Cik man tutwalle tye me moko ni dako-ni balle pe. Nen kong lok ma i tyeng mogo murumo tyeng man.

Tyeng mogo ma Nwoyo Cik 22:25-27 olubo, loko i kom laco ma oromo ki dako mo ma gitongo keny i kome ci obuto kwede “i dye gang”. Pi meno, laco-ni bedo ki bal me tim abor, pien dako ma gitongo keny i kome kineno macalo ngat ma onyomme woko. Dako-ni kono? ‘En pe ogoyo oduru kadi onongo tye i dye gang.’ Ka onongo en go oduru, onongo kono jo mukene gubino gularre. Ento en pe ogoyo oduru. Pi meno, en bene onywako i tim abor meno, oweko gin aryo ducu onongo gibedo lubal.​—Nwo. 22:23, 24.

Cik dok onyuto bal ma kit meno mutimme ka mapat: “Ka laco mo orwatte ki nyako mo ma gitongo keny i kome i dye tim ce omake tektek obuto kwede, ci laco ma obutu kwede-ni aye bito. Pe wubitimo gin mo i kom nyako, pien en pe ki bal mo ma romo keto can me to i kome. Lok man rom ki pa laco mo ma olwenyo i kom lawote ci oneke woko. Laco-nu obino i kom nyako-nu i dye tim ci kadi bed en ogoyo oduru nongo ngat mo pe kunnu ma lare.”​—Nwo. 22:25-27.

Pi meno, lungolkop giye lok pa dako-ni. Pingo? Pien lungolkop gitamo ni en ‘ogoyo oduru ento onongo ngat mo pe kunnu me larre.’ Dong en nongo pe otimo abor. Ento laco man nongo tye ki bal me abor pien ‘omako tektek dok obuto’ ki nyako ma kitongo keny i kome.

Kadi bed cik man tito ni dako-ni balle pe, tyeng magi giloko tutwalle i kom bal pa laco-ni me mako dako-ni tektek kun timo abor. Watwero bedo ki gen ni lungolkop onongo ‘gipenyo lokke kun giyenyo tere motmot’ ci gikatti ki ngol ma rwatte ki lok pa Lubanga ma tye ka maleng dok kinwoyo teretere.​—Nwo. 13:14; 17:4; Nia 20:14.