1. Ka en tye ka moko tamme i kom anga ma myero enyomme kwede, lapeny mene ma lamego ma wiye nono twero pennye kwede?

LUKRICITAYO ducu gitye i te twero pa Yecu, ma en aye laloc ma pe ki roc. Ento ka dako ma Lakricitayo onyomme, en bedo i te twero pa laco ma tye ki roc. Ento man twero kelo ariya. Pi meno ka en mito nyomme ki omego mo, bedo ber ka opennye ni: ‘Ngo ma nyuto ni omego-ni twero bedo lawi ot maber? Tika woro Jehovah obedo gin ma pire tek loyo i kwone? Ka pe, ci ngo ma weko atamo ni en bibedo ngat ma twero konya me gwoko wat maber ki Jehovah ka dong wanyomme?’ Ngene kene ni, lamego-ni bene myero opennye ni: ‘Kit mene mabeco ma atye kwede ma twero konyo nyomwa? Tika adiyo cwinya dok cinga yot? Tika atye ki wat matek ki Jehovah?’ (Latit. 4:9, 12) Ka dako omoko tam mabeco ma peya onyomme, man twero konye me gwoko nyomme maber kun bedo ki yomcwiny.

2. I pwony man wabinyamo gin ango?

² Lumegiwa milion mapol me kacokke giweko lanen maber ki mine i te twero pa coggi. Omyero kipwogi adada! Watye ki yomcwiny madit me woro Jehovah kacel ki mon ma lugen magi! I pwony man, wabinongo lagam pi lapeny adek magi: (1) Ariya ango ma mon ma gunyomme gikemme kwede? (2) Tyen lok ango ma weko dako yero me bedo lawiny bot cware? (3) Ngo ma co ki mon ma Lukricitayo gitwero pwonyo i kom bedo lawiny ki woro twero ki i lanen pa Yecu, Abigail, ki dong Maliam min Yecu?

3. Pingo jo munyomme ducu gibedo ki peko i nyomgi?

³ Nyom obedo mic ma roc mo pe iye mua ki bot Lubanga, ento dano ducu gitye ki roc. (1 Jon 1:8) Meno aye  tyen lok mumiyo Lok pa Lubanga ociko jo munyomme ni gibikemme ki ariya i nyomgi, ma kilwongo ni “ayelayela me kwo me lobo man.” (1 Kor. 7:28) Kong wanyamu ariya mogo ma mon ma gunyomme gitwero kemme kwede.

4. Pingo dako twero winyo calo bedo i te twero pa cware dwoko rwomme piny?

⁴ I kare mukene, kit ma dako odongo kwede twero weko en winyo calo mine i te twero pa cware dwoko rwomme piny. Laminwa ma nyinge Marisol ma bedo i lobo Amerika owaco ni, “Ka ma adongo iye, onongo kare ducu kiwaco ki mon ni omyero gubed rom ki co i jami ducu. Angeyo ni Jehovah omiyo twero ki co dok omoko ni mon gubed luwiny bot coggi, kun mon bene myero kiminigi woro. Ento pe yot me woro twero pa cwara pien jo me lobo giwaco ni pe oporre me timo meno.”

5. Kodi tam maraco ango ma co mukene gitye kwede i kom mon?

⁵ Ki tungcel, twero bedo ni dako onyomme ki laco ma tamo ni mon rwomgi lapiny ka kiporogi ki co. Laminwa ma nyinge Ivon ma bedo i Amerika ma Tung Kupiny owaco ni, “I kabedowa, co aye gikwongo cam ka dong mon camo lacen. Anyira matino myero gubed ka tedo ki gwoko lengo, ento awobe gibedo mot kun megigi ki lumegigi aye tiyo pigi, dok kilwongogi ni ‘rwodi me gang.’” Laminwa mo ma bedo i lobo Acia owaco ni: “I lebwa, watye ki carolok mo ma tyen lokke ni mon myero pe gubed ryek nyo gubed ki diro mo. Ticgi obedo mere tic ma gang, ento pe kiye ni gumi tam mo keken bot coggi.” Laco ma pe nyuto mar dok pe lubo gin ma Baibul waco weko kwo bedo tek pi dakone, pe lubo lanen pa Yecu, dok cwero cwiny Jehovah.​—Ep. 5:28, 29; 1 Pet. 3:7.

6. Gin ango ma mon myero gutim me jingo watgi ki Jehovah?

⁶ Kit ma kitito kwede i pwony mukato-ni, Jehovah mito ni laco ma Lakricitayo omi jami me kom ma mitte pi jo me ode dok okonygi me medde ki woro Jehovah. (1 Tem. 5:8) Ento, lumege ma gunyomme bene myero gukwany kare nino ducu me kwano ki lwodo Lok pa Lubanga, ki me lega bot Jehovah ki cwinygi ducu. Man pe twero bedo yot. Mon odi tye ki tic mapol, dong gitwero winyo calo pe gitye ki cawa nyo kero me timo jami magi, ento pire tek adada ni gutim. Pingo? Pien Jehovah mito ni wan ducu ki acel acel myero wadong dok wagwok wat maber kwede.​—Tic 17:27.

7. Ngo ma twero weko bedo yot bot dako me cobo tic ma Jehovah omine?

⁷ Pi tyen lok magi ducu, twero mitte ni dako oti matek me bedo i te twero pa cware ma tye ki roc. Ento, twero bedo yot pi dako me cobo tic ma Jehovah omine ka en oniang dok oye tyen lok ma Baibul miyo me bedo lawiny bot cware.

8. Kit ma kinyuto kwede i Jo Epeco 5:22-24, pingo dako ma Lakricitayo yero me bedo i te twero pa cware?

⁸ Dako ma Lakricitayo yero me bedo i te twero pa cware pien meno aye gin ma Jehovah mito ki bote. (Kwan Jo Epeco 5:22-24.) En geno Wonne me polo, pien en ngeyo ni Jehovah mare dok pe twero penye me timo gin mo ka pe ber pire.​—Nwo. 6:24; 1 Jon 5:3.

9. Ngo ma timme ka dako ma Lakricitayo woro twero pa cware?

 ⁹ I lobo-ni, kicuko cwiny mon me cayo rwom pa Jehovah ki me neno mine i te twero calo gin ma dwoko rwomgi piny. Ngene kene ni, jo ma gicwako tam magi pe gingeyo Lubangawa ma lamar-ri. Jehovah pe twero miyo ki anyirane ma en maro cik ma dwoko rwomgi piny. Lamego ma tute matek me cobo tic ma Jehovah omine konyo jo me ode me bedo ki kuc. (Jab. 119:165) Cware nongo adwogi maber, lutinone nongo adwogi maber, ki en bene nongo adwogi maber.

10. Pwony ango ma wanongo ki i lok pa laminwa Carol?

¹⁰ Dako ma mine i te twero pa cware ma tye ki roc-ci, nyuto ni emaro dok eworo Jehovah, ngat ma omiyo twero bot co. Laminwa ma nyinge Carol ma bedo i Amerika ma Tung Kupiny owaco ni, “Angeyo ni cwara twero timo bal i kare mogo. Dok angeyo ni kit ma atere kwede ka en otimo bal meno nyuto kit ma atero kwede watta ki Jehovah. Dong atute me medde ki bedo lawiny bote pien amito yomo cwiny Wora ma i polo.”

11. Ngo ma konyo laminwa ma nyinge Aneese me timo kica ki cware, dok ngo ma watwero pwonyo ki i lokke?

¹¹ Pe twero bedo yot ki dako me woro cware ka en tamo ni cware pe paro kit ma en winyo kwede. Ento nen kong kit ma laminwa ma nyinge Aneese dok kwede iye ka gin ma kit meno otimme. En owaco ni: “Atemme pe me mako lok meno i cwinya. Angeyo ni wan ducu watimo bal i kare mogo. Mitina tye me timo kica kare ducu, kit ma Jehovah timo kwede. Ka atimo kica, abedo ki wic ma opye mot.” (Jab. 86:5) Dako ma maro timo kica pol kare nongo ni mine i te twero pa cware doko yot.

12. Labol mene ma tye i Baibul?

¹² Jo mogo gitamo ni ngat ma mine i te twero nongo obedo ngat ma goro. Ento meno pe tye lok ada. Baibul tye ki labol mapol pa jo ma gumine i te twero ento  onongo gubedo jo ma gitye ki tekcwiny adada. Nen kong ngo ma watwero pwonyo ki bot Yecu, Abigail ki Maliam.

13. Pingo Yecu mine i te twero pa Jehovah? Tit kong.

¹³ Yecu mine i te twero pa Jehovah, ento pe ni pien en laming nyo pe kwiri. Kit ma en obedo ka pwonyo kwede dano i yo ma niang iye yot nyuto ni en ryek adada. (Jon 7:45, 46) Jehovah onongo ngeyo ni Yecu kwiri dok oye ni Yecu oti kacel kwede i kare ma En ocweyo jami ducu i polo ki lobo. (Car. 8:30; Ibru 1:2-4) Dok i kare ma Jehovah ocero Yecu, en omine “twero ducu ma i wi polo ki i lobo.” (Mat. 28:18) Kadi bed Yecu tye ladiro adada, ento en pud jenge i kom tira pa Jehovah. Pingo? Pien en maro Wonne.​—Jon 14:31.

14. Pwony ango ma co gitwero nongo ki i (a) kit ma Jehovah neno kwede ki mon? (b) tam ma kicoyo i Carolok cura 31?

¹⁴ Pwony ma co twero nongo. Jehovah pe oyubo ni dako obed i te twero pa cware pien En neno mon calo rwomgi lapiny ka kiporogi ki co. Jehovah kikome onyuto man ka maleng ki yero mon kacel ki co me bedo luloc ki Yecu i polo. (Gal. 3:26-29) Jehovah onyuto genne i kom Wode ki mine twero. I yo acel-lu, laco maryek bene nyuto genne i kom dakone ki mine twero. Baibul tito jami mapatpat ma dako makwiri twero timone. Me labolle, en neno ni tic ma gang ducu woto kore ki kore, wilo dok cato ngom, dok timo bene biacara. (Kwan Carolok 31:15, 16, 18.) En pe tye calo opii ma pe ki twero me miyo tamme bot cware. Me ka meno, cware genne dok winyo tamme. (Kwan Carolok 31:11, 26, 27.) Ka laco miyo dakone woro ma kit meno, ci dakone bene bedo ki yomcwiny me mine i te twerone.

15. Ngo ma mon twero pwonyo ki i lanen pa Yecu?

¹⁵ Pwony ma mon twero nongo. Kadi bed Yecu ocobo tic madongo, en pe winyo calo mine i te twero pa Jehovah dwoko rwomme piny. (1 Kor. 15:28; Pil. 2:5, 6) I yo acel-lu, dako makwiri ma lubo lanen pa Yecu pe biwinyo calo mine i te twero pa cware dwoko rwomme piny. En bikonyo cware pe ni pien en maro cware keken ento tutwalle pien en maro dok woro Jehovah.

16. Ma lubbe ki 1 Camuel 25:3, 23-28, ariya ango ma Abigail owok ki iye? (Nen cal ma tye i pok ngeye.)

¹⁶ Abigail onongo cware obedo laco ma nyinge Nabal. Nabal obedo laco ma laworo, lawakke, dok pe ki pwoc. Kadi bed kit meno, Abigail pe oyenyo yo mayot me giko nyomme. Ka onongo Abigail mito giko nyomme, en onongo twero weko Daudi ki lumonye gineko cware woko. Ento en pe otimo meno. Me ka meno, en otimo gin ma etwero me gwoko Nabal kacel ki jo ducu ma i otgi. Go kong tekcwiny ma Abigail onyuto me cung i nyim lumony 400 ma gitye ki jami lweny kun loko ki Daudi ki woro matut. En bene obedo atera me ye bal pa cware. (Kwan 1 Camuel 25:3, 23-28.) Daudi oye cutcut ni Jehovah otiyo ki dako ma cwinye tek-ki me mine tira ki dok jukke ki timo bal madit adada.

17. Ngo ma co twero pwonyo ki i lok ma kicoyo i kom Daudi ki Abigail?

¹⁷ Pwony ma co twero nongo. Abigail onongo obedo dako maryek. Daudi onyuto ryeko ki ye tamme. Macalo adwogine, en pe oneko jo ma gipe ki bal mo. I yo acel-lu, laco maryek kong  bilwodo tam pa dakone, ma peya omoko tam mo ma pire tek. Twero bedo ni tam pa dakone bikonye pe me moko tam marac.

18. Ngo ma mon twero pwonyo ki i lanen pa Abigail?

¹⁸ Pwony ma mon twero nongo. Dako ma maro dok woro Jehovah twero kelo adwogi maber bot jo me ode, kadi bed cware pe woro Jehovah nyo kwo ma lubbe ki cikke. En pe biyenyo yo mo ma Baibul pe cwako me giko nyomme. Me ka meno, ka en wor dok mine i te twero, ci man twero tugo cwiny cware me pwonyo lok i kom Jehovah. (1 Pet. 3:1, 2) Ento kadi bed cware pe oye tic pi Jehovah, cwiny Jehovah bibedo yom me neno ni dako-ni mine i te twero pa cware dok obedo lagen bot Jehovah.

19. Gin ango ma twero weko dako kwero winyo cware woko?

¹⁹ Ento, dako ma Lakricitayo pe bicwako cware ka cware owacce ni otim gin mo ma turo cik me Baibul. Me labolle, go kong ni cwar laminwa mo ma pe tye Lacaden owacce ni olok lok goba, okwal kwo, nyo odony i tim mo ma turo cik me Baibul. Lukricitayo ducu, kadiwa lumege ma gunyomme, myero gubed luwiny bot Lubanga Jehovah mukwongo. Ka cwar laminwa mo owacce ni otur cik me Baibul, en myero okwer woko kun tite ki mwolo pingo pe etwero timo gin meno.​—Tic 5:29.

20. Wangeyo nining ni Maliam onongo tye ki wat macok adada ki Jehovah?

²⁰ Maliam onongo tye ki wat macok ki Jehovah. En onongo ngeyo Ginacoya maber adada. I kare mo ma en obedo ka lok ki Elicabet min Jon Labatija, Maliam otiyo ki lok ma nonge i Ginacoya me leb Ibru tyen makato 20 kulu. (Luka 1:46-55) Dok tam kong i kom lok man: Kadi bed Maliam onongo ocikke me nyomme ki Yucepu, ento lamalaika pa Jehovah pe kong oloko ki Yucepu. Lamalaika-ni okwongo lok ki Maliam, kun tite ni en binywalo Wod pa Lubanga. (Luka 1:26-33) Jehovah onongo ngeyo Maliam maber dok onongo  tye ki gen ni en bimaro dok bigwoko Wode maber. Dok labongo akalakala mo, Maliam omedde ki bedo ki wat macok ki Jehovah kadiwa i kare ma Yecu oto ci kicere me dok cen i polo.​—Tic 1:14.

21. Ngo ma co twero pwonyo ki i gin ma Baibul waco i kom Maliam?

²¹ Pwony ma co twero nongo. Laco maryek bedo ki yomcwiny ka dakone ngeyo Ginacoya maber. Nyeko pe make i kom dakone kun tamo ni dakone tye ka kette me bedo lawi ot. En niang ni ka dakone ngeyo cik ma igi lac me Baibul maber, ci en twero konyo jo me ode matek. Ngene kene ni, kadi bed dako okwano i rwom ma lamal loyo cware, ento laco aye myero otel woro pi jo me ot kacel ki jami mukene ma kubbe ki worowa.​—Ep. 6:4.

22. Pwony ango ma mon twero nongo ki bot Maliam?

²² Pwony ma mon twero nongo. Kadi bed dako ngeyo ni cware aye myero otel wigi ka odok i kom woro Jehovah, ento dako myero oti matek me gwoko niyene pire kene. (Gal. 6:5) Pi meno, en myero okwany kare me kwan pire kene ki lwodo lok. Man bikonye me gwoko marre ki worone pi Jehovah ki dong me nongo yomcwiny i mine i te twero pa cware.

23. I yo ma nining ma mon ma gimine i te twero ginongo mot dok gikelo adwogi maber bot lupacogi ki jo me kacokke?

²³ Mon ma gimine i te twero pa coggi pien gimaro Jehovah ginongo yomcwiny madwong loyo mon ma gikwero lubo yub me tela ma Jehovah oketo. Gin bene giweko lanen maber pi awobe ki anyira. Dok gikonyo me dongo mar ki kuc pe i pacigi keken ento i kacokke bene. (Tito 2:3-5) I kare-ni, pol pa jo ma gitiyo pi Jehovah gubedo mon. (Jab. 68:11) Wan ducu, kadi wabedo co nyo mon, watye ki tic ma pire tek adada i kacokke. Pwony ma lubo man binyamo kit ma ngat acel acel i kinwa twero cobo kwede tic man.