipong ki jo mamwol ki ma kitgi atir keken, dok gibiloko lobo ducu doko paradic!

7. Tim me camucana gudowa nining i kare-ni?

⁷ Tim me camucana gudowa nining i kare-ni? Dul mogo ma dano gucako aye ma tye ka kelo pol pa jami maraco ma i lobo i kare-ni. Dini mapatpat tye ka bwolo dano milion mapol i kare-ni. Me labolle, pe gitito bot dano lok ada madok i kom Lubanga, giwaco ni lok ma i Baibul pe genne, dok pe gitito lok ada i kom anyim pa dano kacel ki lobowa-ni. Gamente ma opong ki camucana gicwako lweny ki tim gero dok gidiyo lucan ki jo ma lukony korgi pe. Gamente magi ginongo lonyo ki yweka pien pe gingolo kop atir nyo kiwilogi i mung. Dul mogo ma pe giparo pi dano gibalo kabedo murumowa, gibalo jami ma i lobo, dok gibwuro dano wek jo mogo manok gunong lonyo. Nen ka maleng ni tim me camucana aye ma tye ka kelo pol pa pekki ma i lobo i kare-ni.

8. Ngo ma Baibul waco ni bitimme i kom dul mogo ma ginen calo gitek tutwal i kare-ni?

⁸ Gin ango ma Jehovah bitimone? Twon can madit bicakke ka gamente me lobo-ni ooto lweny i kom dini goba ducu ma i lobo, Baibul otito ni dini goba tye calo dako ma lakwele ma kilwongo ni Babilon Madit. (Niyabo 17:1, 2, 16; 18:1-4) Gibijwero dini goba magi ki pete tere ducu. Ento ngo ma bitimme i kom dul mogo ma gilucamucana? Baibul porogi ki got ki cula nam pien gibinen calo gitek adada. (Kwan Niyabo 6:14.) Ento dok medde ni kibijwero dul mo keken ma pe cwako Ker pa Lubanga. Man aye bibedo agikki me twon can madit atika-ni. (Jeremia 25:31-33) I nge meno, tim me camucana dong bibedo pe matwal!

9. Pingo watwero bedo ki gen ni lobo manyen-ni bibedo labongo anyobanyoba mo?

⁹ Ngo ma bileyo ka wang tim me camucana? Tika dul mo dok bibedo tye i nge Armegedon? Baibul waco ni: “Ento macalo en yam ociko, watye ka kuro polo manyen ki lobo manyen, ka ma kit ma atir bedo iye.” (2 Petero 3:13) Polo macon ki lobo macon-ni aye gamente me kare-ni ma opong ki tim me camucana kacel ki dano ma cwakogi. Gin ango ma bileyo ka wanggi ka dong kijwerogi? “Polo manyen ki lobo manyen.” Polo manyen cung pi gamente manyen, Ker ma Yecu Kricito kacel ki jo 144,000 aye giloyo. Lobo  manyen cung pi jo ma Ker pa Lubanga loyogi. Yecu ki jo ma en biloc kacel kwedgi gibilubo lanen pa Jehovah, ma en aye Lubanga ma pe kelo anyobanyoba. (1 Jo Korint 14:33) Pi meno, “lobo manyen” bibedo labongo anyobanyoba mo keken. Jo ma kitgi atir keken aye gibiloyo jami ducu. (Jabuli 45:16) Kricito kacel ki jo 144,000 aye gibitelo jo magi. Tam kong i kom kit ma kwo bibedo kwede ka dong gamente acel keken ma pe timo tim me camucana oleyo ka wang gamente ma opong ki tim me camucana!

10. Tim maraco ango ma tye i lobo i kare-ni, dok man gudo in kacel ki jo me otti nining?

¹⁰ Tim maraco gudowa nining i kare-ni? Wakwo i lobo ma opong ki tim tarwang, tim gero, ki dong jo ma pe gigene. Jami me galowang i kare-ni weko tim magi ginen calo gibeco kun nongo cayo rwom me kwo ma Jehovah cwako. (Icaya 5:20) Lunyodo myero gugwok lutinogi ki i kom jami magi maraco-ni. Ki lok ada, Lukricitayo ducu myero gutute matek me gwoko watgi ki Jehovah ki i lobo man ma pe nyuto woro i kom cik pa Lubanga.

11. Gin ango ma wapwonyo ki i kom kit ma Jehovah ongolo kwede ki kop i kom boma me Codom ki Gomora?

¹¹ Gin ango ma Jehovah bitimone i kom tim maraco? Tam kong i kom gin ma Jehovah otimo i kom tim marac ma onongo tye i boma me Codom ki Gomora. (Kwan 2 Petero 2:6-8.) Lot onongo dano ma kite atir, dok en kacel ki jo me ode gudeno can madwong pi jami maraco ma dano ma gurumo ngetgi gubedo ka timone. Jehovah ojwero boma meno woko wek etyek jami maraco ma onongo tye ka timme ducu. Ento en bene onongo tye ka nyuto “lanen” bot jo maraco ma i kare-ni. Kit macalo Jehovah ogiko tim me tarwang ma onongo tye i kare meno-ni, en bene bigiko tim tarwang i kare-ni ka en ojwero lobo man marac-ci.

12. Kit tic ango ma itye ki miti me timone ka kijwero lobo man marac-ci?

¹² Gin ango ma bileyo ka wang tim maraco? I lobo manyen, wabitimo tic mapol ma keliwa yomcwiny. Me labolle, wabiloko lobo doko paradic dok wabigero odi me bedowa ki pi jowa me amara. Wabijolo dano milion mapol ma kibicerogi kun wapwonyogi ki lok i kom Jehovah kacel ki jami ducu ma en otimo pi dano. (Icaya 65:21, 22; Tic pa Lukwena 24:15) I kare meno, wabitimo tic ma keliwa yomcwiny ki dok ma keto deyo i kom Jehovah!

13. Jemo ma otimme i poto me Eden-ni okelo adwogi ango?

¹³ Kit kwo matek ango ma dano gitye ka kato ki iye? Lobo opong ki lutim maraco, tim me camucana, ki tim maraco, dok man oweko kwo tek adada. Jami calo lweny, can lim, apokapoka me rangi del kom, two, ki to gudo wan ducu. Kwo matek ocakke pien Catan, Adam ki Kawa gujemo i kom Jehovah. Dok jemo man gudo wan ducu.

14. Gin ango ma Jehovah bitimone i kom pekki ma dano gitye ka denone?

 ¹⁴ Gin ango ma Jehovah bitimone? Nen kong labol mogo. Jehovah ocikke me giko lweny ducu. (Kwan Jabuli 46:8, 9.) En bicango two ducu. (Icaya 33:24) En bimwonyo to woko matwal. (Icaya 25:8) En bijwayo can woko. (Jabuli 72:12-16) Dok Jehovah bikwanyo jami maraco ducu ma weko kwo tek i kare-ni. En bene bijwero Catan ki jogine kacel ki adwogi maraco ma Catan okelo ducu!—Jo Epeco 2:2.

15. Gin ango ma dong bibedo pe i nge Armegedon?

¹⁵ Go kong kit ma kwo bibedo kwede i lobo ma lweny, two ki to pe iye! Lumony, jami lweny, nyo gin mo keken ma poyo wiwa i kom lweny dong bibedo pe. Tic pa ot yat, daktari, ka gwoko lyeli, ki limo dong bibedo pe. Dano pe dong gibituro cik, pi meno pe bimitte ni wabed ki abili, lukur-piny, nyo lapung doggola! Jami maraco ducu ma weko wabedo ki par mapol dong bibedo pe matwal.

16, 17. (a) Jo ma gibibwot ki i Armegedon gibiwinyo nining? Mi lapor. (b) Watwero bedo ki gen nining ni wabibwot ka dong kijwero lobo man woko?

¹⁶ Kwo bibedo nining ka dong kikwanyo pekki ma i lobo-ni ducu? Pe yot me goyo kit ma kwone bibedo kwede. Wabedo ki peko pi kare malac adada ma dong i kine mukene pe watwero niang kit ma gidiyowa kwede. Me lapore, jo ma gibedo i citecen gar pe dong giketo cwinygi i kom wor ma i kabedo meno. Dok jo ma gibedo i nget bur yugi pe kitwero keto cwinygi i kom ngwec piny. Ento pud dong wabibedo ki yomcwiny madit ya ka Jehovah okwanyo jami maraco ducu!

¹⁷ Gin ango ma bileyo ka wang par ducu ma watye kwede i kare-ni? Jabuli 37:11 wacci: “Gibibedo ki yomcwiny pi lonyo madwong ma gibilimo.” Pud dong kweyo cwinywa ya me niang ni man aye gin ma Jehovah bitimone piwa! Tim jami ducu ma itwero me bedo cok ki Jehovah kacel ki dulle i kare man ma kwo tek-ki. Genni pi kwo me anyim pire tek adada, pi meno tam iye matut, pe iwek obed calo lok oree mo ata, dok bene nywak gen man ki jo mukene. (1 Temceo 4:15, 16; 1 Petero 3:15) Ka itimo meno, ci itwero bedo ki gen ni ka kijwero lobo man marac-ci, ibibwot dok ibimedde ki kwo ki yomcwiny pi naka!