Kinywala i mwaka 1927 i taun mo matidi macok ki Chicago, Illinois, i lobo Amerika. Lunywalla gubedo ki lutino abic—Jetha, Don, an, Karl, ki Joy. Wan ducu wamoko tamwa me tic pi Jehovah ki cwinywa ducu. Lamera Jetha ocito i kilaci me aryo me Gilead i mwaka 1943. Don ocito ka tic i Betel ma i Brooklyn, New York i mwaka 1944. Karl ocito i Betel i mwaka 1947, dok Joy ocito i mwaka 1951. Lanen maber pa lunyodona, kacel ki omegina ki lumegina ocuko cwinya me tic matek pi Jehovah.

Lunyodowa onongo gubedo jo ma kwano Baibul dok gimaro Lubanga dok gupwonyo wan lutinogi me maro Lubanga bene. Ento, Babawa orwenyo worone pi dini i nge tic macalo lamony i Ulaya i kare me Lweny me Acel me Wi Lobo. Mama obedo ki pwoc madit bot Lubanga ni Baba odwogo cen paco ma kwo, mumiyo en owacce ni: “William, wacit ka lega kit ma onongo con watimo kwede.” Ento Baba ogamo ni: “Abilwoki me cito kunnu, ento pe abidonyo i ot lega.” Mama openye ni: “Pingo?” En ogamo ni: “I kare ma onongo atye i lweny, lutela dini ma gitye i dini acel, ento gia ki i lobe mapatpat gubedo ka goyo gum i kom lumonygi kacel ki jami lwenygi! Tika onongo Lubanga tye ka cwako gurup pa lumony magi ducu?”

Lacen, i kare mo ma Mama onongo tye i kanica, co aryo ma gitye Lucaden pa Jehovah gubino i pacowa. Gumiyo ki Babana bukke aryo ma kilwongo ni Light, ma onongo nyamo buk me Niyabo dok kitiyo kwede me kwano Baibul. Babana onyuto miti dok ogamo bukke magi. I kare ma Mama oneno bukke magi, en ocako kwanogi cutcut. Ci i nino mo, en oneno lok angeya i gajeti akwana ma tye ka lwongo jo ma gitye ki miti me cito ka kwano Baibul kun gitiyo ki bukke me Light. En omoko tamme me cito. I kare ma en oo kunnu, mego mo muteggi oyabo doggola. Mama onyutte buk acel me Light ci openyo ni, “Tika wukwano buk man kany?” Mego-ni ogamo ni: “Ada, nyara, dony.” I cabit ma lubo, Mama otero wan lutino ducu kacel kwede, dok i ngeye wabedo ka cito i cabit ducu.

I cokke mo acel, lador cokke openya ni akwan Jabuli 144:​15, ma waco ni jo ducu ma giworo Jehovah cwinygi yom. Wang ginacoya meno ogudo cwinya, kacel ki tyeng aryo mukene—1 Temceo 1:11 (NWT), ma tito ni Jehovah obedo  “Lubanga ma layomcwiny,” ki Jo Epeco 5:​1, ma cuko cwinywa me ‘lubo kit pa Lubanga.’ Aniang ni myero abed ki yomcwiny me tic pi Lacwec dok omyero apwoye pi mot meno. Meno aye jami aryo ma abedo ka tute me timogi i kare me kwona ducu.

Kacokke macok loyo onongo tye kilomita ma romo 32 (mairo 20) mabor kwedwa i Chicago. Kadi bed kit meno, onongo wacito, dok ngecca i kom Baibul omedde matek. Wiya po ni i nino mo lador cokke ocimo Jetha me miyo lagam. I kare ma awinyo lagamme, atamo ni: ‘Onongo angeyo lagam meno. Kono onongo ailo cinga kono amiyo lagam.’ Acako yubbe pi cokke kacel ki miyo lagam kun atiyo ki nyig lok ma mega. Ma dong pire tek loyo, calo omegina aryo ki lumegina, an bene adongo wat macok ki Jehovah. Anongo batija i mwaka 1941.

Wiya pud po pi gure madit ma wabedo iye i Cleveland, Ohio i mwaka 1942. Jo me pacowa kacel ki utmege gubedo i kema mapatpat ma onongo kiketogi cok ki ka gure madit man. Omege ki lumege ma i boma makato 50 kulu i lobo Amerika kikubogi ki cim. Lweny me Aryo me Wi Lobo onongo pud tye ka medde dok tim gero i kom Lucaden pa Jehovah onongo tye ka medde ameda. I otyeno, aneno omege ma gucibo mutokagi kun mac mutokagi okemo ka mapatpat. Gin weng onongo gumoko ni omego mo olo myero obed i mutoka acel acel wek gutii macalo acikari i dyewor. Ka onongo guneno ngat mo ma mito kelo ayela, ci omege magi onongo gibimenyo mac mutoka wek oum wang ngat meno dok gin weng onongo gibigoyo titit pa mutoka. Ci man onongo biweko omege mukene giringo ka konyogi. Man oweko atamo ni, ‘Jo pa Jehovah gitye ma guyubbe adada pi jami ducu!’ Pe tye gin mo marac ma otimme. Dok man oweko anino maber adada.

I kare-ni, ka atamo i kom gure madit meno, wiya po i kom kit ma Mama onongo pe ki lworo mo dok obedo agonya i kare me gure man. En onongo geno Jehovah kacel ki dulle ki cwinye ducu. Wiya pe biwil kulu i kom lanenne man.

Ma peya gure madit meno otimme, Mama onongo ocako tic macalo painia marii. Pi meno, i kare me gure madit man, en oketo cwinye i kom pwony ma kimiyo ma loko tutwalle i kom tic pi kare malac. I kare ma watye ka dok gang, en owaco ni, “Amito medde ki tic macalo painia, ento pe atwero timo meno kun agwoko ganga maber.” En openyowa ka watwero konye. Waye ni wabikonnye, pi meno en opoko botwa tic me dunyu ot nino ducu ma nongo peya wamato cayi odiko. Ka dong wacito i gang kwan odiko, Mama onongo roto kor ticwa me neno ka ot tye maleng ci en bene cito i ticce me pwony. Mama onongo tye ki tic mapol, ento en pud ogwokowa maber. Ka onongo wadwogo ki i gang kwan ka camo cam me dyeceng dok ka wadwogo otyeno, Mama kare ducu nongo tye ka kurowa. I otyeno mogo ka wadwogo ki i gang kwan, onongo mama terowa i tic me pwony dok man okonyowa me niang gin ma bedo painia kwako.

Acako tic macalo painia ma atye ki mwaka 16. Kadi bed Babana onongo peya odoko Lacaden, en onongo tye ki miti madwong me niang kit ma ticca me tito kwena tye ka wot kwede. I otyeno mo acel, atitte ni kadi bed dong atute matek, pud peya anongo ngat mo ma mito kwano  Baibul. Ci ma aling manok, apenye ni, “Tika aromo cako kwano Baibul kwedi?” En bene oling manok, ci ogamo ni, “Pe aneno tyen lok mo ma genga kwano Baibul.” Pi meno, latin kwanna me Baibul mukwongo obedo Babana. Meno onongo obedo twon mot madit adada!

Onongo watiyo ki buk me “The Truth Shall Make You Free,” me kwano Baibul. I nge kare mo, aniang ni Baba onongo kara tye ka konya me dongo dirona me kwan kacel ki pwonyo jo mukene lok me Baibul. Me labolle, i otyeno mo acel i nge kwano paragraf, Baba openya ni: “Aniang gin ma buk gire tye ka wacone. Ento atwero moko nining ni gin ma buk man waco tye ada?” Onongo pe ayubbe me gamo lapeny meno, pi meno awacce ni, “Pe atwero moko boti kombeddi, ento i nino mukene ka watye ka kwan ci abimini lagamme.” Dok atimo meno. Anongo wang Ginacoya mapatpat ma moko lok ma onongo wabedo ka nyamone-ni. Meno okonya me pwonyo kit me timo kwed ki yubbe maber pi kwanwa. Man okonyo an ki Babana me dongo i yo me cwiny. En oketo i tic jami ma opwonyo dok onongo batija i mwaka 1952.

Acako bedo pira kena ma atye ki mwaka 17. I kare meno, lamera Jetha a ocako tic macalo lamiconari, dok omera Don, ocito ka tic i Betel. Gin aryo ducu onongo gimaro ticgi matek, dok man ocuko cwinya adada. Pi meno, apongo fom me cito i Betel ki me cito i Cukul me Gilead, ci aweko lokke i cing Jehovah. Adwogine obedo nining? Kilwonga me tic i Betel i mwaka 1946.

Pi mwaki mapol ma abedo kwede i Betel, anongo mot me tic mapatpat, dok man okonya me pwonyo diro mapol. Atiyo dong i Betel pi mwaki 75, dok i kare meno, apwonyo kit me yubo bukke kacel ki kit me gwoko rekod me cente ma dulwa tiyo kwede. Apwonyo kit me wilo jami ma mitte i Betel kacel ki kit me cwalo jami i lobe mapatpat. Ma dong pire tek loyo ducu, atye ka nongo mit pa pwonnye ma Betel miyo kun wok ki i woro me odiko kacel ki yub mapatpat.

Anongo pwonnye ki bot omera matidi ma nyinge Karl, ma obino i Betel i mwaka 1947. En onongo tye ki ngec madwong dok obedo lapwony me Baibul ma ladiro adada. Nino mo apenye ni okonya ki tam pi pwony mo ma onongo myero ami. Atito bot Karl ni atimo kwed dok anongo jami mapol ma atwero lok iye, ento atye ka nongo ni tek me tic kwedgi ducu. En openya lapeny acel ma okonya me niang gin ma omyero atim. En owaco ni, “Joel, wi lok me pwonyi tye ningo?” Aniang lokke cutcut. Onongo mitte ni ati ki jami ma kubbe ki pwony ma atye ka miyone keken dok pe mitte ni ati ki jami ducu ma akwedo. Wiya pe owil i kom kony meno ma Karl omina.

 Me nongo yomcwiny i Betel, pire tek ni wanywak i tic me pwony ki kerowa ducu. Dok jami ma timme i tic me pwony twero cuko cwinywa adada. Gin mo ma otimme ma wiya po iye maber obedo gin mutimme i otyeno mo acel i Bronx i boma me New York City. An kacel ki omego mo wadok cen ka limo dako mo ma onongo con ogamo magajin me Wi Lubele ki Awake! Wanyutte bote, ci wawacce ni, “I otyeno man, watye ka konyo dano me pwonyo ki i Baibul jami ma twero cuko cwinygi.” Ci dako meno owaco ni, “Ka wutye ka loko lok me Baibul, ci wudony i ot.” Wakwano dok wanyamo wang Baibul mapol ma loko i kom Ker pa Lubanga kacel ki lobo manyen ma bibino i anyim. Lok meno ogudo cwinye matek, pien i cabit ma lubo, en olwongo lureme mapol me bino ka winyo lokwa. Lacen, dako-ni kacel ki cware gudoko Lucaden pa Jehovah ma lugen.

Onongo dong abedo ka yenyo ngat me anyoma pi mwaki 10 i kare ma arwatte ki lamego ma lacen odoko dakona. Gin ango ma okonya me nongo dako maber? Alego bot Jehovah ci atamo matut i kom gin ma an kacel ki dakona wamito timone i nge nyomme.

I nge gure madit me mwaka 1953 ma otimme i Yankee Stadium, arwatte ki lamego ma nyinge Mary Aniol. En ki lamera Jetha onongo gukwano kacel i kilaci me aryo me Gilead, dok Mary onongo tiyo kacel ki lamera macalo lumiconari. Ki mit kom madwong, Mary otitta pi ticce macalo lamiconari i cula nam ma tye i Caribbean kacel ki lutino kwan me Baibul ma en dong okwano kwedgi. Ma wamedde ki ngene i kinwa maber, waniang ni wan ducu watye ki yub acel me tic pi Jehovah pi kare malac. Mar i kinwa odongo matek, dok wanyomme i April mwaka 1955. I yo mapol, Mary onyuto ni ebedo mot mua ki bot Jehovah dok oweka lanen maber me aluba. Onongo cwinye yom me timo tic mo keken ma kimine. En onongo latic matek, paro pi jo mukene, dok kare ducu keto pi Ker-ri mukwongo. (Mat. 6:33) Watiyo tic me limo adwol pi mwaki adek, ci i mwaka 1958, kilwongowa me cito ka tic i Betel.

Apwonyo jami mapol ki bot Mary. Me labolle, i kare ma pud wanyomme anyoma, wamoko tamwa me bedo ka kwano Baibul kacel, kun wakwano tyeng ma romo 15 nino ducu. I nge kwano tyeng mogo manok, onongo wacung ci wanyamo kit ma watwero keto kwede tyeng magi i tic i kwowa. Mary pol kare onongo titta jami ma opwonyo ki i cukul me Gilead nyo i ticce macalo lamiconari. Jami ma apwonyo ki bote okonya me dongo dirona me miyo pwony ki me ngeyo kit me cuko cwiny lumege.—Car. 25:11.

Dakona me amara Mary oto i mwaka 2013. Ento atye ki miti madwong me nene i lobo manyen! Ka pud akuro kare meno, amoko tamma me medde ki nongo pwonnye kacel ki geno Jehovah ki cwinya ducu. (Car. 3:​5, 6) Anongo kwe cwiny kacel ki yomcwiny ka atamo i kom gin ma jo pa Jehovah gibitimone i lobo manyen. Meno bikwako pwonyo jami manyen i kom Lapwonywa Madit kacel ki nongo pwony ki bote! Ki lok ada, atye ki pwoc adada bote pi jami ducu ma opwonya kwede kacel ki kicane ma pe apore pire.