LUCO Baibul i kare mogo gunwoyo lok mogo nyig lok ki nyig lok. Nen kong tyen lok adek ma twero bedo ni oweko luco Baibul gutimo meno:

Kare ma kicoyo iye lok meno. I lobo Icrael macon, pol pa dano onongo pe gitye ki kopi me Cik ma meggi. Pol kare onongo giwinyo ka kikwano Cik ka gugure kacel i ot pa Lubanga. (Nwo. 31:​10-12) Nen calo onongo tye jami mapol ma twero wiro tamgi i cawa ma kitye ka kwano Cik pien onongo gicung pi cawa malac i kin lwak mapol ma gugure. (Nek. 8:​2, 3, 7) I kare ma kit meno, nwoyo nyig lok ma pigi tego onongo twero weko bedo yot ki dano me po i kom ginacoya ma kikwano kacel ki ketone i tic. Nwoyo nyig lok mogo onongo twero konyogi me po i kom cik matinotino ma Jehovah ominigi.—Levi 18:​4-22; Nwo. 5:1.

Kit ma kicoyo kwede. Bute mogo me Baibul kicoyogi macalo wer, me labolle, bukke me Jabuli, Wer pa Solomon, ki Koko. I kare mogo, wer onongo bedo ki nyig lok ma kinwoyo. Meno onongo weko wi lok me wer meno cung woko ka maleng dok konyo luwer wek wigi opo i kom lok magi. Me labolle, nen kong lok ma nonge i Jabuli 115:​9-11: “Wun jo Icrael, wugen Rwot [Jehovah]! En aye ma konyowu dok gwokowu. Wun jo me ot pa Aron bene wugen Rwot! En aye ma konyowu dok gwokowu. Wun jo ma wulworo Rwot, wugen Rwot! En aye ma konyowu dok gwokowu.” Nwoyo lok magi onongo twero konyo luwer me gwoko ada meno i tamgi ki cwinygi.

Tyen lok mumiyo kicoyo. Luco Baibul onongo i kare mukene ginwoyo lok ma pigi tek. Me labolle, i kare ma Jehovah ociko Luicrael pe me camo remo, en oweko Moses onwoyo lok meno tyen mapol. Lubanga onongo mito nwoyo ni kwo pa gin ma kwo ducu tye i remo, nyo ni, remo cung pi kwo. (Levi 17:​11, 14) Lacen, i kare ma lukwena ki ludongo ma i Jerucalem gucoyo bot Lukricitayo i kom gin ma myero gukwer wek guyom cwiny Jehovah, dok gunwoyo ni mitte ni wakwer tic ki remo.—Tic 15:​20, 29.

Kadi bed Baibul nwoyo lok mogo, man pe te lok ni Jehovah mito ni walok odok kitwa me nwoyo nyig lok me Baibul. Me labolle, Yecu owaco ni: “Ka wutye ka lega, pe wubed ka nwoyo lok acel-li teretere.” (Mat. 6:​7, NWT) I nge meno, en otitiwa jami ma omyero waleg pire ma rwatte ki miti pa Lubanga. (Mat. 6:​9-13) Dong kadi bed wagwokke ki nwoyo nyig lok ma wamako i wiwa teretere, ento watye agonya me lega pi gin moni tyen mapol.—Mat. 7:​7-11.

Dong pi tyen lok ma atir, Lok pa Lubanga nwoyo nyig lok mogo. Meno obedo yo acel ma Lapwonywa pwonyowa kwede wek wanong adwogi maber.—Ic. 48:​17, 18.