I kare ma onongo Yecu tye i polo, en opwonyo kit mogo ma oweko en obedo ngat ma tiyo maber ki jo mukene. Dong i kare ma en tye i lobo, en obedo lanen maber me tic ki jo mukene. Adwogi maber ango ma watwero nongo ki i lanen pa Yecu? Ka wangiyo lanen pa Yecu i yo matut, watwero nongo cik ma igi lac adek ma romo konyowa me tic maber ki jo mukene. Cik ma igi lac magi bikonyowa me bedo ma wanote ki omegiwa.

Ngat ma tiyo maber ki jo mukene nongo mwol. En tero lutic luwote ni pigi tek dok pe temme me ywayo tamgi i kome. Yecu opwonyo cwiny me mwolo ma kit meno ki bot Wonne. Kadi bed Jehovah keken aye opore me alwonga ni Lacwec, en onongo mito ni dano gunge pi tic ma pire tek ma Wode otimo. Waniang meno ki i gin ma Lubanga owaco, ni: “Weku wacweyu dano ma gical ki wan.” (Acak. 1:26) I kare ma Jehovah owaco lok meno, Yecu oniang ni Jehovah mwol adada.—Jab. 18:35.

I kare ma Yecu tye i lobo, en bene onyuto mwolo ma kit meno. I kare ma dano gupake pi tic ma en otimo, en odwoko pak meno bot Ngat ma myero onong, Lubanga. (Mar. 10:17, 18; Jon 7:15, 16) Yecu otiyo matek me bedo ki kuc ki lupwonnyene dok oterogi calo  lureme, ento pe calo opii. (Jon 15:15) En olwoko wa tyengi me pwonyogi me bedo mwol. (Jon 13:5, 12-14) Calo Yecu, omyero wami deyo bot lutic luwotwa me ka keto mitiwa me bedo mukwongo. Watwero cobo tic mapol ka ‘wamiyo deyo bot luwotwa’ dok pe wabedo ki miti ni kibed ka pakowa kare ducu.—Rom. 12:10.

Ngat ma mwol bene niang ni “yub ma giyubo ma kong gipenyo tam bot jo mapol cobbe kakare.” (Car. 15:22) Labongo paro pi ngec nyo diro ma watye kwede, wiwa myero opo ni pe tye dano mo ma ngeyo jami ducu. Kadi wa Yecu bene oye ni tye jami mogo ma onongo en pe ngeyo. (Mat. 24:36) Medo i kom meno, en onongo mito ngeyo tam pa lupwonnyene ma gitye ki roc-ci. (Mat. 16:13-16) Meno aye mumiyo lutic luwote onongo gibedo agonya ka gitye kacel kwede! I yo acel-lu, ka wamwol dok wiwa po ni pe wangeyo jami ducu, kun bene wawinyo tam pa jo mukene, wabimedo kuc ma tye i kinwa dok yubwa ‘bicobbe kakare.’

Pire tek adada pi luelda me lubo lanen me mwolo pa Yecu ka gitiyo kacel ki luwotgi. Wigi myero opo ni cwiny maleng twero konyo laelda mo keken i kingi me loko gin mo ma twero konyo luelda ducu me moko tam ma atir. I kare ma nongo luelda gitye i cokkegi, ka giyelle me neno ni ngat acel acel tye agonya me miyo tamme, ci kacel gibimoko tam ma bikonyo kacokke kulu.

Ngat ma tiyo maber ki jo mukene nyuto niango i kit ma en tero kwede luwote. En pe moko i kom tamme keken dok ye timo alokaloka. Yecu obedo ki kare mapol me neno ka Wonne nyuto niango. Me labolle, Jehovah ocwale me to pi laro dano ki i to ma gupore pire-ni.—Jon 3:16.

Yecu otimo alokaloka ka onongo mitte nyo pore. Wi opo i kom kit ma en okonyo kwede dako mo ma Lakanaan, kadi bed onongo giore bot Luicrael keken. (Mat. 15:22-28) En bene onyuto niango i kom gin ma onongo mito ki bot lulub kore. I kare ma lareme macok Petero okwere i dye lwak, Yecu onongo tye atera me timme kica. Lacen, en omiyo tic ma pire tek bot Petero. (Luka 22:32; Jon 21:17; Tic 2:14; 8:14-17; 10:44, 45) Lanen pa Yecu nyutiwa ka maleng ni omyero ‘wawek jo ducu gunge niango ma  watye kwede’ kun pe wamoko i tamwa keken.—Pil. 4:5.

Bedo ki niango bene bikonyowa me timo alokaloka wek wati maber ki dano mapatpat. Yecu otero jo ma i ka ngete maber adada mumiyo lukworre ma lunyeko-ni gumoro adot i kome ni en “larem lujog-mucoro ki lubalo” ma gujolo pwonye. (Mat. 11:19) Tika watwero bedo calo Yecu, kun watiyo maber ki jo ma gipat kwedwa? Louis, omego mo ma otiyo ki dano mapol mapatpat macalo laneno me adwol ki dok i Betel, owaco ni: “Tic kacel ki jo mukene ma gitye ki roc bedo calo cweyo kor ot kun itiyo ki godi mapatpat. Kit macalo godi magi patpat, tute matek mitte, ento kor ot meno twero bedo atir. An bene atute me timo alokaloka me tic ki jo mukene ki kuc, wek wacob tic ma tye.” Meno pud dong obedo cwiny maber ya!

Awene ma watwero nyuto kwede niango bot jo ma i kacokkewa? Watye ki kare me timo meno ka watiyo kacel ki gurupwa me tito kwena. Waromo tic kacel ki lutit kwena ma tic ma tye i wigi madok i kom kwo me otgi pat ki mewa nyo mwakagi pat. Tika watwero timo alokaloka ma mitte nyo nywako i yo me tito kwena ma gimaro wek gunong yomcwiny?

Ngat ma tiyo maber ki jo mukene tye atera me “miyo mot.” (1 Tem. 6:18) I kare ma onongo gitye ka tic kacel ki Wonne, Yecu nen calo oniang ni Jehovah pe kano jami ki bote. I kare ma Jehovah “oketo polo,” Yecu ‘onongo tye’ dok onongo twero nongo pwony ki bote. (Car. 8:27) Lacen, Yecu kikome onywako ‘gin ducu ma yam owinyo ki bot Wonne’ kacel ki lulub kore. (Jon 15:15) Watwero lubo lanen pa Jehovah ka wanywako ki lutic luwotwa ngec ki diro ma wapwonyo. Ngat ma tiyo maber ki luwote pe temme me loyogi kun mungu ki botgi gin ma myero gunge nyo ma twero konyogi. Cwinye bedo yom me miyo ki jo mukene ngec ma en opwonyo.

Watwero bene miyo cuko cwiny ki lutic luwotwa. Ka ngat mo oneno tutewa dok opwoyo ki cwinye ducu, tika wan pe wawinyo maber? Yecu okwanyo kare me tito bot lutic luwote jami mabeco ma en oneno gitye ka timone. (Por ki Matayo 25:19-23; Luka 10:17-20.) En bene owaccigi ni ‘gibitiyo tic madito makato’ ma en otimo. (Jon 14:12) I dyewor ma en peya oto, en opwoyo lukwenane ma lugen kun waco ni: “Wun aye jo ma yam wubedo ka ngeta jwijwi i kare ducu ma yam gibedo ka tema.” (Luka 22:28) Tam kong i kom kit ma lokke nen calo ocuko cwinygi dok otugo mitigi me tiyo tic! Ka wan bene wakwanyo kare me pwoyo lutic luwotwa, cwinygi bibedo yom dok gibicobo tic mapol.

Omego mo ma nyinge Kayode owaco ni, “Ngat ma tiyo maber ki jo mukene pe mitte ni obed labongo roc, ento en weko jo mukene cwinygi bedo yom dok weko tic bedo yot pigi.” Tika in ibedo ngat ma tiyo ki jo mukene i yo meno? Gwok nyo itwero penyo omegini ki lumegini kodi latic ango ma gitamo ni in ibedo. Ka gimaro tic kwedi, kit macalo lupwonnye pa Yecu onongo gimaro tic kwede, ci itwero waco calo lakwena Paulo ni: “Watiyo kwedwu kacel wek wubed ki yomcwiny.”—2 Kor. 1:24.