1. Pingo wabedo ki pwoc i kom jo ma gidiyo cwinygi?

 WAN ducu wamaro jo ma gidiyo cwinygi. Wabedo ki woro i kom jo ma gidiyo cwinygi ka gitye ka kuro gin mo dok cwinygi pe tur. Wabedo ki pwoc madwong ka jo mukene gidiyo cwinygi i komwa ka watimo bal. Dok cwinywa yom ni lapwonywa me Baibul odiyo cwinye i komwa i kare ma watye ka tute me pwonyo, jolo, kacel ki keto i tic pwony me Baibul. Ma dong pire tek loyo ducu, watye ki pwoc madwong adada ni Lubangawa Jehovah diyo cwinye i komwa!—Rom. 2:4   .

2. I kare mene ma watwero nongo ni tek me diyo cwinywa?

² Kadi bed wamaro jo ma gidiyo cwinygi, wan kikomwa watwero nongo ni tek adada me bedo jo ma gidiyo cwinygi kare ducu. Me labolle, watwero nongo ni tek me bedo ma komwa opye mot ka warye i lain i beng, tutwalle ka watye ka rune me cito ka mo. Kiniga twero makowa ka jo mukene gucwero cwinywa. Dok i kare mogo, waromo nongo ni tek me medde ki kuro lobo manyen ma Jehovah ociko pire-ni. Tika imito bedo ngat ma diyo cwinye? I pwony man, wabinyamo kit ma watwero nyuto kwede ni wabedo jo ma diyo cwinygi kacel ki pingo timo meno pire tek adada. Wabinyamo bene gin ma twero konyowa me bedo jo ma diyo cwinygi kare ducu.

3. Gin ango ma ngat ma diyo cwinye timo ka jo mukene gucwero cwinye?

³ Nen kong yo angwen mapatpat ma watwero nyuto kwede ni wadiyo cwinywa. Mukwongo, ngat ma diyo cwinye kiniga  pe mako oyotoyot. Ka jo mukene gutimo gin mo me cwero cwinye, en bedo ma kome opye mot, dok pe culo wang gin marac ma kitimo i kome. En pe tero jo mukene i yo marac kadi bed par odiye. Lok man ni ‘kiniga pe mako oyot’ kiloko iye pi tyen mukwongo i Baibul i kare ma Baibul oloko i kom Jehovah ni obedo “Lubanga ma lakica dok maro dano, kiniga pe make oyot, marre ma pe lokke dwong, en lagen mada.”—Nia 34:6.

4. Ngat ma diyo cwinye dok iye nining ka mitte ni okur gin mo?

⁴ Me aryo, ngat ma diyo cwinye bedo ma kome opye mot ka tye ka kuro gin mo. Ka gin moni ogalle mukato kare ma onongo en obyeko, ngat ma kit meno tute pe me keco. (Latit. 7:8) Tye jami mapol ma mito ni wadi iye cwinywa. Me labolle, mitte ni wadi cwinywa ka ngat moni tye ka lok kwedwa kun pe wangolo doge. (Yubu 36:2) Mitte ni wadi cwinywa ka watye ka konyo latin kwanwa me niang pwony mo me Baibul nyo me loyo kit mo marac ma orwako lwite i kwone.   

5. Tit kong yo mukene ma watwero nyuto kwede ni wadiyo cwinywa.

⁵ Me adek, ngat ma diyo cwinye pe timo jami oyotoyot labongo tam iye. Ngene kene ni, i cawa mukene mitte ni watim jami oyotoyot. Ento, ka ngat ma diyo cwinye tye ki tic mo ma pire tek me atima, en pe rune ka cakone nyo me tyekone. Me ka meno, en miyo kare muromo me goyo pulan pi gin ma ebitimo. I nge meno, en tero kare muromo me cobo tic man maber.

6. Ngat ma diyo cwinye dok iye nining ka tye ka kato ki i pekki?

⁶ Me angwen, ngat ma diyo cwinye kanyo pekkine labongo bedo ka nguru. I yo man, diyo cwiny kubbe macok adada ki ciro can. Ngene kene ni, pe rac me tito ki laremi mo  macok kit ma iwinyo kwede i kom peko ma itye ka kato ki iye. Ento, ngat ma diyo cwinye bene tamo i kom jami mabeco ma tye i kwone, dok bitute matek me medde ki tic pi Jehovah ki yomcwiny. (Kol. 1:11) Mitte ni jo pa Jehovah gunyut ni gidiyo cwinygi i yo angwen magi ducu. Pingo? Kong wanyamu tyen lok mogo manok.

7. Ma lubbe ki Yakobo 5:7, 8, pingo diyo cwiny pire tek adada? (Nen bene cal.)

⁷ Mitte ni wabed jo ma gidiyo cwinygi wek wanong kwo ma pe tum. Calo lutic pa Lubanga ma lugen me kare macon, mitte ni wadi cwinywa ka wakuro cobbe pa cikke pa Lubanga. (Ibru 6:11, 12) Baibul oporowa ki lupur. (Kwan Yakobo 5:7, 8.) Lapur tiyo matek me pito ki onyo pii i te kodine, ento en pe ngeyo awene ma kodi meno bitwi iye. Pi meno, lapur diyo cwinye kun geno ni ebikayo camme. I yo acel-lu, wan bene watute matek me bedo lulub kor Yecu, kadi bed ‘pe wangeyo nino ma Rwotwa bibino iye.’ (Mat. 24:42) Wadiyo cwinywa ki gen ni i kare ma en oyubo, Jehovah bicobo cikkene ducu. Ka waol woko ki diyo cwinywa, ci waromo cako a woko ki bot Jehovah motmot. Waromo cako keto cwinywa i kom jami ma wangeyo ni bikeliwa yomcwiny kombeddi. Ento ka wabedo jo ma gidiyo cwinygi, watwero ciro nio wa i agikki wek kilarwa.—Mika 7:7; Mat. 24:13.

8. Diyo cwiny konyowa nining me bedo ki wat maber ki jo mukene? (Jo Kolocai 3:12, 13)

⁸ Diyo cwiny konyowa me bedo ki wat maber ki jo mukene. Konyowa me winyo lok mot ka jo mukene gitye ka lok. (Yak. 1:19) Diyo cwiny bene konyowa me bedo ki kuc ki jo mukene. Ka wadiyo cwinywa, ci kadi bed watye ki par madwong, pe wabirune ka gamo lok kun wawaco gin ma cwero cwiny jo mukene. Dok ka wabedo jo ma diyo cwinygi, kiniga pe bimakowa oyotoyot ka ce ngat mo owango iwa. Me ka culo wang gin marac ki marac, ‘wabidiyo cwinywa kekenwa, kun watimo kica ki luwotwa i kinwa kekenwa pi balwa.’—Kwan Jo Kolocai 3:12, 13.

9. Diyo cwiny konyowa nining ka wamito moko tam? (Carolok 21:5)

⁹ Diyo cwiny bene konyowa me moko tam mabeco. Me ka rune me timo jami labongo tam, wabikwanyo kare me timo kwed kun wangiyo jami ducu ma omyero wayer kore ki kore. (Kwan Carolok 21:5.) Me labolle, ka watye ka yenyo tic, watwero bedo ki miti me ye tic mukwongo ma wanongo, kadi bed tic meno bibalo yubwa me woro Jehovah. Ento ka wadiyo cwinywa, wabikwanyo kare me ngiyo jami calo kabedo ma ticci tye iye, cawa ma myero wati, ki kit ma tic man bigudo kwede watwa ki lupacowa kacel ki Jehovah. Ka wadiyo cwinywa, ci watwero gwokke ki moko tam marac.

10. Lakricitayo twero dongo kun bene medde ki nyuto kit me diyo cwiny nining?

¹⁰ Leg pi diyo cwiny. Diyo cwiny obedo but nyig ma nyak pi cwiny maleng. (Gal. 5:22, 23) Watwero lega pi cwiny maleng kun wapenyo Jehovah ni okonywa me dongo nyig ma nyak pi cwiny maleng. Ka wakemme ki gin mo ma weko bedo tek botwa me diyo cwinywa, mitte ni ‘wamedde ki lega’ pi cwiny maleng wek okonywa me diyo cwinywa. (Luka 11:9, 13) Watwero bene penyo Jehovah ni okonywa me neno jami kit ma en neno kwede. I nge lega, mitte ni watute matek me diyo cwinywa nino ducu. Ka wamedde  ki lega pi diyo cwiny dok watute me nyutone, ci Jehovah bikonyowa me dongo kit man, kadi bed yam pe wabedo jo ma gidiyo cwinygi.

11-12. Jehovah onyuto nining ni ediyo cwinye?

¹¹ Lwod lok i kom labol ma i Baibul. Baibul tye ki labol pa jo mapol ma gudiyo cwinygi. Ka walwodo lok i kom labol magi, ci watwero pwonyo yo mapatpat me diyo cwiny. Ma peya wanyamo labol magi, kong wanenu labol maber loyo me diyo cwiny—Jehovah.   

¹² I poto me Eden, Catan obalo nying Jehovah kun tute wek Kawa obed ki akalakala ka ce Jehovah obedo Laloc ma lamar. Me ka jwero labal nying meno cutcut, Jehovah odiyo cwinye dok ojukke kekene, pien onongo ngeyo ni kare bimitte me nyuto ni Yone me loc aye ber loyo. Dok ka en woto ki kuro kare meno, en tye ka kanyo lok goba ducu ma dano giwaco i kom nyinge. Medo i kom meno, Jehovah tye ka diyo cwinye wek omi kare ki dano me nongo kwo ma pe tum. (2 Pet. 3:9, 15) Macalo adwogine, dano milion mapol dong gingeyo Jehovah. Ka waketo cwinywa i kom adwogi mabeco ma bino pi diyo cwiny pa Jehovah, ci bibedo yot botwa me kuro kare ma en bikelo iye agikki.   

13. I yo ma nining ma Yecu olubo kwede lanen me diyo cwiny pa Wonne kore ki kore? (Nen bene cal.)

¹³ Yecu olubo lanen me diyo cwiny pa Wonne kore ki kore dok en onyuto kit man i kare ma tye i lobo. Nen calo pe obedo yot bote me diyo cwinye kare ducu, tutwalle i kom Luparicayo ki lupwony cik ma lugoba-ni. (Jon 8:25-27) Ento calo Wonne, Yecu bene onongo kiniga pe mako oyotoyot. I kare ma dano  guyete, en pe oyetogi. (1 Pet. 2:23) Yecu odiyo cwinye kun ciro can labongo nguru. Dong pe tye me ur ni Baibul tittiwa ni ‘wabed ka tam i kome, ki kit ma en ociro kwede adagadaga marac twatwal ki bot lubalo!’ (Ibru 12:2, 3) Ki kony pa Jehovah, wan bene watwero diyo cwinywa kun waciro kit peko mo keken ma bino i kwowa.

14. Pwony ango ma wanongo ki i diyo cwiny pa Abraim? (Jo Ibru 6:15) (Nen bene cal.)

¹⁴ Jo mogo i kinwa onongo gitye ki gen ni agikki piny bibino mwaki mogo mukato angec, dok kombeddi gitye ki par ni gibito woko ma peya agikki obino. Gin ango ma twero konyogi me medde ki diyo cwinygi? Nen kong labol pa Abraim. I kare ma Abraim tye ki mwaka 75 ma latinne mo pud pe, Jehovah ocikke bote ni: “Abimiyi idoko rok madit.” (Acak. 12:1-4) Tika Abraim oneno cobbe pa cikke meno? En oneno bute mogo ento pe ducu. I nge ngolo Kulu me Euprate ki dok kuro pi mwaki 25, Abraim oneno ka kinywalo wode Icaka, dok i nge mwaki 60 mukene, kinywalo likwayone Ecau ki Yakobo. (Kwan Jo Ibru 6:15.) Ento Abraim pe oneno ka likwayone ginya gidoko rok madit dok gileyo Lobo ma Kiciko Pire-ni. Kadi bed kit meno, laco ma lagen-ni obedo ki wat macok ki Lacwec. (Yak. 2:23) Dok i kare ma kibicero Abraim, en bibedo ki yomcwiny me ngeyo ni, pi niyene ki diyo cwinye, rok ducu ma i lobo-ni gunongo mot! (Acak. 22:18) Pwony ango ma wanongo? Oromo bedo ni pe wabineno cobbe pa cikke pa Jehovah mogo i kare-ni. Ento ka wadiyo cwinywa calo Abraim, watwero bedo ki gen matek ni Jehovah biminiwa mot i kare-ni ki dong i lobo manyen ma en ociko pire.—Mar. 10:29, 30.

15. Gin ango ma watwero timo kwed iye i kare me kwan piwa kenwa?

 ¹⁵ Baibul tye ki labol mapol pa jo ma gudiyo cwinygi. (Yak. 5:10) Pingo pe iket macalo yubbi me timo kwed i kom labol pa jo magi? b Me labolle, kadi bed Daudi onongo tidi adada i kare ma kiwire me doko kabaka me Icrael, onongo mitte ni en okur pi mwaki mapol ma peya obedo i wi komker. Cimeon ki Anna gutiyo pi Jehovah ki gen i kare ma gubedo ka kuro bino pa Meciya ma kiciko pire-ni. (Luka 2:25, 36-38) Ka iwoto ki kwano labol magi, yeny lagam pi lapeny magi: Gin ango ma romo bedo ni okonyo ngat meno me diyo cwinye? En onongo adwogi mabeco ango pi diyo cwinye? Atwero lubo lanenne nining? Itwero bene nongo adwogi maber ki i kwano lok i kom jo ma pe gudiyo cwinygi. (1 Cam. 13:8-14) Itwero pennye kekeni ni: ‘Ngo ma nen calo oweko pe gudiyo cwinygi? Peko ango ma gukato ki iye pien pe gudiyo cwinygi?’

16. Adwogi mabeco ango ma bino pi diyo cwiny?

¹⁶ Tam i kom adwogi mabeco ma bino pi diyo cwiny. Ka wabedo jo ma diyo cwinygi, wabedo ki yomcwiny dok ma wiwa opye mot. Pi meno, diyo cwiny twero weko komwa bedo yot. Ka wadiyo cwinywa i kom jo mukene, ci wabedo ki wat maber kwedgi. Dano me kacokkewa gibedo ma guribbe. Ka ngat mo owango iwa, ento wadiyo kinigawa, ci man konyo weko peko meno pe medde. (Jab. 37:8; Car. 14:29) Ento ma dong pire tek loyo, ka wadiyo cwinywa, walubo lanen pa Wonwa me polo dok wanyikke cok kwede.

17. Gin ango ma omyero wamok tamwa me timone?

¹⁷ Diyo cwiny obedo kit mamwonya adada ma konyo wan ducu! Kadi bed i kare mogo pe wanongo ni yot me diyo cwinywa, ki kony pa Jehovah, watwero medde ki dongo kit man. Dok ka wadiyo cwinywa kun wakuro lobo manyen, watwero bedo ki tekcwiny ni ‘wang Jehovah neno jo ma giwore, jo ma gitye ka kuro mar mere ma pe lokke.’ (Jab. 33:18) Dong, omyero wamoku tamwa me medde ki diyo cwinywa.