ANYIRA aryo mo onongo gitye ka wot kacel i boma me Baguio City, i lobo Philippines. Anyira magi guneno lalor bukke i dye lwak, ento pe gucito macok kwede. Laminwa mo ma nyinge Helen, ma onongo ocung i nget lalor bukke man, obwunyo kwedgi matek. Anyira magi gumedde ki wotgi, ento bwunyo pa Helen oyomo cwinygi adada.

Lacen i kare ma gitye ka dok cen gang kun gitiyo ki bac, guneno lanyut madit me jw.org ma kiketo i kor Ot me Ker. Wigi opo ni lanyut ma tye i kor Ot me Ker-ri rom aroma ki ma guneno i kom lalor bukke con-ni. Anyira aryo-ni gujuko bac ci gukato woko ka neno cawa me cokke ma kicoyo i kom dog gate me Ot me Ker man.

Anyira aryo magi lacen gubino i cokke. Gubedo ki ur madit adada i kare ma guneno Helen i cawa ma gudonyo i Ot me Ker! Cutcut, gin guniang i kome ni en aye lamego ma obwunyo kwedgi-ni. Helen otito ni, “I kare ma gubino bota, lworo omaka manok. Atamo ni gwok atimo gin mo marac.” Ento anyira aryo-ni gutito ki Helen ni onongo gunene kong con i nget lalor bukke.

Anyira-ni gunongo mit pa cokke dok gubedo agonya i kin omege ki lumege. I kare ma guneno jo mukene tye ka tic me gwoko lengo i nge cokke, gin bene gulego ka gitwero miyo kony. Nyako acel i kare-ni dong pe bedo i lobo Philippines, ento nyako mukene-ni ocako bino i cokke dok ocako kwano Baibul​—man ducu otimme macalo adwogi me bwunyo!