1. Gin ango ma romo konyowa me nongo mit pa kwano lok pa lunebi me Baibul?

 IN IWINYO nining ka odok i kom kwano lok pa lunebi me Baibul? Omego matidi ma nyinge Ben, ma kiloko i kome i pwony mukato-ni, owaco ni: “Amaro kwano lok pa lunebi me Baibul.” Tika in bene iwinyo kit meno? Nyo mono kwano lok pa lunebi mini lworo? Itwero bene nongo ni kwano lok pa lunebi me Baibul waco komi. Kadi bed kit meno, ka iniang pingo Jehovah oweko kicoyo lok pa lunebi i Baibul, man twero weko icako nongo mit pa kwanone.

2. Gin ango ma wabinyamo i pwony man?

² I pwony man, wabinyamo pingo omyero wakwan lok pa lunebi me Baibul ki dong kit me kwanone. I nge meno, wabinyamo lok pa lunebi aryo ma nonge i buk pa Daniel wek wanen kit ma niang lok magi twero konyowa kwede i kare-ni.

3. Gin ango ma omyero watim ka wamito niang lok pa lunebi me Baibul?

³ Mitte ni wapeny pi kony ka wamito niang lok pa lunebi me Baibul. Nen kong lapor man. Go kong ni icito ka limo kabedo mo ma pe ingeyo maber ento laremi ma tye ka wot kwedi ngeyo kabedo meno maber adada. En ngeyo ka ma wutye iye kikome ki ka ma yo acel acel cito iye. Labongo akalakala mo, cwinyi bibedo yom ni laremi oye me wot kacel kwedi! Jehovah tye calo laremi meno. En ngeyo gin ma bitimme i anyimwa maber adada. Dong me niang lok pa lunebi me Baibul, mitte ni wapeny pi kony ki bot Jehovah.—Dan. 2:28; 2 Pet. 1:19, 20.

4. Pingo Jehovah oweko kicoyo lok pa lunebi i Baibul? (Jeremia 29:11) (Nen bene cal.)

 ⁴ Calo lanyodo mo keken maber, Jehovah mito ni lutinone gubed ki anyim maber. (Kwan Jeremia 29:11.) Ento Jehovah pe tye calo lanyodo ma dano pien en twero tittiwa gin ma bitimme i anyim, dok lokke ducu cobbe kakare. Jehovah oyero co mogo me coyo lok pa lunebi i Baibul wek wange jami ma pigi tego con ma peya gutimme. (Ic. 46:10) Lok pa lunebi me Baibul gubedo mic mamwonya ma oa ki bot Wonwa me polo. Ento watwero bedo labongo akalakala nining ni jami ma Baibul otito pire bicobbe ada?

5. Gin ango ma jo matino gitwero pwonyo ki i labol pa Max?

⁵ I lobe mapol, Lukricitayo matino ma gicito i cukul gibedo i kin jo ma pe gitye ki woro pi Baibul. Lokgi kacel ki timgi twero weko Lucaden matino gibedo ki akalakala i kom niyegi. Nen kong gin mutimme i kom omego mo ma nyinge Max. En owaco ni, “I kare ma atye i gang kwan, acako bedo ki akalakala ka ce lunywalla gitye ka pwonya lok ada, dok ka ce Lubanga aye oweko kicoyo Baibul.” Gin ango ma lunywalle gutimo? En owaco ni, “Pe gudok iye ki gero, kadi bed onongo angeyo ni gitye ki par.” Lunywal pa Max gutiyo ki Baibul me gamo lapenye. Max bene otimo gin mo. En owaco ni, “Akwano lok pa lunebi me Baibul pira kena, dok anyamo gin ma apwonyo ki jo matino mukene me kacokke.” Adwogine obedo nining? Max owaco ni, “I nge meno, amoko ada ni Lubanga aye oweko kicoyo Baibul!”

6. Ngo ma mitte ni itim ka itye ki akalakala, dok pingo?

⁶ Ka in bene calo Max, icako bedo ki akalakala ka ce lok me Baibul tye ada, pe iwek lewic omaki. Pire tek adada ni itim gin mo oyotoyot. Akalakala tye calo nyal. Ka pe itimo gin mo iye, ci motmot twero balo jami ma welgi tek adada. Me cako kwanyo “nyal” mo keken ki i niyeni, mitte ni ipennye kekeni ni, ‘Tika aye gin ma Baibul waco madok i kom anyimwa?’ Ka itye ki gung cwiny i lok man, ci mitte ni ikwan lok pa lunebi me Baibul ma dong gutyeko cobbe woko. Itwero timo meno nining?

7. Daniel oweko lanen maber ango ka odok i kom kit me kwano lok pa lunebi? (Daniel 12:10) (Nen bene cal.)

⁷ Daniel oweko lanen maber piwa ka odok i kom kit me kwano lok pa lunebi. Daniel obedo ki tyen lok ma atir me kwano lok pa lunebi. En onongo mito ngeyo ada. Daniel bene onongo obedo ngat mamwol. En ongeyo ni Jehovah bikonye me niang lok pa lunebi ka emedde ki bedo cok kwede kun ebedo lawiny bote. (Dan. 2:27, 28; kwan Daniel 12:10.) Daniel onyuto ni ebedo ngat mamwol ki jenge i kom Jehovah pi kony. (Dan. 2:18) Daniel bene onongo kwano ginacoya ki diro. En otimo kwed kun tiyo ki but Ginacoya ma tye nonge i kare meno. (Jer. 25:11, 12; Dan. 9:2) Itwero lubo lanen pa Daniel nining?

8. Pingo jo mogo gikwano lok pa lunebi me Baibul?

⁸ Tyen lok ango mumiyo ikwano lok pa lunebi me Baibul? Tika itye ka kwanone pien imito ngeyo lok ada? Ka tye kit meno, ci Jehovah bikonyi. (Jon 4:23, 24; 14:16, 17) Ento jo  mogo gikwano lok pa lunebi me Baibul pi tyen lok mapat. Gikwano ki miti me moko ni Baibul pe oa ki bot Lubanga. Gitamo ni ka gimoko ni Baibul pe oa ki bot Lubanga, ci man weko gibedo agonya me moko pigi kengi gin ma atir ki gin marac. Ento, wan omyero wakwan pi tyen lok ma atir. Medo i kom meno, tye kit mo ma pire tek ma mitte wek waniang lok pa lunebi me Baibul.

9. Kit mene ma omyero wabed kwede wek waniang lok pa lunebi me Baibul? Tit kong.

⁹ Bed ngat mamwol. Jehovah ocikke me konyo jo mamwol. (Yak. 4:6) Pi meno, omyero waleg pi konye me niang lok pa lunebi me Baibul. Ka wabedo jo mamwol, wabiye bene kony ma a ki bot lagwok ot ma lagen ma Jehovah tye ka tic kwede me miniwa cam me cwiny i karene kikome. (Luka 12:42) Jehovah obedo Lubanga ma timo jami kore ki kore, pi meno rwatte ni en tye ka tic ki dul acel keken me konyowa niang ada ma tye i Lokke.—1 Kor. 14:33; Ep. 4:4-6.

10. Pwony ango ma inongo ki i gin mutimme i kom Esther?

¹⁰ Tim kwed. Cak ki kwano lok pa lanebi mo ma imaro. Man aye gin ma laminwa Esther, ma kiloko i kome i pwony mukato-ni, otimo. En onongo tye ki miti me niang lok pa lunebi ma loko i kom bino pa Meciya. En owaco ni, “I kare ma atye ki mwaka 15, acako timo kwed me moko ka ce lok pa lunebi magi kicoyogi ma peya Yecu obino i lobo.” Gin ma en opwonyo ki i kwano lok i kom bukke adola macon ma kilwongo ni Dead Sea Scrolls okonye. En owaco ni, “Bukke adola magi mogo kicoyogi ma peya kinywalo Yecu, pi meno lok pa lunebi ma iye gua ki bot Lubanga.” Esther oye ni, “Onongo mitte ni akwan jami mogo tyen mapol wek aniang maber.” Ento cwinye yom ni etute matek. I nge kwano ki diro lok pa lunebi me Baibul mapatpat, en owaco ni, “Dong atwero neno pira kena ni lok ma i Baibul tye ada!”

11. Adwogi maber ango ma wanongo ka wamoko piwa kenwa ni lok ma i Baibul tye ada?

¹¹ Ka waneno kit ma lok pa lunebi mogo me Baibul gucobbe kwede, wabibedo ki gen matek i kom Jehovah kacel ki dul ma en tye ka tic kwede me tirowa. Medo i kom meno, lok pa lunebi me Baibul konyowa me bedo ki gen matek pi anyim, kadi bed watye ka kato ki i pekki mapol i kare-ni. Kong dong wanyamu wiye wiye lok pa lunebi aryo ma Daniel ocoyogi ma gitye ka cobbe i kare-ni. Ka waniang lok magi maber, ci bikonyowa me moko tam me ryeko.

12. Tyen cal ma kitiyo ki “nyonyo ma orubbe woko ki lobo” cung pi gin ango? (Daniel 2:41-43)

¹² Kwan Daniel 2:41-43. I lek ma Daniel ogonyo tere bot Kabaka Nebukadnejar, tyen cal ma kabaka oneno-ni onongo kitiyo ki “nyonyo ma orubbe woko ki lobo.” Ka waporo lok pa lanebi man ki mukene ma nonge i buk pa Daniel ki Niyabo, ci watwero moko ni tyen cal man cung pi ker me Britain ki Amerika, ma gin aye gitye oteka ma loyo wi lobo  ducu i kare-ni. Madok i kom oteka man, Daniel owaco ni “ker man bibedo matek i kare mogo ki dok bibedo goro adada.” Pingo bute mogo bibedo goro? Pien dano ata-ni, ma kiporogi ki lobo agulu, giweko bedo tek pi oteka man me nyuto tekone. b

13. Lok ada ma pigi tego ango ma wapwonyo ki i lok pa lanebi man?

¹³ Wapwonyo lok ada mapol ki i kom cal ma Daniel oloko pire-ni, tutwalle ki i tyene. Me acel, ker me Britain ki Amerika gunyuto tekogi i yo mogo. Me labolle, Britain ki Amerika gubedo i kin lobe ma guloyo Lweny me Acel ki me Aryo me Wi Lobo. Ento, oteka man tye ka medde ki doko goro pien lutederogi gilwenyo i kingi kekengi dok gijemo i kom gamente. Me aryo, ker me Britain ki Amerika aye bibedo oteka me agikki me loyo lobo ma peya Ker pa Lubanga ogiko loc pa dano ducu. Kadi bed lobe mukene i kare mogo gipyem ki ker me Britain ki Amerika, ento pe gibileyo kakare. Wangeyo meno pien “got” ma cung pi Ker pa Lubanga binginyo tyen cal-li, ma meno aye cung pi Britain ki Amerika.—Dan. 2:34, 35, 44, 45.

14. I yo ma nining ma niang lok pa lanebi madok i kom tyen cal ma kitiyo ki nyonyo ma orubbe ki lobo twero konyowa me moko tam me ryeko?

¹⁴ Tika iye ni lok ma lanebi Daniel ocoyo i kom tyen cal ma kitiyo ki nyonyo ma orubbe ki lobo-ni tye ada? Ka tye kit meno, ci man bigudo kit ma ikwo kwede. Pe ibiketo cwinyi i kom tute me nongo cente madwong nyo jami me kom mapol pien ingeyo ni ma pe orii, kibijwero lobo man marac-ci woko. (Luka 12:16-21; 1 Jon 2:15-17) Niang lok pa lanebi man maber bene bikonyi me neno kit ma tic me tito kwena ki pwony pire tek kwede. (Mat. 6:33; 28:18-20) Man ma dong wanyamo lok pa lanebi-ni, pingo pe ipennye kekeni ni, ‘Tika tam ma amoko nyuto ni aye ada ni Ker pa Lubanga cokcok-ki bijwero gamente pa dano ducu?’

15. Angagi ma gubedo ‘kabaka ma tung kumalo’ ki ‘kabaka ma tung kupiny’ i kare-ni? (Daniel 11:40)

¹⁵ Kwan Daniel 11:40. Daniel cura 11 loko i kom luker nyo gamente aryo ma gipyem i kingi me bedo oteka ma loyo lobo. Ka waporo lok pa lanebi man ki mukene ma nonge i Baibul, waniang ni ‘kabaka ma tung kumalo’ obedo Russia ki lobe ma gicwake, dok ‘kabaka ma tung kupiny’ obedo ker me Britain ki Amerika ma gitye Oteka ma Loyo Wi Lobo-ni. c

16. Ariya ango ma utmegiwa ma gibedo i te loc pa ‘kabaka ma tung kumalo’ gitye ka kato ki iye?

¹⁶ Jo pa Lubanga ma gibedo i te loc pa ‘kabaka ma tung kumalo’ gitye ka kanyo aunauna ma a ki bot kabaka man. Lucaden mogo kigoyogi dok kibologi i buc pi niyegi. Me ka weko utmegiwa bedo ki lworo, aunauna ma oa ki bot ‘kabaka ma tung kumalo’ ojingo niyegi i kom Jehovah ki Lokke. Pingo? Pien utmegiwa gingeyo ni aunauna ma kiketo i kom jo pa Lubanga tye ka cobo lok pa lanebi Daniel. d (Dan. 11:41) Ngeyo lok man twero konyowa me bedo ki gen matek pi anyim kun wabedo lugen bot Jehovah.

17. Ariya ango ma jo pa Lubanga gukato ki iye i te loc pa ‘kabaka ma tung kupiny’?

¹⁷ I kare mukato angec, ‘kabaka ma tung kupiny’ bene oketo aunauna i kom lutic pa  Jehovah. Me labolle, meno otimme i kare me Lweny me Acel ki me Aryo me Wi Lobo, i kare ma kitweyo omege mapol i buc pi bedo ma pe gicwako tung ka mo, dok lutino pa Lucaden mogo kiryemogi ki i cukul pi tyen lok acel-lu. I mwaki mogo macok cok-ki, lutic pa Jehovah ma gikwo i te loc pa kabaka man kitemo gennegi bot Lubanga lapiny lapiny. Me labolle, i kare me bito kwir, Lakricitayo twero bedo i atematema me cwako pati nyo lacungo mo me wibye. Kadi bed en pe bolo kwir, ento ki i cwinye, en twero winyo ni pati nyo lacungo moni myero olo kwir. Pud dong pire tek ya ni pe wacwak tung ka mo keken i jami ma watimo ki bene i tamwa ki cwinywa!—Jon 15:18, 19; 18:36.

18. Tele ma tye i kin ‘kabaka ma tung kumalo’ ki ‘kabaka ma tung kupiny’ myero ogudwa nining? (Nen bene cal.)

¹⁸ Jo ma gipe ki niye i kom lok pa lunebi me Baibul lworo twero makogi matek adada ka guneno ‘kabaka ma tung kupiny’ tye ka ‘lweny’ ki ‘kabaka ma tung kumalo.’ (Dan. 11:40) Kabaka aryo magi ducu gitye ki bom matego ma twero tyeko kwo ducu ma i wi  lobo-ni. Ento wangeyo ni Jehovah pe biye ni gin ma kit meno otimme. (Ic. 45:18) Dong me kaka keliwa par, tele ma tye i kin ‘kabaka ma tung kumalo’ ki ‘kabaka ma tung kupiny’ jingo niyewa. Moko botwa ni agikki me lobo-ni dong cok.

19. Gin ango ma omyero wange ka odok i kom lok pa lunebi me Baibul?

¹⁹ Pe wangeyo kit ma lok pa lunebi mogo me Baibul bicobbe kwede kikome. Kadi wa lanebi Daniel bene pe oniang tyen lok me jami ducu ma en obedo ka coyone. (Dan. 12:8, 9) Ento kadi bed pe waniang maber kit ma lok pa lanebi moni bicobbe kwede, meno pe tyen lokke ni pe bicobbe. Watwero bedo ki gen ni Jehovah bikonyowa me niang gin ma myero wange i cawane kikome, kit ma en obedo ka timo kwede i kare mukato angec.—Amoc 3:7.

20. Lok pa lunebi mene me Baibul ma wabineno cobbegi cokcok-ki, dok ngo ma omyero wamedde ki timone?

²⁰ Lobe gibimiyo lok angeya ni, “kuc tye, piny okwe mot, gin mo marac pe.” (1 Tec. 5:3) I nge meno, gamente ma i wi lobo-ni gibilokke i kom dini goba, ci gijwero woko. (Yabo 17:16, 17) Ka dong, gibioto lweny i kom jo pa Lubanga. (Ejek. 38:18, 19) Jami magi aye bitugo lweny me agikki ma kilwongo ni Armagedon. (Yabo 16:14, 16) Watwero bedo ki gen matek ni jami magi bitimme macok cok-ki. Ka wawoto ki kuro kare meno, wamedde wunu ki nyuto pwocwa bot Wonwa me polo ki keto cwinywa me niang lok pa lunebi me Baibul kun bene wakonyo jo mukene me timo meno.