I nge mwaka 1920 ma peya gunyomme, lunyodona gupwonyo lok i kom Jehovah. Kinywala i acakki me mwaka 1939. I kare ma an pud awobi matidi onongo wabedo i England, onongo acito kacel ki lunyodona i cokke dok lacen adonyo i Cukul me Tiokraci. Wiya pud po i kom pwony mukwongo ma amiyo i cukul. Acung i wi bok wek abed bor ma atwero neno ka ma lami pwony keto Baibul iye. Onongo atye ki mwaka abicel dok lworo omaka matek ma abedo ka neno jo madongo ma gitye ka winyo pwonya.

Pi tic me pwony, babana ocona kit me cako lok i kad ma atwero tic kwede ka acito ka tito kwena. Onongo atye ki mwaka aboro tyen mukwongo ma acito kena i doggola pa ngat mo. Cwinya obedo yom adada i kare ma rwod ot okwano kada ci cutcut ogamo buk me “Let God Be True”! Aringo bot babana ka titte gin mutimme. Tic me pwony ki cokke onongo yomo cwinya adada dok odongo mitina me tic pi Jehovah pi kare malac.

Acako maro lok ada me Baibul matek i kare ma babana oculo pi Wi Lubele pira wek kibed ka cwala dwe ki dwe. Onongo akwano cutcut ka agamo ki i posta. Genna i kom Jehovah odongo dok man otugo cwinya me dyere bote.

An, babana ki mamana wacito macalo wele i Gure Madit ma wiye obedo ni, Theocracy’s Increase i boma me New York i mwaka 1950. I Ceng Angwen, nino dwe 3 me Agucito, wi lok me nino meno onongo tye ni “Nino pa Lumiconari.” I nino meno, Omego Carey Barber, ma lacen otiyo macalo lamemba me Lukiko Madit, omiyo pwony me  batija. I cawa ma en openyo jo ma gibinongo batija lapeny aryo-ni, aa malo ci awaco ni, “Ee!” Onongo atye ki mwaka 11 keken ento aniang ni amoko tam ma pire tek. Kadi bed kit meno, abedo ki lworo me donyo i pii pien onongo peya apwonyo kwang. Omin babana owoto kacel kweda wa i dog pii dok ocuko cwinya ni jami ducu bibedo maber. Ki lok ada, kibatija an oyotoyot ma tyena pe omedo ki gudo te pii. Omego acel otinga ci ocwala bot omego mukene ma oluta i pii ka dong kitinga kicwala woko. Nicakke i nino ma pire tek meno, Jehovah omedde ki weko yona bedo atir.

I kare ma atyeko cukul cinia, onongo atye ka mito tic macalo painia ento lupwonyena gucuko cwinya me cito i univaciti. Aye tamgi ci acito i univaciti; ento ma pe otero kare malac, aniang ni pe abitwero cung matek i ada kun ki tungcel aketo cwinya i kwanna. Pi meno, amoko tamma me a woko. Alego bot Jehovah i kom lok man dok acoyo waraga bot lupwonyena me tittigi ni abia woko, ci aa woko i agikki me mwaka mukwongo meno. Ki gen matek i kom Jehovah, acako tic macalo painia cutcut.

I Julai 1957, acako tic macalo painia i taun ma kilwongo ni Wellingborough. Apenyo omege ma i Betel me London ni gunonga omego mo ma lapainia mucwiny wek ati kacel kwede. Kicwala Omego Bert Vaisey dok en opwonya jami mapol. En onongo obedo latit kwena ma kome mit dok okonya me bedo ki yub maber me tito kwena. Kacokkewa onongo tye ki lumege abicel ma dong gutii kacel ki Omego Vaisey ki an. Yubbe pi cokke ducu ki dong nywako iye omina kare me dongo genna i kom Jehovah ki me tito pi niyena.

I nge bedo i buc pi kare manok pi kwero donyo i mony, arwatte ki lamego mo ma tye painia keken ma nyinge Barbara. Wanyomme i mwaka 1959, dok onongo watye atera me cito ka mo keken ma kicwalowa iye. I acakkine, kicwalowa i Lancashire ma tye i kin tung kupoto ceng ki tung kumalo me England. Ci i Januari 1961, kilwonga me cito i Cukul me Ticwa me Ker pi dwe acel i Betel me London. Ki ur madit, i nge tyeko kwan kicima me tic macalo laneno me adwol. Pi cabit aryo, anongo pwonnye ki bot laneno me adwol mo mucwiny i boma me Birmingham, dok kiye ni Barbara owot kacel kweda. I nge meno, wadok cen ka tic macalo laneno me adwol i Lancashire ki Cheshire.

I Agucito mwaka 1962 ma onongo watye i yweyo, wanongo waraga ma oa ki i jang gang kal. Onongo kicwalo botwa fom pi Cukul me Gilead! I nge lega iye, an ki Barbara wapongo fom man dok wadwoko cutcut bot jang gang kal kit ma gimito kwede. I nge dwe abic, wacito i Brooklyn, New York, pi kilaci me 38 me Gilead, dok kwan man otero dwe apar.

 I Cukul me Gilead wapwonyo jami mapol ki i Baibul, i kom dulwa, ki omege ki lumege ma i twok lobo-ni ducu. Onongo atye ki mwaka 24 dok dakona tye ki mwaka 23, pi meno wanongo pwony mapol ki bot lutino kwan mukene me kilaciwa. Nino ducu abedo ki mot me tic kacel ki Omego Fred Rusk, ma onongo tye i kin lupwonyewa. Pwony acel ma en onwoyo teretere aye ni omyero wami tira i yo mupore, nyo ni omyero wanen ni tira ma wamiyo jenge i kom Ginacoya. I kin jo ma gumiyowa pwony i kare me kwanwa onongo tye iye omege ma gitye ki ngec calo Nathan Knorr, Frederick Franz ki Karl Klein. Dok wanongo pwony mapol ki i lanen me mwolo pa Omego A.  H.  Macmillan, ma opwonyowa kit ma Jehovah okonyo kwede jone i kare ma kwo tek nicakke i mwaka 1914 me o i acakki me mwaka 1919!

I agikki me kwanwa, Omego Knorr owacciwa ni kibicwalo ka tic i lobo Burundi ma tye i Afrika. Wacito i laibrari me Betel ka ngiyo Yearbook wek wanen lutit kwena adi ma gitye ka tic i Burundi i kare meno. Ento wabedo ki ur madit me nongo ni pe tye latit kwena mo i lobo meno! Ada, onongo watye ka cito i wang tic mo ma peya kitito kwena iye, dok i lobo ma onongo pe wangeyo kulu. Lworo omakowa matek! Ento i nge lega, cwinywa opye.

I wang ticwa manyen-ni, jami ducu onongo pat adada ki gin ma wangiyo kwede​—kit ma pinye tye kwede, tekwarogi, ki lebgi. Onongo mitte ni wapwony leb French. Wabedo bene ki peko me nongo ot. I nge nino aryo ma wao, omego Harry Arnott, ma okwano kwedwa i kilaci acel me Gilead, olimowa i kare ma tye ka dok cen i wang ticce i lobo Zambia. En okonyowa me nongo ot, ma odoko gang mukwongo pi lumiconari. Ento ma pe orii, wacako nongo lyeto ki bot ludito pa gamente, ma onongo pe gingeyo gin mo keken i kom Lucaden pa Jehovah. Ma pud wacako nongo mit pa ticwa anonga, luloc guwacciwa ni pe watwero medde ki bedo i Burundi ka wape ki waraga me tic. Ki cwercwiny, waa woko ci wacito i lobo mukene, ma meno obedo Uganda.

Wabedo ki lworo me donyo i Uganda labongo waraga ma ye ni wabed i lobo man,  ento waketo genwa i kom Jehovah. Omego mo ma a ki i Canada ma onongo tye ka tito kwena i Uganda otito pekowa bot latic pa gamente ma neno lok i kom jo ma gitye ka donyo i Uganda, dok laco-ni oye ni wabed pi dwe mogo wang ma wanongo waraga man. Gin mutimme-ni onyuto ka maleng ni Jehovah tye ka konyowa.

Kwo i Uganda onongo pat adada ki kwo i Burundi. Tic me tito kwena onongo dong tye ka wot anyim i Uganda, kadi bed lutit kwena onongo tye 28 keken i lobo-ni kulu. Wanongo jo mapol ma giloko leb Muno i wang tic man. Ento waniang ni, wek wakony jo ma gunyuto miti me dongo i yo me cwiny, mitte ni wapwony olo leb acel ma kiloko i Uganda. Wacako tito kwena i Kampala, ka ma onongo kiloko iye Luganda, pi man wamoko tamwa me pwonyo leb meno. Otero mwaki mapol me cako loko maber, ento pwonyo Luganda okonyowa me cobo ticwa me pwony maber! Wacako niang maber gin ma lutino kwanwa me Baibul mito wek gudong i yo me cwiny. Gin bene gucako yabo cwinygi kun gititiwa kit ma giwinyo kwede i kom gin ma gupwonyo.

Wabedo ki yomcwiny madit me konyo dano me pwonyo ada. Dok yomcwinywa omedde matek i kare ma kipenyowa me tiyo tic me limo adwol pi lobo Uganda kulu. I te tela pa jang gang kal me Kenya, wacito i safari i kabedo mapol i Uganda ka yenyo ka ma painia keken mitte iye. Tyen mapol dano ma onongo peya gurwatte ki Lucaden aye gugwokowa. Gujolowa i paccigi, guweko wabedo agonya, dok gutedo dek piwa.

I nge meno, wacito dok i safari mukene. Ki Kampala, awoto ki gar pi nino aryo wa i Mombasa ci dok amedde ki meli wa i cula nam me Seychelles, ma tye i nam me Indian Ocean. Lacen, cakke i mwaka 1965 me o 1972, Barbara obedo ka wot kacel kweda me limo Seychelles. I acakkine, onongo tye lutit kwena 2 keken kunnu, ento i ngeye gudoko gurup ka dok lacen kacokke madit. I safari mukene ma wacito iye, walimo omege ma i lobo Eritrea, Ethiopia, ki Sudan.

Rucurucu ocakke i Uganda i kare ma mony oturo gamente woko. Mwaki ma lubo meno obedo rac adada dok opwonya ni pire tek me lubo cik me Baibul ma wacci, “Wudwok jami pa Cecar bot Cecar.” (Mar. 12:17) I kare mo, kimiyo cik ni dano ducu ma pe gubedo anywali me Uganda myero gucone i polic citecen macok kwedgi. Walubo cik meno cutcut. Nino manok i nge meno, ma watye ka dwoyo mutoka i dye Kampala, abili ma pe guruko unifom gujukka kacel ki lamiconari mukene. Lworo omakowa matek! Gukok i komwa ni wabedo jo ma gimito turo gamente dok guterowa i polic citecen madit ka ma wan watito ni wabedo mere lumiconari ma gimaro kuc. Watito botgi ni wan dong watyeko cone woko ki abili ento pe guye lokwa. Kimakowa dok kiterowa i polic citecen macok ki gang pa lumiconari. Cwinywa obedo yom adada i cawa ma abili ma kunnu ma onongo ocoyowa-ni oniang i komwa ci owaco ni kigonywa woko!

I kare meno, onongo wabedo ki lworo matek ka wao i rodbulok ma mony oketo, tutwalle ka warwatte ki lumony ma gumer.  Ento i kare ducu onongo walego dok wawinyo ka cwinywa pye mot ka guye ni wakati. Ki cwercwiny madit, i mwaka 1973 kimiyo rukca ni jo ducu ma pe gubedo anywali me Uganda gua woko.

I nge meno dok kicwalowa ka tic i kabedo mukene, i lobo Côte d’Ivoire, Tung Kupoto Ceng me Afrika. Man dok okelo alokaloka madit i kwowa. Onongo mitte ni wapwony tekwaro manyen, wacak loko leb French doki, dok wapwonnye me kwo kacel ki lumiconari manyen! Kadi bed kit meno, waneno tira pa Jehovah pien jo mamwol gujolo kwena maber oyotoyot. Waneno kit ma keto genwa i kom Jehovah okonyo me tiro yowa oweko obedo atir.

Ki cwercwiny madit, kinongo ni Barbara tye ki two kanca. Wabedo ka dok cen i Ulaya tyen mapol ka nongo kony me ot yat, ento i mwaka 1983 onen ka maleng ni pe dong watwero medde ki ticwa i Afrika. Man oturo cwinywa adada!

Two kanca pa Barbara omedde matek i kare ma watye ka tic i Betel me London, ci lacen kwone orweny woko. Lubetel gukonya adada i kare meno. Tutwalle luot mo acel gukonya me jolo alokaloka ki me medde ki keto genna i kom Jehovah. Lacen, arwatte ki lamego mo ma onongo wire ka tic i Betel dok onongo con otiyo macalo painia keken. En onongo maro Jehovah matek. Anyomo lamego-ni ma nyinge Ann i mwaka 1989, dok watye ka tic i Betel me London cakke i kare meno.

Cakke i mwaka 1995 me o 2018, abedo ki mot me tic macalo lacungo pi gang kal madit (yam kilwongo ni laneno me jon), dok alimo lobe 60 mapatpat. I lobo acel acel, aneno ni Jehovah gwoko jone kadi bed gin ango otimme i komgi.

I mwaka 2017 wadok cen ka limo Afrika. Abedo ki yomcwiny madit me nyuto ki Ann lobo Burundi dok wan ducu wabedo ki ur me neno kit ma wel Lucaden omedde kwede! I dye gudi ma yam atito iye kwena i ot ki ot i mwaka 1964, kombeddi dong tye ki gang pa Lubetel ma gitiyo pi lutit kwena makato 15,500 i lobo man.

Abedo ki yomcwiny madit adada i kare ma kimina nying kabedo ma abilimogi i mwaka 2018. I kin lobe magi, onongo tye iye Côte d’Ivoire. I kare ma wao i Abidjan, ma en aye boma madit loyo, awinyo calo ao gang. I kare ma aneno nying omege ma gitiyo i Betel, anongo ni omego ma bedo i rum macok ki rum pa wele ma watye ka bedo iye-ni nyinge Sossou. Wiya opo ni en onongo yam otiyo macalo laelda i kare ma atye i Abidjan. Ento man kara onongo pe en. Man onongo Sossou mukene​—wode.

Jehovah ogwoko cikkene. Pekki mapol ma akato ki iye-ni opwonya ni ka wageno Jehovah, en biweko yowa bedo atir. Kombeddi dong wamito medde ki lubo yo ma bimedde ki ryeny maleng nio ka oterowa i lobo manyen.​—Car. 4:18.